သတင်းကောင်းကို ဝေမျှနိုင်ပုံ

ကျမ်းစာအမှန်တရားကို သိလာတဲ့အခါ ‘ဒီအကြောင်း လူတိုင်း သိရင် ကောင်းမှာပဲ’ လို့ တွေးမိနိုင်တယ်။ လူတိုင်း သိဖို့လိုတာ မှန်တယ်။ ဒါပေမဲ့ ကိုယ်သိထားတာတွေကို တခြားသူတွေကို ပြောပြဖို့ စိုးရိမ်မိနိုင်တယ်။ စိုးရိမ်စိတ်ကို တိုက်ထုတ်ပြီး ကျမ်းစာမှာပါတဲ့ သတင်းကောင်းကို ဝမ်းမြောက်ဝမ်းသာ ဟောပြောနိုင်ပုံအကြောင်း သုံးသပ်ကြစို့။

၁။ လေ့လာခဲ့တာတွေကို အသိအကျွမ်းတွေကို ဘယ်လို ဝေမျှနိုင်မလဲ။

“ကျွန်တော်တို့ကတော့ ကြားခဲ့မြင်ခဲ့တာတွေကို မဟောဘဲ မနေနိုင်ပါဘူး” လို့ ယေရှုတပည့်တွေ ပြောတယ်။ (တမန်တော် ၄:၂၀) အမှန်တရားကို တန်ဖိုးထားလွန်းလို့ လူများနိုင်သမျှ များများကို ဝေမျှချင်ကြတယ်။ သင်ကော အဲဒီလို ခံစားရသလား။ ဒါဆိုရင် ကိုယ်သိထားတာတွေကို မိသားစုနဲ့ မိတ်ဆွေတွေ သိအောင် လေးလေးစားစား ပြောဖို့ အခွင့်အရေး ရှာပါ။​—ကောလောသဲ ၄:၆ ကို ဖတ်ပါ။

၂။ အသင်းတော်နဲ့အတူ ဟောဖို့ ပန်းတိုင်ထားတာက ဘာကြောင့် အကျိုးရှိသလဲ။

ယေရှုရဲ့တပည့်တွေဟာ အသိအကျွမ်းတွေကိုပဲ ဟောတာ မဟုတ်ဘူး။ ယေရှုက တပည့်တွေကို “မြို့ရွာတွေဆီ နှစ်ယောက်တစ်တွဲ ကြိုလွှတ်လိုက်တယ်။” (လုကာ ၁၀:၁) ဒီလို စနစ်တကျဟောတဲ့အတွက် လူများစွာ သတင်းကောင်းကြားခွင့် ရကြတယ်။ အတူဟောတာက တပည့်တွေကို အလွန်ပျော်ရွှင်စေတယ်။ (လုကာ ၁၀:၁၇) သင်လည်း အသင်းတော်နဲ့အတူ ဟောဖို့ ပန်းတိုင်ထားနိုင်မလား။

ရှာဖွေလေ တွေ့ရှိလေ

၃။ ယေဟောဝါ အတူရှိနေမယ်

တချို့က ဟောချင်ပေမဲ့ လူတွေ ဘယ်လို မြင်မလဲ၊ ဘယ်လို တုံ့ပြန်မလဲဆိုပြီး စိုးရိမ်မိနိုင်တယ်။

• သိလာတာတွေကို ဝေမျှဖို့ စိုးရိမ်နေသလား။ ဘာကြောင့်လဲ။

ဗီဒီယို ဖွင့်ပါ။ ပြီးတဲ့နောက် အောက်ပါမေးခွန်းကို သုံးသပ်ပါ။

ဗီဒီယို။ သတ္တိရှိဖို့ ယေဟောဝါဆီ ဆုတောင်းခဲ့ (၄:၀၅)

• ဒီသက်သေခံလူငယ်တွေ ကြောက်စိတ်ကို ဘယ်လို တိုက်ထုတ်ခဲ့ကြသလဲ။

ဟေရှာယ ၄၁:၁၀ ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ဟောဖို့ ကြောက်နေရင် ဆုတောင်းတာက ဘယ်လို အကူအညီ ဖြစ်စေမလဲ။

