Kota mama-tene ti Bible ayeke na ndö ti Royaume ti Nzapa. Jéhovah ayeke sara kua na Royaume so ti sara ye so lo leke lani na bê ti lo ti sara ndali ti sese. Royaume ti Nzapa ayeke nyen? E hinga tongana nyen so a komanse ti komande awe? Aye wa la Royaume ni asara awe? Aye wa la a yeke sara ni na yâ ti angoi so ayeke ga? Ye ti manda so na ati peko use ayeke kiri tënë na ahunda so.

1. Royaume ti Nzapa ayeke nyen? Gbia ni ayeke zo wa?

Royaume ti Nzapa ayeke mbeni gouvernement so Jéhovah Nzapa la asigi na ni. Jésus Christ, so ayeke Gbia ti Royaume ni, ayeke komande na yayu (Matthieu 4:17; Jean 18:36). Bible atene na ndö ti Jésus, atene: “Lo yeke komande tongana Gbia . . . lakue lakue.” (Luc 1:32, 33). Jésus, so ayeke Gbia ti Royaume ti Nzapa, ayeke komande ande na ndö ti azo kue so ayeke na ndö ti sese.

2. Azo wa la ayeke komande legeoko na Jésus?

Jésus akomande lo oko ape. Azo ti ‘akete mara kue, azo ti ayanga ti kodro kue, azo ti akodro kue nga na azo ti amara kue ayeke komande tongana agbia na ndö ti sese.’ (Apocalypse 5:9, 10). Azo oke la ayeke komande ande legeoko na Christ? Ngbene ye na ngoi so Jésus aga lani na sese, aChrétien kutu mingi aga adisciple ti lo. Me gï azo 144 000 na popo ti ala la ayeke gue na yayu ti komande legeoko na Jésus. (Diko Apocalypse 14:1-4.) Tanga ti aChrétien kue so ayeke na sese ayeke ga ande azo ti gbe ti Royaume ni.—Psaume 37:29.

3. Na lege wa la Royaume ti Nzapa ayeke nzoni mingi ahon agouvernement ti azo?

Même tongana azo so akomande agi ti sara anzoni ye, ala yeke pëpe na ngangu ti sara ye kue so ala ye. Nga azo so ayeke komande na peko ti ala apensé peut-être gï na nzoni ti ala wani na ala ye pëpe ti aidé azo. Me mbeni zo nde ayeke mû ande place ti Jésus, so ayeke Gbia ti Royaume ti Nzapa, lâ oko ape. Nzapa ‘asigi na mbeni royaume so a yeke futi ni lâ oko pëpe.’ (Daniel 2:44). Jésus ayeke komande na ndö ti sese kue, nga lo yeke sara ye ti nzoni gï na ambeni zo ape. Lo yeke sara ye na ndoye, na nzoni bê nga na lege ni, na lo yeke fa na azo ti sara ye na mba na ndoye, na nzoni bê nga na lege ni.—Diko Ésaïe 11:9.

4. Royaume ti Nzapa ayeke komande ande na ndö ti sese

Jésus Christ ayeke na ngangu ti komande ahon agbia kue so akomande na ndö ti sese. Diko Matthieu 28:18, na pekoni kiri tënë na hunda so:

• Kangbi wa la ayeke na popo ti ngangu so Jésus ayeke na ni ti komande na ti azo?

Agouvernement ti azo ayeke changé ka, na agouvernement ni ayeke komande gï na ndö ti mbeni mbage ti sese. Ka Royaume ti Nzapa? Diko Daniel 7:14, na pekoni kiri tënë na ahunda so:

• Ngbanga ti nyen la a yeke nzoni so ‘a yeke futi lâ oko pëpe’ Royaume ti Nzapa?

• Ngbanga ti nyen la a yeke nzoni so a yeke komande ande na ndö ti sese kue?

