Erhi abalume Baisraheli barhumagwa okuj’ilaba evile y’e Yeriko bahika yo, babêra omu nyumpa ya mukazi muguma wakag’ihamagalwa Rahabu. Mwami w’e Yeriko amanya anarhuma abasoda omu nyumpa ya Rahabu. Afulika ezo ndolerezi okw’idari ly’enyumpa yage anarhuma abo basoda baj’izilongeza ahandi hantu. Abwira ezo ndolerezi ntya: ‘Namurhabala bulya manyire oku Yehova ali haguma na ninyu. Nnamanyire oku mwarhôla eci cihugo. Mwemukasinga mundaganye oku mwayokola omulala gwani.’

Ezo ndolerezi zabwira Rahabu ntya: ‘Rhukulaganyize oku nta muntu wayish’iba ali omu mwawe wayish’ijirirwa kubi.’ Bamubwira ntya: ‘Oshwekere omugozi mudukula okw’idirisha ly’enyumpa yawe, n’omulala gwawe gurhayish’isherezibwe.’

Rahabu agereza ezo ndolerezi omw’idirisha ly’enyumpa yage omu kukolesa omugozi. Baj’icifulika omu ntondo banayusayo nsiku isharhu embere bagaluke emunda Yozwe ali. Enyuma z’aho Abaisraheli bayikira Olwishi Yordani banacirheganya okurhôla ecihugo. Evile y’e Yeriko yo yali ntanzi barhôlaga. Yehova ababwira bayuse nsiku ndarhu bali bazunguluka evile liguma ngasi lusiku. Olusiku lwa kali nda, bazunguluka evile kali nda. Enyuma z’aho abakuhani babuha emishekera yabo, n’abasoda bayama bwenene. Enkuta z’eyo vile zashabuka! Cikone enyumpa ya Rahabu yali oku lukuta, erhashabukaga. Rahabu n’omulala gwage bayokosire bulya bal’ilangalire Yehova.

Emyanzi eyerekire e Yeriko yamanyikana oku gandi mashanja g’e Kanani. Abami b’ago mashanja bahiga okucilunga haguma lyo balwisa Abaisraheli. Cikone Abagabaoni bayisha n’omuhigo guli lubero. Baja emunda Yozwe ali banayambirhe emishangi eberesire, banamubwira ntya: ‘Rhurhenzire omu cihugo ca kulî bwenene. Rhwayumvirhe emyanzi eyerekire Yehova n’ebi ajijire enyanya zinyu e Misri n’e Mowabu. Murhulaganye oku murharhushereze, rhwaba bakozi binyu.’

Yozwe abalangalira anayemera oku arhabashereze. Nsiku isharhu enyuma z’aho, amanya oku barhali b’omu cihugo ca kulî. Bali b’omu cihugo c’e Kanani. Yozwe adosa Abagabaoni ntya: ‘Bici byarhumaga mwarhurheba?’ Bashuza ntya: ‘Rhwal’iyobohire! Rhumanyire oku Yehova Mungu winyu ali amulwira. Mwemukasinga mumanye mwakarhuniga.’ Yozwe ahikiriza eciragane abahaga arhanabanigaga.

Kasanzi kasungunu enyuma z’aho, bami barhanu b’e Kanani n’abasoda babo bakayobohya Abagabaoni n’okubabwira oku babarhera. Yozwe n’abasoda bage balambagira obudufu boshi lyo bayokola Abagabaoni. Barhondera okulwa sezi-sezi omu lusiku lwakulikiraga. Abantu b’e Kanani barhondera bayaka omu kulibirha ngasi hoshi. Ngasi hoshi bakag’ilibirhira Yehova akabarhogezako abamuye manenene. Enyuma z’aho Yozwe ahûna Yehova ayimanze izuba. Bici byarhumaga ahûna Yehova ayimanze izuba n’obu nta mango lyalisag’iyimanga? Bulya Yozwe al’ilangalire Yehova. Izuba lirhazikaga olusiku loshi kuhika Abaisraheli bahima abami b’e Kanani n’abasoda babo.