ယာကုပ် မသေဆုံးခင် ပြောတဲ့စကားတွေကနေ သင်ယူနိုင်ရာများ—အပိုင်း ၁

၁-၂။ ယာကုပ် မသေဆုံးခင် ဘာလုပ်သလဲ။ ဘာကြောင့်လဲ။ (ရုပ်ပုံကိုလည်း ကြည့်ပါ။)

ယေဟောဝါဘုရားရဲ့ သစ္စာရှိကျေးကျွန် ယာကုပ်ဟာ ခါနန်ပြည်ကနေ အီဂျစ်ပြည်ကို အိမ်သားတွေနဲ့အတူ ပြောင်းလာတယ်။ (က. ၄၇:၂၈) သေပြီလို့ ထင်ထားတဲ့ သားယောသပ်နဲ့ ပြန်ဆုံပြီး မိသားစု လူစုံတက်စုံ ဖြစ်သွားလို့ သိပ်ဝမ်းသာရတယ်။ ဒီလိုနဲ့ နောက် ၁၇ နှစ်အကြာ မိမိ သေဆုံးတော့မယ်ဆိုတာ သိချိန်မှာ မှာစရာရှိတာ မှာခဲ့ဖို့ သားအားလုံးကို ခေါ်လိုက်တယ်။—က. ၄၉:၂၈။

^၂ အဲဒီခေတ်တုန်းက အိမ်ထောင်ဦးစီးတစ်ယောက် မသေဆုံးခင်မှာ မိသားစုဝင်တွေကို ခေါ်ပြီး အမှာစကားပြောတာ ထုံးစံပါပဲ။ (ဟေရှာ. ၃၈:၁) မိမိ သေဆုံးပြီးနောက် မိသားစုကို ဘယ်သူ ဦးစီးမလဲဆိုတာလည်း အဲဒီအချိန်မှာ မှာခဲ့တတ်တယ်။

၃။ ကမ္ဘာဦး ၄၉:၁၊ ၂ အရ ယာကုပ်ရဲ့ စကားတွေဟာ ဘာကြောင့် ထူးခြားသလဲ။

^၃ ကမ္ဘာဦး ၄၉:၁၊ ၂ ကို ဖတ်ပါ။ မိသားစုကို အမှာစကားပြောတာ အဲဒီခေတ်ထုံးစံ ဆိုပေမဲ့ ယာကုပ်ရဲ့ စကားတွေဟာ သိပ်ထူးခြားတယ်။ အနာဂတ်မှာ သားစဉ်မြေးဆက်တွေ ကြုံရမယ့် အရေးကြီး ဖြစ်ရပ်တွေအကြောင်း ပြောဖို့ ယာကုပ်ကို ယေဟောဝါ လှုံ့ဆော်ပေးလို့ပဲ။ ဒါကြောင့် ယာကုပ်ရဲ့ စကားတွေဟာ အမှာစကားသက်သက် မဟုတ်ဘဲ ကြိုဟောချက် ဖြစ်တယ်။

၄။ ဒီဆောင်းပါးမှာ ဘာအကြောင်း သုံးသပ်မလဲ။ (“ယာကုပ်ရဲ့ မိသားစု” လေးထောင့်ကွက်ကိုလည်း ကြည့်ပါ။)

^၄ ရုဗင်၊ ရှိမောင်၊ လေဝိ၊ ယုဒဆိုတဲ့ သားလေးယောက်ကို ယာကုပ် ဘာပြောသလဲဆိုတာ ဒီဆောင်းပါးမှာ သုံးသပ်သွားပါမယ်။ နောက်ဆောင်းပါးမှာတော့ ကျန်တဲ့သားရှစ်ယောက်ကို ဘာပြောသလဲဆိုတာ ဆွေးနွေးပါမယ်။ ယာကုပ်ရဲ့ စကားတွေဟာ သားတွေနဲ့သာမက အစ္စရေးလူမျိုး ဖြစ်လာမယ့် သူတို့ရဲ့ သားမြေးတွေနဲ့ပါ သက်ဆိုင်တယ်။ အစ္စရေးလူမျိုး သမိုင်းကြောင်းကို လေ့လာတဲ့အခါ ယာကုပ်ရဲ့ ကြိုဟောချက်တွေ တကယ် ပြည့်စုံလာမှန်း သိရမယ်။ ဒါ့အပြင် ကောင်းကင်ဘုံစံအဖ ယေဟောဝါရဲ့ စိတ်တော်နဲ့ တွေ့ဖို့ ဘာလုပ်ရမယ်၊ ဘာမလုပ်ရဘူးဆိုတာလည်း ယာကုပ်ရဲ့ စကားတွေကနေ သိရမယ်။

