ယာကုပ် မသေဆုံးခင် ပြောတဲ့စကားတွေကနေ သင်ယူနိုင်ရာများ—အပိုင်း ၂

၁။ ဒီဆောင်းပါးမှာ ဘာအကြောင်း ဆွေးနွေးကြမလဲ။

တစ်ယောက်ချင်းစီကို သက်ကြီးဖခင် ယာကုပ် အမှာစကားပြောနေတာ သားတွေ ဂရုတစိုက် နားထောင်နေကြတယ်။ ရှေ့ဆောင်းပါးမှာ ဆွေးနွေးခဲ့တဲ့အတိုင်း ရုဗင်၊ ရှိမောင်၊ လေဝိ၊ ယုဒတို့ကို ယာကုပ် ပြောတဲ့စကားတွေဟာ စိတ်ဝင်စားဖို့ကောင်းသလို သူတို့ မျှော်လင့်မထားတဲ့ စကားတွေ ဖြစ်တယ်။ ဒါကြောင့် ကျန်တဲ့သားရှစ်ယောက်ကိုကော ယာကုပ် ဘာတွေများ ပြောမလဲဆိုပြီး သိချင်နေကြမှာပဲ။ ဇာဗုလုန်၊ အိသခါ၊ ဒန်၊ ဂဒ်၊ အာရှာ၊ နဿလိ၊ ယောသပ်၊ ဗင်ယာမိန်တို့ကို ယာကုပ် ပြောတဲ့စကားတွေကနေ ဘာသင်ယူနိုင်ကြောင်း ဆွေးနွေးကြရအောင်။a

ဇာဗုလုန်

၂။ ဇာဗုလုန်ကို ယာကုပ် ဘာပြောသလဲ။ ယာကုပ်ရဲ့ စကားတွေ ဘယ်လို ပြည့်စုံလာသလဲ။ (ကမ္ဘာဦး ၄၉:၁၃) (လေးထောင့်ကွက်ကိုလည်း ကြည့်ပါ။)

^၂ ကမ္ဘာဦး ၄၉:၁၃ ကို ဖတ်ပါ။ ယာကုပ်စကားအရ ဇာဗုလုန်အနွယ်ဟာ ကတိထားရာပြည်မြောက်ပိုင်း ပင်လယ်ကမ်းနားမှာ နေထိုင်ရမယ်။ နောက်အနှစ် ၂၀၀ ကျော်မှာ ဇာဗုလုန်အနွယ် အမွေမြေ ရလာတယ်။ ဒါပေမဲ့ မြေထဲပင်လယ်ကမ်းနားမှာ မဟုတ်ဘဲ မြေထဲပင်လယ်နဲ့ ဂါလိလဲအိုင်ကြားမှာ။ ဘာပဲဖြစ်ဖြစ် ဇာဗုလုန်အနွယ်အတွက် ဝမ်းမြောက်စရာပါပဲ။ ဘာကြောင့်လဲ။ ကမ်းနားနှစ်ခုစလုံးကို အလွယ်တကူ သွားလာနိုင်လို့ ကူးသန်းရောင်းဝယ်ရေးအတွက် အဆင်ပြေတယ်။ ဒါကြောင့်လည်း “ဇာဗုလုန်၊ မင်းရဲ့ ကူးသန်းရောင်းဝယ်မှုကြောင့် ဝမ်းမြောက်ပါ” ဆိုပြီး မောရှေ ပြောခဲ့တာ ဖြစ်မယ်။—တရား. ၃၃:၁၈။

၃။ ကျေနပ်ရောင့်ရဲတတ်ဖို့ ဘာက ကူညီပေးနိုင်သလဲ။

^၃ ဘာသင်ယူနိုင်သလဲ။ ဘယ်မှာပဲ နေရနေရ၊ အခြေအနေ ဘယ်လိုပဲ ရှိရှိ ဝမ်းမြောက်စရာ အကြောင်းရင်း အမြဲ ရှိတယ်။ ဝမ်းမြောက်နိုင်ဖို့ဆိုရင် ရှိတာနဲ့ ကျေနပ်ရောင့်ရဲရမယ်။ (ဆာ. ၁၆:၆။ ၂၄:၅) ကောင်းတာတွေ ပိုင်ဆိုင်ထားလျက်နဲ့ မပိုင်ဆိုင်ရတဲ့အရာတွေကိုပဲ အာရုံစိုက်နေရင် စိတ်ဓာတ်ကျလာနိုင်တယ်။ ဒါကြောင့် ကိုယ့်အခြေအနေနဲ့ပတ်သက်ပြီး ကောင်းတာတွေကို မြင်အောင် ကြည့်ဖို့ ကြိုးစားပါ။—ဂလ. ၆:၄။