5. A doit ti changé agouvernement ti azo

Ngbanga ti nyen la Royaume ti Nzapa adoit ti mû place ti agouvernement ti azo? Zia VIDÉO ni, na pekoni kiri tënë na hunda so:

VIDÉO: Royaume ti Nzapa ayeke nyen?—Mbage ni (1:41)

• Ye ti peko ti komandema ti azo ayeke nyen?

Diko Zo-ti-fa-tene 8:9, na pekoni kiri tënë na ahunda so:

• Mo pensé so a yeke nzoni Royaume ti Nzapa amû place ti agouvernement ti azo? Ngbanga ti nyen?

6. Azo so ayeke komande na yâ ti Royaume ti Nzapa acomprendre e

So Jésus, Gbia ti e, avivre lani tongana zo, lo lingbi ti “bâ mawa ti e na ando so e woko dä”. (aHébreu 4:15). Akoli na awali 144 000 so ayeke be-ta-zo so ayeke komande ande legeoko na Jésus, Jéhovah asoro ala na popo ti “azo ti akete mara kue, azo ti ayanga ti kodro kue, azo ti akodro kue nga na azo ti amara kue”.​—Apocalypse 5:9.

• So Jésus nga na azo kue so ayeke komande legeoko na lo ahinga songo ti gigi, a dë bê ti mo? Ngbanga ti nyen?

7. Royaume ti Nzapa ayeke na andia so ayeke nzoni mingi ahon ti agouvernement ti azo

Agouvernement asigi na andia so ala pensé so ayeke ga na nzoni na azo ti ala nga ayeke bata ala. Royaume ti Nzapa nga kue ayeke na andia so azo ti gbe ni adoit ti sara ye alingbi na ni. Diko 1 aCorinthien 6:9-11, na pekoni kiri tënë na ahunda so:

• Mo pensé so dunia ayeke duti ande tongana nyen na ngoi so azo kue ayeke sara ye alingbi na andia ti Nzapa na ndö ti nzoni sarango ye?a

• Mo pensé so a yeke na lege ni ti tene Jéhovah ahunda na azo ti gbe ti Royaume ti lo ti sara ye alingbi na andia so? Ngbanga ti nyen?

• Nyen la afa so azo so asara ye alingbi na andia so ape apeut ti changé?​—Bâ versê 11.

NA NDURU TËNË

Royaume ti Nzapa ayeke mbeni tâ gouvernement so ayeke na yayu so ayeke komande ande na ndö ti sese kue.

Dango bê

• Azo wa la ayeke komande na yâ ti Royaume ti Nzapa?

• Na lege wa la Royaume ti Nzapa ayeke nzoni mingi ahon agouvernement ti azo?

• Ambeni ye wa la Jéhovah ahunda na azo ti gbe ti Royaume ti lo ti sara?

GI NDA TI YE

Bâ ye so Jésus afa na ndö ti ndo so Royaume ayeke dä.

“Eskê Royaume ti Nzapa ayeke na yâ ti bê ti mo?” (Article na ndö ti site)

Ngbanga ti nyen la aTémoin ti Jéhovah asoro ti duti be-ta-zo na Royaume ti Nzapa ahon ti duti be-ta-zo na agouvernement ti azo?

Ala mû bê ti ala kue na Royaume ti Nzapa (1:43)

Bâ ye so Bible afa na ndö ti azo 144 000 so Jéhovah asoro ala ti komande legeoko na Jésus.

“Azo wa la ayeke gue na yayu?” (Article na ndö ti site)

Nyen la asara si mbeni wali so ayeke na kanga ahinga so gï Nzapa oko la apeut ti ga na mbeni dunia so mbilimbili ayeke dä?

“Mbi hinga awe ye so ayeke hunzi sarango ye na zo na lege ni ape” (Zingo na lango! novembre 2011)

Royaume ti Nzapa akomanse lani ti komande na yayu na ngu 1914. A yeke nga ngoi so lâ ti nda ni ti komandema ti azo akomanse. E hinga ni tongana nyen? E yeke bâ aprophétie ti Bible, aye so ayeke passé na yâ ti dunia nga na sarango ye ti azo ngbene ye na ngu 1914 ti ga na ni.

