Luqaasi Wongeella
1 Batinyu manni ninke seekkine ammanneemmo taje gamba asse borreessate dandaaminsare baala assino; 2 qoleno hanafotenni kayisse illensanni laꞌinorinna Maganu qaale dudubbanno soqqamaano tenne taje ninkera sayissino; 3 ayirradu Tewofiloosi, anino baalanka coye hanafotenni kayise seekke xiinxalloommo daafira, xagge aante aantetenni borreessammohera hasiꞌroommo; 4 tenne assoommohu afuunni kullanna rosoottori baalu halaale ikkinota seekkite afatto gedeeti.
5 Yihudu gobbara Heeroodiisi* moohe noo yannara, Abiyate kakkalaanote gaamo giddo soqqamannohu Zakkaariyaasi yinannihu mittu kakkalaanchi no. Minaamasi Aarooni sirchooti; suꞌmise Elsaabeexiiti. 6 Lamunku Maganu albaanni keeraanote; insa Yihowa* hajajonna seera agadhitanni minshe nookkiha heedhannoreeti. 7 Ikkollana Elsaabeexi ilaweelo* ikkitino daafira ooso dinonsa; qoleno lamunku geedhino.
8 Mitto barra gaamosira bado iilliteenna, Zakkaariyaasi Maganu albaanni kakkalaanote soqqansho soqqamanni no; 9 hakkiinni, kakkalaanote seeri* garinni Yihowaha qullaawa mine eꞌꞌe hixaana giirate bado iillitusi. 10 Hixaana giirranni saatera mannu baalu gobba huuccatto assiꞌranni no. 11 Isi, Yihowa sokkaasinchi hixaana kakkallanni dargira qiniiteenni uurre nooha afi. 12 Zakkaariyaasi sokkaasincho laiti mase lowo geeshsha waajji. 13 Ikkollana sokkaasinchu togo yiisi: “Zakkaariyaasi, waajjitooti; korkaatuno Maganu eeggifatte huucciꞌrootto huuccatto macciishshinohe; minaamakki Elsaabeexi labbaa qaaqqo iltannohe; suꞌmano Yohaannisi yite fushshattosi. 14 Atera lowo geeshsha tashshi yaannohe; isi ilamino daafira lowo mannino hagiidhanno; 15 korkaatuno isi Yihowa albaanni jawa ikkanno. Ikkollana woyine woy wole dimbisanno ago horonta aga dihasiissannosi; qoleno, ilamara albaanni* nafa qullaawu ayyaani woꞌmannosi; 16 isi batinye Israeelete ooso Maganinsa Yihowawa qolanno. 17 Qoleno manna Yihowara qixxeessate, annuwate wodana oosote wodani gedeeha assate,* hajajantannokkire keeraanote hayyowa qolate, Eeliyaasi ayyaaninna wolqanni Maganu albaanni haꞌranno.”
18 Zakkaariyaasi sokkaasinchoho togo yii: “Coyiꞌroottori halaale ikkinota mayinni afeemmo? Korkaatuno ani geedhoommo; minaamaꞌyano jawooꞌmitino.” 19 Sokkaasinchuno togo yee qolisi: “Ani Maganu mule albasiinni uurreemmoho Gebirieeliiti; isi, ate hasaawisammoranna konne dancha duduwo kulammohera soyinoe. 20 Ati kayinni yannasira woꞌmannoha qaaleꞌya diammanootto; hakko daafira, kuni kulummohe coyi woꞌma geeshsha danqicha ikkatto; coyiꞌrano didandaatto.” 21 Hakkawoyite mannu Zakkaariyaasi gobbaanni agare no; isi qullaawu mini giddo lowo yanna keeshsheenna insa huluullantu. 22 Isi hakkiinni fuli yannara manna hasaawisa didandiino; hakko daafira, insa qullaawu mini giddo ajuuja lainota huwattu. Isi hakkunni gedensaanni danqicha ikkino daafira, malaatunni hasaawisannonsa. 23 Qullaawa soqqansho soqqamanno* barri goofita minisira haꞌri.