အိသခါ

၄။ အိသခါကို ယာကုပ် ဘာပြောသလဲ။ ယာကုပ်ရဲ့ စကားတွေ ဘယ်လို ပြည့်စုံလာသလဲ။ (ကမ္ဘာဦး ၄၉:၁၄၊ ၁၅) (လေးထောင့်ကွက်ကိုလည်း ကြည့်ပါ။)

^၄ ကမ္ဘာဦး ၄၉:၁၄၊ ၁၅ ကို ဖတ်ပါ။ အလုပ်ကြိုးစားတဲ့ အိသခါကို ယာကုပ် ချီးမွမ်းတယ်။ လေးလံတဲ့ ဝန်တွေ ထမ်းနိုင်တဲ့ အရိုးသန်မာတဲ့ မြည်းနဲ့ တူတယ်လို့ ပြောတယ်။ အိသခါ ရတဲ့ နယ်မြေဟာ သာယာမယ်လို့လည်း ပြောတယ်။ ယာကုပ်စကားအတိုင်းပဲ ဂျော်ဒန်မြစ်နားက မြေဩဇာကောင်းပြီး သီးပွင့်ဖြစ်ထွန်းတဲ့ နယ်မြေကို အိသခါအနွယ် အမွေရတယ်။ (ယောရှု ၁၉:၂၂) အမွေမြေမှာ သူတို့ ကြိုးကြိုးစားစား စိုက်ပျိုးထွန်ယက်ကြတယ်။ ဒါ့အပြင် အစ္စရေးလူမျိုးအကျိုးအတွက် ကြိုးပမ်းကြတယ်။ (၁ ဘု. ၄:၇၊ ၁၇) ဥပမာ၊ သိသရကို တိုက်ဖို့ တရားသူကြီး ဗာရက်နဲ့ ပရောဖက်မ ဒေဗောရ စစ်ကူခေါ်တုန်းက ကူညီပေးခဲ့တဲ့ အစ္စရေးအနွယ်တွေထဲမှာ အိသခါအနွယ် ပါတယ်။ ဒါဟာ အစ္စရေးလူမျိုးအကျိုးအတွက် အိသခါအနွယ် တိုက်ပွဲဝင်ခဲ့တဲ့ မှတ်တမ်းတစ်ခုပဲ ရှိသေးတယ်။—သူကြီး. ၅:၁၅။

၅။ အိသခါအနွယ်ကို ဘယ်လို အတုယူနိုင်သလဲ။ ဘာကြောင့်လဲ။

^၅ ဘာသင်ယူနိုင်သလဲ။ အိသခါအနွယ် အလုပ်ကြိုးစားတာကို ယေဟောဝါဘုရား တန်ဖိုးထားသလို အမှုတော်မှာ ကျွန်တော်တို့ ကြိုးစားပမ်းစား ပါဝင်တာကို တန်ဖိုးထားတယ်။ (ဒေ. ၂:၂၄) အသင်းတော်ကို အားသွန်ခွန်စိုက် ဂရုစိုက်ပေးနေတဲ့ အကြီးအကဲတွေအကြောင်း စဉ်းစားကြည့်ပါ။ (၁ တိ. ၃:၁) သူတို့ ပကတိတိုက်ပွဲ တိုက်ဖို့ မလိုပေမဲ့ ယေဟောဝါနဲ့ ဆက်ဆံရေး ပြတ်တောက်သွားစေမယ့် အန္တရာယ်တွေကနေ ညီအစ်ကို/မတွေကို စိတ်နှစ်ကိုယ်နှစ် ကာကွယ်ပေးကြတယ်။ (၁ ကော. ၅:၁၊ ၅။ ယု. ၁၇-၂၃) ညီအစ်ကို/မတွေကို အားရှိစေမယ့် ဟောပြောချက်တွေ ကြိုးကြိုးစားစား ပြင်ဆင်တင်ဆက်ကြတယ်။—၁ တိ. ၅:၁၇။

