Ambeti ndali ti Mbeti ti bungbi: Kusala ti e nga na gigi ti e
Yenga ti 1-7 mars
ANZONI YE SO AYEKE NA YÂ TI BIBLE | NOMBRE 7–8
“Aye so e manda na lege ti camp ti azo ti Israël”
it-1 l. 508 par. 5
Congrégation
Na Israël, fani mingi azo so azo ayeke na confiance na ala la ayeke sara kua ndali ti azo (Esd 10:14). Tongaso, na peko ti so a leke tabernacle, “amokonzi ti amara ni” la ayeke ga lani na asandaga (Nb 7:1-11). Nga, na ngoi ti Néhémie, a yeke aprêtre, azo ti mara ti Lévi nga na ‘amokonzi ti azo ni’ la ayeke kpo nzoroko na iri ti azo ti ala ti yeda na yanga so a mû si ‘a sû tënë ni na mbeti.’ (Né 9:38–10:27). Na ngoi so azo ti Israël ayeke lani na benyama, azo 250 so ‘ayeke mû li ni na yâ ti congrégation nga so iri ti ala awu mingi’ abungbi oko na Coré, Dathan, Abiram nga na On ti londo ti ke Moïse na Aaron (Nb 16:1-3). Moïse asara ye alingbi na fango lege ti Nzapa, lo soro akoli 70 na popo ti a-ancien ti Israël so ayeke amokonzi ti “yô kungba” ti azo ni so lo lingbi ti yô ni lo oko ape (Nb 11:16, 17, 24, 25). Lévitique 4:15 atene “a-ancien ni”, na bango ni azo so ayeke sara kua lani na iri ti azo ni ayeke a-ancien ti mara ni, amokonzi ni, ajuge ni nga na akota zo ti kodro ni.—Nb 1:4, 16; Jos 23:2; 24:1.
it-2 l. 835 par. 9
Ruben
Na yâ ti camp ti azo ti Israël, azo ti mara ti Ruben nga na amolenge ti mara ti Siméon na ti Gad ayeke lani na mbage ti sud ti tabernacle. Na ngoi so ala yeke hon, groupe ti amara ota so, so Ruben amû li ni dä ayeke ga na peko ti groupe ti amara ota ti Juda, ti Issacar nga na ti Zabulon (Nb 2:10-16; 10:14-20). A yeke nga na lege ti molongo so la amara ni amû lani asandaga ti ala na lango ti mungo tabernacle na Nzapa.—Nb 7:1, 2, 10-47.
Akota tënë ti buku ti Nombre
8:25, 26. Ti hinga nzoni so gi akoli so ayeke biazo la asala kusala ti Lévite, nga ti fa so a bi bê na ndo ti ala so ngu ti ala ahon mingi, a hunda na ala so aga mbakoro awe ti zi tele ti ala na yâ kusala ti Lévite. Ye oko, na bê ti ala kue, ala lingbi ti yeda ti mû maboko na ambeni mba ti ala aLévite. Atâa so retraite ayeke laso pëpe na yâ kusala ti fango tënë ti Royaume, kpengba-ndia so afa na e mbeni ye ti manda so ngele ni ayeke kota mingi. Tongana a yeke ngbanga ti so ngu ti mbeni koli Chrétien ahon mingi si lo lingbi pëpe ti sala ye alingbi na ambeni kungba so a mû na lo, lo lingbi peut-être ti bi tele ti lo na yâ ti mbeni mara ti kusala so alingbi na ngangu ti lo.
Gi anzoni ye so ayeke na yâ ti Bible
it-2 l. 637
Kozo molenge
So akozo molenge ti azo ti Israël la ayeke mû li ni na ndö ti azo ti sewa nde nde, ala yeke sara lani kua na iri ti mara ni kue. Kozoni kue, Jéhovah atene mara ni kue ayeke ‘kozo molenge ti lo ti koli’, lo ga lani kozo molenge ti lo na lege ti mbele ti Abraham (Ex 4:22). Ti bata akozo molenge ni na fini, Jéhovah amû yanga ti tene a ‘zia nde ndali ti lo akozo molenge ti koli oko oko kue. Akozo molenge ti koli kue so azo na anyama adü ayeke ti lo’. (Ex 13:2). Tongaso, a mû lani akozo molenge ti koli na Nzapa.
