Ala Yeke Azo Wa?

YE SO bê ti aTémoin ti Jéhovah aye ayeke ti tene mo manda ti hinga ala nzoni ahon. Peut-être mo tingbi na ala awe tongana azo so alango ndulu na mo, afon mo ti ndo ti kusala, wala peut-être mo tingbi na ala na yâ ambeni kusala nde ti fini ti lâ oko oko. Peut-être mo ba ala na ndo lege, na fango ambeti ti ala na azo so ayeke hon. Wala peut-être mo sala tene ndulu na ala na yanga-da ti mo.

Ti tâ tene ni, aTémoin ti Jéhovah ayeke bi bê na ndo mo nga na nzoni duti ti mo. Ala ye ti duti akamarade ti mo na ti fa na mo ye mingi na ndo ala mveni, atene ti mabe ti ala, bungbi ti ala, na bibe ti ala na ndo azo nga na ndo sese so e kue e yeke dä. Ti sala ye so, ala leke brochure so teti mo.

Na yâ aye mingi, aTémoin ti Jéhovah ayeke tongana tanga ti azo kue. Ala yeke na akpale so zo kue ayeke na ni: kpale ti mosoro, ti tele, na ti bibe. Ngoi na ngoi, ala yeke glisa lege, teti so ala yeke mbilimbili-kue pepe, yingo ayeke fa lege na ala na yâ ye kue pepe, na ala yeke pepe azo so alingbi pepe ti pika gere ti ala. Me ala yeke tara ti manda ye na lege ti ye so asi na ala, na ala yeke manda Bible ngangu ti ba tongana nyen ti gbian aye so ahunda. Ala mu tele ti ala na Nzapa ti sala ye so bê ti lo aye, na ala yeke sala ngangu ti sala ye alingbi na mungo tele ti ala so. Na yâ akusala ti ala kue, ala yeke gi fango lege so alondo na Tene ti Nzapa nga na yingo ti nzoni-kue ti lo.

A yeke ye ti kota mingi teti ala ti tene atene ti mabe ti ala aluti na ndo Bible na pepe na ndo senge ye ti bibe ti azo wala fango ye ti alege ti vorongo. Ala yeke sala tene tongana ti so bazengele Paul atene lo mveni na gbe ti yingo: “A lingbi i hinga Nzapa ayeke Nzapa ti tene-biani, me azo kue ayeke awamvene.” (aRomain 3:4a) Tongana ala si na ndo afango ye so a fa ni tongana tâ tene so alondo na Bible, aTémoin aye ti sala ye alingbi na ye so azo ti Bérée asala la ni na ngoi so ala mä bazengele Paul na fango tene: “Ala yeke na nzala ti mä tene so, na ala gi Mbeti ti Nzapa lâ na lâ ti ba tongana tene so ayeke biani.” (Kusala 17:11) A-Témoin ti Jéhovah amä na bê so a lingbi fade afango ye ti alege ti vorongo kue ahon na gbele tara ti ba wala a gue legeoko na Mbeti ti Nzapa, ti hinga wala fango ye ni alondo na ala mveni wala na mbeni zo nde. Ala tisa mo, ala wa mo mingi, ti sala tongaso na ngoi ti alisoro ti mo na ala.

Tongaso, a yeke polele so aTémoin ti Jéhovah amä na bê na Bible tongana Tene ti Nzapa. Ala yeke ba abuku 66 so ayeke na yâ ni tongana ye so a sala ni na gbe ti yingo, na ambaï ti yâ ni ayeke tâ ye. Mbage so a hiri ni mingi Fini Testament, ala yeke hiri ti ala ni mbage ti Mbeti ti Nzapa so aChrétien asala na yanga ti Grec, na Ngbele Testament, ala yeke hiri ni mbage ti Mbeti ti Nzapa so asala na yanga ti Hébreu. Ala yeke zia bê ti ala na ambage ni use kue, Mbeti ti Nzapa so asû na yanga ti Hébreu nga ti Grec, na tongana atene ni wala atene so angoro ni afa so a yeke pepe ti ba ni tongana fä, ala yeke gi ti gbu nda ni tongana ti so a sû ni na mbeti. Ala hinga so mingi ti aprophétie ti Bible aga tâ tene awe, ambeni angbâ ti ga tâ tene, na ambeni nde ayeke ku ti ga tâ tene ande.

