Umi Yohaannisi Sokka
5 Yesuusi addinta Kiristoosi ikkinota ammanannohu baalu Maganu ilaati; Anna baxannohu baalu ilasi ikkinohano baxanno. 2 Magano banxeemmohanna hajajosi agadhineemmoha ikkiro, Maganu ooso banxeemmota tennenni anfeemmo. 3 Mayira yiniro, Magano baxate yaa hajajosi agadhate; hajajosino duha diꞌꞌikkitino; 4 korkaatuno Maganu ila ikkinohu baalu alame qeelanno. Alame qeelleemmo gede assitinonketi ammanankeeti.
5 Alame qeelara dandaannohu ayeti? Yesuusi Maganu Beetto ikkinota ammananno mancho diꞌꞌikkino? 6 Wayinna mundeete widoonni dayinohu isooti, yaano Yesuusi Kiristoosiiti; dayinohuno wayi ledo calla ikkikkinni wayinna mundeete ledooti. Ayyaanuno tenne farciꞌranno; korkaatuno ayyaanu halaaleho. 7 Farciꞌrannohu sasu coyi no; 8 insano: ayyaanaho, waahonna mundeete; sasunku sumuu yitanno.
9 Mannu farciꞌranno coye ammanneemmoha ikkiro, Maganu farciꞌranno coyi isinni hakkiinni rooreho. Korkaatuno Beettisi daafira Maganu umisi farciꞌrino. 10 Maganu Beetto ammanannohura Maganu farciꞌrinori wodanisira no. Magano ammanannokkihu kayinni Maganu Beettisi daafira farciꞌrinore ammaninokki daafira iso kaphaancho assino. 11 Farciꞌnoonni coyino konneeti: Maganu hegere heeshsho uyinonke; tenne heeshsho afiꞌnoommohu Beettisinniiti. 12 Beettu noosihura tini heeshsho noosi; Maganu Beetti noosikkihura tini heeshsho dinosi.
13 Konne coye borreesseemmoꞌnehu Maganu Beetti suꞌma ammantinannirira kiꞌnera hegere heeshsho nooꞌneta affinanni gedeeti. 14 Iso addaxxineemmo coyi* konneeti: aye coyeno fajjosi garinni huucciꞌnummoro isi macciishshannonke. 15 Huucciꞌneemmore baala macciishshannonketa anfoommo daafira, xaꞌmiꞌneemmore afiꞌneemmota dihuluullammeemmo.
16 Aye manchino rodiisi reyote iillishannokki cubbo loosanna lairo, huuccatto assannosi; Maganuno heeshsho aannosi; kuni ikkannohu cubbinsa reyote iillishannoha ikka hoogirooti. Ikkollana reyote iillishanno cubbi no. Togoo cubbo loosino manchira ayino huuccatto assona diyeemmo. 17 Bushu loosi baalu cubboho; ikkollana reyote iillishannokki cubbi no.
18 Maganu ila ikkinohu baalu cubbo loosa roso assiꞌrannokkita anfoommo; hatteentenni Maganu ila* ikkinohu agarannosi; bushuno* kisasira didandaanno. 19 Ninke Maganu wido ikkinoommota anfoommo; alame woꞌma kayinni bushu anga no. 20 Ikkollana Maganu Beetti dayinota anfoommo; isi halaalaanchu Magani daafira egenno afiꞌneemmo gede wodancha uyinonke. Ninkerano Beettisi Yesuusi Kiristoosi widoonni halaalaanchu Magani ledo mittimma noonke. Isi halaalaancho Maganootinna hegere heeshshooti. 21 Oosoꞌya, kaphu magannawiinni xeertidhe.*