Azo ahunda atene . . . 

A-Témoin ti Jéhovah afa tënë da na da ngbanga ti nyen?

▪ Na yâ ti Bible, e wara commandement so Jésus amû lani na adisciple ti lo, lo tene: “Ala gue, ala sara si azo na popo ti amara kue aga adisciple. Ala fa [ye na ala].” (Matthieu 28:19, 20). Commandement so andu aChrétien kue? Akozo disciple ti Jésus amä yâ ni tongaso. Na tapande, bazengele Pierre atene: “Lo [Jésus, lo] mû yanga na e ti fa tënë na azo na ti fa nda ti tënë ni kue.” (Kusala 10:42). Bazengele Paul nga atene: “A yeke ye so a hunda na mbi ti sara ni la. Biani, mawa na mbi tongana mbi fa nzoni tënë pëpe!”​—1 aCorinthien 9:16.

Me a yeke gi Paul na Pierre la si asara ye tongaso pëpe. Tanga ti aChrétien kue ti ngoi ni kâ asara tongaso nga. Fango tënë ayeke lani kua so ayeke kota ahon atanga ni kue na lê ti ala (Kusala 5:28-32, 41, 42). Laso, aTémoin ti Jéhovah nga kue ayeke gi ti sara tongaso. Gi oko tënë so Jésus afa lani la si ala yeke fa ni, so ti tene “royaume ti yayu”.​—Matthieu 10:7.

Na azo wa la si a lingbi a fa tënë ti Royaume ni na ala? Jésus afa so a lingbi a fa ni na azo kue na ndo kue. Lo tene na adisciple ti lo: “Ala yeke duti atémoin ti mbi . . . juska na ambage ti sese so ayeke tâ yongoro.” (Kusala 1:8). Lo tene nga so kozo si a futi dunia so, “a yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin”. (Matthieu 24:14). Ni la lani akozo Chrétien ayeke sara kue ti fa tënë na azo kue, pëpe gi na azo so ala hinga ala wala na azo so ayeke na yâ ti mbeni bungbi ti vorongo Nzapa pëpe (aColossien 1:23; 1 Timothée 2:3, 4). Laso nga, aTémoin ti Jéhovah ayeke sara kue ti ndu azo kue.a

Nzoni kode ti fango na tënë ti Royaume ayeke so wa? Jésus, lo so ahinga tongana nyen ti ndu azo mingi, atokua lani adisciple ti lo na yâ ti agbata, akete kodoro nga na ayanda-da ti azo (Matthieu 10:7, 11, 12). Na peko ti so lo zingo na kuâ, adisciple ti lo azia lege ti fango tënë “da na da” pëpe (Kusala 5:42). Tongana ti Jésus, ala nga kue afa tënë na alege kue so azi na ala nga na ando so a wara gbâ ti azo dä (Jean 4:7-26; 18:20; Kusala 17:17). Laso, aTémoin ti Jéhovah ayeke sara nga tongaso ti fa tënë na azo kue.

Jésus atene lani so azo kue la ayeke ye ande dä ti mä tënë ni so pëpe (Matthieu 10:14; 24:37-39). A yeke nzoni bê ti e anze? Bâ tapande so: Mo yeke na popo ti azo so ayeke gi azo so mbeni kota bateau atuku na ala. Mo yeke zia lege ti gingo azo ni gi ngbanga ti so a wara gi ala kete? Oko ape! Tongana mo hinga mo tene beku ayeke dä ti wara kamême mbeni zo, mo yeke ngbâ ti gi ala. Ti Jésus nga kue, lo tene na adisciple ti lo so tongana beku ti warango mbeni zo so ayeke mä ande nzoni tënë ti Royaume ayeke dä, a yeke nzoni ala ngbâ lakue ti fa tënë ni (Matthieu 10:23; 1 Timothée 4:16). Na gingo mara ti azo tongaso da na da, aTémoin ti Jéhovah afa so ala ye Nzapa nga na amba ti ala azo, teti so azo ni so ayeke ngbâ na fini gi tongana ala yeda na nzoni tënë ti Royaume ni.​—Matthieu 22:37-39; 2 aThessalonicien 1:8.

Mbeti so ayeke na maboko ti mo so afa tâ gi nzoni tënë ti Royaume so. Ti hinga ye mingi na ndo ni, hunda ni na aTémoin ti Jéhovah tongana ala si na yanga-da ti mo, wala tokua mbeti na ala.

[Kete tënë na gbe ni]