‘Magano Baxate’ Yaa Mayyaate?

1, 2. Magano Yihowa baxatto gede assannohehu maati?

ATI Magano baxatto? Ateneeto Yihowara sayisse uyite isi ledo fiixoomoottoha ikkiro, mittore huluullamittokki ee yite qolatto; hatto yaakki qolte hasiissannote! Addaho, Yihowa baxanke noo coyeeti. Ninke Magano banxoommohu isi balaxe baxinonkehuraati. Qullaawu Maxaafi togo yaanno: “Maganu ninke umo asse baxinonkehura ninkeno banxeemmosi.”—1 Yohaannisi 4:19.

² Baxille leellishate umo asse qaafo adhinohu Yihowaati. Isi biifado uulla kalaqe qaenke ikkitara uyinonke. Heeshshonkera hasiisannore baala uyinonke. (Maatewoosi 5:43-48) Hakkiinni saeno, ayyaanaamittete hasattonke wonshannohu isooti. Isi Qaalesi yaano Qullaawa Maxaafa uyinonke. Qoleno Yihowa, iso huucciꞌneemmo gede koyisinonke, hattono huuccattonke macciishshatenna qullaawa ayyaana oye ninke kaaꞌlate qaale eino. (Faarso 65:2; Luqaasi 11:13) Konni baalunkunni roore, Yihowa lowo geeshsha muxxe ikkino Beettosi ninkera wodo ikke cubbunninna reyotenni gatisannonke gede soyino. Addaho, Yihowa bayira baxille leellishinonke!—Yohaannisi 3:16; Roomu Sokka 5:8.

3. (a) Maganu baxillinni fullummokki heeꞌrate ma assa hasiissannonke? (b) Ninkeneeto hiittee hasiissanno xaꞌmo xaꞌma hasiissannonke? Dawarona hiikko no?

³ Yihowa baxillisinni hegerera xiqime afiꞌnammora hasiꞌranno. Ikkollana, tenne xiqime afiꞌrate woyi hoogate doodhineemmori ninkeeti. Maganu Qaali togo yee amaalannonke: “Hegere heeshsho . . . agadhitinanni Maganu baxillinni fultinikki heedhe.” (Yihuda 21, NW) “Fultinikki heedhe” yaanno qaali, Maganu baxilli giddo heeꞌrate assa hasiissannonkeri noota xawisanno. Yihowa leellishinonke baxillira leellanno coyinni galata qola hasiissannonke. Konni daafira, ‘Magano baxeemmota loosunni leellisha dandeemmohu hiittoonniiti?’ yitannota hasiissanno xaꞌmo ninkeneeto xaꞌma hasiissannonke. Tenne xaꞌmora dawaro, hawaariya Yohaannisi ayyaanu marraeennasi coyiꞌrino qaali giddo no: “Magano baxa hajajosi agadhate, hajajosino diqarrissannote.” (1 Yohaannisi 5:3) Magano lowo geeshsha banxeemmota leellisha hasiꞌneemmo daafira, tini xiqise mayi tiro afidhinoro seekke xiinxalla hasiissannonke.

‘MAGANO BAXATE’ YAA MAYYAATE?

4, 5. Ati Yihowa baxa jammaroottohu hiittoonniitiro xawisi.

⁴ Hawaariya Yohaannisi, “Magano baxa” yaanno qaale borreessi wote maa xawisate hasiꞌrino? Isi xawisinohu mitti mittinkera Maganoho noonkeho giddo baxilleeti. Ati Yihowa konni garinni baxa jammaritto yanna qaagatto?

⁵ Hanni shiima geeshsha, Yihowanna alaamasi lainohunni umo halaale rositto yanna, hattono rosoottore ammana jammaritto yanna hedi. Cubbaataamonna Maganuwiinni badamoottoha ikkite ilamoottoha ikkirono, Addaami hunino guunte afiꞌrattotanna hegere heeshsho ragiꞌratto doogo Yihowa Kiristoosi widoonni faninoheta hatte yannara huwatootto. (Maatewoosi 20:28; Roomu Sokka 5:12, 18) Yihowa lowo geeshsha muxxe ikkino Beettosi atera yee reyanno gede soye kakkalino kakkalo mageeshshi waaga afidhinoro wodanchootto. Konninni wodanikki lowo geeshsha hagiidhino daafira, konne bayira baxille leellishinohe Magano baxa jammarootto.—1 Yohaannisi 4:9, 10.

