Kiri mo leke songo ti mo ti kamarade na Jéhovah

NGU oko oko, a yeke kiri na gbâ ti ataba ti Jéhovah so lo ye ala mingi na bungbi. Imaginé kota ‘ngia so ayeke na yayu’ na ngoi so ala oko oko kue ayeke kiri na bungbi (Luc 15:7, 10). Tongana a kiri na mo na bungbi, hinga na bê ti mo kue so Jésus, a-ange nga na Jéhovah ayeke na ngia mingi ti bâ so mo kiri na bungbi. Me na ngoi so mo kiri mo yeke leke songo ti mo na Jéhovah, mo peut ti wara akpale. Ambeni kpale ni ayeke so wa? Nyen la apeut ti aidé mo?

AKPALE NI AYEKE SO WA?

Aita mingi atiri na asioni pensé na peko ti so ala kiri na bungbi. Peut-être mo comprendre Gbia David. Même na peko ti so a pardonné lo ndali ti asiokpari so lo sara, lo tene: “Afaute ti mbi ahon ndö ti mbi awe.” (Ps. 40:12; 65:3). Na peko ti so mbeni zo akiri na Jéhovah, lo peut ti ngbâ ti bâ so tënë ayeke na li ti lo wala kamene asara lo teti angu mingi. A bi lani Isabelle na gigi ahon ngu 20.a Lo tene: “A yeke ngangu na mbi ti yeda so Jéhovah apeut ti pardonné mbi.” Tongana mo découragé, songo ti mo ti kamarade na Jéhovah apeut ti kiri ti woko (aProv. 24:10). Zia pëpe si ye tongaso asi na mo.

Mbeto asara ambeni ita ndali ti so ala bâ so ala lingbi pëpe ti sara aye kue so ala doit ti sara ti kiri ti leke songo ti ala na Jéhovah. Na peko ti so a kiri na Antoine na bungbi, lo tene: “Mbi girisa gbâ ti aye so mbi manda wala mbi sara na ngoi so mbi yeke lani Témoin.” So ambeni ita ayeke na apensé so, ala sara pëpe ye kue so ala peut ti sara ndali ti Jéhovah.

Na tapande, mbeni zo so kota pupu abuba mingi da ti lo so lo ye ni mingi apeut ti sara mbeto tongana lo gbu li na ndö ti ngoi nga na effort so lo doit ti sara ti kiri ti leke da ni. Legeoko nga, tongana mo bâ so songo ti mo na Jéhovah abuba ndali ti mbeni kota siokpari so mo sara, mo peut ti bâ so a hunda kua mingi ti tene mo kiri mo leke ni. Me mo yeke sara ni mo oko ape.

Jéhovah atisa e, atene: “Ala ga, e leke tënë.” (És. 1:18). Mo sara ngangu mingi awe ti “leke tënë” ni. Jéhovah aye mo ndali ti effort so mo sara so. Gbu gï li kete: Mo sara mbeni ye so amû lege na Jéhovah ti kiri tënë na Satan so abi tënë na li ti lo.—aProv. 27:11.

So mo kiri na Jéhovah, mo ga nduru mingi na lo, na lo mû zendo ti ga nga nduru na mo (Jacq. 4:8). A yeke nzoni so aita ahinga so mo kiri na bungbi awe, me mo bezoin ti sara ambeni ye. Mo bezoin ti ngbâ ti ye mingi Babâ ti mo nga Kamarade ti mo Jéhovah. Mo peut ti sara ni tongana nyen?

ZIA NA GBELE MO AMBENI YE SO MO PEUT TI SARA

Gi ti zia na gbele mo ambeni ye so mo peut ti sara. Peut-être ade mo girisa ape akozo ye so mo manda na ndö ti Jéhovah nga na zendo so lo mû na ndö ti Paradis. Me fadeso, mo bezoin ti kiri ti sara anzoni ye so mo yeke sara lani, na tapande ti fa tënë lakue, ti gue na abungbi nga ti mû ngoi ti duti na aita. Bâ ambeni ye so mo peut ti zia na gbele mo ti sara.

