Sango na ndo ti mbaï ti bungbi ti e

Voyage na apèlerin

“MBI peut ti gue da na da ape!” Tongana a ndu tënë ti fango tënë da na da na azo so e hinga ala pëpe, afini wafango tënë mingi ayeke pensé tongaso. Me, mbeni ita so ayeke pèlerin so ayeke mbeni nzoni wamungo diskur nga so ayeke fa ye na ndo ti Bible la atene tënë so ayeke na nduzu ge so.

Azo mingi so ayeke diko Tour ti Ba Ndo (Zion’s Watch Tower) na so azia a-eglize ti ala aye lani mingi ti bungbi oko na azo so ayeke nga na nzara ti tâ tënë so ayeke na yâ ti Bible. Tour ti Ba Ndo awa azo so ayeke diko ni ti gi ambeni zo so ayeke nga na kpengba mabe ti bungbi lakue ti manda Bible. A to nda ni na ngu 1894, Sociéte Watch Tower atokua ambeni zo so ayeke gue na ando nde nde ti bâ agroupe so ahunda ti tene a sara vizite na ala. Aita-koli so ahinga kua ti ala nzoni nga ala sara kua ngangu. Na pekoni a iri ala apèlerin. A soro ala ndali ti so ala sara tere ti ala kete, ala hinga Bible nzoni, ala hinga ti sara tënë nga ti fa ye nzoni nga ala mä na bê na ngere so a futa ti zi na azo. Vizite ni ayeke ninga gi lango oko wala use, me na ngoi ni a yeke sara aye mingi. A-Wamandango Bible mingi ato nda ti kozo fango tënë ti ala na kangbingo na azo ambeti ti tisango ndo ti tene ala ga amä diskur ti pèlerin. Na pekoni so ita Hugo Riemer, so na pekoni aga membre ti Bebungbi, amû diskur ti lo na lakui na yâ ti mbeni ekole, lo kiri tënë na atënë so azo ahunda na ndo ti Bible juska bê ti bï ahon. Lo nze me lo yeke na ngia na lo tene so bungbi ni ayeke “pendere mingi.”

Tour ti Ba Ndo atene so kota ye ti nzoni so vizite ti apèlerin aga na ni ayeke ti kpengba awakua ti Nzapa na lege ti abungbi so a yeke sara ni na yâ ti da ti aita. A-Wamandango Bible ti ando so ayeke nduru na ndo ni ayeke ga ti mä adiskur nga na abungbi so na ngoi ni a yeke kiri tënë na atënë so azo ahunda. Na pekoni aita ayeke bungbi ti te kobe. Ita-wali Maude Abbott so ade lani maseka ague amä diskur ti ndapre so na pekoni azo kue abungbi na tere ti mbeni yongoro table na gigi ti te kobe. Lo tene: “Mo yeke wara gbâ ti apendere kobe: jambon, yorongo kondo, mara ti amapa nde nde nga na agâteau. Zo oko oko ate ye alingbi na lo, nga nduru na ngbonga use ti peko ti midi e kiri e bungbi ti mä mbeni diskur.” Lo tene nga so “na pekoni lê ti azo ni ane na lango.” Benjamin Barton, mbeni pèlerin so aninga na yâ ti kua ni, atene: ‘Tongana mbi te lani anzoni ye kue so a mû na mbi, ka mbi kui depuis awe.’ Mbeni lettre so alondo na kota ndokua ti e na Brooklyn amû wango na aita-wali so ayeke na nzoni bê so a yeke duti nzoni mingi ti tene azo kue abi bê ti ala ti mû na apèlerin “senge kobe so azo ayeke te lâ oko oko” nga ti sara si “ala lango nzoni.”

Apèlerin ahinga ti fa ye nzoni mingi nga ti sara kusala na acarte, atapande nga na aye kue so ayeke nduru na ala ti sara si azo agbu nda ti ye so ala yeke fa. R. H. Barber ayeke mû lakue adiskur na mbeni lege so andu bê ti zo. W. J. Thorn ayeke sara tënë “tongana mbeni babâ ti sewa ti ngoi ti giriri.” Mbeni lâ, na ngoi so Shield Toutjian ayeke na yâ ti mbeni oto, gi hio tongaso lo dë kongo, lo tene: “Luti!” Lo zu na sese, lo fâ ambeni fleur ti ngonda na lo fa ye na amba ti lo na ndo ti aye so Jéhovah acréé.