6. Addu baxilli baxxe leellannohu mayinniiti? Maganoho noohe baxilli ma assatto gede kakkayisinohe?

⁶ Ikkollana, Yihowara baxillu lao noonke daafira calla iso addinta banxeemmo yaa diꞌꞌikkino. Magano addinta baxa, “Ani Yihowa baxeemmo” yaatenni saꞌanno. Ammanate gede, addu baxillino loosunni baxxe leellanno. (Yaaqoobi 2:26) Mitto mancho banxummoro, hagiirsiisannosire assine banxeemmosita leellinsheemmo. Konnira Yihowara noohe baxilli wodanikkira rumuxxa jammarita, iimi Annakki hagiirsiisanno garinni heeꞌrate hasatto galtinohe. Cuuante Yihowa Farciꞌraasincho ikkootto? Hatto ikkiro, Yihowa lubbora baxakkinninna isira ammanamoottoha ikkite heeꞌrate hasiꞌrakkinni, heeshshokki giddo duuchchantenni roortino wussaane wossaꞌnootto yaate. Yihowa fajjo assate ateneeto isira sayisse ootto; hakkiinni saꞌeno ateneeto sayisse oottota cuuante leellishootto. (Roomu Sokka 14:7, 8) Yihowara ninkeneeto qooffantummokki sayinse uyinoommota leellishate, hawaariya Yohaannisi aantete coyiꞌrinoreno assa hasiissannonke.

“HAJAJOSI AGADHATE”

7. Maganu hajajo yinanniri giddo gamu hiikkuriiti? Maganu hajajo agadha maa assano mitteenni amaddanno?

⁷ Yohaannisi Magano baxate yaa mayyaatero xawisanni, “Hajajosi agadhate” yiino. Maganu hajajo yinanniri hiikkuriiti? Yihowa Qaalisi yaano Qullaawu Maxaafi widoonni konne asse, konne assitinoonte yitannota haammata hajajo uyinonke. Lawishshaho, dimba, foora, kaphphu maganna magansiꞌra, moora, kaphphanna woleno konne lawannore isi effire giwanno. (1 Qorontoosi 5:11; 6:18; 10:14; Efesooni 4:28; Qolasiyaasi 3:9) Maganu hajajo agadha, Qullaawu Maxaafi giddo xawinse kulloonnihu amanynyootu seeri ledo sumuu yee heeꞌrano mitteenni amaddanno.

8, 9. Assi woyi assitooti yitannoti Qullaawu Maxaafi higge heedhannokki wote, Yihowa hagiirsiisannohu maatiro afa dandiineemmohu hiittoonniiti? Lawishsha kuli.

⁸ Ikkollana, Yihowa hagiirsiisate, isi xawise assenna assitinoonte yee hajajinonkere calla agadha baqe diꞌꞌikkitino. Yihowa heeshshonke giddo mitte mittenta millimmonke illaallissanno higge oye qorqoranni diqarrisinonke. Konnira barru millimmonke giddo, Qullaawu Maxaafi xawise asse woyi assitinoonte yaannokkihu haammatu coyi tuncu yaankera dandaanno. Togoori tuncu yaannonke wote, Yihowa hagiirsiisannohu maatiro afa dandiineemmohu hiittoonniiti? Qullaawu Maxaafi Maganu hedo huwanteemmo gede kaaꞌlannonkere duuchchare amadino. Qullaawa Maxaafa xiinxallinanni haꞌnummo kiiro, Yihowa baxannorenna giwannore anfanni haꞌneemmo. (Faarso 97:10; Lawishsha 6:16-19) Qoleno isi kaffi asse laꞌꞌanno hedonna assoote roore buunxanni haꞌneemmo. Yihowa akatirenna doogosire roore ronsanni haꞌnummoro, wossaꞌnineemmo wussaanenna assineemmo assooti isi hedo gede ikkanni haꞌranno. Konni daafira, assi woyi assitooti yitannoti Qullaawu Maxaafi higge hoogganno wote nafa, “Mootichchu hedo maatiro” wodancha dandiineemmo.—Efesooni 5:17.

⁹ Lawishshaho, bararraaqisannore woyi foorre leellishshanno filme woyi televizhiinete pirogiraame laꞌneemmota hooltannoti xawinse worroonni higge Qullaawu Maxaafi giddo dino. Ikkollana hattoo higge hooggurono, togoo coye laꞌꞌa dihasiissannonke. Yihowara togoo coyira mayi lao noosiro anfoommo. Qaalisi xawise togo yaanno: “Finqille baxxannore baala [Yihowa] lubbo effidhe gibbanno.” (Faarso 11:5) Qoleno Qullaawu Maxaafi, “Foortannorenna soorritannore Maganu faradanno” yaanno. (Ibiraawuyaani 13:4, NW) Qullaawu ayyaaninni borreessaminoha konne qaale seekkine hiincine, Yihowa fajjo maatiro wodancha dandiineemmo. Konni daafira Maganinke giwanno assoote reqecci assite leellishshanno filmenna misilla laꞌꞌa hoogate wossaꞌnineemmo. Tini alame mittore gawajjannokki boohaarsha lawisse shiqishshannote amanynyootu maaeellewiinni xeertiꞌnummoro Yihowa hagiidhannota anfoommo.a

10, 11. Yihowara hajajama hasiissannonkehu mayiraati? Hajajama hasiissannonkehuna hiittoonniiti?

