ROSO 29
Reyineemmo Woyite Hiikkineemmo?
Baxatto manna shiidhe egennootto? Hattee dadillu yannara, togo yite hedoottoha ikkara dandaanno: ‘Mannu reyanno woyite isi hiikkanno? Shiiꞌnoommo manni ledo wirro xaandeemmo yanna dagga ikka?’ Qullaawu Maxaafi tenne xaꞌmuwara qolannota sheshifachishshanno dawaro konninna aananno rosira laꞌneemmo.
1. Reyineemmo woyite hiikkineemmo?
Yesuusi, reyo takkinaatu goxichi gedeeti yiino. Reyo goxichu gede ikkitinohu hiittoonniiti? Natare goxino manchi, mulesi mayi ikkanni nooro diafanno. Mittu manchi reyihu gedensaanni, dixissannosi. Callimmano diamaddannosi. Qullaawu Maxaafi, “Reyitinori . . . mittoreno diaffanno” yaanno.—Rosiisaancho 9:5 nabbawi.
2. Reyote daafira halaale afa kaaꞌlitannonkehu hiittoonniiti?
Batinyu manni reyono ikko reyitinore lowo geeshsha waajjanno. Ikkollana, Qullaawu Maxaafi reyote daafira kulannori sheshifachishahera dandaanno. Yesuusi, “Halaaluno borojjimmatenni fushshannoꞌne” yiino. (Yohaannisi 8:32) Mite ammaꞌno, mannu reyanno woyite reyitukki gattanno lubbo no yite rosiissanno; Qullaawu Maxaafi kayinni hatto diyaanno. Hakko daafira, mittu manchi reyihu gedensaanni diqarramanno. Qoleno, reyitinori mittoreno affannokki daafira, ninke gawajjitankera didandiitanno. Konni daafira, reyino manna magansiꞌra woy hanqannonke yine mitore assa lawishshaho, annuwate xorshiꞌra dihasiissanno; qoleno insa daafira huuccatto assano dihasiissanno.
Mitu manni reyitinori ledo hasaawa dandiinanni yaanno. Kuni kayi ikkannokki coyeeti. Aleenni ronsummonte gede, reyitinori “mittoreno diaffanno.” Reyino fiixinke ledo hasaambanni heeꞌnoommo yee hedanno manni, durriissate (agaanintete) ledo hasaawanni nooha ikkara dandaanno; korkaatuno durriissa reyino manna labbe coyiꞌra dandiitanno. Konnira reyote daafira halaale afa, durriissate gawajjonni agartannonke. Yihowa reyino manna hasaawisate woꞌnaalleemmokki gede qorowisiisinonke; korkaatuno isi durriissate ledo hasaawa gawajjitannonketa afino.—Marro 18:10-12 nabbawi.
LEDDE XIINXALLI
Qullaawu Maxaafi reyote daafira kulannore ledde rosse, Maganu reyitinore qorichishannokkiha shaqqado ikkinota albinni roore addaxxi.
3. Reyino manni noo gara rosi
Alamete aana mannu ‘Reyineemmo woyite isi hiikkineemmo?’ yitanno xaꞌmora duuchare yaanno. Hige mannu yaannori baalunkuri addaho yaa diꞌꞌikkino.
Kiꞌne qooxeessira duuchu manni reyitinori hiikkite no yee ammananno?
Tenne daafira Qullaawu Maxaafi mayyaannoro afate, VIIDIYO laꞌe.
Rosiisaancho 3:20 nabbabbe; hakkiinni aante noo xaꞌmuwa hasaabbe:
Kuni qummeeshshi kulanno garinni, mittu manchi reyanno woyite hiikkanno?
Reyineemmo woyite giddonke reyikki gatannori no?
Qullaawu Maxaafi, Yesuusi jaali Aliaazaari reyinota kulanno. Yohaannisi 11:11-14 nabbabbinanni woyite, Yesuusi Aliaazaari hiitto ikke no yiinoro wodanchate woꞌnaalle. Hakkiinni aante noo xaꞌmuwa hasaabbe:
Yesuusi reyo mayi ledo heewisiisino?
Yesuusi hatto yaasi, reyitinori hiitto ikkite noota huwanteemmo gede assitannonke?
Qullaawu Maxaafi reyote daafira kulannore hedatto woyite mayyaatto?
4. Reyote daafira halaale afa kaaꞌlitannonke
Reyote daafira halaale afa reyitinore waajjineemmokki gede assitannonke. Rosiisaancho 9:10 nabbabbe; hakkiinni aante noo xaꞌmo hasaabbe:
Reyitinori gawajjitankera dandiitanno?
Qullaawu Maxaafi reyote daafira kulanno halaale ammanneemmoha ikkiro, reyitinore magansiꞌra woy hanqitannonke yine mitore assa hasiissannonke yine dihendeemmo. Isayaasi 8:19 nna Yohaannisi Ajuuja 4:11 nabbabbe; hakkiinni aante noo xaꞌmo hasaabbe:
Mittu manchi reyitinore magansiꞌranno woyite woy insa kaaꞌlo huucciꞌranno woyite Yihowara mayi macciishshamannosiha lawannohe?
Reyote daafira halaale afa, Yihowa dadillisanno budiwiinni xeertiꞌneemmo gede kaaꞌlitannonke
5. Reyote daafira halaale afa sheshifachishshannonke
Batinye manna, mittu manchi reyanno woyite alba loosino cubbira qoricha adhanno yine rosiinsoonninsa. Ikkollana mittu manchi reyihu gedensaanni, alba lowo bunshe assinoha ikkiro nafa qarramannokkita afanke sheshifachishshannonke. Roomu Sokka 6:7 nabbabbe; hakkiinni aante noo xaꞌmo hasaabbe:
Qullaawu Maxaafi, mittu manchi reyanno woyite cubbu anganni fulanno yaanno. Hatto ikkiro, reyihu gedensaanni alba loosino cubbinni kainohunni qarramanno manchi heeꞌrannoha lawannohe?
Yihowa affanni haꞌritto kiiro, isi reyitinore horo qorichishannokkita albinni roore huwatatto. Marro 32:4 nna 1 Yohaannisi 4:8 nabbabbe; hakkiinni aante noo xaꞌmuwa hasaabbe:
Tenne qummeeshshuwara kulli akatta noosi Magani, reyitinore qorichishannoha lawannohe?
Reyote daafira rosootto halaali sheshifachishinohe? Mayira?
MITU MANNI TOGO YAANNO: “Reyummoro hiikkeemmokka yee waajjeemmo.”
Hatto yaanno mannira sheshifachishshannota hiikkuri qummeeshshuwa kula dandaatto?
XAPHISHSHA
Mittu manchi reyanno woyite, mittoreno diafanno. Reyitinori diqarrantanno; lubbote nooreno gawajja didandiitanno.
Kageeshsha Rosoottore
Reyineemmo woyite hiikkineemmo?
Reyote daafira halaale afa kaaꞌlitannonkehu hiittoonniiti?
Reyote daafira halaale afa sheshifachishshannonkehu hiittoonniiti?
EGENNO LEXXI
Qullaawu Maxaafi giddo “lubbo” yaanno qaali mayi tiro afiꞌrinoro huwati.
Maganu bushuulle giiratenni qorichishannoni?
Reyitinore waajja hasiissannonke?
Reyitinori Ekera Kaaꞌlitahera Woy Gawajjitahera Dandiitanno? Heeꞌransana Halaaleho? (biroshere)
Mitto mancho reyineemmo woyite hiikkineemmoro Qullaawu Maxaafinni rosasi sheshifachishshinosi gara nabbawi.