Kua ti pèlerin ayeke ngangu mingi, mbilimbili na azo so akpengba awe wala ala so ngu ti ala ague na li ni kete. Ye oko, ti ambeni, kpale so ayeke ngangu mingi ayeke gbiango ye so a ga na ni na yâ ti kusala ti ala. A hunda fadeso ti tene ala mû li ni na yâ ti kua ti fango tënë da na da. Tour ti Ba Ndo ti lango 15 ti mars ti ngu 1924 na Anglais atene so “mbeni kota kusala” ti atâ Chrétien “ayeke ti fa tënë ti Royaume. A tokua apèlerin ti sara kusala so.”

Na bango ni ambeni pèlerin ni aye tënë ti gbiango ye so pëpe ndali ti so ala zia kua ti ala ti guengo na ando nde nde. Ambeni so tënë ni anzere na ala pëpe ague asigigi na bungbi ti ala wani. Ita Robie D. Adkins atene so mbeni pèlerin so ândö ayeke mbeni nzoni wamungo diskur adema na vundu na bê atene: “Mbi hinga gi ti luti na ndo ti estrade ti fa tënë awe. Mbi peut ti gue da na da ape!” Adkins akiri atene: “Na pekoni mbi bâ lo na kota bungbi ti district ti ngu 1924 na Columbus na Ohio. Lo luti lo oko na gbe ti dê ti mbeni kete keke. Lo oko la lo yeke na ngia pëpe na popo ti aita saki mingi so ayeke lani dä. Na pekoni mbi kiri mbi bâ lo ape. Kete na pekoni, lo dö bungbi lo zia.” Me, “aita mingi so ayeke na ngia ayô ambeti ague na ni na yâ ti a-oto ti ala”. Mo bâ ala, ala yeke na ngia ti gue ti fa tënë da na da.​—Kus. 20:20, 21.

Atâa so apèlerin mingi nga na aita so a tokua apèlerin ni ti fa ye na ala asara mbeto ti fa tënë da na da, ala kue amû bê ti ala na kua ni. Ita Maxwell G. Friend (Freschel) so ayeke tene Allemand asara tënë ti fango tënë da na da lo tene: “So ayeke mbeni oko ti aye ti nzoni so apèlerin awara.” Pèlerin John A. Bohnet atene so mingi ti aita ayeda na bê ti ala kue so bungbi ti Jéhovah aluti mingi na ndo ti fango tënë ti Royaume. Lo tene so gbâ ti aita ayeke na nzara mingi ti gue ti fa tënë da na da.

Teti angu mingi, aita so ague na ando nde nde asara si aita mingi andoye fango tënë da na da. Norman Larson, mbeni Témoin so aninga na yâ ti bungbi, atene: ‘Apèlerin amû maboko mingi na yâ ti bungbi, même na ngoi so mbi de maseka mbi bâ ni. Ala mû maboko na mbi mingi ti tene mbi mû nzoni lege.’ Juska laso, aita so so asara asacrifice nga na asurveillant so angbâ ti gue na ando nde nde ayeke mû maboko na aita ti tene ala tene: “E peut ti gue da na da!”

[Tënë na lembeti 32]

Tongana pèlerin asi na mbeni ndo, aita ti ndo ni ayeke na ngia na lango ni so

[Foto na lembeti 31]

Na ngu 1905 Benjamin Barton asi na ando 170

[Foto na lembeti 32]

Walter J. Thorn ayeke mbeni Pèlerin so azo airi lo Pappy ndali ti so lo sara ye tongana mbeni babâ so asara ye tongana ti Christ

[Foto na lembeti 32]

J. A. Browne na ngu 1902, a tokua lo tongana pèlerin na Jamaïque ti kpengba akete groupe 14

[Foto na lembeti 32]

Kua ti pèlerin akpengba mabe nga na dutingo beoko ti aChrétien na asara si aita akiri aga nduru mingi na bungbi ti Jéhovah