ကျမ်းစာကို ယုံကြည်စိတ်ချနိုင်ပါသလား

ကျမ်းစာထဲမှာ ကတိတွေ၊ အကြံပြုချက်တွေ အများကြီး ပါတယ်။ သင်ဟာ ကျမ်းစာမှာ ဘာတွေ သွန်သင်သလဲဆိုတာ သိချင်ပေမဲ့ ယုံဖို့ခက်နေနိုင်တယ်။ ခေတ်ဟောင်းနေတဲ့ စာအုပ်ထဲက ကတိတွေ၊ အကြံပြုချက်တွေကို ယုံကြည်စိတ်ချနိုင်ပါ့မလား။ လောလောဆယ်မှာကော အနာဂတ်မှာပါ ဘဝကို ပျော်မွေ့နိုင်မယ်ဆိုတဲ့ ကျမ်းစာအဆိုကို ယုံလို့ရပါ့မလား။ လူများစွာကတော့ ယုံကြတယ်။ ကိုယ်တိုင် လေ့လာဆန်းစစ်ကြည့်လိုက်ပါ။

၁။ ကျမ်းစာမှာ ပါတာတွေက ဖြစ်ရပ်မှန်တွေလား၊ စိတ်ကူးယဉ်တွေလား။

ကျမ်းစာမှာ “[တိကျမှန်ကန်တဲ့] အမှန်တရားစကားတွေ” ပါတယ်လို့ ဆိုထားတယ်။ (ဒေသနာ ၁၂:၁၀) တကယ်ရှိခဲ့တဲ့ လူတွေအကြောင်း ဖြစ်ရပ်မှန်တွေ ပါတယ်။ (လုကာ ၁:၃။ ၃:၁၊ ၂) ကျမ်းစာထဲက အရေးပါတဲ့ ရက်စွဲ၊ လူတွေ၊ နေရာဒေသတွေ၊ ဖြစ်ရပ်တွေရဲ့ မှန်ကန်မှုကို သမိုင်းပညာရှင်နဲ့ ရှေးဟောင်းသုတေသီများစွာ အတည်ပြုကြတယ်။

၂။ ကျမ်းစာဟာ ခေတ်နောက်ကျနေတဲ့ စာအုပ် မဟုတ်ဘူးလို့ ဘာကြောင့် ပြောနိုင်သလဲ။

ကျမ်းစာဟာ ခေတ်ရှေ့ပြေးတဲ့ စာအုပ်ဆိုတာ နည်းအမျိုးမျိုးနဲ့ သက်သေထူခဲ့ပြီ။ ဥပမာ၊ သိပ္ပံနဲ့ဆိုင်တဲ့ အကြောင်းအရာတွေကို ဖော်ပြထားတယ်။ အဲဒီအကြောင်းတွေကို ရေးသားချိန်တုန်းကတောင် လူတွေ မယုံကြဘူး။ ဒါပေမဲ့ ခေတ်သစ် သိပ္ပံပညာက ကျမ်းစာရဲ့ တိကျမှန်ကန်မှုကို အတည်ပြုတယ်။ ကျမ်းစာကို “အခုရော၊ နောင်ရော အမြဲစိတ်ချနိုင်တယ်။”—ဆာလံ ၁၁၁:၈။

၃။ အနာဂတ်နဲ့ပတ်သက်တဲ့ ကျမ်းစာအဆိုကို ဘာကြောင့် စိတ်ချနိုင်သလဲ။

“မလုပ်ဆောင်ရသေးတဲ့အရာတွေ” အကြောင်း ကြိုဟောချက်တွေ ကျမ်းစာမှာ ပါတယ်။ (ဟေရှာယ ၄၆:၁၀) သမိုင်းဝင်ဖြစ်ရပ်တွေ မဖြစ်လာခင်ကတည်းက နှစ်ပေါင်းများစွာ အတိအကျ ကြိုဟောထားတယ်။ လက်ရှိ ကမ္ဘာ့အခြေအနေအကြောင်းကိုလည်း အသေးစိတ် ကြိုဟောထားတယ်။ ဒီသင်ခန်းစာမှာ ကျမ်းစာကြိုဟောချက်တချို့ကို ဆန်းစစ်ကြပါမယ်။ ဒီကြိုဟောချက်တွေရဲ့ တိကျမှန်ကန်မှုဟာ အံ့မခန်းပါပဲ။

အနှစ်ချုပ်

သမိုင်း၊ သိပ္ပံပညာ၊ ကြိုဟောချက်တွေက ကျမ်းစာကို ယုံကြည်စိတ်ချနိုင်ကြောင်း ဖော်ပြတယ်။

ပြန်လည်သုံးသပ်ခြင်း

• ကျမ်းစာမှာပါတာတွေက ဖြစ်ရပ်မှန်တွေလား၊ စိတ်ကူးယဉ်တွေလား။

• ဘယ်ကဏ္ဍတွေမှာ သိပ္ပံပညာက ကျမ်းစာကို ထောက်ခံထားသလဲ။

• ကျမ်းစာမှာ အနာဂတ်အကြောင်း ကြိုဟောထားတယ်လို့ ထင်ပါသလား။ ဘာကြောင့်လဲ။

လေ့လာစရာ ထပ်ဖွေရှာ

ကျမ်းစာမှာ သိပ္ပံပညာနဲ့ မကိုက်ညီတာ ရှိသလား။

“သိပ္ပံပညာက ကျမ်းစာနဲ့ ကိုက်ညီသလား” (ဝက်ဘ်ဆိုက် ဆောင်းပါး)

“နောက်ဆုံးကာလ” နဲ့ပတ်သက်တဲ့ အဖြစ်မှန်တွေက ဘာလဲ။

“ကျမ်းစာကြိုဟောချက် ၆ ခု” (ကင်းမျှော်စင် မေ ၁၊ ၂၀၁၁)

ဂရိအင်ပါယာအကြောင်း ကျမ်းစာကြိုဟောချက် ဘယ်လို ပြည့်စုံခဲ့သလဲဆိုတာ လေ့လာကြည့်ပါ။

‘ပရောဖက်ပြုချက်တွေက’ ခွန်အားရှိစေ (၅:၂၅)