¹⁰ Maganu hajajo agadhineemmohu qaru korkaati maati? Barru barrunku Maganu hedo ledo sumuu yaanno garinni heera hasiissannonkehu mayiraati? Maganu hajajo agadhineemmohu fajjosi garinni heedhannokkirira iillannonsa qarrinninna qorichchinni gatate calla diꞌꞌikkino. (Galatiya 6:7) Yihowara hajajammeemmohu, hajajama isira baxille leellishate dancha kaayyo assine laꞌneemmohuraati. Mittu qaaqqi annisi ‘hayya beettoꞌya’ yaasira hasiꞌrannonte gede, ninkeno Yihowa albaanni ayirrinynye afiꞌra hasiꞌneemmo. (Faarso 5:12) Isi Annankeeti; qolleno banxeemmosi. ‘Yihowawiinni ayirrinynye afiꞌneemmo’ gede assannonke garinni heeꞌnanni heeꞌnoommota afanke duuchchunkunni roore lowo geeshsha hagiirsiissannonke; hattono tashshi assitannonke.—Lawishsha 12:2.

¹¹ Konni daafira, hajajammeemmohu giwisannanke, doorre woyi gara laꞌne diꞌꞌikkino.b Uyinoonninke hajajo giddo injiitannota calla doorre, woyi hajajamanke qarra abbitannonkekki wote calla hajajama dihasiissannonke. Hatteentenni, “wodaninni” woyi giddonkenni ‘hajajama’ hasiissannonke. (Roomu Sokka 6:17) Qullaawu Maxaafi giddo, “Baxanni heeꞌroommota hajajokki, xaano lubbora baxeemmo” yee borreessino Faarsaasinchi ledo sumuu yineemmo. (Faarso 119:47) Addaho, Yihowara hajajama banxeemmo. Gara laꞌnummokki isira woꞌmunni woꞌma hajajama hasiissannonketanna isino hatto assinammora hasiꞌrannota anfoommo. (Marro 12:32) Yihowa Nohi yiinore ninkeno yaankera hasiꞌneemmo. Qullaawu Maxaafi, Magano baxannota seeda diro hajajame leellishinoha konne ammanamino mancho togo yaanno: ‘Nohi baalankare Maganu hajajinosi garinni assi.’—Kalaqo 6:22.

12. Yihowa wodana tashshi assineemmohu ma garinni hajajammummosirooti?

¹² Yihowara baxillunni hajajammeemmosi wote mayi macciishshamannosi? Qaalisi hatto assanke ‘wodanasi tashshi’ assitanno yaanno. (Lawishsha 27:11) Kalqete alamera Aliidiha ikkino Mootichcha hajajamanke addinta hagiirsiissannosi? Ee hagiirsiissannosi; qoleno hagiidhate ikkadu korkaati noosi! Yihowa doodhate mabte oye kalaqinonkehura banxummore assate mabte noonke. Konni daafira Yihowara hajajama woyi hajajama hooga doodha dandiineemmo. (Marro 30:15, 16, 19, 20) Yihowara hajajamate uminkenni doodhineemmoha ikkironna, hatto assineemmo gede kakkayisinonkehu giddonke woꞌminohu Maganoho noonke baxille ikkiro, iimi Anninke lowo geeshsha hagiidhanno. (Lawishsha 11:20) Qoleno hatto assineemmoha ikkiro, duuchchantenni woyyitino heeshsho doodhinoommo yaate.

“HAJAJOSINO DIQARRISSANNOTE”

13, 14. Maganu ‘hajajo diqarrissannote’ yineemmohu mayiraati? Tenne lawishshunni kula dandaattohu hiittoonniiti?

¹³ Hawaariya Yohaannisi Yihowa seera lainohunni jawaachchishannore coyiꞌrino; togo yiino: “Hajajosino diqarrissannote.” Wole Qullaawu Maxaafi tiro tenne xiqise, “Hajajosi coqqontannonketa diꞌꞌikkitino” yite tirtino. (Niwu Ingilishi Tiraansileeshini) Yihowa seeri korkaatiweelo woyi duha diꞌꞌikkino. Higgesi guunte noonsakkiri mannu ooso agadha dandiitannokkita diꞌꞌikkitino.

