Yehova abwira Musa ntya: ‘Oyishe rhurhimanane oku ntondo. Nayandika amarhegeko gani oku mabuye g’olubamba n’okukuhago.’ Musa asokera oku ntondo anayusako nsiku 40 mushi n’obudufu. Erhi ali eyo munda, Yehova ayandika Amarhegeko Ikumi oku mabuye abirhi g’olubamba anagaha Musa.

Enyuma za kasanzi kalebe, Abaisraheli barhanya oku Musa abalesire. Babwira Aroni ntya: ‘Rhulonzize omuntu w’okurhulongoza. Orhujirire mungu!’ Aroni aderha ntya: ‘Mumpe enoro mugwerhe.’ Aziyayusa anazitulamwo ensanamu y’akanina. Abantu baderha ntya: ‘Aka kanina ye Mungu wirhu warhukûlaga e Misri!’ Barhondera baharamya ako kanina k’enoro, banajira idinye. K’okujira ntyo kwali kubi? Neci, bulya abantu bali erhi balaganyize oku Yehova yene ye bakaharamya. Cikone bavuna eco ciragane bajiraga.

Yehova abona ebi Abaisraheli bakag’ijira, anabwira Musa ntya: ‘Oyandagale emunda abantu bali. Bambulire obukenge banali baharamya himungu hy’obunywesi.’ Musa ayandagala erhi anagwerhe galya mabuye abirhi g’olubamba.

Erhi Musa ayegerera akambi, ayumva abantu bali bayimba. Buzinda ababona bali basama banali bafukamira akanina. Musa agaya bwenene. Arhimba galya mabuye okw’idaho, ganaberanguka goshi. Ho n’aho ashereza eyo nsanamu. Buzinda adosa Aroni ntya: ‘Bici aba bantu bakubwizire ly’oyemera okujira akantu kabi kali nk’aka?’ Aroni aderha ntya: ‘Orhabaga burhe. Oba omanyire oborhere bw’aba bantu. Bal’ilonzize himungu, ntyo namakweba enoro zabo omu muliro gwamarhengamwo aka kanina!’ Aroni arhal’ishinganine ajire ntyo. Musa ashub’igaluka oku ntondo anasemberera Yehova ababalire abo bantu.

Yehova ababalira abal’ilonzize okumurhumikira. K’obwine bulya gurhi kwali kwa bulagirire oku Baisraheli okurhumikira obulongozi bwa Musa?

Erhi Musa ali oku Ntondo Sinayi, Yehova amubwira ayubake ihema lyago-lyago, lyakag’ihamagalwa ihema ly’entimanano, n’Abaisraheli bakag’iharamizamwo Yehova. Bakag’ihêka ihema ly’entimanano ngasi mango erhi bakahamire.

Yehova aderha ntya: ‘Obwire abantu balerhe ngasi kantu bakapata lyo muyubaka ihema ly’entimanano.’ Abaisraheli balerha enoro, enfaranga, amarhale, amabuye g’engulo ndarhi, n’ebindi bintu by’engulo ndarhi bakag’iciyinjihyamwo. Na kandi bahâna oboya bw’ecibuzi, ebitambara by’irangi lidukula, empu z’ensimba, n’ebindi bintu binji. Bahânyire bintu binji bwenene kuhika Musa ababwira ntya: ‘Byamaluga! Mumanye mwakacilerha ebindi.’

Abalume n’abakazi bagwerhe obulenga barhabala okuyubaka ihema ly’entimanano. Yehova ye wabahaga obwenge bw’okujira ogo mukolo. Baguma na baguma bakasuka enyuzi n’ebitambara, abandi bakajira omukolo gw’okubiyinjihya. Abandi bakarheganya amabuye, enoro, n’empaho.

Abantu bayubaka ihema ly’entimanano nk’oku Yehova anababwiraga. Bal’ijijire erido nyinja bwenene yal’igabire ihema ly’entimanano mwo bigabi bibirhi; Ahatagatifu n’Ahatagatifu Bwenene. Omu Hatagatifu Bwenene mwali isanduku ly’endagano lyal’ijijirwe n’empaho z’akasiya n’enoro. Omu Hatagatifu mwali ecimanikiro c’itara cijijirwe n’enoro, mwali ameza, n’amazabahu g’okuyocerako obuku. Omu ngo mwali ebasé y’amarhale, n’amazabahu manenene. Isanduku ly’endagano lyakag’ikengeza Abaisraheli eciragane bajiraga c’okukarhumikira Yehova. K’omanyire endagano byo bici? Endagano ciri ciragane cago-cago.

Yehova acishoga Aroni n’abagala lyo bakakola omw’ihema ly’entimanano nka bakuhani. Bal’ishinganine bakalishibirira n’okuheramwo Yehova enterekêro. Bulya Aroni ye wali kuhani mukulu, yene wal’iyemerirwe okuja Ahatagatifu Bwenene. Akag’ijamwo liguma omu mwaka ly’ahâna enterekêro enyanya z’ebyaha byage, ebyaha by’omulala gwage, n’ebyaha by’ishanja lyoshi lya bene Israheli.

Abaisraheli bayusagya bayubaka ihema ly’entimanano mwaka muguma enyuma z’okurhenga e Misri. Bal’ikola bagwerhe ahantu h’okuharamiza Yehova.

Yehova abumba irenge lyage omw’ihema ly’entimanano anajira ecitu cikabonekana enyanya zalyo. Erhi ecitu cakabêzire enyanya z’ihema ly’entimanano, Abaisraheli bakag’ibêra aha bali. Cikone erhi eco citu cakagenzire, bakag’imanya oku kakola kasanzi k’okugenda. Bakag’ishaba ihema ly’entimanano n’okukulikira eco citu.