ဒန်

၆။ ဒန်အနွယ် ဘာတာဝန် ရသလဲ။ (ကမ္ဘာဦး ၄၉:၁၇၊ ၁၈) (လေးထောင့်ကွက်ကိုလည်း ကြည့်ပါ။)

^၆ ကမ္ဘာဦး ၄၉:၁၇၊ ၁၈ ကို ဖတ်ပါ။ ဒန်ဟာ စစ်မြင်း၊ မြင်းစီးသူလို မိမိထက် အရွယ်အစား အများကြီး ပိုကြီးတဲ့ ရန်သူကိုတောင် ပေါက်တတ်တဲ့ မြွေနဲ့ တူတယ်လို့ ယာကုပ် ပြောတယ်။ တကယ်လည်း ဒန်အနွယ်ဟာ အစ္စရေးလူမျိုးရဲ့ ရန်သူတွေ ကြောက်ရတဲ့အနွယ် ဖြစ်လာတယ်။ ကတိထားရာပြည်ကို သွားတဲ့လမ်းမှာ “နောက်ရံတပ်အနေနဲ့” တခြားအနွယ်တွေကို စောင့်ကြပ်ပေးတယ်။ (တော. ၁၀:၂၅) ဒန်အနွယ်ရဲ့ တာဝန်ဟာ မမြင်သာပေမဲ့ သိပ်အရေးပါတယ်။

၇။ ဘာတာဝန်ပဲ ရပါစေ ဘယ်လို သဘောထားသင့်သလဲ။

^၇ ဘာသင်ယူနိုင်သလဲ။ တခြားသူတွေ သတိထားမိပုံမရတဲ့ တာဝန် ရဖူးသလား။ အစည်းအဝေးခန်းမ သန့်ရှင်းရေး လုပ်တာ၊ ပြုပြင်ထိန်းသိမ်းတာ၊ တိုက်နယ်အစည်းအဝေး၊ ခရိုင်အစည်းအဝေးမှာ လုပ်အားပေးတာ ဒါမှမဟုတ် တခြားတာဝန်တစ်မျိုးမျိုး လုပ်တာ ဖြစ်နိုင်တယ်။ ချီးမွမ်းစရာပါပဲ။ မိမိအတွက် သင် လုပ်ဆောင်သမျှကို ယေဟောဝါ သတိထားမိပြီး တန်ဖိုးထားတယ်ဆိုတာ အမြဲ သတိရပါ။ လူချီးမွမ်းခံချင်စိတ်နဲ့ မဟုတ်ဘဲ မိမိကို ချစ်တဲ့စိတ်နဲ့ အမှုဆောင်တဲ့အခါ ယေဟောဝါ သိပ်ပီတိဖြစ်တယ်။—မ. ၆:၁-၄။

ဂဒ်

၈။ ဂဒ်အနွယ်ဟာ ဘာကြောင့် အလွယ်တကူ တိုက်ခိုက်ခံရနိုင်သလဲ။ (ကမ္ဘာဦး ၄၉:၁၉) (လေးထောင့်ကွက်ကိုလည်း ကြည့်ပါ။)