ရုဗင်

၅။ ရုဗင် ဘာမျှော်လင့်မိနိုင်သလဲ။

^၅ ‘မင်းဟာ ငါ့သားဦးပဲ’ ဆိုပြီး ရုဗင်ကို ယာကုပ် အမှာစကား အရင်ဆုံး ပြောတယ်။ (က. ၄၉:၃) သားဦး ဖြစ်လို့ ညီတွေထက် အမွေနှစ်ဆ ရမယ်လို့ ရုဗင် မျှော်လင့်မိနိုင်တယ်။ ဒါ့အပြင် ဖခင် သေဆုံးပြီးနောက် မိသားစုကို မိမိ ဦးစီးရမယ်၊ မိမိသားမြေးတွေကို ဦးစီးအရိုက်အရာ လက်ဆင့်ကမ်းရမယ်လို့လည်း မျှော်လင့်ထားမှာပဲ။

၆။ ရုဗင် ဘာကြောင့် သားဦးအခွင့်အရေး မရသလဲ။ (ကမ္ဘာဦး ၄၉:၃၊ ၄)

^၆ ရုဗင်ဟာ လေအာနဲ့ မွေးတဲ့ ယာကုပ်ရဲ့ သားဦး ဖြစ်ပေမဲ့ သားဦးအခွင့်အရေး မရဘူး။ (၁ ရာ. ၅:၁) လေအာရဲ့ ညီမရာခေလ သေဆုံးပြီးနောက် ရာခေလရဲ့ ကျွန်မဗိလဟာနဲ့ ရုဗင် လိင်အကျင့်ယိုယွင်းလို့ပဲ။ ဗိလဟာကို ယာကုပ်အတွက် ဇနီးမယားအဖြစ် ရာခေလ ပေးခဲ့တာ။ (က. ၃၅:၁၉၊ ၂၂) ဒီတော့ ရုဗင် လိင်အကျင့်ယိုယွင်းတဲ့ အကြောင်းရင်းက ရမ္မက် မထိန်းချုပ်နိုင်လို့ ဖြစ်နိုင်တယ်။ ဒါမှမဟုတ် ဖခင် သိပ်ချစ်တဲ့ ရာခေလ မရှိတော့တဲ့နောက်ပိုင်း မိခင်လေအာ ပိုအချစ်ခံရပြီး ဗိလဟာ အမုန်းခံရစေချင်လို့ ဖြစ်နိုင်တယ်။ ဘာအကြောင်းကြောင့်ပဲ ဖြစ်ဖြစ် ရုဗင်ရဲ့ လုပ်ရပ်ကို ယေဟောဝါကော ယာကုပ်ပါ တော်တော် စိတ်ပျက်သွားတယ်။—ကမ္ဘာဦး ၄၉:၃၊ ၄ ကို ဖတ်ပါ။

၇။ ရုဗင်ကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ (“ယာကုပ်ရဲ့ နောက်ဆုံးအမှာစကား” လေးထောင့်ကွက်ကိုလည်း ကြည့်ပါ။)