Sara tënë na Jéhovah fani mingi. Babâ ti mo ahinga so tongana mo ngbâ ti bâ so tënë ayeke na li ti mo ndali ti sioni so mo sara, a peut ti duti ngangu na mo ti sambela lo (aRom. 8:26). Me “ngbâ lakue ti sambela”, fa na Jéhovah so mo ye mingi ti duti kamarade ti lo (aRom. 12:12). Andrej atene: “Mbi bâ so tënë ayeke na li ti mbi mingi nga kamene asara mbi mingi. Na peko ti sambela oko oko so mbi sara, mbi bâ so mbi yeke nzoni. Mbi bâ so mbi yeke na siriri ti bê ahon ti kozo.” Tongana mo hinga ape ye so mo peut ti sambela ndali ni, gbu li na ndö ti asambela so Gbia David so achangé bê ti lo asara so ayeke na Psaume chapitre 51 nga na chapitre 65.

Manda Bible lakue. A yeke sara si mabe ti mo akpengba nga mo ye Jéhovah mingi (Ps. 19:7-11). Felipe atene: “So mbi yeke lani pëpe na nzoni kapa ti dikongo Bible nga na ti mandango ni, mbi woko nga mbi zia vundu na bê ti Jéhovah. Mbi ye ti zia vundu na bê ti Jéhovah encore ape, tongaso mbi sara kue ti manda Bible lakue.” Mo nga kue mo peut ti sara tongaso. Tongana mo bezoin mungo maboko ti hinga tënë so mo peut ti manda ye na ndö ni, hunda na mbeni kamarade ti mo so ayeke na kpengba songo na Jéhovah ti aidé mo.

Kiri mo sara kamarade na aita. Ambeni ita so akiri na bungbi ayeke gi bê ti ala so aita ayeke duti na sioni bango ndo na ndö ti ala. Larissa atene: “Kamene ahon lani ndö ti mbi. Mbi bâ so mbi zia vundu na bê ti aita. Tënë so angbâ na li ti mbi aninga.” Hinga na bê ti mo kue so a-ancien nga na aita aye mingi ti aidé mo ti kiri ti duti na songo na Jéhovah. (Bâ encadré “Aye so a-ancien apeut ti sara.”) Ala yeke na ngia so mo kiri na Jéhovah, nga ala ye ti tene mo duti na ngia.—aProv. 17:17.

Tongana nyen la mo peut ti ga nduru mingi na aita? Gue lakue na abungbi legeoko na aita nga fa tënë lakue legeoko na ala. Ye so ayeke aidé mo tongana nyen? Felix atene: “Aita ayeke ku lani kungo ti tene mbi kiri na bungbi. Mbi bâ so ala ye mbi. Ala kue a-aidé mbi ti bâ so place ti mbi ayeke na yâ ti congrégation, a pardonné mbi awe nga ti ngbâ ti sara na Jéhovah.”—Bâ encadré “Aye so mo peut ti sara.”

DÉCOURAGÉ APE

Satan ayeke ngbâ ti ga na mo akpale ti gi ti woko mo na ngoi so mo yeke gi ti kiri ti duti na songo na Jéhovah (Luc 4:13). Duti nduru na lege so mo gi ti duti na kpengba songo na Jéhovah laso.

Jéhovah atene na ndö ti ataba ti lo, atene: “Taba so agirisa, mbi yeke gi peko ti lo. Lo so ahon yongoro, mbi yeke mû lo ti kiri na lo. Lo so awara kä, mbi yeke kanga lê ti kä ni. Lo so awoko, mbi yeke mû ngangu na lo.” (Ézéch. 34:16). Jéhovah a-aidé gbâ ti aita ti kiri ti duti na nzoni songo na lo. Hinga na bê ti mo kue so lo ye ti aidé mo ti kiri ti duti na kpengba songo na lo ahon ti kozo.