Aye ti ngangu ayeke si laso
BIBLE afa kozoni awe so fade “lâ ti ye ti ngangu” ayeke ga na ndo ti azo. Bible afa so ngoi ni so ayeke “lâ ti nda ni”. (2 Timothée 3:1-5; 2 Pierre 3:3-7). Jésus Christ asara lani tënë ti oko ngoi ni so tongana lo yeke kiri tënë na adisciple ti lo so ahunda lo na ndo ti “nda ti ngoi so”. (Matthieu 24:3). E yeke fadeso na lâ ti nda ni? Haka aye so Bible afa kozoni awe na aye so andangba gingo nda ti ye afa, na so ayeke na gbe ni ge. Na pekoni, gi mo wani ti bâ wala e yeke biani na lâ ti nda ni.
Ye so Bible afa kozoni awe: bira ayeke mû ndo kue—Luc 21:10; Apocalypse 6:4.
Aye so andangba gingo nda ti ye afa: “Wungo ti azo so akui ndali ti abira ti londo na ngu 1900 ti si na ngu 2000 ahon fani ota wungo ti azo so akui ndali ti abira ti londo na ngoi so a dü Jésus juska ti si na ngu 1900.”—Worldwatch Institute.
Ye so Bible afa kozoni awe: kota nzara nga na akobela—Luc 21:11; Apocalypse 6:5-8.
Aye so andangba gingo nda ti ye afa: Na ngu 2004, a tene so azo kutu 863 tongaso ayeke te kobe nzoni pëpe, so ti tene azo kutu 7 atï na ndo ti wungo ti azo ti ngu 2003.—Organisation des Nations unies pour l’alimentation et l’agriculture.
Azo ngbundangbu oko tongaso ayeke lango na yâ ti agbagbara da; azo ahon ngbundangbu use ayeke lango na ando so afungo ngu nga na azende ayeke dä; azo ahon ngbundangbu oko ayeke na nzoni ngu ti nyongo ni pëpe.—Worldwatch Institute.
Kobela ti palu ayeke sara azo kutu 500 tongaso; azo kutu 40 ayeke na kobela ti SIDA wala ayeke na makongo ni; kobela ti kota koro afâ azo ahon kutu oko na ndambo na ngu 2005.—Organisation mondiale de la santé.
Ye so Bible afa kozoni awe: bubango ti sese—Apocalypse 11:18.
Aye so andangba gingo nda ti ye afa: “Akua so azo ayeke sara alingbi ti sara si na yâ ti kete ngoi gbâ ti mara ti anyama nga na akeke nde nde ayeke duti ande dä mbeni pëpe.” “Na ndo ti sese kue, mingi ti aye ti nzoni so e yeke wara na lege ti aye so angoro e, na so ayeke bata e na fini, akiri na gbe ni.”—Millennium Ecosystem Assessment.
“Akua so azo ayeke sara asara si ala yeke tokua asioni pupu na lê ti nduzu na asara si ndowa nga na dê ayeke sara kirikiri nga ngu-nzapa ayeke pika ahon ndo ni. Aye so alingbi ti sara si sese ti e abuba.”—Institut Goddard de recherches spatiales, à la NASA.
Ye so Bible afa kozoni awe: a yeke fa nzo tënë ti Royaume ti Nzapa na ndo ti sese kue—Matthieu 24:14; Apocalypse 14:6, 7.
Aye so andangba gingo nda ti ye afa: Na ngu 2007, wungo ti aTémoin ti Jéhovah 6 957 854 amû angbonga nduru na ngbundangbu oko na ndambo ti fa nzo tënë ti Royaume ti Nzapa na yâ ti akodoro 236.—Annuaire des Témoins de Jéhovah 2008.
Tongana ti so e bâ na yâ ti aparagraphe so ahon awe, Bible afa kozoni awe so atâa so asioni sango ayeke dä mingi, nda ti tënë ayeke dä ti tene e bâ gigi ti e ti kekereke na nzoni ni. Jésus asara tënë ti “nzo tënë” ti Royaume ti Nzapa. Royaume ti Nzapa ni ayeke nyen? Ngbanga ti nyen a mû na azo beku ti mbeni nzoni kekereke? Na ndo ni, Royaume ti Nzapa ayeke sara ande nyen teti mo?
[Kete tënë na lembeti 5]
Bible afa kozoni awe aye so e yeke bâ laso na ndo ti sese