Bible atene nyen na ndö ti dutingo kumbamba nga na mariage?

Na ambeni ndo, ambeni zo apensé so zo ayeke duti na ngia gï tongana lo sara mariage. Ye oko, azo kue so asara mariage la ayeke na ngia ape nga akumbamba kue la ngia amanke ala ape. Ti tâ tënë ni, Bible atene so dutingo kumbamba nga na mariage ayeke cadeau so Nzapa amû na zo.

1. Ambeni nzoni ye ti dutingo kumbamba ayeke so wa?

Bible atene: “Zo kue so asara mariage, lo sara nzoni, me zo kue so asara mariage pëpe, lo yeke sara ande nzoni mingi.” (Diko 1 aCorinthien 7:32, 33, 38.) Na alege wa la mbeni kumbamba apeut ti ‘sara nzoni mingi’? A-Chrétien so ayeke kumbamba ayeke na wali wala koli ti bâ lege ti lo ape. Mingi ni, ala yeke na liberté mingi. Ambeni apeut ti sara aye mingi na yâ ti kua ti Jéhovah, ala peut ti sara aye so ayeke pendere mingi. Na tapande, ala peut ti gue na mbeni ndo nde ti fa nzoni tënë. Kota ye ni, ala peut ti mû ngoi mingi ti ga nduru na Jéhovah.

2. Ambeni nzoni ye ti sarango mariage alingbi na ndia ayeke so wa?

Legeoko tongana dutingo kumbamba, mariage ayeke nga na aye ti nzoni. Bible atene so “azo use ayeke nzoni ahon zo oko”. (Zo-ti-fa-tene 4:9). Tënë so ayeke tâ tënë ndali ti aChrétien so asara ye alingbi na amama-ndia ti Bible na yâ ti mariage ti ala. Azo so asara mariage alingbi na ndia amû zendo ti ne mba nga ti ye mba. A sara si, mingi ni ala bâ so ala duti nzoni mingi ahon azo so avivre ndo oko sân mariage. Amolenge ti ala ayeke bâ nga so ala duti nzoni mingi.

3. Jéhovah abâ mariage tongana nyen?

Na ngoi so Jéhovah abungbi lani koli na wali na yâ ti kozo mariage, lo tene: “Koli ayeke zia ande babâ na mama ti lo, lo yeke ngbâ ande na terê ti wali ti lo.” (Genèse 2:24). Jéhovah aye ti tene koli na wali aye terê nga ala ngbâ na terê ti mba na ngoi kue so ala ngbâ na fini. Lo mû lege na ala ti sara divorce gï tongana mbeni agi koli wala wali nde. Tongana a si tongaso, Jéhovah amû na zo so tënë ayeke na li ti lo ape droit ti mû desizion ti sara divorce wala pëpe.a (Matthieu 19:9). Jéhovah ake na aChrétien ti mû gbâ ti awali.​—1 Timothée 3:2.

GI TI HINGA AYE MINGI

4. Tongana mo yeke kumbamba, sara kua nzoni na cadeau so

Jésus abâ lani dutingo kumbamba tongana mbeni cadeau (Matthieu 19:11, 12). Diko Matthieu 4:23, na pekoni kiri tënë na hunda so:

• Tongana nyen la Jésus asara kua na cadeau ti lo so ayeke dutingo kumbamba ti sara kua na Babâ ti lo nga ti mû maboko na azo?

A-Chrétien so ayeke kumbamba alingbi ti duti na ngia tongana ala sara ye tongana ti so Jésus asara lani. Zia VIDÉO ni, na pekoni kiri tënë na hunda so:

VIDÉO: Akumbamba so ayeke be-ta-zo (3:11)

• Aye wa la aChrétien so ayeke kumbamba apeut ti sara so ayeke ga na ala ngia?

Mo hinga?

Bible afa ape na ngu oke la zo alingbi ti sara mariage. Ye oko, Bible awa amaseka ti ku juska ala “kpengba koli wala wali awe” si, ndali ti so tongana ala ngbâ maseka, nzara ti terê ti ala ayeke sara ala mingi na a yeke ngangu na ala ti mû nzoni desizion.​—1 aCorinthien 7:36.