1. Aprophétie ti Bible afa nyen?

Mbeti ti Daniel afa so Royaume ti Nzapa ayeke komanse ti komande na hunzingo ti ngoi so a iri ni “angoi mbasambala”. (Daniel 4:16, 17). Angu mingi na pekoni, Jésus airi oko ngoi so “ngoi so a fa ndali ti amara”, na lo fa so ade ti hunzi ape (Luc 21:24). Tongana ti so e yeke bâ, angoi mbasambala ni ahunzi na ngu 1914.

2. Ngbene ye na ngu 1914 ti ga na ni, aye wa la ayeke passé na yâ ti dunia nga sarango ye ti azo ayeke tongana nyen?

Adisciple ti Jésus ahunda lani lo, atene: “Fä ti ngoi so mo yeke duti dä nga ti ngoi so aye ti ngoi so ayeke gue ti hunzi ayeke nyen?” (Matthieu 24:3). Na yâ ti kiringo tënë ti Jésus, lo fa na ala gbâ ti aye so ayeke si na ngoi so lo yeke komanse ti komande na yayu tongana Gbia ti Royaume ti Nzapa. Ambeni ye ni ayeke bira, kota nzara nga na yengingo ti sese. (Diko Matthieu 24:7.) Bible atene nga kozo awe so “na lâ ti nda ni,” sarango ye ti azo ayeke sara si gigi “ayeke ngangu na zo”. (2 Timothée 3:1-5). Ngbene ye na ngu 1914 ti ga na ni, aye so ayeke passé na yâ ti dunia nga na sarango ye ti azo afa polele so e yeke na yâ ti ngoi ni so.

3. Ngbanga ti nyen la aye aga sioni mingi ngbene ye na ngoi so Royaume ti Nzapa akomanse ti komande?

Kete na peko ti so Jésus aga Gbia ti Royaume ti Nzapa, na yayu kâ lo sara bira na Satan nga na asioni yingo. Me Satan asö benda ape. Bible atene so “a bi lo na sese, na a bi nga a-ange ti lo ni legeoko na lo.” (Apocalypse 12:9, 10, 12). Ngonzo asara Satan mingi ndali ti so lo hinga so a yeke futi lo ande. Tongaso, lo la lo yeke na gunda ti apasi kue so azo ayeke bâ na ndö ti sese. Ndani la aye so ayeke passé na yâ ti dunia ayeke tâ sioni mingi. Royaume ti Nzapa ayeke zi ande akpale so kue.

GI TI HINGA AYE MINGI

4. Aprophétie ti Bible asara tënë ti aye so asi na ngu 1914

VIDÉO: Royaume ti Nzapa akomanse ti komande na ngu 1914 (5:02)

Nzapa asara si Nébucadnezzar, gbia ti Babylone ti ândö, abâ li ti lo. Na yâ ti bango li ni, Nzapa afa na lo aye so ayeke si ande. Bango li ni nga na atënë so Daniel atene ti fa ndani afa so bango li ni aye ti sara tënë ti komandema ti Nébucadnezzar nga na Royaume ti Nzapa.—Diko Daniel 4:17.a

Diko Daniel 4:20-26, na pekoni sara kua na tableau ti lembeti 133 ti kiri tënë na ahunda so:

• (A) Nyen la Nébucadnezzar abâ lani na yâ ti bango li?​—Bâ versê 20 na 21.

• (B) Nyen la ayeke si na keke ni?—Bâ versê 23.

• (C) Nyen la ayeke si na hunzingo ti “angoi mbasambala”?​—Bâ versê 26.

