Mitu Woꞌminoha Ikkirono, Rooru Mulla Gatino

Albillitte heeshshokki hiittoota ikkitannoro afoottoro baxisannohe? Lowo manni tenne afa hasiꞌranno. Albillitte ikkannore masaalannohu batinyu manni no. Kuri giddo hanni aante noore laꞌno:

• SAYINTISTOOTU addi addi hajore balaxxe afate lowo geeshsha raqaxamino massaara horoonsidhanno, hattono lowo woxe fushshitanno. Lawishshaho, albillitte ayyarete daafama uulla hiissitannoro hattono gaꞌa xeena ganannoronna teꞌee balaxxe masaaltanno.

• XIINXALLAANO daddalunna poletiku daafira masaaltanno. Alamete dureeyye goowa ikkinohu Woreni Bafati yinanni manchi, daddalu daafira balaxe coyiꞌrinori woꞌminohura mannu iso “masaalaanchoho” yiino. Neeti Silveri yinannihu wolu xiinxallaanchi qole, Yunayitidi Isteetete poletikinni kayise Hooliwuudi filmera shillimaate adhanno manni geeshsha duuchu coyi daafira masaalino.

• BIꞌREE BORRUWA masaalo amaddino gede asse hedanno manni no. Mitu manni, 16ki sanira heeꞌrinohu Nostiradamesi (Misheli de Nostiradam) borreessinoti xawe leellannokkire kultanno borruwa yitannori yannankera woꞌmanni no yee hedanno. Mitootu, Maya daga kalaandere Sadaasa 21, 2012nni gumulantanno wote, alamete aana waajjishannori ikkanno yite masaaltino.

• AMMAꞌNOTE MAROOTI manna qorophe yaatenna harunsaano gamba assiꞌrate yite alamete aana goofo dagganno yite himantanno woti no. Baote Barri masaalaanchi Haroldi Kampinginna harunsaanosi, uulla 2011nni baꞌanno yite dudubbino. Alame kayinni xaano noolla.

• DIRINKE KIILAANO albillitte ikkannore masaalleemmoti baxxitino wolqa noonke yitanno. Edigari Kaasenna Jeeni Dikseni 20ki sani daafira masaaltino coyibba giddo gamu woꞌmino. Ikkollana insa coyidhinohu lowo coyi ikkikki gatino. Lawishshaho Dikseni, Sayikkihu Alamete Oli 1958nni kaꞌꞌanno yite masaaltino; Kaase qole 1970 mereedhanno wote Niwu Yoorkete gobba shirri yite wuqiyaanoosete giddora eꞌanno yee masaalino.

Ikkina albillitte ikkannore mittoreno soꞌnikki afa dandiinanni gari heeꞌranno? Tini xaꞌma hasiissanno xaꞌmooti. Albillitte ikkannore balaxxe afittoro, heeshshokki xa nootenni lowo geeshsha baxxitinota ikkitara dandiitanno.