ISOMO LYA 58
Ogendekere Waba Mwishwekerezi Kuli Yehova
Abakristu b’okuli baba bahizire oku ntakantu erhi muntu yeshi-yeshi wakabasheregeza obwîra bwabo haguma na Yehova. Rhunayemire buzira karhinda oku nawe go muhigo gwawe ogo. Yehova anabone obwishwekerezi bwawe oku buli bwa bulagirire bwenene. (Osome 1 Enganîro 28:9.) Kanga kahi kakahira obwishwekerezi bwawe kuli Yehova omu marhangulo, na bici byakakurhabala ly’okahima?
1. Gurhi abandi bakahira obwishwekerezi bwirhu kuli Yehova omu marhangulo?
Bantu baguma na baguma banajire okwabo koshi lyo barhuhanza okukolera Yehova. Bandi bakajira ntyo? Bantu baguma na baguma balesire okuli banakaderha obunywesi okubiyerekire ikubuliro lya Nnâmahanga lyo barhuma rhwanyihya obuyemere bwirhu. Abo bantu banakahamagalwa bagoma. Na kandi, abakulu b’amadîni banayalize emyanzi y’obunywesi kurhuyerekera lyo bala babula kuba masu baleka okuli. Kuli kubi bwenene erhi rhwakakaganiza abagoma, okusoma ebitabu byabo, okuja oku site zabo z’e Enternete erhi okulola amavideo gabo. Hali akantu Yezu adesire lugenda bala balonza okushumya abandi baleke okukolera Yehova n’obwishwekerezi. Aderha ntya: ‘Leki bo: bali birongozi mihûrha! Erhi omuhûrha gwankahêka ogwabo, yombi okw’enali yanahirimira omu mwina.’—Mateyo 15:14, Mashi Bible.
2. Gurhi emihigo yirhu rhwenene yakayerekanamwo oku rhuli bishwekerezi kuli Yehova erhi nanga?
Obuzigire bwirhu kuli Yehova bunarhushumye rhuyake okuba n’olushangi n’idîni ly’obunywesi. Co cirhumire rhurhashinganini rhujire mukolo mulebe, okuja omw’ikubuliro lilebe, erhi kujira kantu kalebe kagwerhe olushangi n’idîni ly’obunywesi. Yehova arhuhanizize ntya: “Rhengi muli [Babiloni Mukulu], ngabo yani.”—Amafulûlo 18:2, 4.
HUMBIRIRA LY’OHUGÛKWA
Olole gurhi wakajira ly’omuntu yeshi-yeshi arhanyihyagya obwishwekerezi bwawe kuli Yehova. Na kandi olole gurhi wakayerekanamwo oku oli mwishwekerezi omu kurhenga omu Babiloni Mukulu.
3. Ojire hange n’abalimu b’obunywesi
Gurhi rhushinganine rhujire erhi rhwakayumva muntu mulebe ali aderha eby’obunywesi okubiyerekire ikubuliro lya Yehova? Osome Emigani 14:15, na buzinda oganirire er’idoso:
Bulya gurhi rhurhashinganini rhukayemereza ngasi kantu rhwayumvirhe?
Osome 2 Yowane 9-11, na buzinda oganirire aga madoso:
Gurhi rhushinganine rhukajirira abagoma?
Ciru akaba rhurhaganiri n’abagoma busu oku busu, omu yindi njira ehi rhwakarhogeramwo oku nyigirizo zabo?
Gurhi orhanyize Yehova akaciyumva erhi rhwakakayumvirhiza emyanzi y’obunywesi bali bamuderhera n’ikubuliro lyage?
4. Obêre mwishwekerezi kuli Nnâmahanga amango mwene wirhu amajira ecaha
Bici rhushinganine rhujire erhi rhwakamanya oku muntu mulebe w’omu cigamba anajijire ecaha cizibu? Rhulole akanuni rhwakakula omw’irhegeko Yehova ahâga aba Israheli ba mîra. Osome Bene-Levi 5:1.
Nk’oku biyerekinwe mw’olo lwandiko, erhi rhwakamanya oku muntu mulebe anajijire ecaha cizibu, rhushinganine rhujibwira abagula kuli ogo mwanzi. Cikone, embere rhugend’ibabwira, kwanaba kwinja erhi rhwakarhang’ibwira oyo wajiraga ecaha yene oku ajibabwira ly’ahungama ecaha cage. Erhi akalahira okugend’ibabwira, rhwanayerekana oku rhuli bishwekerezi kuli Yehova omu kugend’ibwira abagula kw’eyo myanzi rhumanyire. Gurhi okujira ntyo kwakayerekana oku rhuzigire . . .
Yehova Nnâmahanga?
oyo wajiraga ecaha?
abandi bali omu cigamba?
Erhi akaba owinyu mwemezi ali omu lugenzi lubi, wanamurhabala!
5. Orhenge omu Babiloni Mukulu
Osome Luka 4:8 n’Amafulûlo 18:4, 5, na buzinda oshuze kw’aga madoso:
K’izino lyani liciba oku nfishi (fiche) y’abantu baba omw’idîni ly’obunywesi?
Kamba omw’ikubuliro lilebe ligwerhe olushangi n’idîni ly’obunywesi?
K’akazi kani kanalunge okuboko idîni ly’obunywesi omu njira nguma na nguma?
Ka hali akandi kantu nshinganine njire omu kalamo kani lyo nciyegula n’idîni ly’obunywesi?
Erhi nakashuza neci ciru okw’idoso liguma lyone, mpindûlo zihi nshinganine njire?
Omu ngasi kanga, orhôle omuhigo gwakakurhabala ogendekere waba n’ezamiri ecîre n’okubêra mwishwekerezi kuli Yehova.
Bici oshinganine ojire erhi bakakubwira oku ohâne oburhabale okw’ikubuliro l’idîni lirhabala abantu?
HALI ABANTU BADERHA NTYA: “Nshinganine manye ebi abagoma baderha okubiyerekire Abahamirizi ba Yehova lyo mpash’ikahalira okuli.”
K’orhanyize oku kuli kwinja okujira ntyo? Bulya gurhi odesire ntyo?
KWA BOFOFI
Lyo rhugendekera rhwabêra bishwekerezi kuli Yehova rhushinganine rhuyake okucilunga haguma na balya balonza okurhuhabula.
Okucikengeza
Bulya gurhi rhurhashinganini rhuyumvirhize entanya z’abagoma?
Erhi rhwakamanya oku mwene wirhu erhi mwali wirhu anajijire ecaha cizibu, bici rhushinganine rhujire?
Gurhi rhwakajira lyo rhuyerekana oku rhukenzire irhegeko lirhubwizire oku rhurhenge omw’idîni ly’obunywesi?
OCIYIGIRIZE KWA BULÎRI
Olole ebi oshinganine ojire amango abandi bali balumîza emyanzi y’obunywesi okubiyerekire Abahamirizi ba Yehova.
“Unajua Ukweli wa Mambo?” (Ilabiro ly’Akalalizi, ly’Omwezi gwa 8, 2018)
Gurhi wakamanyamwo erhi ikubuliro lilebe erhi mikolo milebe elunzire Babiloni Mukulu okuboko?
Bici bagoma baguma na baguma bajijire lyo balonza okuzambanya obuyemere bwirhu?
Omu mwanzi gudesire “Nimemutafuta Mungu Tangu Ningali Mutoto,” olole gurhi padiri muguma wali omw’idîni ly’aba Shinto arhengaga omw’idîni ly’obunywesi.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/7/2011)