Fason so mbeni keke so a bâ na yâ ti mbeni bango li ague oko na Royaume ti Nzapa

PROPHÉTIE NI (Daniel 4:20-36)

Komandema

(A) Mbeni kota keke

A kaï komandema ni

(B) “Dë keke ni na sese” nga zia “angoi mbasambala ahon si”

A kiri na komandema ni

(C) “A yeke kiri ti mû na mo royaume ti mo”

Na ngoi so prophétie so aga tâ tënë ti kozoni . . .

• (D) Keke ni aye ti sara tënë ti zo wa? —Bâ versê 22.

• (E) Lawa la a kaï komandema ti lo?​—Diko Daniel 4:29-33.

• (F) Nyen la asi na Nébucadnezzar na hunzingo ti “angoi mbasambala”?​—Diko Daniel 4:34-36.

PROPHÉTIE NI AGA TÂ TËNË TI KOZONI

Komandema

(D) Nébucadnezzar, Gbia ti Babylone

A kaï komandema ni

(E) Na peko ti ngu 606 K.N.E, fou atï na li ti Nébucadnezzar na lo lingbi pëpe ti komande ngu 7

A kiri na komandema ni

(F) Li ti Nébucadnezzar aga dä na lo kiri lo komanse ti komande

Na ngoi so prophétie so aga tâ tënë ti use ni . . .

• (G) Keke ni aye ti sara tënë ti azo wa?​—Diko 1 Chronique 29:23.

• (H) Lawa la a kaï komandema ti ala? E hinga tongana nyen so juska na ngoi so Jésus ayeke lani na sese ala yeke komande ape?​—Diko Luc 21:24.

• (I) A kiri na komandema ni lawa nga na ndo wa?

PROPHÉTIE NI AGA TÂ TËNË TI USE NI

Komandema

(G) Agbia ti Israël akomande na iri ti Nzapa

A kaï komandema ni

(H) A futi Jérusalem, komandema ti agbia ti Israël akaï teti ngu 2 520

A kiri na komandema ni

(I) Jésus akomanse ti komande na yayu tongana Gbia ti Royaume ti Nzapa

5. Dunia achangé ngbene ye na ngu 1914 ti ga na ni

Zia VIDÉO ni.

VIDÉO: Dunia achangé ngbene ye na ngu 1914 ti ga na ni (1:10)

Jésus afa lani awe aye so ayeke si na yâ ti dunia, so a yeke bâ ni polele na peko ti so lo ga Gbia. Diko Luc 21:9-11, na pekoni kiri tënë na hunda so:

• Na popo ti aye so, ati so wa la mo bâ wala mo mä tënë ni?

Bazengele Paul afa sarango ye ti azo na lâ ti nda ni ti komandema ti azo. Diko 2 Timothée 3:1-5, na pekoni kiri tënë na hunda so:

• Na popo ti aye so, ati so wa la mo bâ na mbage ti azo laso?

6. Fa so mo mä na bê so Royaume ti Nzapa akomanse kua awe

Diko Matthieu 24:3, 14, na pekoni kiri tënë na ahunda so:

• Kota kua wa la afa so Royaume ti Nzapa akomanse kua awe?

• Mo peut ti mû mbage na kua so tongana nyen?

Royaume ti Nzapa akomanse kua awe, nga lango so a yeke komande sese kue aga nduru awe. Diko aHébreu 10:24, 25, na pekoni kiri tënë na hunda so:

• Nyen la e oko oko kue e doit ti sara, so e “bâ lango ni ayeke pusu nduru”?

NA NDURU TËNË

Aprophétie ti Bible nga na aye so ayeke passé na yâ ti dunia afa so Royaume ti Nzapa akomanse kua awe. E yeke fa so e mä na bê na tënë so tongana e yeke fa ni na azo nga e yeke gue na abungbi.

Dango bê

• Nyen la apassé lani na hunzingo ti angoi mbasambala so a sara tënë ni na mbeti ti Daniel?

• Nyen la asara si mo hinga biani so Royaume ti Nzapa akomanse ti komande na ngu 1914?