^၇ “ညီတွေထက် သာလွန်မှာ မဟုတ်ဘူး” လို့ ရုဗင်ကို ယာကုပ် ပြောတယ်။ ယာကုပ် ပြောတဲ့အတိုင်း ဖြစ်လာတယ်။ ရုဗင်အနွယ်ကနေ ဘုရင်၊ ပုရောဟိတ်၊ ပရောဖက် ပေါ်ထွန်းတယ်ဆိုတဲ့ ကျမ်းမှတ်တမ်း မရှိဘူး။ ဒါပေမဲ့ ရုဗင် အမွေ လုံးဝ မရတာတော့ မဟုတ်ဘူး။ သူ့သားမြေးတွေဟာ အစ္စရေးအနွယ်တစ်နွယ် ဖြစ်လာတယ်။ (ယောရှု ၁၂:၆) ရုဗင် ကောင်းတာ လုပ်တဲ့အချိန်တွေလည်း ရှိပါတယ်။ ဒါ့အပြင် လိင်အကျင့် ထပ်ယိုယွင်းတယ်ဆိုတာမျိုး ကျမ်းစာမှာ ဖော်ပြမထားဘူး။—က. ၃၇:၂၀-၂၂။ ၄၂:၃၇။

၈။ ရုဗင်ဆီကနေ ဘာသင်ယူနိုင်သလဲ။

^၈ ဘာသင်ယူနိုင်သလဲ။ ကျွန်တော်တို့ ချုပ်တည်းမှု ရှိရမယ်။ လိင်အကျင့်မယိုယွင်းမိဖို့ ဆုံးဖြတ်ထားရမယ်။ သွေးဆောင်ခံရတဲ့အခါ ကိုယ့်လုပ်ရပ်ကြောင့် ယေဟောဝါ၊ မိသားစုနဲ့ တခြားသူတွေ ဘယ်လို ခံစားရမလဲဆိုတာ စဉ်းစားလိုက်ပါ။ “မျိုးစေ့ကြဲတဲ့အတိုင်း ရိတ်သိမ်းရလိမ့်မယ်” ဆိုတာလည်း သတိရပါ။ (ဂလ. ၆:၇) ဒါ့အပြင် ယေဟောဝါ ကရုဏာ ကြီးမားကြောင်း ရုဗင်ရဲ့အဖြစ်ကနေ သိရတယ်။ လုပ်ရပ်အမှားရဲ့ ဆိုးကျိုးတွေကနေ ကျွန်တော်တို့ကို ယေဟောဝါ ကာကွယ်မပေးပေမဲ့ နောင်တယူပြီး မှန်တာ လုပ်ဖို့ ကြိုးစားတဲ့အခါ ခွင့်လွှတ်ပေးတယ်၊ ကောင်းချီးပေးတယ်။

ရှိမောင်နဲ့ လေဝိ

၉။ ရှိမောင်နဲ့ လေဝိကို ယာကုပ် ဘာကြောင့် မနှစ်သက်သလဲ။ (ကမ္ဘာဦး ၄၉:၅-၇)

^၉ ကမ္ဘာဦး ၄၉:၅-၇ ကို ဖတ်ပါ။ ရှိမောင်နဲ့ လေဝိကို ယာကုပ် ပြောတဲ့စကားတွေဟာ တော်တော် ပြင်းထန်တယ်။ သူတို့ကို မနှစ်သက်ကြောင်း ပေါ်လွင်တယ်။ သမီးဒိနကို ခါနန်အမျိုးသား ရှေခင် စော်ကားလိုက်တုန်းက ရှိမောင်နဲ့ လေဝိ လုပ်ခဲ့တာတွေကြောင့်ပါ။ နှမဖြစ်သူ စော်ကားခံရလို့ အစ်ကိုအားလုံး ဒေါသထွက်ကြတယ်။ ဒါနဲ့ ရှေခင်မြို့သားယောက်ျားအားလုံး အရေဖျားဖြတ်မယ်ဆိုရင် ကျေအေးပေးမယ်၊ သင့်သင့်မြတ်မြတ် နေမယ်လို့ ဉာဏ်ဆင်ပြီး ပြောကြတယ်။ ရှေခင်နဲ့ မြို့သားတွေလည်း လိုက်လျောကြတယ်။ ဒါပေမဲ့ သူတို့ အရေဖျားဖြတ်ပြီး နာကျင်နေတုန်းမှာ “ရှိမောင်နဲ့ လေဝိက ဓားကိုယ်စီကိုင်၊ အမှုမဲ့အမှတ်မဲ့ဖြစ်နေတဲ့ မြို့ကို သွားပြီး ယောက်ျားအားလုံးကို သတ်လိုက်တယ်။” ဒေါသမထိန်းချုပ်နိုင်ဘဲ အကြမ်းဖက်တဲ့အထိ ဖြစ်သွားတာပဲ။—က. ၃၄:၂၅-၂၉။