Yenga ti 8-14 mars
ANZONI YE SO AYEKE NA YÂ TI BIBLE | NOMBRE 9–10
“Jéhovah ayeke fa lege na azo ti lo tongana nyen?”
it-1 l. 386 par. 5
Camp
Hongo ti gbâ ti azo ti Israël na yâ ti camp so ti gue na ando nde nde ayeke lani mbeni ye so afa so a leke yâ ti ala na mbeni lege so ahon gbungo li ti zo. (Na Nombre chapitre 33 Moïse asara tënë ti ando so azo ti Israël asara camp dä 40 tongaso.) Na ngoi kue so mbinda ni angbâ na ndö ti tabernacle ni, azo ti camp ni ayeke ngbâ place oko. Tongana mbinda ni ahon, azo ti camp ni nga ayeke hon. “Tongana Jéhovah amû yanga na ala ti luti, azo ti Israël ayeke luti. Tongana Jéhovah amû yanga na ala ti hon, ala yeke hon.” (Nb 9:15-23). A yeke hûru atrompette use ti argent so a leke ni na marteau ti sara tënë ti ayanga so Jéhovah amû so na azo ti camp ni kue (Nb 10:2, 5, 6). Fason so trompette ni ayeke toto na ni la ayeke fa na azo ti camp ni ti londo ti hon. Ye so asi ti kozoni “na use ngu ni [1512 K.N.E], na lango 20 ti use nze ni.” Na hongo ni, sanduku ti mbele ni ayeke na devant, na pekoni a yeke wara groupe ti amara ota so Juda amû li ni dä na azo ti mara ti Issacar aga na peko ti ala, na pekoni azo ti Zabulon. Na peko ti ala a yeke wara amolenge ti Guershon na amolenge ti Mérari so ayô aye ti tabernacle so a zi yâ ni, so a mû na ala ti yô. Na pekoni a yeke wara agroupe ti amara ota so Ruben amû li ni dä, na pekoni azo ti mara ti Siméon na ti Gad. Na peko ti ala, amolenge ti Kohath so ayô agbakuru ti ndo so ayeke nzoni-kue, na pekoni groupe ti amara ota, ti Éphraïm, ti Manassé na ti Benjamin. Na nda ni, groupe ti amara ota, ala na aturugu ti ala, so Dan la si amû li ni dä nga Aser na Nephtali. Tongaso, agroupe use ti amara so azo ayeke dä gbani nga so ayeke ngangu mingi ayeke na devant ti camp ni nga na pekoni tongana aturugu.—Nb 10:11-28.
w11 15/4 l. 4-5
Mo bâ polele aye so afa so Nzapa ayeke fa lege na e?
Tongana nyen la e lingbi ti fa so e bâ fango lege ti Nzapa na nene ni? Bazengele Paul atene: “Ala mä yanga ti ala so ayeke mû li ni na popo ti ala na ala woko terê ti ala na gbe ti ala.” (aHéb. 13:17). Ti sara ni alingbi ti duti kete ye ape. Na tapande: Zia terê ti mo na place ti mbeni zo ti Israël ti ngoi ti Moïse. Tara ti bâ so na peko ti so mo tambela teti mbeni ngoi, mbinda ni aluti. Mbinda ni ayeke luti ande ngoi oke? Lango oko? Yenga oko? Anze mingi? Mo yeke hunda terê ti mo, mo tene: ‘A yeke kota ye ti tene mbi zi yâ ti akugba ti mbi kue?’ Kozoni, peut-être mo yeke mû gï ati so mo yeke tâ na bezoin ni. Me, na peko ti ambeni lango, gingo aye ni so afatigué mo, mo komanse ti zi yâ ti akugba ni kue. Me gï so mo hunzi ti zi yâ ti akungba ni, mo bâ so mbinda ni alondo, na mo doit ti kiri ti kanga akugba ni encore. A yeke kete ye ape nga a yeke nzere na mo ape. Me azo ti Israël adoit lani ti “londo nga ti hon”.—Nb 9:17-22.
E yeke sara ye tongana nyen na ngoi so e wara fango lege ti Nzapa? Eskê e yeke yeda ti “londo nga ti hon”? Wala e yeke ngbâ ti sara aye gï tongana ti so e yeke sara kozo? Eskê e yeke mû peko ti achangement so a sara, so andu fason so e yeke manda na Bible na azo, e yeke fa na tënë na azo so atene yanga ti mbeni kodro nde, e yeke voro na Nzapa na yâ ti sewa, e yeke sara kua maboko na maboko na aKomite so abâ lege ti songo na ada-nganga, nga e yeke sara ye nzoni na ngoi ti akota bungbi? E yeke fa so e bâ na nene ni fango lege ti Nzapa tongana e yeda na awango. Tongana e ye ti mû akota desizion, a lingbi e sara confiance ape na hingango ye ti e, me e bâ ndo na mbage ti Jéhovah na bungbi ti lo ti fa lege na e. Nga, gï tongana ti so mbeni kete molenge ayeke gi batango terê na mbage ti babâ na mama ti lo na ngoi ti mbeni kota pupu ti ngu-nzapa, e yeke gi batango terê na mbage ti bungbi ti Jéhovah na ngoi so e tingbi na akpale ti dunia so, so ayeke tongana ngu-nzapa so apika na bekpa.
