Atënë so azo ahunda

Ye wa e lingbi ti manda na lege ti aProverbe 24:27?

Ti mû wango na mbeni maseka-koli, zo ti sungo Proverbe so atene: “Mo leke kusala ti mo so ayeke na gigi, mo sara yaka ti mo alingbi na mo, na nda ni, mo sara da ti mo.” Nzapa aye ti fa tënë wa na e na yâ ti proverbe so? A lingbi mbeni koli aleke tere ti lo nzoni kozo si lo sara mariage na lo dü amolenge, na lo hinga so akusala ayeke mingi na peko ti sarango mariage.

Kozo, a fa nda ti versê so a tene a lingbi koli wala babâ asara kua ti mitele, me a lingbi nga lo wa azo ti sewa ti lo, na tapande na lege ti fango na ala tënë ti Nzapa. Atâa so tënë so ayeke tâ tënë na alondo na yâ ti Mbeti ti Nzapa, ti bâ ni nzoni a yeke gi kota tënë ni oko la pëpe. Ngbanga ti nyen? Zia e bâ anda ti tënë use.

Kozoni, versê ni aye pëpe ti sara tënë ti wango wala mungo ngangu na azo ti mbeni sewa so ayeke dä awe. Nde na so, a ye kozoni kue ti sara tënë ti sarango da ti lango. Mbupa so a kiri pekoni na “sara da” ayeke nga fä tongana andu tënë ti sarango mbeni sewa wala ziango na sese mbeni sewa, so ti tene ti sara mariage na ti dü amolenge.

Use ni, versê ni aluti mingi na ndo ti sarango ye na molongo ni, a yeke tongana ti so a tene: “Kozoni sara so ge, na pekoni sara so kâ.” Proverbe ni aye ti fa so a lingbi e bâ lege ti akusala ti e ti mitele kozoni si e sara ti yingo? Oko pëpe!

Na ngoi so a sû na Bible, tongana mbeni koli aye ti “sara da ti [lo]”, wala ti sara sewa na lege ti sarango mariage, a lingbi lo hunda tere ti lo: ‘Mbi lingbi ti bata wali ti mbi na amolenge so e lingbi ti dü ande?’ Kozo ti sara mbeni sewa, a lingbi lo sara kua, lo bâ lege ti yaka wala akobe ti yaka ti lo. Nda ni la versê ni atene polele: “Mo leke kusala ti mo so ayeke na gigi, mo sara yaka ti mo alingbi na mo, na nda ni, mo sara da ti mo.” Tënë so abâ nga e laso?

En. A lingbi mbeni koli so aye ti sara mariage aleke tere ti lo nzoni. Tongana lo yeke na nzoni seni, a lingbi lo sara kua. Biani, mbeni koli so asara kua ngangu ti bâ lege ti sewa ti lo ayeke ngbâ pëpe gi na ndo ti aye ti mitele. Mbeti ti Nzapa afa so koli so amû kobe na azo ti da ti lo pëpe, abi bê na ala pëpe na afa tënë ti Nzapa na ala pëpe ayeke sioni mingi ahon zo so amä na bê pëpe! (1 Tim. 5:8). Tongaso, ti leke tere teti mariage na ti dü amolenge, a yeke nzoni mbeni maseka-koli ahunda tere ti lo: ‘Mbi leke tere ti mbi nzoni awe ti mû ye ti mitele na sewa ti mbi? Mbi lingbi awe ti mû li ni ti manda tënë ti Nzapa na sewa ti mbi? Fade mbi sara kusala ti mbi ti mandango Bible na wali ti mbi nga na amolenge ti mbi lakue?’ Mbeti ti Nzapa aluti ngangu na ndo ti atënë so.​—Deut. 6:6-8; aÉph. 6:4.

Tongaso, maseka-koli so aye ti mû wali a lingbi lo gbu li ti lo nzoni na ndo ti kpengba-ndia so ayeke na aProverbe 24:27. Legeoko nga, a lingbi maseka-wali ahunda tere ti lo ti bâ wala lo leke tere ti lo nzoni awe ti duti wali ti da na mama ti amolenge. Amaseka so amû tere awe alingbi nga ti hunda tere ti ala na mara ti tënë so tongana ala ye ti dü amolenge (Luc 14:28). Tongana awakua ti Nzapa abata na yâ ti fini ti ala mara ti wango tongaso, a lingbi ti mû maboko na ala ti kpe avundu na ti duti nzoni na yâ ti sewa ti ala.

[Foto na lembeti 10]

Ahundango tënë wa so andu mariage a lingbi maseka-koli ahunda tere ti lo na ni?