• Tongana nyen la mo peut ti fa so mo mä na bê so Royaume ti Nzapa akomanse kua awe?

GI NDA TI YE

Bâ aye so azo ti sungo mbaï nga na ambeni zo atene na ndö ti aye so achangé na yâ ti dunia ngbene ye na ngu 1914 ti ga na ni.

“Lawa la anzoni sarango ye ti azo akomanse ti kiri na gbe ni mingi?” (Zingo na lango! ti avril 2007)

Bâ tongana nyen la prophétie so ayeke na Matthieu 24:14 achangé gigi ti mbeni koli.

“Mbi ye pikango ballon ti maboko mingi ahon aye kue” (Tour ti Ba Ndo N° 3 2017)

E hinga tongana nyen so prophétie so ayeke na Daniel chapitre 4 abâ Royaume ti Nzapa?

“Royaume ti Nzapa akomanse ti komande lawa? (Mbage 1)” (Tour ti Ba Ndo ti lango 1 ti octobre 2014)

Nyen la afa so “angoi mbasambala” so a sara tënë ni na Daniel chapitre 4 ahunzi na ngu 1914?

“Royaume ti Nzapa akomanse ti komande lawa? (Mbage 2)” (Tour ti Ba Ndo ti lango 1 ti novembre 2014)

Royaume ti Nzapa akomanse ti komande awe. Fafadeso, Royaume ni ayeke sara akota changement na ndö ti sese. Zia e bâ ambeni nzoni ye so mo peut ti ku kungo ti wara na gbe ti Royaume ni.

1. Tongana nyen la Royaume ti Nzapa ayeke kiri ande na siriri nga na fango ngbanga ti mbilimbili na ndö ti sese?

Jésus, Gbia ti Royaume ti Nzapa, ayeke futi ande asioni zo nga na agouvernement na ngoi ti bira ti Harmaguédon (Apocalypse 16:14, 16). Na ngoi ni so, zendo ti Bible so ayeke ga tâ tënë kue kue kue: “Na yâ ti kete ngoi, azo ti sioni ayeke duti dä encore ape.” (Psaume 37:10). Na lege ti Royaume ni, Jésus ayeke sara ande kue ti tene siriri nga na fango ngbanga ti mbilimbili amû ndö ti sese kue.​—Diko Ésaïe 11:4.

2. Gigi ayeke duti ande tongana nyen na ngoi so a yeke sara na sese ye so bê ti Nzapa aye?

Na gbe ti Royaume ti Nzapa, “sese ayeke ga ande ye ti azo ti mbilimbili, na ala yeke ngbâ na ndö ni lakue lakue.” (Psaume 37:29). Imaginé so mo yeke vivre na yâ ti mbeni dunia so azo kue ayeke azo ti mbilimbili, ala ye Jéhovah nga na amba ti ala. Terê ti zo oko ayeke son ape, nga azo kue ayeke ngbâ na fini lakue lakue.

3. Nyen la Royaume ti Nzapa ayeke sara ande na peko ti so a futi azo ti sioni?

Na peko ti so a futi azo ti sioni, Jésus ayeke komande tongana Gbia ngu saki oko. Na ngoi ni so, lo na azo 144 000 so ayeke komande legeoko na lo ayeke aidé azo so ayeke na sese ti ga mbilimbili-kue. Na hunzingo ti ngu saki oko, sese kue ayeke ga mbeni pendere paradis nga azo kue ayeke duti na ngia ndali ti so ala mä yanga ti Jéhovah. Na pekoni, Jésus ayeke kiri na Royaume ni na Babâ ti lo, Jéhovah. Iri ti Jéhovah ayeke ga nzoni-kue na mbeni lege so ade asi lâ oko ape (Matthieu 6:9, 10). Jéhovah ayeke fa ande so lo yeke nzoni Gbia so ayeke pensé na azo ti lo. Na pekoni, Jéhovah ayeke futi Satan, asioni yingo nga na azo kue so asoro ti sara kpengba-li na komandema ti lo (Apocalypse 20:7-10). Anzoni ye so Royaume ti Nzapa aga na ni ayeke ngbâ ande lakue lakue.