၁၀။ ရှိမောင်နဲ့ လေဝိကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ (“ယာကုပ်ရဲ့ နောက်ဆုံးအမှာစကား” လေးထောင့်ကွက်ကိုလည်း ကြည့်ပါ။)

^၁၀ သားနှစ်ယောက်ရဲ့ အကြမ်းဖက်လုပ်ရပ်ကြောင့် ယာကုပ် အကြီးအကျယ် စိတ်ဒုက္ခရောက်တယ်။ အစ္စရေးပြည်မှာ သူတို့ လူစုကွဲမယ်၊ ကစဉ့်ကလျားဖြစ်မယ်လို့ ကြိုဟောလိုက်တယ်။ အနှစ် ၂၀၀ ကျော်အကြာ ကတိထားရာပြည်ထဲ အစ္စရေးလူမျိုး ဝင်ရောက်ချိန်မှာ အဲဒီကြိုဟောချက် ပြည့်စုံလာတယ်။ ရှိမောင်အနွယ် အမွေရတဲ့ မြို့တွေဟာ ယုဒအနွယ် နယ်မြေထဲမှာ ဟိုတစ်စု ဒီတစ်စု ပျံ့နှံ့နေတယ်။ (ယောရှု ၁၉:၁) လေဝိအနွယ် အမွေရတဲ့ မြို့ ၄၈ မြို့လည်း အစ္စရေးပြည်တစ်ခွင် ပျံ့နေတယ်။—ယောရှု ၂၁:၄၁။

၁၁။ ရှိမောင်အနွယ်နဲ့ လေဝိအနွယ်မှာ ဘာကောင်းကွက်တွေ ရှိသလဲ။

^၁၁ ရှိမောင်နဲ့ လေဝိ လုပ်တဲ့အမှားမျိုးကို သားမြေးတွေ မလုပ်ကြဘူး။ လေဝိအနွယ်ဟာ ယေဟောဝါအပေါ် သိပ်သစ္စာရှိတယ်။ ယေဟောဝါဆီက ပညတ်တွေ ပါတဲ့ ကျောက်ပြားနှစ်ချပ် ယူဖို့ ဆိုင်းနိုင်းတောင်ပေါ် မောရှေ တက်သွားတုန်း အစ္စရေးတော်တော်များများ နွားရုပ်တု လုပ်ပြီး ဦးချကြတယ်။ လေဝိအနွယ်ကတော့ ရုပ်တု မကိုးကွယ်ဘူး။ ဒါ့အပြင် ရုပ်တုကိုးကွယ်သူတွေကို သုတ်သင်ရာမှာ မောရှေကို ကူညီပေးတယ်။ (ထွ. ၃၂:၂၆-၂၉) ယေဟောဝါ ရွေးချယ်ထားတဲ့အတွက် လေဝိအမျိုးအဆက်ဆက် ပုရောဟိတ်တာဝန် ထမ်းဆောင်ကြတယ်။ (ထွ. ၄၀:၁၂-၁၅။ တော. ၃:၁၁၊ ၁၂) ရှိမောင်အနွယ်ကော ဘာတွေ လုပ်သလဲ။ ယေဟောဝါရဲ့ ရည်ရွယ်ချက်နဲ့အညီ ကတိထားရာပြည်ကို သိမ်းပိုက်ချိန်မှာ ယုဒအနွယ်ကို အားတက်သရော ကူညီပေးတယ်။—သူကြီး. ၁:၃၊ ၁၇။