24 Shiima yanna gedensaanni minaamasi Elsaabeexi godobbu; ise onte agana mine keeshshitino; togo yite coyidhino: 25 “Yihowa tenne yannara konne coye assinoe. Mannu mishannoeta hoolate alba higinoe.”
26 Isera lee agana ikke heeꞌreennase Maganu sokkaasinchosi Gebirieeli Galiilu katama Naazireete soyi; 27 soyinohuno Daawiti sircho ikkinohu Yooseefi yinanni manchi adhara huucciꞌre noo seemowaati; suꞌmise Maariyaamiiti. 28 Sokkaasinchuno eꞌꞌe, “Ati lowo geeshsha maassamoottati, keereho? Yihowa ledokki no” yiise. 29 Ise kayinni sokkaasinchu coyiꞌrinori lowo geeshsha masiseennase, kuni hiittoo keereetiro huwatate seekkite heddu. 30 Konnira sokkaasinchu togo yiise: “Maariyaami, Maganu albaanni ayirrinye afiꞌroottana waajjitooti. 31 Kuneeti godobbe labbaa qaaqqo ilatta; suꞌmano Yesuusa yite fushshattasi. 32 Isi jawa ikkanno; Woꞌmunkura Aliidi Magani Beetto yinannisi; Maganu Yihowa annisi Daawiti Zuufaane aannosi; 33 isi moote ikke Yaaqoobi mine hegerera gashshanno; Gashshootisirano gawalo dino.”
34 Maariyaami kayinni sokkaasinchoho, “Ani labbaahu ledo goxe* egennoommakki daafira kuni hiitto ikke ikkanno?” yitu. 35 Sokkaasinchu togo yee qolise: “Qullaawu ayyaani ate aana dirranno; Woꞌmunkura Aliidi Magani wolqa caalshiishshannohe. Konnira ilamanno qaaqqo qullaawanna Maganu Beetto yinanni. 36 Fiixikki Elsaabeexino geedhitinoti labbaa qaaqqo godobbe no; ilaweelote* yinanna heedhinoti godobbunku kuni leekki aganaati; 37 Maganu coyiꞌre kae wonsha hoogannori dino.”* 38 Hatte yannara Maariyaami, “Kune ani Yihowa borojjichooti! Ati yiitto gede ikkoe” yitu. Hakkiinni sokkaasinchu isewiinni haꞌri.
39 Shiima yanna gedensaanni, Maariyaami rakke kaꞌe ilaalaame Yihudu gobbara noo katama hadhu; 40 ise, Zakkaariyaasi minira eꞌe Elsaabeexi keere haadhu. 41 Elsaabeexi, Maariyaami keere haadhanna macciishshituta godowise giddo noo qaaqqi kukkubbi. 42 Elsaabeexino qullaawu ayyaani woꞌmeennase qoonqose naggi assite togo yitu: “Ati meentu giddo maassamoottate; godowikki giddo noo laalchino maassaminoho! 43 Mootichiꞌya ama anewa daase anera lowo ayirrinyeeti. 44 Ati keere haaꞌrittaeta godowiꞌya giddo noo qaaqqi hagiirrunni kukkubbino. 45 Yihowa coyiꞌrinoseri mitturino gatikkinni woꞌmanno daafira, tenne ammantu mancho hagiirraamete.”