GI TI HINGA AYE MINGI

4. Royaume ti Nzapa ayeke futi ande agouvernement ti azo

Bible atene: “Komandema ti zo na ndö ti mba ti lo aga gï na sioni na mba ti lo ni.” (Zo-ti-fa-tene 8:9). Jéhovah ayeke zi ande asioni ye kue so komandema ti zo aga na ni na lege ti Royaume ti lo.

Diko Daniel 2:44 nga na 2 aThessalonicien 1:6-8, na pekoni kiri tënë na ahunda so:

• Nyen la Jéhovah na Molenge ti lo, Jésus, ayeke sara ande na agouvernement ti azo nga na azo so amû maboko na ala?

• Tongana nyen la aye so mo manda na ndö ti Jéhovah na Jésus asara si mo hinga so aye so ala yeke sara ayeke duti ande na lege ni?

5. Jésus ayeke Gbia so ayeke nzoni mingi

Jésus so ayeke Gbia ti Royaume ti Nzapa ayeke sara ande anzoni ye mingi na azo ti lo so ayeke na sese. Zia VIDÉO ni ti bâ tongana nyen la Jésus afa awe so lo yeke na nzara ti mû maboko na azo nga so Nzapa amû na lo ngangu ti sara ni.

VIDÉO: Jésus afa lani aye so Royaume ti Nzapa ayeke sara ande (1:13)

Aye so Jésus asara lani na ngoi so lo yeke na sese afa aye so Royaume ti Nzapa ayeke sara ande. Na popo ti anzoni ye so a fa ge, ati so wa la mo yeke ku ni kungo? Diko aversê so ayeke na terê ti anzoni ye so, so afa ambeni ye na ndö ni.

6. Royaume ti Nzapa ayeke sara ande si gigi ti kekereke aduti tâ pendere mingi

VIDÉO: Kete yanga ti pendere gigi ti kekereke (4:38)

Diko Psaume 145:16, na pekoni kiri tënë na hunda so:

• So mo hinga so Jéhovah ayeke “mû na aye kue so ayeke na fini ye so ala sara nzara ni”, a sara mo tongana nyen?

NA NDURU TËNË

Royaume ti Nzapa ayeke sara ye so Nzapa aye ti tene a sara. A yeke sara ande si sese kue aga mbeni paradis so asi singo na anzoni zo so ayeke voro Jéhovah lakue lakue.

Dango bê

• Tongana nyen la Royaume ti Nzapa ayeke sara ande si iri ti Jéhovah aga nzoni-kue?

• Ngbanga ti nyen la e lingbi ti mä na bê so Royaume ti Nzapa ayeke sara ande si azendo so ayeke na yâ ti Bible aga tâ tënë?

• Na popo ti aye so Royaume ti Nzapa ayeke sara ande, ti so wa la mo yeke ku ni kungo?

GI NDA TI YE

Gi ti hinga Harmaguédon ayeke nyen?

“Bira ti Harmaguédon ayeke nyen?” (Article na ndö ti site)

Gi ti hinga aye so ayeke si ande na ngoi ti Komandema ti ngu saki oko ti Jésus nga na pekoni.

“Kota ye ti vundu ayeke nyen?” (Article na ndö ti site)

Bâ tongana nyen la asewa apeut ti imaginé so ala yeke na yâ ti Paradis.

Bâ terê ti mo na yâ ti paradis (1:50)

Na yâ ti article “Mbi yeke lani na ahunda mingi so asara si li ti mbi aga kirikiri,” gi ti hinga tongana nyen la mbeni zo ti poroso so asara kpengbango-li awara aye so lo yeke gi ni lani.

“Bible achangé fini ti azo” (Tour ti Ba Ndo ti lango 1 ti janvier 2012)