Gi anzoni ye so ayeke na yâ ti Bible
it-1 l. 207 par. 7
Assemblée
Ndani so a yeke kota ye ti bungbi ndo oko. Matanga ti pâque so a yeke sara ni lani ngu oko oko afa so a yeke kota ye ti wara aye ti nzoni na lege ti aye so Jéhovah aleke ti bungbi azo ti lo ndo oko ti mû na ala aye na lege ti yingo. Koli kue so ayeke na sioni ye lani na terê ti lo ape wala so ague na mbeni yongoro tambela ape si ake na mbana ti sara Pâque ni, a yeke fâ lo (Nb 9:9-14). Na ngoi so Gbia Ézéchias ahunda na azo ti Juda na ti Israël ti gue na Jérusalem ti sara Matanga ti pâque, lo tene: “Azo ti Israël, ala kiri na mbage ti Jéhovah . . . Ala sara ye pëpe tongana ti akotara ti ala nga na aita ti ala so asara ye lani na lege ni pëpe na mbage ti Jéhovah Nzapa ti akotara ti ala, na lo sara si ala ga mbeni ye so amû mbeto na zo, tongana ti so ala yeke bâ so. . . . Ala woko terê ti ala na gbe ti Jéhovah nga ala gue na ndo so ayeke nzoni-kue so lo zia ni nde teti lakue lakue nga ala sara na Jéhovah Nzapa ti ala, tongaso si ngonzo so asara lo ngangu na terê ti ala akaï. . . . Jéhovah Nzapa ti ala ayeke Nzapa so ayeke bâ mawa ti zo nga lo yeke sara nzoni bê na zo. Lo yeke bi lê ti lo yongoro na ala pëpe, tongana ala kiri na mbage ti lo.” (2Ch 30:6-9). Tongana mbeni zo ake na mbana ti gue na matanga ni ayeke fa biani so lo sara sanka ti Nzapa. Atâa so aChrétien ayeke sara pëpe Matanga ti pâque nga na ambeni matanga so ague oko na ni, Paul awa ala ti zia pëpe lege ti guengo na abungbi lakue, lo tene: “Nga, zia e bi lê na ndö ti mba ti pusu mba ti duti na ndoye na ti sara anzoni kusala, e zia pëpe lege ti guengo lakue na bungbi ti e, tongana ti so ambeni zo ayeke sara ka, me e wa terê na popo ti e nga e ngbâ ti sara ni mingi ahon ti kozo, so ala bâ lango ni ayeke pusu nduru.”—aHb 10:24, 25.
Yenga ti 15-21 mars
ANZONI YE SO AYEKE NA YÂ TI BIBLE | NOMBRE 11-12
“Ngbanga ti nyen la a lingbi e kpe bibe ti demango terê?”
I Ga Pepe Azo so Aglisa Ye so Ala Mä
20 Mingi ti aChrétien atï lâ oko pepe na yâ salango pitan. Ye oko, a lingbi e sala hange si e mu pepe lege so ague na e ti mu tapande ti demango tele lakue, so a lingbi sala si Nzapa ayeda na e mbeni pepe. Paul agboto mê ti e: “A lingbi e handa Seigneur pepe, legeoko tongana ambeni ti [azo ti Israël] ahanda Lo, si angbo afâ ala. Nga i kasa ndo pepe, legeoko tongana ambeni na popo ti ala akasa ndo, si ala kui na lege ti wafutingo ye.” (1 aCorinthien 10:9, 10, NW) Azo ti Israël akasa Moïse na Aaron, biani, ala kasa même Nzapa mveni, na demango tele teti manne so Nzapa amu na lege ti ye ti kpene. (Nombre 16:41; 21:5) Kasango ndo ti ala aso bê ti Jéhovah mingi pepe ahon ye ti pitan ti ala? Mbaï so ayeke na yâ ti Bible afa so angbo afâ azo mingi so akasa ndo. (Nombre 21:6) Na mbeni ngoi so ahon awe, a futi azo ahon 14700 so ake yanga na adema tele. (Nombre 16:49) Tongaso, zia e tara pepe be-nze-pepe ti Jéhovah na yekiango pepe aye so lo leke.
E kpe kasango ndo
7 Bibe ti amolenge ti Israël achangé mingi. Tongana a zi ala lani na Egypte nga ala hon na yâ ti Kota Ngu Bengba, bê ti ala apusu ala ti he bia ti sepela Jéhovah (Exode 15:1-21). Me tongana ala bâ so ala duti nzoni pëpe na yando nga mbeto ti azo ti Canaan asara ala, bibe ti kasango ndo amû place ti bê ti kiri singila so ala yeke na ni kozo. Ahon ti kiri singila na Jéhovah teti so ala yeke na liberté, ala bi tënë na li ti Nzapa teti so ala bâ ti ala atene ye amanke ala mingi. Tongaso, demango tere ti ala ni ge afa na gigi so ala bâ na nene ni pëpe aye so Jéhovah amû na ala. A yeke ye ti dongo bê pëpe so Jéhovah atene: “Juska lâ nyen fade Mbi zia bungbi ti azo ti sioni so angbâ ti dema tere ti ala ti ke Mbi?”—Nombre 14:27; 21:5.