^၈ ကမ္ဘာဦး ၄၉:၁၉ ကို ဖတ်ပါ။ ဂဒ်ကို ဓားပြတွေ တိုက်ခိုက်မယ်လို့ ယာကုပ် ကြိုဟောတယ်။ နောက်အနှစ် ၂၀၀ ကျော်မှာ ဂျော်ဒန်မြစ်အရှေ့ဘက်က နယ်မြေကို ဂဒ်အနွယ် အမွေရတယ်။ ရန်သူနယ်မြေနဲ့ ထိစပ်နေလို့ အလွယ်တကူ တိုက်ခိုက်ခံရနိုင်တယ်။ ဒါပေမဲ့ သိုးနွားတိရစ္ဆာန်တွေအတွက် စားကျက်ကောင်း ဖြစ်လို့ အဲဒီနေရာမှာ ဂဒ်အနွယ် နေချင်တယ်။ (တော. ၃၂:၁၊ ၅) ဂဒ်အနွယ် သတ္တိရှိတာ သိပ်ထင်ရှားတယ်။ ပိုထင်ရှားတဲ့ အချက်ကတော့ အမွေမြေကို ဓားပြတွေလက်ကနေ ကာကွယ်ဖို့ ယေဟောဝါ ကူညီပေးမယ်ဆိုတာ စိတ်ချတာပါပဲ။ ဂျော်ဒန်မြစ်အနောက်ဘက်က ကတိထားရာပြည်ရဲ့ ကျန်တဲ့အပိုင်းကို တခြားအနွယ်တွေ သိမ်းပိုက်ရာမှာ ဂဒ်အနွယ် စစ်သည်တွေ နှစ်နဲ့ချီ သွားကူညီပေးကြတယ်။ (တော. ၃၂:၁၆-၁၉) ယောက်ျားသားတွေ မရှိတဲ့အချိန် သူတို့ရဲ့ သားမယားတွေကို ယေဟောဝါ ကာကွယ်ပေးမယ်ဆိုတာ စိတ်ချကြတယ်။ သူတို့ရဲ့ သတ္တိရှိမှု၊ ကိုယ်ကျိုးစွန့်မှုကို ယေဟောဝါ ကောင်းချီးပေးတယ်။—ယောရှု ၂၂:၁-၄။

၉။ ယေဟောဝါကို ယုံကြည်ကိုးစားတယ်ဆိုရင် ကျွန်တော်တို့ ဘာလုပ်မလဲ။

^၉ ဘာသင်ယူနိုင်သလဲ။ အခက်အခဲတွေ ရှိပေမဲ့ ဆက်အမှုဆောင်နိုင်ဖို့ဆိုရင် ယေဟောဝါကို ယုံကြည်ကိုးစားနေရမယ်။ (ဆာ. ၃၇:၃) ဒီနေ့အချိန်မှာ ညီအစ်ကို/မများစွာဟာ အဖွဲ့အစည်း ဆောက်လုပ်ရေး စီမံကိန်းတွေမှာ ပါဝင်ခြင်း၊ ဟောပြောသူ ပိုလိုအပ်တဲ့ ဒေသမှာ အမှုဆောင်ခြင်း၊ အဖွဲ့အစည်းကို နည်းအမျိုးမျိုးနဲ့ ထောက်မခြင်းအားဖြင့် ယေဟောဝါကို ယုံကြည်ကိုးစားကြောင်း ပြနေကြတယ်။ မိမိတို့ကို ယေဟောဝါ အမြဲ စောင့်ရှောက်ပေးမယ်ဆိုတာ ယုံလို့ ဒီလိုကိုယ်ကျိုးစွန့်ကြတာ။—ဆာ. ၂၃:၁။

အာရှာ

၁၀။ အာရှာကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ ဒါပေမဲ့ အာရှာအနွယ် ဘာဖြစ်သွားသလဲ။ (ကမ္ဘာဦး ၄၉:၂၀) (လေးထောင့်ကွက်ကိုလည်း ကြည့်ပါ။)