5. Soro zo so mo ye ti sara mariage na lo na ndara

Ti soro zo so mo ye ti sara mariage na lo ayeke mbeni kota desizion so mo yeke mû. Diko Matthieu 19:4-6, 9, na pekoni kiri tënë na hunda so:

• Ngbanga ti nyen la a yeke nzoni mbeni Chrétien adö terê ti lo ti sara mariage ape?

Bible apeut ti aidé mo ti hinga asarango ye wa la ayeke sara si mbeni zo aduti mbeni nzoni koli wala wali ndali ti mariage. Kota ye ni ayeke ti gi mbeni zo so aye Jéhovah.b Diko 1 aCorinthien 7:39 nga na 2 aCorinthien 6:14. Na pekoni kiri tënë na ahunda so:

• Ngbanga ti nyen la a yeke nzoni e sara mariage gï na mbeni mba ti e Chrétien?

• Mo pensé a yeke sara Jéhovah tongana nyen tongana e soro ti sara mariage na mbeni zo so aye Lo ape?

6. Bâ mariage tongana ti so Jéhovah abâ ni

Na Israël ti ândö, ambeni koli asara divorce na awali ti ala ndali ti so ala pensé gï na nzoni ti ala wani. Diko Malachie 2:13, 14, 16, na pekoni kiri tënë na hunda so:

• Ngbanga ti nyen la Jéhovah ake divorce so ayeke na lege ni ape?

Zia VIDÉO ni, na pekoni kiri tënë na hunda so:

VIDÉO: Songo ti mariage adoit ti ngbâ lakue lakue (4:30)

• Tongana mo sara mariage awe na mbeni zo so ayeke Témoin ape, nyen la mo peut ti sara ti tene mariage ti mo aduti na ngia?

7. Sara ye alingbi na aye so Jéhovah ahunda na ndö ti mariage

VIDÉO: Mo peut ti sara ye alingbi na andia ti Jéhovah na ndö ti mariage (4:14)

Diko aHébreu 13:4, na pekoni kiri tënë na ahunda so:

• Mo pensé so andia ti Jéhovah na ndö ti mariage ayeke na lege ni? Ngbanga ti nyen?

Jéhovah ahunda na aChrétien so ayeke sara mariage wala divorce ti sara ni alingbi na ndia, ndali ti so na yâ ti akodro mingi, akota zo ti kodro ahunda ti sara ni tongaso. Diko Tite 3:1, na pekoni kiri tënë na hunda so:

• Tongana mo sara mariage awe, eskê mo yeke sûr so ndia ti kodro ayeda na ni?

NA NDURU TËNË

Ti duti kumbamba wala ti sara mariage ayeke acadeau so alondo na Jéhovah. Akumbamba nga na azo so asara mariage alingbi ti duti na ngia tongana ala sara ye so bê ti Jéhovah aye.

Dango bê

• Aye ti nzoni wa la mbeni zo so ayeke kumbamba apeut ti sara?

• Ngbanga ti nyen la Bible ahunda na e ti sara mariage gï na mbeni mba ti e Chrétien?

• Oko raison so ndali ni Bible amû lege na zo ti sara divorce ayeke so wa?

GI NDA TI YE

Ti sara mariage “gï na yâ ti Seigneur” aye ti tene nyen?

“Atënë so azo ahunda” (Tour ti Ba Ndo ti lango 1 ti juillet 2004)

Bâ avidéo ota so apeut ti aidé mo ti mû nzoni desizion na ndö ti bango terê ndali ti mariage nga na mariage.

Tongana nyen ti leke terê ti mo ndali ti mariage (17:05)

Bâ ndani so mbeni ita-koli abâ so ye so Jéhovah amû na lo ayeke kota mingi ahon ye kue so lo zia ni.

Mbi ye lani ti tene lo manda tâ tënë (1:56)

Aye wa la mbeni zo so aye ti sara divorce wala so aye ti kangbi na koli wala wali ti lo adoit ti bâ ni kozo si lo sara ni?

“Bâ na nene ni ‘ye so Nzapa abungbi na gbe ti joug oko’” (Tour ti Ba Ndo ti décembre 2018)