Yihowa Jaala Ikka Dandaatto

Yihowa seekkite afattosira hasiꞌranno. Mayira? Ayimmasi, doogosinna hedosi seekkite afittoro, jaalasi ikka hasiꞌrattota afino daafiraati. Addinta Maganu jaala ikka dandiinanni? (Faarso 25:14 nabbawi.) Maganu jaala ikkate maa assa dandaatto? Qullaawu Maxaafi kuri xaꞌmuwara dawaro qolanno; qoleno Yihowa gedee jaali dino yineemmohu mayiraatiro kulanno.

1. Yihowa ma assatto gede koyisinohe?

“Maganunniwa shiqqi yiiyye; isino kiꞌnewa shiqqi yaanno.” (Yaiqoobi 4:8) Hatto yaa mayyaate? Yihowa jaalasi ikkattora koyisinohe yaate. Mitu manni Magano laꞌꞌa dandiineemmokki daafira jaalasi ikka didandiineemmo yee hedanno. Ikkirono, Yihowa Qaalisi giddo isiwa shiqate isi daafira afa hasiissannonkere baalankare kulinonke. Qullaawu Maxaafi giddo noota Maganu sokka nabbambeemmoha ikkiro, Yihowa illetenni laꞌꞌa dandiineemmokkiha ikkirono isi ledo noonke jaaloomi lexxanni haꞌranno.

2. Yihowa gedee jaali dino yineemmohu mayiraati?

Yihowa geeshsha baxannohehu dino. Isi hagiirraamo ikkattoranna qarru amadannohe woyite hasaaphattosira hasiꞌranno. ‘Atere malannohu iso ikkino daafira, qarrisinohere baala isi aana tuqqa’ dandaatto. (1 Pheexiroosi 5:7) Yihowa woꞌmanka woyite jaallasi irkisate, sheshifachishatenna kuꞌlitannore macciishshate qixxaawinoho.—Faarso 94:18, 19 nabbawi.

3. Yihowa jaala ikkate maa assa hasiissannonke?

Yihowa baalanka manna baxannoha ikkirono, “suwashshu wodanirira kayinni wodanisire kulanno.” (Lawishsha 3:32) Yihowa jaallasi isi danchareeti yiinore assitaranna bushaho yiinore kayinni gibbara hasiꞌranno. Mitu manni, Yihowa asse yaannore baala assanna agurre yaannore baala agura qarrissanno yee hedanno. Ikkollana Yihowa shooshaqa Maganooti. Isi godowinta baxxannosirenna iso hagiirsiisate dandiiture baala assitannore baxannonsa.—Faarso 147:11; Soqqamaasinete Looso 10:34, 35.

LEDDE XIINXALLI

4. Abirihaami Yihowa jaalaati

Abirihaami (Abiraamino yinannisi) daafira kultannoti Qullaawu Maxaafi xagge, Yihowa jaala ikkate yaa mayyaatero huwatate kaaꞌlitannonke. Abirihaami daafira Kalaqama 12:1-4 nabbabbe. Hakkiinni aante noo xaꞌmuwa hasaabbe:

• Yihowa Abirihaami maa assi yiinosi?

• Yihowa isira mayyee hexxo uyinosi?

• Abirihaami ma assiyya?

5. Yihowa jaallasi assitara hasiꞌrannore

Duucha woyite jaallanke assitankera hasiꞌneemmori heeꞌranno.

• Ati jaallakki maa maa assitahera hasiꞌratto?

Umi Yohaannisi 5:3 nabbabbe; hakkiinni aante noo xaꞌmo hasaabbe:

• Yihowa jaallasi maa assitara hasiꞌranno?

Yihowara hajajamate, amanyootenkenna akatanke biddi assiꞌra hasiissannonkeha ikkara dandaanno. Isayaasi 48:17, 18 nabbabbe; hakkiinni aante noo xaꞌmo hasaabbe:

• Yihowa jaallasi heeshshonsa biddi assidhara hasiꞌrannohu mayiraati?

6. Yihowa jaallasira assannore

VIIDIYO: Yihowa Anera Lowore Assinoe (3:20)

• Yihowa viidiyote giddo laꞌnummo mancho wodanise xisso cincite heedhanno gede kaaꞌlinosehu hiittoonniiti?

Isayaasi 41:10, 13 nabbabbe; hakkiinni aante noo xaꞌmuwa hasaabbe:

• Yihowa jaallasi baalantera maa assara qaale eino?

• Yihowa dancha Jaala ikkannoheha lawannohe? Mayira?

7. Yihowa jaalla ikkate, isi ledo hasaawa hasiissannonke

Hasaawu jaaloomu kaajjanno gede assanno. Faarso 86:6, 11 nabbabbe; hakkiinni aante noo xaꞌmuwa hasaabbe:

• Yihowa hasaawisa dandiineemmohu hiittoonniiti?

• Yihowa hasaawisannonkehu hiittoonniiti?

XAPHISHSHA

Yihowa Jaalakki ikka hasiꞌranno; qoleno isiwa shiqatto gede kaaꞌlannohe.

Kageeshsha Rosoottore

• Yihowa jaallasi kaaꞌlannohu hiittoonniiti?

• Yihowa jaallasi heeshshonsa biddi assidhara hasiꞌrannohu mayiraati?

• Yihowa jaallasi wolqansara aleenni ikkinore asse yaannoha lawannohe? Mayira?

EGENNO LEXXI

Maganu jaala ikkakki heeshshokkira kaaꞌlitannohehu hiittoonniiti?

“Yihowa Afa Hasiissanno Maganooti” (Agarooshshu Shae, Ammajje 15, 2003)

Maganu ledo jaalooma kalaqiꞌra dandiinanni gara rosi.

“Maganu Jaala Ikka Dandeemmohu Hiittoonniiti?” (Wedellu Xaꞌmanno Xaꞌmonna Mala Ikkitanno Dawaro, Gafa 2, fooliishsho 35)

Mitte mancho Yihowa jaala ikkase heeshshose seekkitinohu hiittoonniitiro wodanchi.

“Reya Horo Dihasiꞌroomma!” (Agarooshshu Shae Kiiro 1 2017)

Wedellootu Yihowa daafira mayi macciishshamannonsaro kultanna macciishshi.

Maganu Jaala Ikkate Yaa Mayyaate? (1:46)