Erhi Adamu na Eva barhenga omu bustani bw’e Edeni, baburha bana banji. Mugala wabo murhanzi Kayini, ali muhinzi, na Abeli, mugala wabo wa kabirhi ali mushwesi.

Lusiku luguma Kayini na Abeli baha Yehova enterekêro. K’omanyire enterekêro byo bici? Eba ngalo ndebe yago-yago. Yehova ashagalukira enterekêro ya Abeli, cikone arhashagalukiraga eya Kayini. Oko kwarhuma Kayini akunira bwenene. Yehova arhonda Kayini oku obo bukunizi bwage bwarhuma ajira kantu kalebe kabi. Cikone Kayini arhayumvagya.

Lubero n’oko, Kayini abwira Abeli ntya: ‘Yisha rhuje ebw’ishwa.’ Erhi baba bali bone ebw’ishwa, Kayini ahamirako mulumuna wage anamuniga. Gurhi Yehova ajijire? Yehova ahana Kayini omu kumurhuma kuli bwenene n’omulala gwage. Arhaciyemereragwa okugaluka emwabo ciru n’olusiku luguma.

Ka hali isomo oko kwakarhuyigiriza? Rhwanarhondera okukunira erhi ebintu byakabula bwajirikana nk’oku rhwal’ilonzize bijirikane. Erhi rhwakayumva oku obukunizi bukola buli bwakula muli rhwe; nisi erhi abandi bakarhurhonda bulya babwine oku rhugwerhe obukunizi, rhushinganine rhujire empindulo duba-duba lyo rhuhima obo bukunizi n’okurhulirira.

Bulya Abeli al’izigire Yehova, anajijire ebintu bishinganine, Yehova akamukengera ensiku zoshi. Mungu anafûle Abeli amango ajira igulu libe paradizo.

Erhi hagera nsiku, abantu baba banji okw’igulu. Banji muli bo bali babi. Ciru na bamalahika baguma na baguma b’empingu baba babi. Barhenga emwabo empingu bayisha hanw’igulu. K’omanyire ecarhumaga bajira ntyo? Lyo bayambala omubiri gwa bene bantu n’okurhola abakazi.

Abo bamalahika n’abo bakazi baburha abana. Abo bana bali ba misi minji banali baminya bwenene. Bakag’ijirira abantu kubi bwenene. Yehova arhayemeraga ebyo bigendekere byajirikana. Ntyo ahiga okushereza abantu babi kugerera enkuba y’ecihonzi.

Cikone hali mulume muguma wali lubero. Al’izigire Yehova. Izino lyage ye wali Nuhu. Agwerhe omukazi na bagala basharhu; Semu, Hamu, na Yafeti. Na ngasi mugala agwerhe omukazi. Yehova abwira Nuhu ayubake esafina nnene lyo ye n’omulala gwage barhag’isherezibwa n’eyo Nkuba y’Ecihonzi. Esafina liri isanduku linene bwenene lyakayerera enyanya z’amishi. Na kandi Yehova abwira Nuhu ahire nsimba nyinji omu safina lyo nazo zirhag’isherezibwa.

Ho n’aho Nuhu arhondera ayubaka esafina. Nuhu n’omulala gwage bayusize hofi myaka 50 bali bayubaka esafina. Bayubaka esafina nk’oku Yehova anababwiraga bajire. Mw’ako kasanzi, Nuhu akarhonda abantu lugenda Enkuba y’Ecihonzi. Cikone ntaye wamuyumvirhizize.

Buzinda, akasanzi k’okuja omu safina kahika. Leki rhulabe ebyabire enyuma z’aho.