၁၂။ ရှိမောင်နဲ့ လေဝိဆီကနေ ဘာသင်ယူနိုင်သလဲ။

^၁၂ ဘာသင်ယူနိုင်သလဲ။ ဒေါသရှေ့ထားပြီး ဘာကိုမှ မဆုံးဖြတ်ပါနဲ့၊ မလုပ်ပါနဲ့။ ကိုယ်တိုင် ဒါမှမဟုတ် ချစ်ရသူတစ်ယောက် မတရားဆက်ဆံခံရတဲ့အခါ ဒေါသထွက်တာ သဘာဝပါပဲ။ (ဆာ. ၄:၄) ဒါပေမဲ့ မတရားဆက်ဆံသူကို နာနာကြည်းကြည်း ပြန်ပြောတာ၊ ပြန်လုပ်တာကို ယေဟောဝါ မနှစ်သက်ဘူးဆိုတာ သတိရပါ။ (ယာ. ၁:၂၀) အသင်းတော်မှာဖြစ်ဖြစ်၊ အပြင်မှာဖြစ်ဖြစ် မတရားဆက်ဆံခံရတဲ့အခါ ကျမ်းစာမူတွေကို စဉ်းစားလိုက်ပါ။ ဒါက ဒေါသမထိန်းချုပ်ဘဲ ပြောမိလုပ်မိတဲ့အဖြစ်ကနေ ကာကွယ်ပေးနိုင်တယ်။ (ရော. ၁၂:၁၇၊ ၁၉။ ၁ ပေ. ၃:၉) သင်ခန်းစာ နောက်တစ်ခုကတော့ ယေဟောဝါ မနှစ်သက်တာတွေကို သင့်မိဘတွေ လုပ်တယ်ဆိုရင်တောင် မိဘလမ်းစဉ် လိုက်ဖို့ မလိုဘူးဆိုတာပါပဲ။ မိဘတွေရဲ့ လုပ်ရပ်ကြောင့် သင့်ကိုပါ ယေဟောဝါ မနှစ်သက်တော့ဘူးလို့ မတွေးပါနဲ့။ မှန်တာ လုပ်ဖို့ ကြိုးစားမယ်ဆိုရင် သင့်ကို ယေဟောဝါ ကူညီပေးမယ်၊ ကောင်းချီးပေးမယ်။

ယုဒ

၁၃။ ဖခင် ဘာပြောမလဲဆိုပြီး ယုဒ ဘာကြောင့် စိတ်ပူနေနိုင်သလဲ။

^၁၃ ယုဒကို ယာကုပ် အမှာစကားပြောမယ့်အလှည့် ရောက်လာတယ်။ အစ်ကိုသုံးယောက်ကို ဖခင် ပြောတဲ့စကားတွေ ကြားပြီး ယုဒ စိတ်ပူနေနိုင်တယ်။ ဘာကြောင့်လဲ။ ယုဒလည်း ကြီးလေးတဲ့အမှားတချို့ လုပ်ထားလို့ပဲ။ ရှေခင်မြို့သားတွေကို ရှိမောင်နဲ့ လေဝိ သတ်ပစ်ပြီးနောက် မြို့ထဲက ပစ္စည်းတွေ သိမ်းယူတဲ့အထဲမှာ သူ ပါတယ်။ (က. ၃၄:၂၇) ညီအစ်ကိုတွေနဲ့ပေါင်းပြီး ယောသပ်ကို ကျွန်အဖြစ် ရောင်းစားတယ်။ ယောသပ် သေပြီဆိုပြီး ဖခင်ကို လိမ်ပြောတယ်။ (က. ၃၇:၃၁-၃၃) သားဖြစ်သူ သေဆုံးပြီးနောက် ချွေးမတာမာကို ပြည့်တန်ဆာ ထင်ပြီး လိင်အကျင့်ယိုယွင်းမိသွားတယ်။—က. ၃၈:၁၅-၁၈။

၁၄။ ယုဒကို ယာကုပ် ဘာပြောသလဲ။ ယုဒမှာ ဘာကောင်းကွက်တွေ ရှိသလဲ။ (ကမ္ဘာဦး ၄၉:၈၊ ၉)

