Aye so apusu azo ti tene so Nzapa ayeke sioni

NZAPA ayeke sioni? Hundango tënë so asara nyen na ndo ti mo? Ti ambeni zo, Nzapa alingbi ti duti sioni oko ape. Ambeni atene ti ala so Nzapa ayeke ti lo gi sioni. Nyen la apusu ala ti tene tënë tongaso?

Ambeni zo so ye ti ngangu asi na ala ayeke hunda tere ti ala atene: “Nyen la si Nzapa azia si mara ti aye tongaso asi na e so? Lo yeke bâ nga mawa ti e ape?”

Ti ambeni ayeke gi na peko ti so ala diko Bible. Na tapande, tongana ala diko mbaï ti Kota Ngu so apika lani na ngoi ti Noé, ala yeke tene: “Tongana Nzapa aye azo, nyen la si lo kiri lo fâ gbâ ti azo so kue tongaso? Ye ni mawa ti azo asara lo ape?”

Mo kue mo hunda tere ti mo na atënë so awe? Tongana ambeni zo ahunda tere ti ala atene, ‘Nzapa ayeke sioni?’, mo wani mo bâ so kiringo tënë ni akara mo? Atâa a yeke so wa, bâ mbeni hundango tënë ni nde so alingbi ti mû maboko na mo.

E AZO E YE KA SIONI YE APE NGBANGA TI NYEN?

E ye ka sioni ye ape ngbanga ti so e hinga ti sara kangbi na popo ti nzoni na sioni. E yeke nde mingi na anyama, teti so Nzapa asara e na “image ti Lo mveni.” (Genèse 1:27). A ye ti tene so Nzapa aleke e ti tene e sara ye tongana ti lo, nga lo mû na e ndara ti hinga ti sara kangbi na popo ti nzoni na sioni. Bâ tënë so si: So Nzapa la si amû na e ndara ni so, a yeke nzere ka na e ape ti bâ aye ti sioni so ayeke si. Ti Nzapa nga kue ayeke tongaso ape?

Bible afa so ti lo nga kue ayeke tongaso, teti Nzapa lo wani atene tënë so: “Lege ti Mbi ayeke na nduzu ahon lege ti i, na bibe ti Mbi ayeke na nduzu ahon bibe ti i.” (Ésaïe 55:9). Tongana e tene Nzapa ayeke sioni, andâ e yeke tene so lege ti e la ayeke na nduzu mingi ahon ti lo. A yeke nzoni ti bâ ambeni ye kozoni awe si e tene mara ti tënë tongaso. Ni la, ahon ti tene e tene Nzapa ayeke sioni, a yeke peut-être nzoni ti hunda tere ti e, ‘Ngbanga ti nyen ambeni ye so lo sara akpa mo bâ mo tene lo yeke sioni?’ Ti hinga tënë so nzoni, zia e hinga kozoni kue nda ti tënë “sioni.”

Tongana e tene zo tongaso ayeke sioni, andâ e tene so sioni bê ti lo la asara si lo ga tongaso. Sioni zo ayeke zo so a nzere na lo nzerengo ti bâ ambeni zo na yâ ti pasi na ye so asara ye oko na ndo ti lo ape. Na tapande, mbeni babâ so ase molenge ti lo gi ti son bê ti molenge ni, lo yeke sioni babâ. Me babâ so ase molenge ti lo ndali ti so lo ye ti fa lege na lo wala lo ye si sioni ye asi na molenge ni ape ayeke mbeni nzoni babâ. Tongana a si na mo awe so mbeni zo afâ ngbanga hio na ndo ti mo, mo yeke hinga so a yeke ngangu pëpe na zo ti fâ ngbanga hio na ndo ti mba ti lo.

Fadeso zia e bâ araison use so ndali ni ambeni zo apensé ti ala atene Nzapa ayeke sioni. Kozoni ayeke aye ti ngangu so ayeke si laso, na use ni angbanga so Nzapa afâ ândö na ndo ti azo so Bible asara tënë ni. Aye ni so afa biani atene Nzapa ayeke sioni?