Maatewoosi Wongeella

3 Hatte yannara Cuuaanchu Yohaannisi Yihudu gobbara halalla sabbakanni dayi. 2 “Gordu Gashshooti gambisinona maaro eˈe” yaanni sabbaki. 3 Masaalaanchu Isayyaasi isi daafira togo yee coyiˈrino: “Mittu manchi halalla, ‘Yihowa doogo qixxeesse! Dooggasino taashshe’ yaanni lallawanno.” 4 Yohaannisi gaalu ordanni gannoonni uddano uddiˈranno; halloho gogunni seekkinoonni qawatto qodhanno. Kanchafarenna dubbu malawo itanno. 5 Hatte yannara mannu Yerusaalamete kataminni, Yihudu gobba baalatenninna Yoordaanoosi qooxeessira noo qoqqowi baalunni isiwa dayi; 6 isino, cubbonsa faajjete kultanna Yoordaanoosi Lagira cuuinsa.*

7 Isi, lowo Farisootinna Saduqooti cuuannowa dagganna lae togo yiinsa: “Kiˈne buutete ooso, daanni noo hanqo xooqqinanni gede ayi qorowisiisiˈne? 8 Xaate maaro eˈinoonnita leellishanno guma laalle. 9 ‘Anninke Abirihaamiiti’ yitinoonni daafira gattinanniha lawoonkeˈne. Maganu tenne kinna mereerinni Abirihaamira ooso kayisa dandaanno. 10 Meesane haqqete hunda no. Konnira dancha guma laaltannokki haqqicho baala karre giirate giddo tunganni. 11 Hige ani maaro eˈinoonni daafira wayinni cuueemmoˈne; ane gedensaanni daannohu kayinni ane rooreho; ani caammasi fushshate nafa diˈˈikkoommoho. Isi qullaawu ayyaaninninna giiratenni cuuannoˈne. 12 Isi woowancho* anga haaˈre no; ayiddumme coˈo asse feyanno; sinde gootaaraho woranno; kura kayinni xoˈannokki giirara tuganno.”

13 Hakkiinni Yesuusi, Yohaannisi cuuasira Galiilunni kae Yoordaanoosi dayi. 14 Yohaannisi kayinni, “Atewa cuuama hasiissannoehu aneeti ikkinnina ati anewa daatto?” yee hoolasira woˈnaali. 15 Yesuusi qole, “Konni garinni Maganu fajjo baala wonsha hasiissannonkena, qarru dinona cuuiella” yiisi. Yohaannisino maahoyye yee cuuisi. 16 Yesuusi cuuamihu gedensaanni bayichonko wayi giddonni fuli. Hakkiinni gordu faˈnami! Maganu ayyaanino lembooli gede ikke aanasi dirranna lai. 17 Qoleno gordunni togo yitanno huuro daggu: “Tashshi assannoehu baxeemmo Beettiˈya isooti.”