Na yâ ti kete ngoi Nzapa ayeke zi apasi kue

Habakuk atene: “Jéhovah, juska lawa la mbi yeke toto na mo ti mû maboko na mbi, me mo yeke mä mbi ape? Juska lawa la mbi yeke hunda mo ti mû maboko na mbi ndali ti aye ti ngangu, me mo yeke sara mbeni ye ape?” (Habakuk 1:2, 3). Habakuk ayeke lani mbeni zo so Nzapa abâ lo na nzoni lê. Me eskê tënë so lo tene so afa so lo yeke na mabe ape la? Ên-ën! Nzapa adë bê ti Habakuk so lo leke mbeni ngoi déjà awe ti zi apasi kue.—Habakuk 2:2, 3.

Tongana mo wala mbeni zo so mo ye lo mingi abâ pasi, mo peut ti pensé hio so Nzapa ane nengo nga so a lingbi lo sara mbeni ye hio ti leke kpale ni. Me Bible adë bê ti e atene: “Jéhovah ane nengo pëpe na ndö ti tënë ti zendo ti lo, tongana ti so ambeni zo abâ na sarango ye ti zo so ane nengo, me lo yeke kanga bê na ala ngbanga ti so lo ye si zo oko akui pëpe, me lo ye si azo kue achangé bê ti ala.”—2 Pierre 3:9.

LAWA LA NZAPA AYEKE ZI ANDE APASI NI?

Lo yeke sara ni na yâ ti kete ngoi! Jésus afa lani so azo ti mbeni ngoi ayeke bâ ande aye so ayeke si, so afa biani so “aye ti ngoi ni so” aga nduru ti hunzi awe (Matthieu 24:3-42). So prophétie ti Jésus so aga tâ tënë laso na ngoi ti e, a fa so Nzapa aga nduru ti zi akpale ti azo awe.a

Me, Nzapa ayeke zi ande apasi kue tongana nyen? Na ngoi so Jésus ayeke lani na sese, lo fa ngangu so Nzapa ayeke na ni ti yapu pasi ti azo. Bâ ambeni tapande ni.

Akpale tongana ngu so asuku amû ndo wala sese so ayengi: Na ngoi so Jésus na abazengele ti lo ayeke fâ Kota ngu ti Galilée, mbeni kota pupu aya ngangu na a ngbâ kete bateau ti ala alï ngu. Jésus afa so lo na Babâ ti lo ayeke na ngangu na ndö ti aye tongana ngu nga na pupu (aColossien 1:15, 16). Jésus atene gï mbeni senge tënë, lo tene: “Kaï! Duti kpô!” Nyen la asi na pekoni? “Pupu ni akaï na ndo adë ngii.”—Marc 4:35-39.

Kobela: Azo mingi ahinga lani so Jésus ayeke na ngangu ti sava awaziba, azo so gere ti ala abuba, azo so kobela ti makako asara ala, azo ti buruma nga na azo so mbeni mbage ti terê ti ala abuba. “Lo sava ala kue so terê ti ala ason.”—Matthieu 4:23, 24; 8:16; 11:2-5.

Kota nzara: Jésus asara kua lani na ngangu so Babâ ti lo amû na lo ti sara si kete kobe aga gbani. Bible atene so na ngoi so lani lo yeke sara kua ti lo ti fango tënë ti Nzapa, fani use lo mû kobe na gbâ ti azo.—Matthieu 14:14-21; 15:32-38.

Kuâ: Tapande ti azo ota so Jésus azingo ala na kuâ, so Bible asara tënë ni, afa polele so Jéhovah ayeke na ngangu ti zi kuâ biani biani. Na milieu ti azo ni so si Jésus azingo ala na kuâ, mbeni ayeke dä so akui asara lango osio.—Marc 5:35-42; Luc 7:11-16; Jean 11:3-44.