Jésus na adisciple ti lo asara bï ota na Béthanie, depuis so ala londo na Jéricho si ala ga. Fadeso, a yeke yanga ti ndapre ti lundi la, lango 10 ti Nisan. Ala yeke gue na Jérusalem. Nzara asara Jésus. Ni la, na ngoi so lo bâ mbeni keke ti figue, lo gue nduru na ni. Me, alê ti keke ni ayeke dä?

A yeke na hunzingo ti nze ti mars la, na alê ti figue ayeke sigi ka gi na nze ti juin. Me, akugbe ti keke ti figue ti so ni so asigi hio mingi. A sara si Jésus apensé ti lo atene, peut-être ni yeke wara akozo lengo ni na yâ ti keke ni. Me, lo ga ti bâ so ye oko ayeke dä ape. Kugbe ni so ahanda gi lê ti azo senge senge. Ni la, Jésus atene: “Zia zo ate lengo ti mo encore ape biani biani.” (Marc 11:14). Gi na lê ni lê ni, keke ni akomanse ti kui, me na ndade ni la azo ayeke manda ye na ndo ti deba so Jésus atene na ndo ti keke ni.

A ninga ape Jésus na adisciple ti lo asi na Jérusalem. Lo gue na temple so lo bâ yâ ni biri na peko ti midi. Ti laso, a yeke senge bango yâ ti temple ni ape; lo sara mara ti ye so lani lo sara, a sara ngu ota tongaso awe, na Pâque ti ngu 30 (Jean 2:14-16). Jésus atomba “azo so ayeke kä ye nga na azo so ayeke vo ye na yâ ni. Lo kinda atable ti azo so ayeke changé nginza na aye ti duti ti azo so ayeke kä akolokoto.” (Marc 11:15). Lo zia même lege na azo ti yô ye na mbeni ndo nde ti mû nduru lege ti hon na ni na yâ ti lacour ti temple ni ape.

Ngbanga ti nyen la Jésus asara mara ti ye ni so? Lo tene: “Ala diko na mbeti ti Nzapa ape? ‘A yeke iri ande da ti mbi atene da ti sambela ti azo ti amara kue.’ Me, ala sara si da ni aga kota dû ti azo ti nzi.” (Marc 11:17). Lo iri azo ni so “azo ti nzi”, ngbanga ti so, anyama so ala yeke kä na azo so aga ti vo ni ti sara na sandaga, ala yeke zia ngere ni ngangu mingi. Jésus abâ ye so a yeke sara so tongana gbungo ye ti zo na ngangu, wala nzi.

Tongana aprêtre-mokonzi, ascribe nga na ambeni kota zo ni nde amä tënë ti aye so Jésus asara, ala tene so ala yeke sara kue ti fâ lo. Me, mbeni kpale ayeke dä. Ala hinga pëpe ye so ala peut ti sara ti fâ Jésus, ngbanga ti so azo angbâ gi ti ga gbani gbani ti mä fango ye ti lo.

Na ngoi ti matanga ti Pâque ni, a yeke wara mara ti azo nde nde: aJuif ni wani nga na azo so ayeke aJuif ape, me so ala yeda ti sara Nzapa ti aJuif, so a iri ala aprosélyte. Na popo ti ala, a yeke wara aGrec, so ala ga na matanga ni ti voro Nzapa. Ala ga nduru na Philippe, na ala hunda lo atene ala ye ti bâ Jésus. Peut-être iri ti lo, Philippe, so alondo na yanga ti Grec la agboto ala na mbage ti lo. Philippe ague abâ André, peut-être ti hinga wala a yeke na lege ni ti sara bungbi legeoko na azo ni so. Ala use kue ague fadeso na tënë ni so na gbele Jésus, so angbâ encore na yâ ti temple.

Jésus ahinga so, na yâ ti kete lango, a yeke fâ lo; tongaso, lo peut ti sara aye kue so azo ahunda na lo ape wala ti gi ti nzere na lê ti zo ape. Ni la, lo kiri tënë na abazengele ti lo use so na lege ti mbeni hakango ye, lo tene: “L’heure ni asi awe ti tene Molenge ti zo awara gloire. Ti tâ tënë ni, mbi tene na ala: Tongana lê ti blé atï na sese si akui ape, a yeke ngbâ gi lê ti blé oko. Me tongana a kui, na pekoni a yeke lë mingi.”—Jean 12:23, 24.

