“Mbi yeke bâ acréature so ayeke na fini so”

Kite ayeke dä ape so Ézéchiel abâ lani akota statue ti akoli-bagara so ayeke na kpangbi nga na abamara so li ti ala ayeke ti zo so aluti tongana agarde na devant ti ayangbo ti gbia nga na atemple. Mara ti astatue tongaso ayeke lani mingi na kodro ti Assyrie nga na Babylonie ti giriri. Legeoko tongana tanga ti azo kue so abâ acréature so amû mbeto na zo so, li ti Ézéchiel adoit lani ti kpe kue. Ambeni créature ni ayo mètre 6. Me atâa so acréature so akpa ambeni ye so ayeke na ngangu mingi, ala yeke na fini ape, gï tênë la a leke na astatue ni.

Me acréature osio so Ézéchiel abâ na yâ ti vision ayeke “acréature so ayeke na fini”. So kota kangbi! Ye so Ézéchiel abâ so asara ye mingi na ndö ti lo, ni la lo sara tënë ti “acréature so ayeke na fini” fani 11 na yâ ti atënë ti tongo nda ti prophétie ti lo (Ézéch. 1:5-22). Vision ti acréature osio so ayeke na fini so ayeke na gbe ti trône ti Nzapa, so ayeke tambela legeoko ti gue na oko ndo, adoit ti sara si Ézéchiel agirisa lâ oko ape so Jéhovah ayeke na kota komandema na ndö ti aye kue so lo créé. Laso, oko vision so asara si e yeke girisa lâ oko ape ngangu ti Jéhovah, kota ti lo nga gloire ti lo ti Kota Gbia ti dunia kue.​—1 Chron. 29:11.