it-2 l. 715 par. 1
Papa
Kasango ndo. Kasango ndo ayeke decouragé zo nga ayeke woko zo. Kete na peko ti so azo ti Israël asigi na Égypte, ala komanse ti kasa Jéhovah, ala bâ so awakua ti lo, Moïse na Aaron, so lo zia ala ti fa lege na ala asara kua ti ala nzoni ape (Ex 16:2, 7). Na pekoni, demango terê ti ala ni adécouragé Moïse kue na lo hunda ti kui (Nb 11:13-15). Kasango ndo alingbi ti gue na zo so akasa ndo ni na kuâ. Jéhovah abâ so atënë so azo ni ayeke diko na terê ti Moïse ayeke sarango kpengbango-li na komandema ti lo la (Nb 14:26-30). Ala mingi awara kuâ ndali ti kasango ndo.
Gi anzoni ye so ayeke na yâ ti Bible
it-2 l. 207 par. 2-8
Manne
A yeke tongana nyen? Manne ayeke “vuru vuru tongana lê ti coriandre” nga “akpa” delium, mbeni ye so ayeke clair clair tongana cire nga ayeke na forme ti perle. Goût ni ayeke tongana ti “akpangbala gâteau so a sara ni na mafuta ti otoro” nga tongana “mapa so a sara na mafuta.” Na peko ti so a neka manne ni na tênë ti nekango na ye wala a pika ni na kpu a yeke kporo ni na ngu wala a zö ni na four tongana gateau.—Ex 16:23, 31; Nb 11:7, 8.
Yenga ti 22-28 mars
ANZONI YE SO AYEKE NA YÂ TI BIBLE | NOMBRE 13-14
“Tongana nyen la mabe asara si e sara ye na mbeto ape”
Mabe na kpengo mbeto ti Nzapa atomba mbeto
5 Ye oko, awakala use, Josué na Caleb, aye ti ala ti lï na Sese ti Zendo ni. Ala tene so azo ti Canaan ayeke “kobe teti e, teti ye ti bata ala ayeke mbeni pëpe, me L’Eternel ayeke na e; i kpe mbeto ti ala pëpe.” (Nombre 14:9). Josué na Caleb ayeke na raison ti tene atënë so? Biani ala yeke na ni. Legeoko na tanga ti mara ni, ala bâ tongana nyen Jéhovah azia kamene na lê ti Egypte na anzapa ti lo na lege ti aye ti ngangu bale-oko. Na pekoni, ala bâ tongana nyen Jéhovah afuti Pharaon na aturugu ti lo na yâ Ngu Bengba (Psaume 136:15). A yeke polele so mbeto ti awakala bale-oko so nga na ti azo so ayeda na ala ayeke ye so alingbi na pardon pëpe. Jéhovah afa vundu ti lo, lo tene: “Lawa si fade azo so azia ti ke Mbi? na lâ nyen si fade ala mä na bê na Mbi, tënë ti fä kue so Mbi sara na popo ti ala?”—Nombre 14:11.
6 Jéhovah afa tâ gunda ti kpale ni: mbeto so asara ala afa so ala yeke na mabe pëpe. Biani, mabe na sarango ye na mbeto pëpe ague tâ gi oko, ni la bazengele Jean asû tënë so na ndo kongregation ti aChrétien nga na bira ti ala na lege ti yingo: “Ye so ahon sese so na ngangu ayeke mabe ti e.” (1 Jean 5:4). Laso, aTémoin ti Jéhovah kutu omene na ndo ni ayeke fa mabe tongana ti Josué na Caleb na lege ti fango nzo tënë ti Royaume na ndo sese kue; na popo ti aTémoin so mo yeke wara amaseka na ambakoro, ala so akpengba na ala so ayeke na ngangu mingi pëpe. Ala yeke mbeni ngangu bungbi ti azo so ayeke na mbeto pëpe, na mbeni wato alingbi ti kanga yanga ti ala pëpe.—aRomain 8:31.
Gi anzoni ye so ayeke na yâ ti Bible
it-1 l. 740
Kodro so Nzapa amû na azo ti Israël
KODRO so Nzapa amû lani na azo ti Israël ayeke biani mbeni pendere kodro. Na ngoi so Moïse a tokua azo ti mbembe Sese ti Zendo nga ti ga na ambeni lê ti keke so ayeke kâ, ala ga na alê ti keke ti figue nga na ti grenade nga na mbeni kota maboko ti vigne so li ti vigne ni ayeke dä so akoli use ayô ni na ndö ti mbeni yongoro keke. Atâa so mbeto asara ala na kiringo ti ala ndali ti so mabe amanke ala, ala tene: “Lait na mafuta ti otoro asi singo” na yâ ti kodro ni.—Nb 13:23, 27.