^၁၀ ကမ္ဘာဦး ၄၉:၂၀ ကို ဖတ်ပါ။ အာရှာအနွယ် စည်းစိမ်ကြွယ်ဝမယ်လို့ ယာကုပ် ကြိုဟောတယ်။ ကြိုဟောတဲ့အတိုင်း တကယ် ဖြစ်လာတယ်။ အာရှာအနွယ်ရဲ့ အမွေမြေထဲမှာ အစ္စရေးပြည်ရဲ့ မြေဩဇာအကောင်းဆုံး နယ်မြေတချို့ ပါတယ်။ (တရား. ၃၃:၂၄) မြေထဲပင်လယ်နဲ့ ကပ်လျက်မှာ ရှိပြီး စီးပွားရေး အချက်အချာကျတဲ့ ဆိုင်ဒုန်ဆိပ်ကမ်းမြို့လည်း ပါတယ်။ ဒါပေမဲ့ ခါနန်လူမျိုးတွေကို နယ်မြေထဲကနေ အာရှာအနွယ် မနှင်ထုတ်ဘူး။ (သူကြီး. ၁:၃၁၊ ၃၂) ဒီလိုနဲ့ အာရှာအနွယ်ဟာ ခါနန်တွေရဲ့ ဩဇာလွှမ်းမိုးခံရပြီး စည်းစိမ်ဥစ္စာကို ဦးစားထားလာပုံရတယ်။ ဒါဟာ စစ်မှန်တဲ့ ဝတ်ပြုရေးအတွက် ထက်သန်မှု လျော့သွားရတဲ့ အကြောင်းရင်း ဖြစ်နိုင်တယ်။ ခါနန်လူမျိုးရန်သူတွေကို တိုက်ခိုက်ဖို့ တရားသူကြီး ဗာရက် စစ်ကူခေါ်တုန်းက အာရှာအနွယ် သွားမကူညီဘူး။ ဒါကြောင့် “မေဂိဒေါချောင်းနား” မှာ အစ္စရေးတွေကို ယေဟောဝါ အံ့ဖွယ်နည်းနဲ့ အောင်ပွဲဆင်စေတာ သူတို့ မတွေ့လိုက်ရဘူး။ (သူကြီး. ၅:၁၉-၂၁) ဗာရက်နဲ့ ဒေဗောရရဲ့ အောင်ပွဲခံသီချင်းမှာ “အာရှာကလည်း ကမ်းခြေမှာပဲ အချိန်ဖြုန်းနေတယ်” ဆိုတဲ့ စာသားကို ကြားရတော့ သူတို့ အရှက်ရကြမှာပဲ။—သူကြီး. ၅:၁၇။

၁၁။ ငွေကြေးစည်းစိမ်ကို ဘာကြောင့် ဦးစားမထားသင့်သလဲ။

^၁၁ ဘာသင်ယူနိုင်သလဲ။ လောကက လူတွေလို ငွေကြေးစည်းစိမ်ကို ကျွန်တော်တို့ ဦးစားမထားကြဘူး။ (ပညာ. ၁၈:၁၁) ငွေနဲ့ပတ်သက်ပြီး မျှတတဲ့အမြင် ရှိကြတယ်။ (ဒေ. ၇:၁၂။ ဟီ. ၁၃:၅) တကယ် မလိုအပ်တဲ့အရာတွေ ပိုင်ဆိုင်ဖို့ ကြိုးစားရင်း ကိုယ့်အချိန်၊ ခွန်အားကို အလဟဿ အဖြစ်မခံကြဘူး။ ဘာကြောင့်လဲ။ ယေဟောဝါအတွက် အကောင်းဆုံး ပေးဆက်ချင်လို့ပါ။ ဒါ့အပြင် ပူပင်ကြောင့်ကြစရာ လုံးဝ မလိုတဲ့ အသက်တာမျိုးကို အနာဂတ်မှာ ယေဟောဝါ ပေးမယ်ဆိုတာ သိထားလို့ပါပဲ။—ဆာ. ၄:၈။

နဿလိ

၁၂။ နဿလိကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ (ကမ္ဘာဦး ၄၉:၂၁) (လေးထောင့်ကွက်ကိုလည်း ကြည့်ပါ။)

^၁၂ ကမ္ဘာဦး ၄၉:၂၁ ကို ဖတ်ပါ။ နဿလိဟာ “ယဉ်ကျေးရည်မွန်တဲ့ စကားတွေ” ပြောမယ်လို့ ယာကုပ် ကြိုဟောတယ်။ ယေရှု အမှုဆောင်ချိန်အတွင်း ဘယ်လို ဟောပြောသွန်သင်မယ်ဆိုတာကို ရည်ညွှန်းတာ ဖြစ်နိုင်တယ်။ နဿလိနယ်၊ ကပေရနောင်မြို့မှာ ယေရှု အထိုင်ချရင်း ထိထိရောက်ရောက် ဟောပြောသွန်သင်တယ်။ ဒါကြောင့် ကပေရနောင်မြို့ကို ယေရှုရဲ့ “နေရင်းမြို့” လို့ ကျမ်းစာမှာ ခေါ်ထားတယ်။ (မ. ၄:၁၃။ ၉:၁။ ယော. ၇:၄၆) ဇာဗုလုန်နယ်သားတွေနဲ့ နဿလိနယ်သားတွေ “တောက်ပတဲ့ အလင်း” မြင်ရမယ်လို့ ဟေရှာယ ကြိုဟောတယ်။ (ဟေရှာ. ၉:၁၊ ၂) တကယ်လည်း ယေရှုဟာ ဟောပြောသွန်သင်ခြင်းအားဖြင့် “လူအမျိုးမျိုးကို အလင်းပေးမယ့် စစ်မှန်တဲ့အလင်း” ဖြစ်လာတယ်။—ယော. ၁:၉။