Lê ti blé oko ayeke mbeni ye so akpa sörö ye ape. Me, tongana a bi ni na yâ ti sese, si akui, a yeke sigi, na yeke yeke, a yeke lë gbani. Legeoko nga, Jésus ayeke zo so ayeke na siokpari na tere ti lo ape. Me, tongana lo ngbâ be-ta-zo na Nzapa juska na kuâ, lo yeke zi ande lege ti fini ti lakue lakue na gbâ ti azo, so ayeke na mara ti pensé ti lo so, so ayeke gi ti pensé na ala wani ape. Ni la, lo tene: “Zo so aye fini ti lo mingi, lo yeke ngbâ na fini ape. Me zo so ake fini ti lo na yâ ti dunia so, lo yeke bata ni ndali ti fini ti lakue lakue.”—Jean 12:25.

Jésus ayeke pensé gi na lo wani ape, teti so lo tene: “Tongana mbeni zo aye ti sara kua na mbi, zia lo mû peko ti mbi. Ndo so mbi yeke dä, zo ni so ayeke duti ande dä nga. Tongana mbeni zo aye ti sara kua na mbi, Babâ ayeke ne lo.” (Jean 12:26). So tâ pendere futa! Azo so Babâ ni ane ala ayeke wara pasa ti duti ande legeoko na Christ na yâ ti Royaume ni.

Na ngoi so Jésus apensé na kota pasi so lo yeke gue ti bâ juska na kuâ ti lo, lo tene: “Ti ndembe so, li ti mbi ayeke kpô ape, na mbi tene nyen? Babâ, sö mbi na yâ ti ngoi ti ngangu so.” Me, Jésus aye pëpe ti kpe ti sara ye so bê ti Nzapa aye. Lo tene: “Me, a lingbi mbi hon na yâ ni, ndali ti so a yeke ndali ni la mbi ga so.” (Jean 12:27). Jésus ayeda na aye kue so Nzapa aleke ti sara, so tënë ti kuâ ti lo nga kue ayeke na popo ni.

Na temple na lundi, lango 10 ti Nisan, Jésus ayeke sara tënë na ndo ti kuâ ti lo so aga nduru. Teti so Jésus ahinga atene kuâ ti lo ni ayeke sara ande ye mingi na ndo ti iri ti Nzapa, lo tene: “Babâ, mû gloire na iri ti mo.” Mo ye ti bâ, mbeni go so atoto ngangu na yayu akiri tënë, a tene: “Mbi mû gloire na ni awe na mbi yeke kiri ti mû gloire na ni.”—Jean 12:27, 28.

Li ti azo so ayeke na place ni so akpe kue. Ambeni apensé ti ala atene a yeke sungbango ti bekpa la. Ambeni atene ti ala atene: “Mbeni ange la asara tënë na lo.” (Jean 12:29). Andâ, a yeke ti lo go ti Jéhovah la ala mä so! Nga, a yeke kozoni ti tene azo amä go ti Nzapa na sarango tënë na ndo ti Jésus la ape.

Ngu ota na ndambo tongaso kozoni, na ngoi ti batême ti Jésus, Jean Baptiste amä lani go ti Nzapa na sarango tënë ti Jésus, lo tene: “So ayeke Molenge ti mbi so mbi ye lo mingi, bê ti mbi ayeda na lo.” A si na mbeni ngoi, na peko ti Pâque ti ngu 32, tere ti Jésus achangé na lê ti Jacques, Jean nga na Pierre. Akoli ota so amä Nzapa na sarango tënë, lo tene: “So ayeke Molenge ti mbi so mbi ye lo mingi, bê ti mbi ayeda na lo. Ala mä lo.” (Matthieu 3:17; 17:5). Me fadeso, ti fani ota ni, Jéhovah asara tënë na mbeni lege so gbâ ti azo apeut ti mä ni.

Jésus atene: “Go so atoto ndali ti mbi ape, me ndali ti ala.” (Jean 12:30). A yeke mbeni ye so amû lege na azo ti hinga so Jésus ayeke biani Molenge ti Nzapa, wala Messie so a sara tënë ti lo depuis.