46 Maariyaamino togo yitu: “Lubboꞌya* Yihowa guwissanno; 47 giddoꞌyano* Gatisaanchiꞌya Maganunni lowo geeshsha hagiidhitanno; 48 isi borojjichosi mishama laino. Xaanni kayisse ilama baala hagiirraamete yitannoe; 49 korkaatuno wolqaataamu Magani anera jajjabba coye assinoe; suꞌmisino qullaawaho; 50 ilamatenni ilamate geeshsha waajjitannosirira maarosi leellishanno. 51 Cigilesinni jajjabba looso loosino; wodaninsa hedonni booꞌnaleeyye ikkitinoreno billaallisino. 52 Isi wolqaataamma zuufaanetenni dirrisino; woffi yitinore gotti assino; 53 hudidhinorira dancha coye duushshino; dureeyye kayinni mulla anganni haꞌrisino. 54 Isi maareemmo yiinota qaage soqqamaanchosi Israeeli kaaꞌlino; 55 hatto assinohu albi annuwankera eino qaali garinni, Abirihaamiranna sirchisira hegerera maaro leellisharaati.” 56 Maariyaami Elsaabeexiwa sasu agani geeshsha keeshshituhu gedensaanni qaese higgu.
57 Yanna iillituta Elsaabeexi labbaa qaaqqo iltu. 58 Olliichisenna fiixise Yihowa lowo maaro leellishinoseta macciishshe ledose hagiidhi. 59 Ilamihunni settikki barra, qaaqqo barcinshiishshara daggu; suꞌmano annisi suꞌminni Zakkaariyaasi yite fushshitara heddu. 60 Amasi kayinni, “Deeꞌni! Suꞌmasi Yohaannisi yinanni” yitu. 61 Insa, “Fiixikki giddo konni suꞌminni woshshinannihu dinowe” yituse. 62 Hakkiinni, annasi qaaqqoho suꞌma ayi yine fushshinara hasiꞌrannoro malaatunni xaꞌmitusi. 63 Isino xaawula abbinannisi gede xaꞌmiꞌre, “Suꞌmisi Yohaannisiiti” yee borreessi. Hatte yannara mannu baalu dhagge assiꞌri. 64 Hakkawoyintenni arrawu tidhameennasi wirro coyiꞌra dandii; Maganono guwisiꞌri. 65 Olliinsa manni baaluno lowo geeshsha waajji; kuni duduwi ilaalaame Yihudu gobba baala iilli. 66 Konne coye macciishshino manni baalu, “Kuni qaaqqi hiittooha ikkaraati ikka?” yee hedi. Insa hatto yitinohu Yihowa ledosi noo daafiraati.*
67 Hakkiinni annisi Zakkaariyaasi qullaawu ayyaani woꞌmeennasi togo yee masaali: 68 “Alba mannisiwa higino daafiranna gatisinonsahura Israeelete Magani Yihowa ayirro. 69 Soqqamaanchisi Daawiti mine wolqaataamo gatisaancho* kayisinonke; 70 hatto assinohu hundinni kayisse noote qullaawa masaalaano widoonni coyiꞌrino garinniiti; 71 diinnankenna gibbannonkeri baalu anganni gatisannonketa coyiꞌrino; 72 albi annuwankera eino qaali garinni maarannonke; qullaawa gondoorosino qaaganno; 73 kuni gondoori, isi anninke Abirihaamira xaarino xaarooti; 74 xaarino xaaro garinni diinnanke anganni gatise fushshinkehu gedensaanni, waajjinummokkinni qullaawa soqqansho soqqammeemmosi gede fajjannonke; 75 isi hatto assinohu heeshshonke diro woꞌma albasiinni ammanamme keeraanchimmatenni heeꞌneemmo gedeeti. 76 Ati kayinni qaaqqoꞌya, doogosi qixxeessate Yihowa albaanni haꞌratto daafira, Woꞌmunkura Aliidi Magani masaalaancho yinannihe; 77 mannisi cubbonsa maarreenna gato afiꞌranno gede assitanno egenno aattonsa; 78 kuni ikkinohu Maganinke godowinta mararinonke daafiraati. Tenne mararronni kainohunni soodimaru bakkalchi iiminni daannonke; 79 tunsotenna reyote caalira ofoltinorira xawisanno; lekkankeno keeru doogo aana haꞌrisanno.”
80 Qaaqquno lophe ayyaanunni jawaata ikki; isi Israeelete faajjetenni leelli yanna geeshsha halalla heeꞌri.