Yenga ti 29 mars–4 avril
ANZONI YE SO AYEKE NA YÂ TI BIBLE | NOMBRE 15-16
“Hange na baba nga sara confiance na mo ahon ndö ni ape”
Jéhovah ahinga mo?
12 Me na ngoi so azo ti Israël ayeke na lege ti gue na Sese ti Zendo, Koré apensé ti lo so mbeni ye asava pëpe na yâ ti ye so Jéhovah aleke ti fa lege na mara ni. Lo ye ti ga na changement. Tongaso ambeni koli 250 amû peko ti Koré. Ala pensé ti ala biani so ala yeke na nzoni songo na Jéhovah. Ala tene na Moïse atene: “A lingbi awe! azo oko oko kue ti bungbi ni ayeke nzoni-kue, na L’Éternel ayeke na popo ti ala.” (Nom. 16:1-3). So ayeke sarango ye na baba la. Ala pensé so lege so ala sara na aye la ayeke nzoni mingi. Moïse atene na ala atene: “Kekereke na ndapre Jéhovah ayeke fa zo wa la ayeke ti lo, zo wa la ayeke nzoni-kue, zo wa la alingbi ti ga nduru na Nzapa. Zo so Nzapa asoro lo, fade zo ni aga nduru na Nzapa.” (Nom. 16:5, FD). Na hunzingo ti lango so aga na pekoni, Koré nga na azo kue so amû peko ti lo akui.—Nom. 16:31-35.
Jéhovah ahinga mo?
11 Tongana a ndu tënë ti bango na nene ni aye so Jéhovah aleke nga na adesizion ti lo, Moïse na Koré ayeke azo so ayeke nde na mba mingi. Sarango ye ti ala asara ye na ndo ti lege so Jéhovah abâ na ala. Koré ayeke lani mbeni zo ti Kehath ti mara ti Lévi. Peut-être lo wara pasa lani ti bâ aye so Jéhovah asara ti zi azo ti Israël na yâ ti Ngu Bengba. Lo mû nga mbage na yâ ti fango ngbanga so Jéhovah afâ na ndo ti azo ti Israël so ake yanga lani na Hoto ti Sinaï, nga lo mû maboko lani ti yô arche mbele (Ex. 32:26-29; Nom. 3:30, 31). Na bango ni lo yeke lani be-ta-zo na Jéhovah teti angu mingi, ye so asara si azo mingi na Israël ane lo.
Gi anzoni ye so ayeke na yâ ti Bible
w98 1/9 l. 20 par. 1-2
E Zia Akota Ye na Kozo Ndo!
Me tene ni ayeke kota mingi na lë ti Jéhovah. Bible atene: “Na L’Eternel atene na Moïse, A lingbi i fâ zo so.” (Nombre 15:35) Ngbanga ti nyen Jéhovah afâ ngbanga ngangu mingi na ndo ye so koli so asala?
Azo ni ayeke na lango omene ti bungbi keke na ti ba atene ti kobe, bongo, na ti ndo ti lango. A lingbi azia lango mbasambala ni nde teti aye ti yingo. Atä so a yeke sioni pepe ti bungbi keke, ti sala ni na ngoi so alingbi fade azia ni nde teti vorongo Jéhovah, ayeke duti sioni. Atä so aChrétien ayeke pepe na gbe ti Ndia ti Moïse, ye so afa pepe na e laso nene ti bata aye so aga na kozo ndo?—aPhilippien 1:10.
Yenga ti 5-11 avril
ANZONI YE SO AYEKE NA YÂ TI BIBLE | NOMBRE 17-19
“Mbi yeke . . . heritage ti mo”
Mo yeke zia si Jéhovah aduti ye ti mo?
9 Gbu li na ndo ti aLévite so awara lani pëpe mbeni sese tongana ye ti héritier. Teti so kusala ti ala ayeke ti fa lege na azo ti mara ni na yâ ti tâ vorongo, a lingbi ala hinga na bê ti ala kue so Jéhovah ayeke mû na ala ye so ala yeke na bezoin ni na lege ti mitele, teti Jéhovah atene: “Mbi yeke ye ti mo.” (Nom. 18:20). Atâa so laso e yeke sara na Jéhovah na yâ ti mbeni temple pëpe tongana ti so aprêtre nga na aLévite ayeke sara lani, e nga kue e lingbi ti hinga na bê ti e kue so Jéhovah ayeke bâ lege ti e. Na ngoi so alango ti nda ni ayeke pusu nduru nduru ti hunzi, a yeke nzoni e zia bê ti e na Jéhovah mingi ahon ti kozo ti bâ lege ti e.—Apoc. 13:17.