စိတ်ဝင်စားစရာအချက်

သတင်းကောင်း ဟောရဲမှာ မဟုတ်ဘူးလို့ သက်သေခံအများစု ယူဆခဲ့ဖူးတယ်။ ဆာဂေးဟာ ကိုယ့်ကိုယ်ကိုယ် ယုံကြည်စိတ်ချမှု မရှိဘူး။ ပြောရဲဆိုရဲ မရှိဘူး။ ကျမ်းစာ လေ့လာပြီးနောက်မှာတော့ “ကြောက်ပေမဲ့ ကိုယ်သိလာတာတွေကို တခြားသူတွေကို ပြောပြတယ်။ အဲဒီအခါ ကိုယ့်ကိုယ်ကိုယ် ယုံကြည်စိတ်ချမှု ရှိလာပြီး ယုံကြည်ခြင်း ပိုခိုင်မာလာတယ်” လို့ သူပြောတယ်။

၄။ လေးစားမှု ရှိပါ

သတင်းကောင်း ဟောတဲ့အခါ ပြောမယ့်အကြောင်းကိုသာမက ဘယ်လိုပြောမလဲဆိုတာကိုပါ စဉ်းစားပါ။ ၂ တိမောသေ ၂:၂၄ နဲ့ ၁ ပေတရု ၃:၁၅ တို့ကို ဖတ်ပါ။ ပြီးတဲ့နောက် ဒီမေးခွန်းတွေကို သုံးသပ်ပါ။

• ကျမ်းစာအကြောင်း ပြောတဲ့အခါ ဒီကျမ်းပိုဒ်တွေကို ဘယ်လို လက်တွေ့ ကျင့်သုံးနိုင်မလဲ။

• ကိုယ်ဟောတာကို မိသားစုနဲ့ မိတ်ဆွေတချို့ လက်မခံတဲ့အခါ ဘာလုပ်နိုင်သလဲ။ ဘာမလုပ်သင့်ဘူးလဲ။

• တဲ့တိုးမပြောဘဲ လိမ္မာပါးနပ်စွာ မေးခွန်းမေးတာက ဘာကြောင့် ပိုကောင်းသလဲ။

၅။ သတင်းကောင်း ဟောခြင်းက ပျော်ရွှင်စေ

ယေဟောဝါက ယေရှုကို သတင်းကောင်း ဟောတဲ့အလုပ် ပေးခဲ့တယ်။ ဒီအလုပ်ကို ယေရှု ဘယ်လို သဘောထားသလဲ။ ယောဟန် ၄:၃၄ ကို ဖတ်ပါ။ ပြီးတဲ့နောက် ဒီမေးခွန်းတွေကို သုံးသပ်ပါ။

• အာဟာရရှိတဲ့အစာ စားတာက အသက်ရှင်စေရုံမက ပျော်ရွှင်စေတယ်။ ယေရှုက သတင်းကောင်းဟောခြင်းလိုမျိုး ဘုရားအလိုတော် ဆောင်တာကို အစာစားတာနဲ့ ဘာကြောင့် နှိုင်းယှဉ်ထားသလဲ။

• သတင်းကောင်း ဟောရင် ဘာပျော်ရွှင်မှုတွေ ခံစားရမယ် ထင်သလဲ။

အနှစ်ချုပ်

တခြားသူတွေကို သတင်းကောင်း ပြောပြတာက ပျော်ရွှင်စေတယ်။ ထင်သလောက် မခက်မှန်း သိလာမယ်။

ပြန်လည်သုံးသပ်ခြင်း

• တခြားသူတွေကို ဘာကြောင့် သတင်းကောင်း ပြောရမလဲ။

• ဘယ်လို လေးလေးစားစား ပြောနိုင်သလဲ။

• ဟောဖို့ ကြောက်နေရင် ဘာလုပ်နိုင်သလဲ။

လေ့လာစရာ ထပ်ဖွေရှာ

လက်လျှော့လိုက်ဖို့ စဉ်းစားခဲ့ပေမဲ့ အခုတော့ တခြားသူတွေကို ဟောပြောရတာ ကြိုက်နှစ်သက်နေပြီဖြစ်တဲ့ လူတစ်ယောက်အကြောင်း လေ့လာကြည့်ပါ။

“နားမကြားပေမဲ့ တခြားသူတွေကို သွန်သင်ပေးခဲ့” (ကင်းမျှော်စင်၊ မေ ၂၀၁၇)