၁၃။ ယေဟောဝါ နှစ်သက်တဲ့ “ယဉ်ကျေးရည်မွန်တဲ့ စကားတွေ” ဘယ်လို ပြောနိုင်သလဲ။

^၁၃ ဘာသင်ယူနိုင်သလဲ။ ကျွန်တော်တို့ ပြောတဲ့စကားကိုရော ပြောတဲ့ပုံစံကိုပါ ယေဟောဝါ ဂရုစိုက်တယ်။ ယေဟောဝါ နှစ်သက်တဲ့ “ယဉ်ကျေးရည်မွန်တဲ့ စကားတွေ” ဘယ်လို ပြောနိုင်သလဲ။ ဟုတ်တိုင်းမှန်ရာ ပြောပါ။ (ဆာ. ၁၅:၁၊ ၂) တခြားသူတွေကို ချီးမွမ်းဖို့ နှုတ်မလေးပါနဲ့။ ပြစ်တင်ဝေဖန်မစောပါနဲ့။ (ဧ. ၄:၂၉) စကားစမြည် စပြောရာမှာ ပိုကျွမ်းကျင်လာဖို့ ပန်းတိုင်ထားပါ။ ဒါဆိုရင် သက်သေခံဖို့ လမ်းပွင့်လာမယ်။

ယောသပ်

၁၄။ ယောသပ်ကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ (ကမ္ဘာဦး ၄၉:၂၂၊ ၂၆) (လေးထောင့်ကွက်ကိုလည်း ကြည့်ပါ။)

^၁၄ ကမ္ဘာဦး ၄၉:၂၂၊ ၂၆ ကို ဖတ်ပါ။ သိပ်ချစ်ရတဲ့ ဇနီးရာခေလ မွေးတဲ့ သားဦးယောသပ်ကို “အသီးသီးနေတဲ့အပင်ရဲ့ အကိုင်း” လို့ ယာကုပ် ခေါ်ထားတယ်။ ယာကုပ်ဟာ အပင် ဖြစ်ပြီး ယောသပ်ဟာ အကိုင်း ဖြစ်တယ်။ “ညီအစ်ကိုတွေထဲက [ယောသပ်] ရွေးချယ်ခံရ” လို့ ယာကုပ် သိပ်ဂုဏ်ယူနေမှာပဲ။ ယာကုပ်စကားအရ သားဦးရုဗင် မရတဲ့ အမွေနှစ်ဆကို ယောသပ် ရမယ်။ (က. ၄၈:၅၊ ၆။ ၁ ရာ. ၅:၁၊ ၂) ယောသပ်ရဲ့ သားနှစ်ယောက် ဖြစ်တဲ့ ဧဖရိမ်နဲ့ မနာရှေကနေ အနွယ်နှစ်နွယ် ဆင်းသက်လာပြီး အမွေမြေ ကိုယ်စီရချိန်မှာ ယာကုပ်ရဲ့ စကားတွေ ပြည့်စုံလာတယ်။—က. ၄၉:၂၅။ ယောရှု ၁၄:၄။