Jéhovah ayeke ye ti mbi
4 Kusala so a mû na aLévite so aye ti tene nyen teti ala? Jéhovah atene so lo yeke ye ti ala na lege so ahon ti tene lo mû na ala mbeni sese tongana ye ti héritier, Jéhovah amû na ala mbeni ye so ngere ni ayeke kota mingi, mbeni kota kusala ti tene ala sara. “Kusala ti prêtre ti L’Éternel” la ayeke ye ti héritier ti ala (Jos. 18:7). Atënë so angoro Nombre 18:20 amû maboko na e ti hinga so ala yeke wara aye so ala yeke na bezoin ni na lege ti mitele. (Diko Nombre 18:19, 21, 24.) A lingbi a mû lani na aLévite “dîme kue ti azo ti Israël ti ga ye ti héritier ti ala ti futa ala teti kusala so ala yeke sara”. Ye so aye ti tene so alê ti kobe so sese ti azo ti Israël ayeke lë nga wungo ti anyama ti ala so ague na li ni, a lingbi ala kangbi yâ ni bale-oko na ala mû mbage ni oko na aLévite. Na pekoni, aLévite ayeke mû dîme ti “ye ti nzoni ahon kue” so ala wara ti mû maboko na aprêtre (Nom. 18:25-29). Aprêtre ayeke wara nga “offrande ti yango-na-nduzu ti ye ti nzoni-kue” so amolenge ti Israël aga na ni na Nzapa na yâ ti temple so a yeke voro lo dä. Azo so ayeke sara kusala ti prêtre ayeke biani na anzoni raison ti mä na bê so Jéhovah ayeke bâ lege ti ala.
Gi anzoni ye so ayeke na yâ ti Bible
g02 8/6 l. 14 par. 2
Ingo ayeke sara mbeni kpengba ye na terê ti kobe
A sara nga kua lani na ingo ti sara tënë ti mbeni ye so ayeke changé ape wala so ayeke ngbâ lakue. Ni la na yâ ti Bible a iri mbeni kpengba debango yanga “mbele ti ingo”, fani mingi azo so adeba yanga ni ayeke te kobe ndo oko na ingo ti mû ngangu na debango yanga ni (Nombre 18:19). Na gbe ti Ndia ti Moïse, a yeke zia ingo na terê ti asandaga so a yeke yâa na ndö ti gbalaka, kite a yeke dä ape so a yeke ndali ti so a ye ti sara tënë ti ye so tënë ti goro ayeke dä ape nga mbeni ye so ayeke buba ape.
Yenga ti 12-18 avril
ANZONI YE SO AYEKE NA YÂ TI BIBLE | NOMBRE 20-21
“Ngbâ ti sara terê ti mo kete na ngoi so a sara ngangu na ndö ti mo”
Gi ti sara terê ti mo kete nga nzere na lê ti Jéhovah
19 E yeke kpe ti sara afaute. Gbu li encore na ndö ti Moïse. Teti angu mingi lo sara lani terê ti lo kete nga lo nzere na Jéhovah. Me na hunzingo ti ngu 40 so azo ti Israël asara na yâ ti benyama, Moïse afa pëpe so lo sara terê ti lo kete. Ita ti lo ti wali, so kite ayeke dä ape, amû maboko na lo ti sö fini ti lo na Égypte, alondo ti kui na a lu lo na Cadès. Na fadeso encore azo ti Israël ayeke dema atene a bâ lege ti ala nzoni ape. Na ti so ni so ala yeke “papa na Moïse” ndali ti so ngu ayeke dä ape. Atâa so Jéhovah amû ngangu na Moïse ti sara amiracle mingi nga atâa so Moïse asara asacrifice ti fa lege na azo ti Israël, ala dema. Ala dema gï ndali ti ngu ape me nga ndali ti Moïse, mo bâ mo tene lo la lo sara si nzara ti ngu asara ala.—Nom. 20:1-5, 9-11.
Gi ti sara terê ti mo kete nga nzere na lê ti Jéhovah
20 Ngonzo asara Moïse ngangu na lo zia lege ti sarango ye na ngangu ape. Atâa so Jéhovah ahunda na Moïse ti sara tënë na tênë, lo tene tënë na azo ni na ngonzo, lo tene ni yeke sara mbeni miracle. Na pekoni, lo pika tênë ni fani use na gbâ ti ngu asigi. Baba nga na ngonzo asara si lo sara lani mbeni kota faute (Ps. 106:32, 33). Moïse awara lani lege pëpe ti lï na Sese ti zendo ndali ti so na kete ngoi lo sara terê ti lo kete ape.—Nom. 20:12.
21 Na lege ti tapande so, e manda ambeni kpengba ye. Kozoni, a lingbi e sara ngangu lakue ti ngbâ ti duti na bibe ti sarango terê kete. Tongana e zia ni gï kete, e yeke ga hio zo ti baba na e yeke sara atënë ti buba nga na aye ti buba. Use ni, tongana e yeke na gingo bê alingbi ti duti ngangu ti tene e ngbâ ti sara terê ti e kete, tongaso a lingbi e sara terê ti e kete même na ngoi so e yeke na ngoi ti aye ti ngangu.
