Diinara Qarru Iillise

DIINA ayeoowa hadhanni nooro afootto? Kanaꞌꞌaani gobbara heeꞌranno seenni ledo godoꞌlitara hadhanni no. Annise Yaaqoobi hakka haꞌrase baxinokka? Tenne xaꞌmora dawaro afiꞌrate, Abirahaaminna Yisaaqi Kanaꞌꞌaani seennira mayi lao noonsaro hedi.

Abirahaami beettisi Yisaaqi Kanaꞌꞌaani seenne adhara hasiꞌrinoni? Dihasiꞌrino. Yisaaqinna Ribiqa beettinsa Yaaqoobi Kanaꞌꞌaani seenne adhannota baxxinoni? Dibaxxino. Mayiraatiro afootto?

Korkaatuno Kanaꞌꞌaani manni kaphphu maganna magaꞌnannohuraati. Kuni manni ayiddaannanna ayiddaama assiꞌnanniha qoleno muli fiixa assiꞌnanniha diꞌꞌikkino. Konni daafira Yaaqoobi, beettosi Kanaꞌꞌaani seenni ledo jaalooma kalaqirase baxannokkiti egennantinote.

Diina qarru aana uwase digattino. Misilete aana Diina laꞌꞌanni nooha Kanaꞌꞌaani beetto laitto? Suꞌmisi Seekeemiiti. Mitto barra Diina godoꞌlitara dagganna, Seekeemi amade ledosi goxxanno gede giddeessise. Tenne assasi soꞌrote; korkaatuno meyaatinna labbaahu mitteenni goxa dandiitannohu adhanturo callaati. Seekeemi Diinara assinohu kuni bushu coyi wole roore qarrano abbino.

Diina roduuwi iillinosere macciishshitu yannara lowo geeshsha hanqitu. Simiooninna Leewi lowo geeshsha hanqitinohura bise adhite Kanaꞌꞌaani katama hadhu; marteno labballo hayyotenni amaddu. Lamunku, wolootu roduuwinsa ledo Seekeeminna woloota labballo baala shite guddu. Yaaqoobi oososi konne busha coye assitinohura hanqi.

Kuni baalu qarri dayinohu mayinniiti? Kuni qarri dayinohu Diina Maganu hajajo ayirrisannokki manni ledo jaaloontinohuraati. Ninke togoo manni ledo jaalooma kalaqira dihasiꞌneemmo; hasiꞌneemmoni?