^၁၄ ကောင်းချီးပေးတဲ့စကားတွေ၊ ချီးမွမ်းစကားတွေပဲ ယာကုပ်ဆီကနေ ယုဒ ကြားလိုက်ရတယ်။ (ကမ္ဘာဦး ၄၉:၈၊ ၉ ကို ဖတ်ပါ။) ယုဒမှာ ဘာကောင်းကွက်တွေ ရှိလို့လဲ။ ယုဒဟာ သက်ကြီးဖခင်ရဲ့ ခံစားချက်ကို အင်မတန် အလေးထားတယ်။ အငယ်ဆုံးညီ ဗင်ယာမိန်ကို သိပ်ချစ်တဲ့အတွက် ကိုယ်စား ကျွန်ခံဖို့တောင် အသင့်ရှိခဲ့တယ်။—က. ၄၄:၁၈၊ ၃၀-၃၄။

၁၅။ ယုဒ ဘာကောင်းချီးတွေ ရသလဲ။

^၁၅ ညီအစ်ကိုတွေကို ယုဒ ဦးဆောင်ရမယ်လို့ ယာကုပ် ကြိုဟောတယ်။ ဒါပေမဲ့ အနှစ် ၂၀၀ ကျော် ကြာပြီးမှ အဲဒီကြိုဟောချက် ပြည့်စုံလာတယ်။ အီဂျစ်ပြည်ကနေ အစ္စရေးတွေ ထွက်လာပြီး ကတိထားရာပြည်ကို သွားတဲ့လမ်းမှာ တခြားအနွယ်တွေရှေ့ကနေ ယုဒအနွယ် သွားတယ်။ (တော. ၁၀:၁၄) နောက်နှစ်များစွာအကြာမှာ ကတိထားရာပြည်ကို သိမ်းပိုက်ဖို့ ယုဒအနွယ် ဦးဆောင်ချီတက်သွားတယ်။ (သူကြီး. ၁:၁၊ ၂) ယုဒအနွယ်ကနေ ဘုရင်အများကြီး ပေါ်ထွန်းလာတယ်။ ဦးဆုံးဘုရင်ကတော့ ဒါဝိဒ်ပါ။ ယာကုပ်ရဲ့ ကြိုဟောချက် ဘယ်လို ပြည့်စုံလာသေးသလဲ။

၁၆။ ကမ္ဘာဦး ၄၉:၁၀ မှာ ပါတဲ့ ကြိုဟောချက် ဘယ်လို ပြည့်စုံလာသလဲ။ (“ယာကုပ်ရဲ့ နောက်ဆုံးအမှာစကား” လေးထောင့်ကွက်ကိုလည်း ကြည့်ပါ။)

^၁၆ လူအားလုံးကို ထာဝစဉ် အုပ်ချုပ်မယ့်သူဟာ ယုဒအနွယ်က ဖြစ်မယ်လို့ ယာကုပ် ကြိုဟောတယ်။ (ကမ္ဘာဦး ၄၉:၁၀ နဲ့ အောက်ခြေမှတ်ချက်ကို ဖတ်ပါ။) ရှိလောလို့ ယာကုပ် ခေါ်ထားတဲ့ အဲဒီအုပ်ချုပ်သူကတော့ ယေရှုခရစ်ပါပဲ။ “ယေဟောဝါဘုရားက [ယေရှု]ကို ဖခင်ဒါဝိဒ်ရဲ့ ရာဇပလ္လင် အပ်နှင်းလိမ့်မယ်” ဆိုပြီး ကောင်းကင်တမန်တစ်ပါး ပြောတယ်။ (လု. ၁:၃၂၊ ၃၃) ယေရှုကို “ယုဒအနွယ်ဝင် ခြင်္သေ့” လို့လည်း ကျမ်းစာမှာ ခေါ်ထားတယ်။—ဗျာ. ၅:၅။

၁၇။ ယေဟောဝါကို ဘယ်လို အတုယူနိုင်သလဲ။

^၁၇ ဘာသင်ယူနိုင်သလဲ။ ယုဒ ကြီးလေးတဲ့အမှားတချို့ လုပ်ထားတာတောင် ယေဟောဝါ ကောင်းချီးပေးတယ်။ ယေဟောဝါ ဘာကို ကြည့်ပြီး ကောင်းချီးပေးသလဲလို့ ကျန်တဲ့ညီအစ်ကိုတွေ တွေးကြမလား။ သူတို့ ဘယ်လို တွေးသလဲဆိုတာ ကျွန်တော်တို့ မသိပေမဲ့ ယုဒရဲ့ ကောင်းကွက်တွေကို ယေဟောဝါ မြင်ပြီး ကောင်းချီးပေးတယ်ဆိုတာတော့ သိရတယ်။ ယေဟောဝါကို ဘယ်လို အတုယူနိုင်သလဲ။ ညီအစ်ကို/မတစ်ယောက် အခွင့်ထူး ရတဲ့အခါ သူ့အားနည်းချက်တွေကို ကျွန်တော်တို့ အရင်ဆုံး တွေးမိနိုင်တယ်။ ဒါပေမဲ့ သူ့ကောင်းကွက်တွေကို ယေဟောဝါ မြင်ပြီး ကောင်းချီးပေးတာ ဖြစ်ကြောင်း သတိရရမယ်။ ဝတ်ပြုသူတွေရဲ့ ကောင်းကွက်ကို အမြဲ ရှာတဲ့ ယေဟောဝါကို အတုယူကြရအောင်။

၁၈။ ယုဒအနွယ်ကို ဘယ်လို အတုယူနိုင်သလဲ။

^၁၈ စိတ်ရှည်ဖို့ လိုကြောင်းလည်း ယုဒရဲ့အဖြစ်ကနေ သင်ယူရတယ်။ ကတိတွေကို ယေဟောဝါ အမြဲ ပြည့်စုံစေတယ်။ ဒါပေမဲ့ ကျွန်တော်တို့ မျှော်လင့်ထားတဲ့ပုံစံအတိုင်း မျှော်လင့်ထားတဲ့အချိန်မှာ ပြည့်စုံစေတာ ဟုတ်ချင်မှ ဟုတ်မယ်။ စစချင်း အစ္စရေးလူမျိုးကို ဦးဆောင်သူတွေဟာ ယုဒအနွယ်က မဟုတ်ဘူး။ ဒါပေမဲ့ ယေဟောဝါ ရွေးချယ်တဲ့ လေဝိအမျိုးသား မောရှေ၊ ဧဖရိမ်အမျိုးသား ယောရှု၊ ဗင်ယာမိန်အမျိုးသား ဘုရင်ရှောလုကို သူတို့ သစ္စာရှိရှိ ထောက်မကြတယ်။ ဒီနေ့အချိန်မှာလည်း ကျွန်တော်တို့ကို ဦးဆောင်ဖို့ ယေဟောဝါ ရွေးချယ်ထားသူတွေကို သစ္စာရှိရှိ ထောက်မရမယ်။—ဟီ. ၆:၁၂။

၁၉။ ယာကုပ် မသေဆုံးခင် ပြောတဲ့စကားတွေကနေ ယေဟောဝါအကြောင်း ဘာသိရသလဲ။

^၁၉ ယာကုပ် မသေဆုံးခင် ပြောတဲ့စကားတွေကနေ ယေဟောဝါအကြောင်း ဘာသိရသလဲ။ ယေဟောဝါက “နှလုံးသားကို ကြည့်တယ်။” (၁ ရှ. ၁၆:၇) သည်းခံခွင့်လွှတ်ပေးတတ်တယ်။ အမှားလုပ်တာကို မနှစ်သက်ပေမဲ့ ဝတ်ပြုသူတွေ အမှားကင်းဖို့ မမျှော်လင့်ဘူး။ ကြီးလေးတဲ့အမှား လုပ်မိရင်တောင် စိတ်ရင်းမှန်နဲ့ နောင်တယူပြီး မှန်တာ လုပ်ဖို့ ကြိုးစားမယ်ဆိုရင် ကောင်းချီးပေးတယ်။ ကျန်တဲ့သားရှစ်ယောက်ကိုကော ယာကုပ် ဘာတွေ ပြောသလဲ။ ဒီအကြောင်း နောက်ဆောင်းပါးမှာ ဆွေးနွေးကြရအောင်။