IRI TI ALA

A-Témoin ti Jéhovah? Biani, a yeke iri so ala yeke fa tele ti ala na lege ni. A yeke mbeni iri so ayeke fa ye na ndo ala, na fango so ala yeke fa tene ti témoin na ndo Jéhovah, dutingo ti lo tongana Nzapa, na aye so lo leke ti sala. “Nzapa,” “Seigneur,” na “Wasalango ye,” tongana “Président,” “Gbia,” na “Watongoro,” ayeke gi a-iri so aye ti yä zo na nduzu, na a lingbi ti mu ni na azo nde nde mingi. Me “Jéhovah” ayeke iri ti zo na a yeke iri ti Nzapa ti ngangu ahon kue na Wasalango ndagigi. A yeke ye so afa ni na Psaume 83:19, na yâ Bible de Crampon (1905): “Si azo alingbi hinga so mo, so gi mo oko iri ni ayeke JÉHOVAH, mo yeke mo oko Lo ti nduzu ahon kue na ndo sese kue.”

Iri Jéhovah (wala Yahweh, tongana ti so Bible de Jérusalem ti aCatholique ti Rome, na ambeni wagingo nda ti ye ti laso aye) asigigi ndulu na fani 7 000 na yâ Mbeti ti Nzapa so asala na yanga ti Hébreu. Mingi ti aBible afa ni tongaso pepe, me ala zi ni na ala zia “Nzapa” wala “Seigneur” na place ni. Ye oko, même na yâ aBible so, fani mingi mbeni zo alingbi ti fa na place wa Mbeti ti Nzapa so asala giriri na yanga ti Hébreu asala kusala na iri “Jéhovah,” teti na ando ni so, a sû na kota gere ti mbeti iri ni so a zia na place ni, tongaso: NZAPA, SEIGNEUR. Ambeni Bible ti laso ayeke sala kusala na iri “Jéhovah,” wala na iri “Yahweh.” Ni la, New World Translation afa peko ti Esaïe 42:8 tongaso: “Mbi yeke Jéhovah. So ayeke iri ti mbi.”

Mbage ti Mbeti ti Nzapa so aTémoin ti Jéhovah aluti na ndo ni teti iri ti ala ayeke chapitre 43 ti Esaïe. Na ndo so, a fa ye so asi na sese tongana mbeni ye so ayeke si na yâ ti da ti fango ngbanga: A tisa anzapa ti amara ti sigigi na atémoin ti ala so alingbi ti fa na gigi mbilimbili so ala tene ala yeke na ni, wala ti mä atémoin ti mbage ti Jéhovah, na ti yeda na tâ tene. Na ndo so, Jéhovah atene na azo ti lo: “I yeke atémoin ti mbi, Jéhovah atene, na wakua ti mbi so mbi soro; si i lingbi hinga na i mä na bê na mbi, na i hinga so mbi yeke lo: kozo na mbi, a sala mbeni Nzapa oko pepe, nga na peko ti mbi, fade a sala mbeni oko pepe. Mbi, biani mbi, yeke Jéhovah; na nde na mbi, wamungo salut ayeke pepe.”—Esaïe 43:10, Bible de Crampon (1905).

Jéhovah Nzapa ayeke la ni na atémoin na ndo sese na yâ angu saki mingi kozoni si a dü Jésus. Na peko ti so aHébreu chapitre 11 afa molongo ti ambeni na popo ti azo ti mabe so, aHébreu 12:1 (NW) atene: “Tongaso, teti e yeke na kota mbinda ti atémoin mingi mingi so angoro e, a lingbi e zia nga kungba kue na siokpari so akanga lege na e hio, nga, na bê so azia pepe, e kpe loro so a zia na gbele e.” Jésus atene na gbele Ponce Pilate: “A dü mbi teti so, na mbi ga na sese so teti so: ti sala tene ti témoin ti tâ tene.” A hiri lo “tâ Témoin ti biani.” (Jean 18:37, NW; Apocalypse 3:14) Jésus atene na adisciple ti lo: “Fade i wara ngangu tongana Yingo Vulu aga na ndo i; na fade i ga atémoin ti Mbi na Jérusalem, na Judée kue, na Samarie, na juska na nda ti sese kue.”—Kusala 1:8.

Tongaso, laso, azo ndulu na kutu omene so ayeke fa nzo tene ti Royaume ti Jéhovah na lege ti Christ Jésus na yâ akodoro ahon 230 ayeke ba so a yeke na lege ni ti ba tele ti ala tongana aTémoin ti Jéhovah.

[Tene na Gbe Ni]

[Akete tene na lembeti 4]

Ala mu tele ti ala na Nzapa ti sala ye so bê ti lo aye

[Akete tene na lembeti 4]

Ala mä na bê so Bible ayeke Tene ti Nzapa

[Akete tene na lembeti 5]

Kamba ayeke na popo ti iri ni na ye so asi na yâ mbeni da ti fango ngbanga

[Akete tene na lembeti 5]

Wungo ti aTémoin ayeke ndulu na 6 000 000 na yâ akodoro ahon 230

[Foto na lembeti 3]

Ala yeke bi bê na ndo mo

[Foto na lembeti 4]

Iri ti Nzapa mveni na ngbele yanga ti Hébreu