So Jésus angbâ be-ta-zo, lo zia mbeni tapande ndali ti azo nga a fa biani so a yeke fâ ande ngbanga na ndo ti Satan Zabolo, so ayeke mokonzi ti dunia so. Jésus atene: “A yeke fâ ngbanga na ndo ti dunia so na ndembe so, na a yeke bi mokonzi ti dunia so na gigi.” Na pekoni, lo tene: “Me ti mbi, tongana a kanga mbi na nduzu awe, mbi yeke gboto mara ti azo nde nde kue na mbage ti mbi.” (Jean 12:31, 32). Ye so aye ti fa so, azo ayeke wara ande anzoni ye na lege ti kuâ ti Jésus. Lo yeke gboto azo na mbage ti lo, na lege so lo yeke zi na ala lege ti fini ti lakue lakue.

Teti so Jésus atene a yeke “kanga” ande ni “na nduzu”, gbâ ti azo ni angbâ atene: “E mä na yâ ti Ndia a tene so Christ ayeke ngbâ lakue lakue. Me a sara tongana nyen si mo tene a lingbi a kanga Molenge ti zo na nduzu? Molenge ti zo ni ayeke zo wa?” (Jean 12:34). Atâa aye kue so azo ni abâ na lê ti ala, même so ala mä tâ go ti Nzapa kue so, mingi ti azo ni ake ti yeda so Jésus la ayeke tâ Molenge ti zo ni, wala Messie ni.

Tongana ti so Jésus asara kozo, lo tene so ni yeke “lumière ti dunia so.” (Jean 8:12; 9:5). Ni la, lo wa azo ni, lo tene: “Lumière ayeke ngbâ ande ti za na popo ti ala teti kete ngoi. Ala tambela na ngoi so ala yeke na lumière ni, tongaso si bingo ahon ndo ti ala ape. . . . Na ngoi so ala yeke na lumière, ala mä na bê na lumière ni, tongaso si ala ga amolenge ti lumière.” (Jean 12:35, 36). Na pekoni, Jésus azi tere ti lo, ngbanga ti so lango 10 ti Nisan ayeke pëpe lango so lo yeke kui na ni. Lango so a yeke ‘kanga lo na nduzu’, na ndo ti keke, ayeke na lango 14 ti Nisan.—aGalate 3:13.

Tongana mo kiri na peko ti bâ akua kue so Jésus asara, me si aJuif ake ti mä na bê na lo so, a yeke polele so aprophétie la ayeke ga tâ tënë so. Ésaïe atene lani awe so lê ti azo ayeke kanga ande nga bê ti ala ayeke kpengba, a sara si a yeke sava ala ande ape (Ésaïe 6:10; Jean 12:40). Biani, bê ti mingi ti aJuif akpengba, a sara si ala ke ti yeda na aye kue so afa atene Jésus la ayeke Sauveur ti ala, wala lege ti fini.

Nicodème, Joseph ti Arimathée nga na gbâ ti ambeni kota zo “amä na bê” na Jésus. Me, eskê ala yeke sara ande aye so afa atene ala yeke na mabe, wala ala yeke kiri na peko, ngbanga ti so ala yeke na mbeto ti tene a tomba ala na yâ ti synagogue wala “ndali ti so ala ye ti tene azo agonda ala”?—Jean 12:42, 43.

Jésus lo wani lo fa ye so a lingbi mbeni zo asara ti fa so lo yeke na mabe, lo tene: “Zo so amä na bê na mbi amä na bê gi na mbi pëpe me nga na lo so atokua mbi.” Atâ tënë so Nzapa atokua Jésus ti fa ni, si Jésus angbâ ti fa ni so, ayeke kota ye mingi, ni la lo tene: “Zo so ane mbi ape na lo yamba atënë ti mbi ape, mbeni ye ayeke dä ti fâ ngbanga na ndo ti lo. A yeke tënë so mbi tene la ayeke fâ ngbanga na ndo ti lo na lâ ti nda ni.”—Jean 12:44, 45, 48.

Na nda ni, Jésus atene: “Mbi sara tënë ti bê ti mbi wani ape, me Babâ so atokua mbi la amû yanga na mbi na ndo ti ye so mbi yeke tene nga mbi yeke fa. Mbi hinga nga so ti sara ye alingbi na commandement ti lo ayeke gue na zo na fini ti lakue lakue.” (Jean 12:49, 50). Jésus ahinga so, na yâ ti kete ngoi, lo yeke tuku mênë ti lo na sandaga ndali ti azo so asara aye so afa so ala yeke na mabe na lo.—aRomain 5:8, 9.