¹⁴ Tenne assaawe lawishshunni kulate, mittu lubbote jaalikki mine miꞌnanni kaaꞌlattosira huucciꞌrinohe yino. Dunke mine minnanniwa massinanniti lowo xarra no. Mite xarra mittu manchi calla duhannote, mite kayinni ayirritannotenna lamu manni kaaꞌlame duhannote. Jaalikki ati duha kaaꞌlattosira hasiꞌranno xarra bade fushsha jammari. Dandaattokkita afanni heeꞌrenni atera lowo geeshsha ayirritanno xarra duhisiisannoheni? Deeꞌni. Ayirritanno xarra callikki dukke gawajjamattora dihasiꞌranno. Hatteente gede, baxillaanchunna shaqqadu Maganinke agadhate lowo geeshsha qarrissanno hajajo diaannonke. (Marro 30:11-14) Togooha ayirranno duha duqqinammora horonta dihajajannonke. Yihowa “kalaqammoommo gara seekke afinohura, hattono bushsha ikkinoommota qaaganno” daafira, wolqanke deerra egennino.—Faarso 103:14.

15. Yihowa hajajo ninke xiqimera uyinoonnite yineemmohu mayiraati?

¹⁵ Yihowa hajajo horonta diqarrissannote, roorenkanni ninke xiqimera uyinoonnite. (Isayyaasi 48:17) Konni daafira Muse hundi Isiraeelera togo yee kulino: “Yihowa konne baalanka seera agadhineemmo gedenna Maganonke Yihowa waajjineemmo gede hajajinonkehu, ayeewoteno seyannonke gedeetinna xa heeꞌnoommonte gede lubbote heeꞌneemmo gedeeti.” (Marro 6:24) Ninkeno Yihowa higgesi uyinonkehu xiqimenkera lowonta assaawino daafiranna hegerera seyankera hasiꞌre ikkinota mittore dihuluullammeemmo. Addaho, Yihowa higgesi uyinonkehu wolurira diꞌꞌikkino! Yihowa gawalo nookki hayyo afiꞌrino Maganooti. (Roomu Sokka 11:33) Konni daafira ninkera woyyannohu maatiro afino. Qoleno Yihowa bayira baxilleeti. (1 Yohaannisi 4:8) Ayee coye coyiꞌrannohunna assannohu qara akatasi ikkinohunni baxillunniiti. Baxillu isi soqqamaanosira uyino hajajo baalantera xintaho.

16. Tini battaabbino alamenna shamu maali qarrisinkerono, Maganoho hajajama dandiineemmo yineemmohu mayiraati?

¹⁶ Hatto yaa kayinni Maganoho hajajama shota coyeeti yaa diꞌꞌikkino. Battaabbinotenna “Sheexaanu gashshooti woroonni ikkitino” alame ledo gaarama hasiissannonke. (1 Yohaannisi 5:19) Qoleno Maganu higge diingeemmo gede assannonkehunni shamu maalinke ledo gaarama hasiissannonke. (Roomu Sokka 7:21-25) Ikkollana Maganoho noonke baxilli konne baala qeelleemmo gede kaaꞌlannonke. Yihowa isira noonsa baxille hajajante leellishshannore maassiꞌrannonsa. Isi ‘hajajantannosirira’ qullaawa ayyaanasi aannonsa. (Soqqamaanote Looso 5:32) Kuni ayyaani dancha guma laalleemmo gede, yaano hajajammanni heeꞌneemmo gede kaaꞌlitannonke akatta heedhannonke gede assanno.—Galatiya 5:22, 23.

17, 18. (a) Konni maxaafi giddo maa xiinxallineemmo? Xiinxallineemmo wote, hawa hasiissannonkekkihu maati? (b) Aantanno fooliishsho mayinnire kultanno?

¹⁷ Konni maxaafi giddo Yihowaha xintu seera, amanynyootu uurrinshanna Yihowa fajjo maatiro xawisannore haammatare xiinxallineemmo. Hatto assineemmo wote hawa hasiissannonkekkihu batinynyu coyi no. Yihowa higgesinna amanynyootu seerasi agadhineemmo gede giddeessannonkekkita hamboonke, isi hasiꞌrannohu giddonkenninna banxe hajajammammosiraati. Yihowa hasiꞌrannohu xaa yannara lowo atoote abbannonke garinni, hattono konni kaꞌira hegere heeshsho afiꞌneemmo garinni heeꞌnammora ikkinota hamboonke. Qoleno woꞌmunni woꞌma hajajamanke Yihowa lowo geeshsha banxeemmota leellishate dancha kaayyo ikkitino gede assine laꞌno.

¹⁸ Yihowa gara ikkinorenna gara ikkinokkire bande anfeemmo gede kaaꞌlate, tiia uyinonke; tinino isi baxannonketa leellishshanno. Ikkeennano, tiiꞌꞌinke ammanaminoha ikkanno gede, qajeelsiꞌra hasiissannonke. Aante noo fooliishsho tenne hajore kultanno.