Loti al’ilamire na mw’ishe Abrahamu omu cihugo c’e Kanani. Buzinda, Abrahamu na Loti baba na bishwekwa binji, cikone ahantu h’okubiyabulira byoshi haba hasungunu. Abrahamu abwira Loti ntya: ‘Rhurhakacibêra haguma. Wekasinga ocishoge aha osimire okuja, nani naja olundi lunda.’ Oko kuyerekine oku Abrahamu arhali muntu wa kucikaliza, k’arhali ntyo?

Loti abona ahantu hinja bwenene mw’eco cihugo hofi n’evile yakag’ihamagalwa Sodoma. Eyo yali amishi manji n’ebyasi. Acishoga eyo eneo anahamikiza yo omulala gwage.

Abantu b’omu vile y’e Sodoma n’ab’omu vile yali hofi nayo y’e Gomora bali babi bwenene. Kobinali bali babi bwenene, n’oko kwarhuma Yehova ahiga okushereza ezo vile zombi. Cikone Mungu al’ilonzize okuyokola Loti n’omulala gwage, muli oko arhuma bamalahika babirhi lyo babarhonda. Bababwira ntya: ‘Yimuki! Murhenge mw’eyi vile! Yehova akola ayishereza.’

Loti arharhengaga mw’eyo vile ho n’aho. Arhabiduhaga okurhenga mw’eyo vile. Muli oko bamalahika bagwarha Loti, mukage, na bali babo babirhi amaboko babakululira embuga z’eyo vile, banababwira ntya: ‘Kanyi! Muyase amagala ginyu, murhanakabaganaga murhag’ifâ!’

Erhi bahika omu vile yakag’ihamagalwa Sowari, Yehova aniesa enkuba y’ecibiriti n’omuliro omu Sodoma n’omu Gomora. Ezo vile zombi zasherezibwa loshi-loshi. Erhi muka Loti abula burhumikira Yehova akabagana, ahinduka cirundo ca munyu! Cikone Loti na bali bage bayokoka bulya barhumikire Yehova. Bashinganine babe baciyumvirhe kubi okubona muka Loti arharhumikiraga Yehova. Cikone bashagalusire bwenene okubona barhumikire obulongozi bwa Yehova.

Abrahamu ayigirizize omugala Izaki okuzigira Yehova n’okulangalira ebiragane byage byoshi. Cikone erhi Izaki agwerhe hofi myaka 25, Yehova abwira Abrahamu ajire kantu kalebe kakabire kazibu kuli Abrahamu okujira. Kantu kahi ako?

Mungu abwira Abrahamu ntya: ‘Wekasinga, orhôle mugala wawe cusha omuhêke omu cihugo c’e Moriya, nakuyeresa entondo wamumperako nterekêro.’ Abrahamu arhalimanyire ciru n’ehitya ecarhumaga Yehova amubwira ajire ntyo. Cikone kandi arhumikira Yehova.

Erhi guba mucera-cera olusiku lwakulikiraga, Abrahamu arhôla Izaki na bakozi bage babirhi baja omu cihugo c’e Moriya. Enyuma za nsiku isharhu, barhondera balangira entondo. Abrahamu abwira abo bakozi bage bamulinde amango ye na Izaki baj’ihâna enterekêro. Abrahamu abarhuza Izaki enshali, naye ahêka akere. Izaki adosa ishe ntya: ‘Ngahi omwana-buzi rhwahâna nterekêro ali?’ Abrahamu amushuza ntya: ‘Mwana wani, Yehova arhuha ye.’

Erhi bahika oku ntondo, bayubaka amazabahu. Enyuma z’aho Abrahamu ashweka Izaki amaboko n’amagulu anamuhira oku mazabahu.

Abrahamu arhôla akere ly’amuniga. Mw’ako kasanzi, malahika wa Yehova ahamagala kurhenga empingu. Aderha ntya: ‘Abrahamu! Orhajiraga oyo mwana kubi! Nkolaga manyire oku ojira obuyemere muli Mungu bulya wayemire okuhâna mugala wawe nterekêro.’ Enyuma z’aho, Abrahamu alangira engandabuzi ehangarhine amahembe omw’ishaka. Ho n’aho ashwekula Izaki anahâna eyo ngandabuzi nterekêro ahali h’okuhâna Izaki.

Kurhondera olo lusiku, Yehova akahamagala Abrahamu mwîra wage. K’omanyire bulya gurhi? Abrahamu akag’ijira ebi Yehova amuhûnyire byoshi, ciru n’amango arhal’ihugûsirwe bulya gurhi Yehova amuhûnyire abijire.

Yehova ashub’igalukira eciragane ahaga Abrahamu. Aderha ntya: ‘Nakugisha, iburha lyawe naliluza.’ Ko kuderha oku Yehova akagishire abantu boshi binja kugerera omulala gwa Abrahamu.