၁၅။ မတရားမှု ကြုံရချိန်မှာ ယောသပ် ဘယ်လို တုံ့ပြန်သလဲ။

^၁၅ “လေးသမားတွေက [ယောသပ်]ကို မပြတ်နှောင့်ယှက်ပြီး ပစ်ခတ်တယ်။ မုန်းတီးစိတ်နဲ့ ရန်ငြိုးထားတယ်” လို့လည်း ယာကုပ် ပြောတယ်။ (က. ၄၉:၂၃) ယောသပ်ကို မနာလိုဖြစ်တဲ့ အစ်ကိုတွေကို ရည်ညွှန်းပြီး ပြောတာပါ။ ယောသပ် မတရားမှုအများကြီး ကြုံရတာ အစ်ကိုတွေကြောင့်ပဲ။ ဒါပေမဲ့ အစ်ကိုတွေကို ယောသပ် မနာကြည်းဘူး။ မတရားမှု ကြုံခွင့်ပြုလို့ဆိုပြီး ယေဟောဝါကို အပြစ်မတင်ဘူး။ ယာကုပ် ပြောသလိုပဲ ယောသပ်ဟာ “သူ့ရဲ့လေးကို ဆုပ်ကိုင်ထားတယ်။ သူ့လက်တွေဟာ သန်မာသွက်လက်တယ်။” (က. ၄၉:၂၄) ဆိုလိုတာက လက်ထဲမှာ လေးအသင့်ရှိပေမဲ့ မြားနဲ့ တူတဲ့ အမုန်းတရားတွေ မပစ်ခတ်ဘူး။ စမ်းသပ်ခံရချိန်မှာ ယေဟောဝါကို အားကိုးတယ်။ အစ်ကိုတွေကို ခွင့်လွှတ်တဲ့အပြင် မေတ္တာနဲ့ ဆက်ဆံတယ်။ (က. ၄၇:၁၁၊ ၁၂) စမ်းသပ်မှုတွေဟာ မိမိကို ပိုကောင်းတဲ့လူ ဖြစ်လာစေတဲ့အရာလို့ သဘောထားတယ်။ (ဆာ. ၁၀၅:၁၇-၁၉) ဒါကြောင့်လည်း ယေဟောဝါအတွက် ယောသပ် သိပ်အသုံးဝင်သူ ဖြစ်လာတာ။

၁၆။ စမ်းသပ်မှု ကြုံရတဲ့အခါ ယောသပ်ကို ဘယ်လို အတုယူနိုင်သလဲ။

^၁၆ ဘာသင်ယူနိုင်သလဲ။ စမ်းသပ်မှုတွေကြောင့် ယေဟောဝါနဲ့ကော ညီအစ်ကို/မတွေနဲ့ပါ ဝေးကွာမသွားပါစေနဲ့။ ကျွန်တော်တို့ကို လေ့ကျင့်ပေးဖို့ စမ်းသပ်မှုတွေ ယေဟောဝါ ကြုံခွင့်ပြုနိုင်တယ်ဆိုတာ သတိရပါ။ (ဟီ. ၁၂:၇၊ အောက်ခြေမှတ်ချက်) အဲဒီလေ့ကျင့်မှုက ကရုဏာ၊ ခွင့်လွှတ်မှု စတဲ့ အရည်အသွေးကောင်းတွေ ပိုရှိလာစေတယ်။ (ဟီ. ၁၂:၁၁) ခံနိုင်ရည် ရှိမယ်ဆိုရင် ယောသပ်ကို ဆုချသလို ကျွန်တော်တို့ကို ယေဟောဝါ ဆုချမယ်။

ဗင်ယာမိန်

၁၇။ ဗင်ယာမိန်ကို ယာကုပ် ပြောတဲ့စကားတွေ ဘယ်လို ပြည့်စုံလာသလဲ။ (ကမ္ဘာဦး ၄၉:၂၇) (လေးထောင့်ကွက်ကိုလည်း ကြည့်ပါ။)

