Ecihugo c’e Usi, calimwo mulume muguma wakag’iharamya Yehova. Izino lyage ye Ayubu. Ali muntu mugale bwenene, ananagwerhe mulala munji. Ali muntu mwinja, anakag’irhabala abakenyi, abakazi b’iba bali bafîre, n’abana barhacigwerhe babusi. Cikone, k’okubona Ayubu akag’ijira ebintu binja kuli kuderha oku arhakacihikirwe n’amazibu?

Shetani Ibilisi akag’ilabiriza Ayubu, cikone Ayubu arhal’imanyire ntyo. Yehova abwira Shetani ntya: ‘Ka wabwine omukozi wani Ayubu? Nta muntu oli akage okw’igulu. Anakanyumvirhiza n’okujira ebintu binja.’ Shetani ashuza ntya: ‘Kobinali Ayubu anakurhumikire. Onamulange n’okumugisha. Wamuhîre amashwa n’ebishwekwa. Erhi wakamunyaga byo, analeka okukuharamya.’ Yehova aderha ntya: ‘Okalonza ohire Ayubu omu marhangulo. Cikone omanye wakamuniga.’ Bici byarhumaga Yehova aleka Shetani ahire Ayubu omu marhangulo? Al’imanyire n’obwalagale oku Ayubu arhaleke okumukolera.

Shetani ahira Ayubu omu marhangulo omu kumulerhera mahanya manji bwenene. Burhangiriza arhuma abantu b’e Seba lyo bazimba enkafu za Ayubu na ba punda bage. Enyuma z’aho omuliro gwashereza ebibuzi byoshi bya Ayubu. Ecindi cigusho c’abantu b’e Kaldayo, cazimba engamiya zage. Abakozi ba Ayubu bakag’iyabula ebyo bishwekwa banigwa. Enyuma z’aho hahikira obuhanya bubi kulusha. Abana ba Ayubu boshi bafâ amango bakag’icishagalusa erhi enyumpa balimwo ebashabukirako. Ayubu avunika omurhima, cikone arhalekaga okuharamya Yehova.

Shetani al’ilonzize Ayubu alibuke bwenene kulusha, ntyo amezako Ayubu amahurhe oku mubiri gwage goshi. Ayubu agwerhe amalumwa madarhi bwenene. Arhal’imanyire ecakag’irhuma ebyo bintu byoshi byamuhikira. Cikone, Ayubu agendekera aharamya Yehova. Mungu abona ebyo byoshi, anashagalukira Ayubu bwenene.

Enyuma z’aho Shetani arhuma balume basharhu lyo bagend’ihira obwishwekerezi bwa Ayubu omu marhangulo. Bamubwira ntya: ‘Bibonekine oku wajijire ecaha onali walonza okucifulika. Mungu ali akuha obuhane.’ Ayubu aderha ntya: ‘Yaga, nta kantu kabi najijire.’ Cikone arhondera arhanya oku Yehova ye warhumaga ahikirwa n’ago mazibu goshi, anaderha oku Mungu arhamujiriri okushinganine.

Musole muguma gwakag’ihamagalwa Elihu gwakag’iyumvirhiza enshambalo zabo buzira kuderha kantu. Enyuma z’aho aderha ntya: ‘Ebyo mwadesire mweshi biri bya bunywesi. Yehova ali mukulu bwenene kulusha oku rhwakahash’ihugûkwa. Nta mango akajira kantu kalebe kabi. Anabone ngasi kantu n’okurhabala abantu bali omu mazibu.’

Enyuma z’aho Yehova aganiza Ayubu. Aderha ntya: ‘Ngahi wali erhi ndema empingu n’igulu? Bulya gurhi odesire oku ntakujiriri okushinganine? Oli waderha, cikone orhamanyiri bulya gurhi ebyo bintu bili byakuhikira.’ Ayubu ayemera amagosa gage anaderha ntya: ‘Nacirhebire. Nakag’iyumva bakakuderha, cikone lero nkola nkumanyire. Nta kantu kakakuyabira. Ombabalire kw’ebi naderhaga.’

Erhi amarhangulo ga Ayubu gahwa, Yehova ashub’imugalulira amagala minja anamuha bintu binji bwenene kulusha ebi agwerhe embere. Ayubu alama nsiku nyinji na za mwishingo. Yehova agisha Ayubu bulya amuyumvirhizize ciru akaba okujira ntyo kwali kuzibu. Ka waba aka Ayubu omu kugendekera waharamya Yehova ciru wakahikirwa na mazibu gahi?

Erhi omulala gwa Yakobo guli e Misri, gwakag’ihamagalwa Baisraheli. Enyuma za Yakobo na Yozefu okufâ, Faraoni muhyahya arhondera arhambula. Al’iyobohire bulya Abaisraheli balikola bali baba na buhashe bunji kulusha Abamisri. Ntyo oyo Faraoni ajira Abaisraheli babe baja. Aseza Abaisraheli barhondere okujira omukolo gw’okuforomola amatofali n’okuhinga bwenene amashwa. Cikone oku Abamisri bagendekire babaseza okujira emikolo mizibu, ko Abaisraheli banagendekire baba banji bwenene. Bulya Faraoni arhashagalukiraga oko, arhegeka oku orhubonjo rhw’Abaisraheli rhoshi rhwakaburhwa rhurhabana rhunigwe. Ka wanarhanya kunganaci Abaisraheli bayobohire enyanya z’oko?

Mukazi muguma Muisraheli wakag’ihamagalwa Yokebedi agwerhe omwana-rhabana w’iranga linja. Ly’amulanga, amuhira omu lurhanda anagend’ilufulika omu masheke g’Olwishi Nile. Miriyamu, mwali wa Yokebedi abêra hofi n’olo lurhanda ly’aja alaba oku byaba.

Mwali wa Faraoni ayish’iyoga oku lwishi anabona olo lurhanda. Erhi alaba mw’olo lurhanda abona omwana oli walaka, anamuyumviza obwonjo. Miriyamu amudosa ntya: ‘Ka nged’ikulongeza omukazi wakakuyonkeza oyo mwana?’ Erhi mwali wa Faraoni ayemera, Miriyamu agend’ilerha nina Yokebedi. Mwali wa Faraoni amubwira ntya: ‘Orhôle oyu mwana, okamunyonkeza, nakakulipa.’

Erhi oyo mwana akula, Yokebedi amuhekera mwali wa Faraoni, mwali wa Faraoni amuha izino lya Musa anamulera nka mugala. Musa akula nka muluzi erhi mwene mwami, akanabire na ngasi kantu koshi al’ilagirireko. Cikone Musa arhayibagiraga Yehova ciru n’ehitya. Al’imanyire n’obwalagale oku ali Muisraheli, ci arhali Mumisri. Anacishoga okukolera Yehova.

Erhi aba na myaka 40, Musa ahiga okurhabala bene wabo Baisraheli. Erhi Musa abona Mumisri muguma ali ashurha Muisraheli muguma wali muja, ashurha oyo Mumisri bwenene kuhika amuniga. Musa afulika omubiri gw’oyo Mumisri omu mucanga. Erhi Faraoni amanya oko, alonza okuniga Musa. Cikone Musa ayakira omu cihugo c’e Midiyani. Yehova amushibirira eyo munda.