Mbeni juge so ahule na terê ti ye so ayeke na lege ni
Kozo ni, Nzapa ahunda na Moïse ti sara tënë na azo ti Israël ape, nga ti tene ape so ala yeke azo ti kpengbango-li. Use ni, Moïse na Aaron amû gloire na Nzapa ape. Nzapa atene: “Ala sara pëpe si mbi ga nzoni-kue.” (Nombre 20:12). So Moïse atene “E doit ti sara si ngu asigi”, lo ye ti fa so a yeke lo na Aaron la asara lani miracle si ngu ni asigi, me a yeke Nzapa ape. Ota ni, ngbanga so a dë na li ti ala ague oko na angbanga so a fâ kozo. Nzapa ake lani ti tene azo ti mbeni ngoi so asara kpengbango-li alï na sese ti Canaan, lo sara nga lani tongaso na Moïse na Aaron (Nombre 14:22, 23). Osio ni, Moïse na Aaron la ayeke na li ti azo ti Israël lani. Azo so a mû na ala kua mingi ayeke na tënë mingi ti kiri na ni na Nzapa.—Luc 12:48.
Gi anzoni ye so ayeke na yâ ti Bible
Mo bâ wokongo so zo ayeke na ni tongana ti so Jéhovah abâ na ni?
12 Na yâ ti aye so asi so, Jéhovah alingbi lani ti punir Aaron gi na lê ni lê ni. Me Jéhovah ahinga so Aaron ayeke sioni zo ape wala lo sara faute ni na mbana ape. Aaron azia lege na aye so asi wala azo ti sara si lo sara pëpe ye so ayeke nzoni. Me lo yeke nduru ti yeda na afaute ti lo nga lo yeda na awango ti Jéhovah (Ex. 32:26; Nom. 12:11; 20:23-27). Jéhovah abâ gi mabe ti Aaron nga lo bâ so lo yeke nduru ti changé. Angu mingi na pekoni, azo angbâ ti dabe ti ala so Aaron na afami ti lo akpe mbeto ti Jéhovah.—Ps. 115:10-12; 135:19, 20.
Yenga ti 19-25 avril
ANZONI YE SO AYEKE NA YÂ TI BIBLE | NOMBRE 22-24
“Jéhovah asara si deba aga tufa”
Fa “nzoni tënë na ndo ti Jésus”
5 Laso nga, sarango ye ti ngangu na awakua ti Jéhovah akaï fango tënë ti ala pëpe. Fani mingi, tongana aChrétien akpe ndo ti ala si ala gue na mbeni ndo nde wala a bi ala na da ti kanga, a yeke mû maboko ti tene nzoni tënë asi na ndo so ala gue dä. Na tapande, na ngoi so Use Bira so Amû Sese Kue angbâ ti kporo, aTémoin ti Jéhovah awara lege ti fa tënë mingi na yâ ti acamp so aNazi asara pasi na azo dä. Mbeni Juif so aita afa tënë na lo kâ atene: “Kpengba-be so aTémoin ti Jéhovah ayeke na ni asara si mbi hinga so mabe ti ala aluti na ndo ti atënë ti yâ ti Bible, na mbi nga kue mbi ga Témoin ti Jéhovah.”
it-1 l. 909 par. 3-9; l. 910 par. 1
Ye ti buba
Ti ke yanga ti Jéhovah ayeke ye ti buba. Buba asara prophète Balaam lo ye ti tene prophétie na ndö ti azo ti Israël ti tene Balak gbia ti Moab amû na lo nginza, me Jéhovah asara si a-éffort ti lo ni atï na ngu. Bazengele Pierre asara tënë na ndö ti Balaam atene so “mbeni nyama ti yongo kungba so ayeke sara ka tënë pëpe asara tënë na lo na go ti zo nga akanga lege na ye ti buba so prophète ni aye ti sara so.” Ti sara tënë ti ye ti buba so Balaam asara, bazengele ni asara kua na tënë ti Grec paraphronia, so aye ti sara tënë ti “zo so li ti lo ayeke dä ape.”—2Pi 2:15, 16; Nb 22:26-31.
Gi anzoni ye so ayeke na yâ ti Bible
Akota tënë ti buku ti Nombre
22:20-22—Ngbanga ti nyen Jéhovah asala ngonzo na tele ti Balaam? Jéhovah atene lani na prophète Balaam ti hiri deba sioni pëpe na ndo ti amolenge ti Israël (Nombre 22:12). Ye oko, prophète ni ague lani na mbage ti azo ti Balak na bibe ti tene lo hiri deba sioni na ndo amolenge ti Israël. Balaam aye lani ti nzere na lê ti gbia ti Moab na ti wara faïda na mbage ti lo (2 Pierre 2:15, 16; Jude 11). Atâa so a pusu Balaam na ngangu ti tene lo hiri deba nzoni na ndo amolenge ti Israël, lo gi alege ti tene lo nzere na lê ti gbia ni, na mungo wango ti tene a sala lani kusala na awali so avoro Baal ti handa akoli ti Israël (Nombre 31:15, 16). Tongaso, nda ti ngonzo ti Jéhovah na ndo Balaam ayeke ngbanga ti so lo yeke mbeni prophète so ayeke na kota bê ti wara ye na lege ti handa.
Yenga ti 26 avril–2 mai
ANZONI YE SO AYEKE NA YÂ TI BIBLE | NOMBRE 25-26
“Aye so zo oko asara apeut ti ga na ye ti nzoni na azo mingi?”
“Ala kpe yongoro na lango-sioni”
MBENI zo ti gingo susu ague na mbeni ndo so lo lingbi ti wara mara ti susu so lo ye ti gbu. Lo soro kobe so lo ye ti zia na lê ti yango ti lo na lo bi yango ni na ngu. Lo kanga bê lo ku, na ngoi so mbeni susu ate kobe ni, lo dë yango ni agbu yanga ti susu ni na lo gboto lo.
2 A lingbi ti gbu azo legeoko tongaso. Na tapande, azo ti Israël asi lani nduru awe na Sese ti zendo na ngoi so ala sara camp na Kpangbala ndo ti Moab. Gbia ti Moab amû zendo na mbeni koli so iri ti lo ayeke Balaam ti mû gbâ ti nginza na lo tongana lo deba azo ti Israël. Na nda ni, Balaam awara mbeni lege ti sara si azo ti Israël ala wani, ala deba ala. Lo soro kobe ti zia na lê ti yango ti lo nzoni. Lo tokua amaseka-wali ti Moab na yâ ti camp ti azo ti Israël ti handa akoli ti Israël.—Nombre 22:1-7; 31:15, 16; Apocalypse 2:14.
“Ala kpe yongoro na lango-sioni”
4 Ngbanga ti nyen la ye so Balaam aleke agbu gbâ ti azo ti Israël? Ala yeke pensé lani gï na nzerengo terê ti ala wani nga ala girisa aye kue so Jéhovah asara lani ndali ti ala. Azo ti Israël ayeke lani na araison mingi ti ngbâ be-ta-zo na Nzapa. Lo zi ala na ngbâa na Égypte, lo mû na ala kobe na yâ ti benyama na lo ga na ala nzoni na yanga ti Sese ti zendo (aHébreu 3:12). Me ala zia si a handa ala na lege ti lango-sioni. Bazengele Paul atene: “Zia e ngbâ na yâ ti lango-sioni pëpe tongana ti so lani ambeni na popo ti ala asara lango-sioni” na ala kui.—1 aCorinthien 10:8.
Gi anzoni ye so ayeke na yâ ti Bible
it-1 l. 933 par. 5-6
Frontière
A yeke polele so kangbingo yâ ti akodro na popo ti amara ni aluti na ndö ti aye use: ye so a yeke bâ na peko ti so a bi mbeni ye ti kangbi yâ ti kodro ni nga na wungo ti azo ti mara ni. Bingo ye ni ayeke fa peut-être ndo so ayeke nduru na kodro so mara oko oko ayeke wara, mbeni mara ayeke wara héritage ti lo na ndo tongaso wala na ndo tongaso na yâ ti kodro ni; na tapande na mbage ti nord, sud, est wala ouest, na akpangbala ndo wala na ando so ahoto ayeke dä. Desizion so a yeke mû lani na peko ti bingo ye ni alondo na Jéhovah, na ye so ayeke sara si amara ni asara kota bê ape nga ala papa na popo ti ala ape (aPr 16:33). A yeke nga na lege so la Nzapa aleke lani si aye asi ti tene dutingo ti mara ni oko oko kue ague oko na prophétie so kotara ti ala Jacob atene na ngoi so lo ga nduru ti kui na so ayeke na Genèse 49:1-33.
Na peko ti so bingo ye ni afa ndo ti mbeni mara, a yeke nga kota ye ti tene a fa konongo ti ndo ni na lege ti wungo ti azo ti mara ni ti gue oko na use ye ni. “A lingbi ala bi mbeni ye ti kangbi yâ ti kodro ni na popo ti asewa ti ala. Groupe so azo ni ayeke mingi, ala yeke mû na ala ande héritage ti ala akono, groupe so azo ni ayeke kete, ala yeke mû na ala héritage ti ala kete. Zo oko oko ayeke wara héritage ti lo na ndo so a soro ni na lo.” (Nb 33:54). A yeke sara ye alingbi na desizion so a yeke mû na peko ti bingbo ye ni, me a peut ti sara ambeni kete changement dä. Na tapande, na ngoi so a bâ so ndo ti azo ti Juda akono mingi, a fâ mbage ni a mû na azo ti mara ti Siméon.—Jos 19:9.