Kiristaanu Madaarshu Ledo Xaado Afiꞌrino Bude Ma Garinni Laꞌꞌanno?
BANXANNI manna hakko iso hedeweelcho shiira lowo geeshsha dadillissanno. Hattoo wote umo manseemmo, hakkiinnino godowinke lowo geeshsha xissiisiꞌranno. Woy banxeemmo manchi reyinohu seeda yanna dhiwanni waadisihu gedensaanni ikkara dandaanno; hakkawoteno ikkiro dadillineemmo hattono xissiisiꞌneemmo.
Banxanni manchi hedeweelcho reyinohano ikkiro, woy dhiwamanni keeshshe reyinohano ikkiro, shiirino mancho kaaꞌlanna sheshifachisha hasiissanno. Qoleno, Qullaawa Borro ledo sumuu yaannokki bude harunsanno manni shiirino Kiristaanchira qarra qalara dandaanno. Batinye Afiriku gobbuwarano ikko mite mite wole gobbuwara kuni rosaminoreeti.
Shiirino Kiristaani Qullaawa Borro ledo sumuu yaannokkihu madaarshu ledo xaado afiꞌrino budiwiinni xeertiꞌranno gede kaaꞌlannonsari maati? Togoote fatanu yannara ammanate roduuwi kaaꞌla dandiitannohu hiittoonniiti? Yihowa hagiirsiisa hasidhannori baalunku tenne xaꞌmuwa seekkite heda hasiissannonsa. Korkaatuno, “Maganinkenna Anninke albaanni xuru nookkitinna battaabbinokki magansiꞌra, annanna ama shiidhinorenna gunnoota qarrinsa yannara towaatatenna alamete xurinni meessaneeto agadhate.”—Yaq. 1:27.
MITTE AMMANA LEDO XAADO AFIꞌRINOHO
Madaarshu ledo xaado afiꞌrinohu lowo budi, reyino manni illete leeltannokki alamera albi annuwa ledo heeꞌranno yitanno ammana ledo xaado afiꞌrinoho. Batinyu shiirino manni reyitinore hagiirsiisate mito bude harunsa hasiissannonsaha lawannonsa. Woy hattoo bude wonsha hoongiro ayiddu giddo mitiri ikkanno yee ammanannoha olluu manna waajjara dandaanno.
Addu Kiristaani manna waajje qeelamanna Magano dadillisanno budira karsama dihasiissannonsa. (Lawishsha 29:25; Maatewoosi 10:28) Qullaawu Maxaafi reyino manni afannori nookkita kulanni togo yaanno: “Heeshshote noori reyitannota affino; reyitinori kayinni mittoreno diaffanno . . . Ati haꞌrattowa Waammate giddo, loosu woy iqqide woy egenno woy hayyo dino.” (Mekibibi 9:5, 10) Konni daafira, Maganu Yihowa hunda dagasi reyino manna hagiirsiisate yite mitore assitannokki gedenna insa coyishiishate woꞌnaaltannokki gede duure kulino. (Marro 14:1; 18:10-12; Isayyaasi 8:19, 20) Madaarshu ledo xaado afiꞌrinohu lowo budi konni Qullaawu Maxaafi halaali ledo sumuu diyaannoho.
“SIIMU XAADINNI KEERAAꞌMATE” YINANNIRINA?
Mereerimu Afirikira heedhannote mite gobbuwara, mannootu mittu manchi galte shiiriro galtete muli fiixa ikkanno manni ledo siimu xaado assa hasiissannosi yite ammantanno. Kuni ikka hoogiro reyi manchi lubbote noo ayidde gawajjanno yitanno ammana noonsa. Konne assoote “siimu xaadinni keeraaꞌmate” yitanno. Qullaawu Maxaafi kayinni meessi galte ikkinokki manchi ledo siimu xaado assa “foorre” ikkitinota kulanno. Kiristaanu ‘foorretewiinni xooqa’ hasiissannonsa daafira, Qullaawa Borro ledo sumuu yaannokkiha konne bude giwanno.—1 Qorontoosi 6:18.
Hanni minaanna shiidhinote Mersii yinanni manchora iillinosere laꞌno.a Minaannise 1989nni reyi yannara, ayiddu ise minaannisera fiixa ikkanno manchi ledo siimu xaado assitara hasiꞌrino. Ise kayinni kuni budi Maganu higge ledo sumuu yaannokkiha ikkinota kulte maahoyye yaa gibbu. Ayiddu tennera hanqe afiinsa abbita yee xonisehu gedensaanni agure haꞌri. Mittu agani gedensaanni galagale daye, “Hanni ammaꞌnokki assitannohere laꞌneemmona” yee minese diigi.
Songote giddo noo roduuwi Mersii sheshifachishshinose, qoleno haaro mine nafa mintinose. Olluu manni tenne lae dhagge assiꞌrino, mitu isinni daye mina kaaꞌlino; Kaatolikete ammaꞌno harunsitannoti olluu sooreessi galte isenni baalanka balaxxe mineho buuyyo abbitino. Mersii kaajjite uurrase oosose jawaachishshino. Insa giddo shoolu insaneeto Yihowara sayisse uyite cuuantino; mittu isinni muli yannara Soqqamaanote Qajeelshi Rosi Mine eino.
Mitu Kiristaani siimu xaadinni keeraaꞌmate budinni kainohunni, mannu xixxiiweennansa qeelame ammaninokki manni ledo adhamino. Lawishshaho, 70 diro sainosihu galte shiirinohu mittu manchi muddame galtesira fiixa ikkitannota seemo beetto adhino. Konne assinohu siimu xaadinni keeraaꞌmate seera wonshoommo yaaraati. Ikkollana, kuni assooti Kiristaanu “Mooticha ammaninoha calla” adho yaannohu Qullaawu Maxaafi biddishshi ledo dixaadannoho.—1 Qorontoosi 7:39.
