Yaaqoobi Sokka
4 Mereeroꞌne noo olinna gibbo mamiinni dagginote? Giddoꞌne* olantannote maalu yortoꞌnewiinni dagginota diꞌꞌikkitino? 2 Yortinanni, kayinni diafidhinanni. Shitinanni hattono yogortinanni, kayinni afiꞌra didandiitinanni. Giwantinanni hattono olantinanni. Huuccidhinannikki daafira diafidhinanni. 3 Huuccidhinanni woyiteno diafidhinanni; korkaatuno huuccidhinannihu bushare heddine yaano maalu yortoꞌne wonshiꞌrate yitineeti.
4 Kiꞌne soorraasine,* alamete ledo jaalooꞌma Maganu ledo diinooꞌma ikkitinota diaffinoonni? Hakko daafira, alamete jaala ikka hasiꞌrannohu baalu isonooto Maganu diina assanno. 5 Qullaawa borro qaali, “Giddonke noo ayyaani woꞌmanka woyite hinaasotenni yoranno” yaannohu mulla lawannoꞌne? 6 Ikkollana Maganu aanno elto togoo ayyaana roortanno. Hakko daafira qullaawu qaali, “Maganu booꞌnaleeyyete ikkito giwanno; jooguulleho kayinni elto aanno” yaanno.
7 Konni daafira, Maganoho maahoyye yitine galle; Daawuloosi kayinni gibbe; isino kiꞌnewiinni xooqanno. 8 Maganunniwa shiqqi yiiyye; isino kiꞌnewa shiqqi yaanno. Kiꞌne cubbaataammu, angaꞌne keereensidhe; kiꞌne lame hedonni kawa kaꞌa higginanniri, wodanaꞌne xalashshidhe. 9 Yaadde, dadille, wiꞌle. Osoliꞌne dadilleho, hagiirriꞌneno hexxo mudhate widira soorramo. 10 Yihowa albaanni umoꞌne heeshshi asse; isino gotti gotti assannoꞌne.
11 Roduuwa, mimmito misha agurre. Rodoosi mishannohu woy rodiisi aana yoo yaannohu baalu seera mishanni no; hattono seeru aana yoo yaanni no. Seeru aana yoo yaattoha ikkiro, ati daanyaho ikkinnina seera agadhattoha diꞌꞌikkootto. 12 Seera aannohunna Daanyu mitto callaho; gatisano hunano dandaannohu isooti. Ikkina olliichikkira* yoo yaattohu ati ayeti?
13 Kiꞌne, “Techo woy gaꞌa konne katama haꞌneemmo; hakkiicho mitto diro heeꞌneemmo; daddaꞌlineemmo; tirfiꞌneemmo” yitinanniri macciishshe; 14 gaꞌa heeshshoꞌne makkitannoro nafa diaffinoonni. Korkaatuno kiꞌne shiima geeshsha leelte baꞌanno guunjooti. 15 Hatteentenni, “Yihowa fajjiro lubbotenni heeꞌneemmo; qoleno konne woy koꞌonne assiꞌneemmo” yaa hasiissannoꞌne. 16 Xa kayinni kiꞌne quwa saꞌine booꞌnitinanni naaxxitinanni. Togoo booꞌna baalanti bushate. 17 Hakko daafira, mittu manchi gara ikkino coye magarinni assannoro afe heeꞌrenni assikkinni gatiro, cubbo ikkannosi.