^၁၇ ကမ္ဘာဦး ၄၉:၂၇ ကို ဖတ်ပါ။ ဗင်ယာမိန်အနွယ်ဟာ ဝံပုလွေလို တိုက်ရည်ခိုက်ရည် ရှိမယ်လို့ ယာကုပ် ကြိုဟောတယ်။ (သူကြီး. ၂၀:၁၅၊ ၁၆။ ၁ ရာ. ၁၂:၂) ‘မနက်ပိုင်းမှာ သားကောင်ကို ကိုက်စားမယ်’ ဆိုတဲ့ ကြိုဟောချက် ဘယ်လို ပြည့်စုံလာသလဲ။ “မနက်ပိုင်း” ဖြစ်တဲ့ အစ္စရေးမင်းဆက်အစမှာ ဗင်ယာမိန်အနွယ် ရှောလုဟာ ဦးဆုံး အစ္စရေးဘုရင် ဖြစ်လာတယ်။ ဖိလိတိတွေကို ရှောလု ရွပ်ရွပ်ချွံချွံ တိုက်ခိုက်ခဲ့တယ်။ (၁ ရှ. ၉:၁၅-၁၇၊ ၂၁) “ညနေပိုင်းမှာ တိုက်ရာပါဥစ္စာတွေကို ခွဲဝေမယ်” ဆိုတဲ့ ကြိုဟောချက်ကော ဘယ်လို ပြည့်စုံလာသလဲ။ “ညနေပိုင်း” ဖြစ်တဲ့ အစ္စရေးမင်းဆက် မရှိတော့တဲ့အချိန်မှာ ပါးရှားအင်ပါယာတစ်ခွင်က အစ္စရေးတွေ သုတ်သင်ခံရမယ့်အဖြစ်ကနေ ဗင်ယာမိန်အနွယ် မိဖုရား ဧသတာနဲ့ ဝန်ကြီးချုပ် မော်ဒကဲ ကယ်တင်ခဲ့တယ်။—ဧသ. ၂:၅-၇။ ၈:၃။ ၁၀:၃။

၁၈။ ဗင်ယာမိန်အနွယ်ရဲ့ သစ္စာစောင့်သိမှုကို ဘယ်လို အတုယူနိုင်သလဲ။

^၁၈ ဘာသင်ယူနိုင်သလဲ။ မိမိတို့အနွယ်ထဲက ရှောလု ဘုရင်ဖြစ်လာတာ မြင်ရလို့ ဗင်ယာမိန်အနွယ် သိပ်ဂုဏ်ယူမှာပဲ။ ယုဒအနွယ်ထဲက ဒါဝိဒ်ကို ယေဟောဝါ ထီးနန်းလွှဲပြောင်းပေးတဲ့အခါ သူတို့ အစပိုင်းမှာ မထောက်ခံပေမဲ့ နောက်ပိုင်းမှာ သဘောတူထောက်ခံတယ်။ (၂ ရှ. ၃:၁၇-၁၉) နှစ်များစွာအကြာမှာ ယုဒနိုင်ငံကို ဆယ်နွယ်နိုင်ငံ ပုန်ကန်တဲ့အခါ ယုဒအနွယ်ကိုကော ယေဟောဝါ ရွေးချယ်ထားတဲ့ ဘုရင်ကိုပါ သူတို့ သစ္စာစောင့်သိတယ်။ (၁ ဘု. ၁၁:၃၁၊ ၃၂။ ၁၂:၁၉၊ ၂၁) ဒီနေ့အချိန်မှာလည်း လူမျိုးတော်ကို ဦးဆောင်ဖို့ ယေဟောဝါ ခန့်အပ်ထားသူတွေကို ကျွန်တော်တို့ သစ္စာရှိရှိ ထောက်မရမယ်။—၁ သက်. ၅:၁၂။

၁၉။ ယာကုပ်ရဲ့ နောက်ဆုံးအမှာစကားတွေကနေ ဘာသင်ယူနိုင်သလဲ။

^၁၉ ယာကုပ်ရဲ့ နောက်ဆုံးအမှာစကားတွေကနေ ကျွန်တော်တို့ အများကြီး သင်ယူနိုင်တယ်။ ယာကုပ်ရဲ့ ကြိုဟောချက်တွေ ဘယ်လို ပြည့်စုံလာကြောင်း လေ့လာတဲ့အခါ ကျမ်းစာထဲက တခြားကြိုဟောချက်တွေလည်း ပြည့်စုံလာမယ်ဆိုတာ ပိုစိတ်ချလာတယ်။ ယေဟောဝါရဲ့ စိတ်တော်နဲ့ တွေ့ဖို့ ဘာလုပ်ရမယ်ဆိုတာ ပိုနားလည်လာတယ်။