HASHSHA REESHSHA AGARE GALATE SEERA
Batinye gobbuwara, mannu wiꞌlate mine hashsha gamba yee reeshsha agare ofolle galanno. Togoo yannara roore wote jila jillanni hattono muuziiqa luushshinanni. Konne assa reyinoha hagiirsiissanno hattono lubbote noo ayidde bushu ayyaani gawajjannota agartanno yine hendanni. Konni seeri yannara reyino manchira ayirrinye aate mannootu ikkinoreno ikkinokkireno coyidhara dandiitanno. Mittu manchi gamba yiino mannira nigiggire shiqisheenna mereeroho ammaꞌnote faarso faarsitanno; hakkiinni xaano wolu manchi kae nigiggire shiqishanno. Sooda geeshsha hatte gedeenni galtanno.b
Addu Kiristaani gamba yine reeshsha agarre galate seera diharunsanno; korkaatuno Qullaawu Maxaafi reyino manni lubbote noore kaaꞌlara woy gawajjara dandaannokkita kulanno. (Kalaqo 3:19; Faarso 146:3, 4; Yohaannisi 11:11-14) Qullaawa Borro agaanintete ledo xaado afiꞌrino coyiwiinni xeertiꞌra hasiissannonketa kultanno. (Ajuuja 9:21; 22:15) Ikkollana, mitte minaanna shiidhino Kiristaanchora wolootu agaanintete ledo xaado afiꞌrinore assitannota hoola qarra ikkitasera dandiitanno. Kuni manni minese hashsha woꞌma reeshsha agarre galate seera wonsha hasiissannonke yee qarrisasera dandaanno. Togoo qarri iillannonsare shiirino Kiristaana ammanate roduuwi kaaꞌla dandiitannohu hiittoonniiti?
Roore wote songote cimeeyye shiirino Kiristaanchi fiixanna olluu manna hasaawisse ammanate rodoonsa irkisa dandiitino. Konni garinni hasaawinsiro, kuni manni salaametenni agure haꞌre madaarshaho wole barra daara dandaanno. Mitu manni gaagaale gaꞌne macciishshalla giwi? Togoo manna ammansiisate hoode haꞌra gibbote widira massitara dandiitanno. ‘Mootichu borojjichi kayinni giwama dihasiissannosi; hatteentenni busha coye cince saꞌꞌa hasiissannosi.’ (2 Ximootewosi 2:24) Konni daafira, fiixu yinoonnita giwe giddetenni seera wonshate kaꞌꞌannoha ikkiro minaannase shiidhino rodooranna oososera coyi wolqansara aleenni ikkara dandaanno. Ikkirono, minensa wonshinannihu kaphu ammaꞌno seeri baalunkura dikarsamanno; korkaatuno insa, “Ammaninokki manni ledo taalannokki garinni waaxantinoonte” yitannota Qullaawu Maxaafi hajajo ayirrisanno.—2 Qorontoosi 6:14.
Kuni xintu seeri madaarshu yannarano kaaꞌlanno. Yihowa Farciꞌraasine kaphu ammaꞌno marooti marraꞌanno faarsora, huuccattora woy wolu seerira dikarsantanno. Miteekke muli fiixa ikkino Kiristaanchi madaarsha fula hasiissannoe yee hediro, togoo coyibbara kayinni dieanno.—2 Qorontoosi 6:17; Ajuuja 18:4.
KAWAJJAAMO MADAARSHA
Yihowa Farciꞌraasine madaarshu yannara reyino mancho hagiirsiisate yite wonshitanno seeri dino. Mangistete Addaraashera, woy wiꞌlate mine, woy madaarshu basera Qullaawu Maxaafi nigiggire shiqqanno gede assitanno. Nigiggire shiqinshannihu Qullaawu Maxaafi reyote daafiranna kaote hexxo daafira yaannore kulle shiidhino maate sheshifachishateeti. (Yohaannisi 11:25; Roomu Sokka 5:12; 2 Pheexiroosi 3:13) Qullaawa Borro aana xintantino faarso faarsinara dandiinanni; madaarshu jeefora qolle sheshifachishshanno huuccatto assinanni.
Muli yannara, Wodiidi Afiriki pirezidaantichi Nelseni Maandeelli rodoo ikkitinote Yihowa Farciꞌraasincho madaarsha konni garinni assinoonni. Madaarshu gedensaanni, kuni pirezidaantichi nigiggire shiqishino rodoo shiqe galatino. Hakkawote lowo silxaane noonsarinna gashshaano madaarsha fulte no. Mitte kaabinete ministeritte togo yitino: “Kageeshsha fuloomma madaarshi baalunku giddo kuni roore kawajjaamoho.”
XIDDU UDUUNNE UDDIꞌRA HASIISSANNO?
Yihowa Farciꞌraasineno shiidhuro lowo geeshsha xissiisidhanno. Yesuusinte gede insano hindiiddonsa duꞌnitara dandiitanno. (Yohaannisi 11:35, 36) Ikkollana, xissonsa mannu afanno gede baxxino malaate wodha hasiissannonke yite diheddanno. (Maatewoosi 6:16-18 ledo heewisiisi.) Duucha gobbuwara minaanna shiirino meenti, reyinoha hagiirsiisate baxxinoha xiddu uduunne uddiꞌra hasiissannonsa yine hendanni. Konne uduunne madaarshu gedensaanni haammata agana, mito wote isinni diro woꞌma uddiꞌranno; konne uduunne uddiꞌra agurannohu wole jila jillanni woteeti.
Xissiisiꞌnoonnita leellishate togoo uduunne uddiