Tongana nyen la abungbi ti aTémoin ti Jéhovah alingbi ti mû maboko na mo?

A tisa mo na mbeni bungbi ti aTémoin ti Jéhovah awe? Tongana ade mo gue ape, peut-être mbeto ayeke sara mo ti gue. Peut-être mo hunda terê ti mo: ‘A yeke sara abungbi ni tongana nyen? Ngbanga ti nyen la a yeke kota ye ti gue? Ngbanga ti nyen la a yeke nzoni mbi gue?’ Ye ti manda so ayeke fa na mo tongana nyen la ti gue na abungbi alingbi ti sara si mo ga nduru mingi na Nzapa nga tongana nyen la abungbi ayeke mû maboko na mo.

1. Kota raison so e yeke sara abungbi ayeke so wa?

Bâ tongana nyen la mbeni zo ti sungo Bible afa kota raison so e yeke sara bungbi na amba ti e. Lo tene: “Mbi yeke sepela Jéhovah na yâ ti kota congrégation.” (Psaume 26:​12). Legeoko nga, a nzere mingi na aTémoin ti Jéhovah ti sara abungbi. Na yâ ti dunia kue, ala yeke bungbi yenga oko oko ti sepela Nzapa, ti he bia nga ti sambela. Na ambeni ngoi na yâ ti ngu oko oko, ala yeke sara nga akota bungbi.

2. Nyen la mo yeke manda na ngoi ti abungbi ti e?

Na ngoi ti abungbi ti e, a yeke fa ye na lege ti Bible, a yeke “fa ndani nzoni nga [a] sara si azo amä yâ ti ye so a diko”. (Diko Néhémie 8:8.) Tongana mo gue na abungbi, mo yeke manda ye na ndö ti Jéhovah nga na apendere sarango ye ti lo. Tongana mo hinga so lo ye mo mingi, mo yeke ga nduru mingi na lo. Mo yeke hinga nga tongana nyen la lo lingbi ti mû maboko na mo ti duti na ngia na yâ ti gigi ti mo.​—Ésaïe 48:​17, 18.

3. Azo so mo wara ala na ngoi ti abungbi ti e alingbi ti mû maboko na mo tongana nyen?

Jéhovah afa na e ti “bi lê na ndö ti mba ti pusu mba ti duti na ndoye na ti sara anzoni kusala, [ti] zia pëpe lege ti guengo lakue na bungbi ti e”. (aHébreu 10:​24, 25). Na abungbi ti e, mo yeke wara terê na azo so aye amba ti ala biani nga so, legeoko tongana mo, ayeke gi ti hinga Nzapa nzoni. Mo yeke mä atënë so akpengba zo so ala tene so alondo na yâ ti Bible. (Diko aRomain 1:​11, 12.) Mo yeke hinga nga akumbamba nga na azo so asara mariage awe so ayeke na ngia atâa so ala yeke na akpale. So ayeke gï ambeni raison so Jéhovah aye si e gue na abungbi lakue.

GI TI HINGA AYE MINGI

4. Abungbi ti aTémoin ti Jéhovah

Akozo Chrétien abungbi lani lakue ti voro Jéhovah (aRomain 16:​3-5). Diko aColossien 3:​16, na pekoni kiri tënë na hunda so:

• Akozo Chrétien avoro lani Jéhovah tongana nyen?

VIDÉO: E yeke sara abungbi ti e tongana nyen? (2:13)

• Nyen la mo bâ so ague oko na yâ ti fason so a sara abungbi na Da ti Royaume nga na ye so mo diko na aColossien 3:16?

• Na yâ ti vidéo ni wala foto ni, eskê mo bâ mbeni ye nde na ndö ti abungbi so anzere na mo?

Diko 2 aCorinthien 9:​7, na pekoni kiri tënë na hunda so:

• Ngbanga ti nyen la aTémoin ti Jéhovah ayeke ro nginza na tïtî azo ape na ngoi ti abungbi ti ala?

Zia mo na zo so ayeke fa ye na mo abâ legeoko aye so a yeke sara lisoro na ndö ni na ngoi ti mbeni bungbi so a yeke sara na yenga so.

• Mbage wa ti bungbi ni la mo pensé ayeke nzere na mo wala ayeke mû maboko na mo?

Mo hinga?

Na ndö ti jw.org, mo lingbi ti hinga ando so a yeke sara abungbi dä, alango ni nga na l’heure ni na yâ ti dunia kue.

1. Na ngoi ti abungbi ti e, a yeke mû adiskur, a yeke sara adevoir nga e yeke bâ avidéo. Abungbi ni ayeke to nda ni nga ayeke hunzi na bia nga na sambela

2. Na ambeni mbage ti abungbi ni, azo so aga ayeke mû acommentaire

3. Azo kue apeut ti gue: asewa, akumbamba, ambakoro nga na amolenge

4. Azo ayeke gue na abungbi ti e senge senge. A-Témoin ti Jéhovah ayeke ro nginza na tïtî azo ape

5. Ti gue na abungbi ahunda ti sara effort

• Ngbanga ti nyen la a lingbi e gue lakue na abungbi?

NA NDURU TËNË

Guengo na abungbi ayeke mû maboko na mo ti hinga aye mingi na ndö ti Jéhovah, ti kpengba songo ti kamarade ti mo na lo nga ti voro lo legeoko na ambeni zo.

Dango bê

• Ngbanga ti nyen la Jéhovah awa e ti gue na abungbi?

• Nyen la mo yeke manda na ngoi ti abungbi ti aTémoin ti Jéhovah?

• Ambeni ye ti nzoni wa la mo pensé so mo lingbi ti wara tongana mo gue na abungbi?

GI NDA TI YE

Ka tongana mbeto asara mo ti gue na mbeni bungbi? Bâ tongana nyen la mbeni koli so asara lani mbeto ti gue na abungbi aye fadeso mingi ti gue na abungbi.

E yeke girisa bara so lâ oko ape (4:​16)

Bâ tongana nyen la guengo na abungbi anzere mingi na mbeni maseka-koli nga bâ ngangu so lo sara ti ngbâ ti gue lakue na abungbi.

Mbi ye abungbi mingi (4:​33)

Gi ti hinga tënë ti bê ti ambeni zo na ndö ti guengo na abungbi.

“Ngbanga ti nyen ti gue na abungbi na Da ti Royaume?” (Article na ndö ti site)

Gi ti hinga tongana nyen la gigi ti mbeni zo so ayeke lani na yâ ti groupe ti abandit achangé na peko ti so lo gue na mbeni bungbi ti aTémoin ti Jéhovah.

“Mbi fono lani lâ oko sân ngombe ti mbi ape” (Tour ti Ba Ndo ti lango 1 ti juillet 2014)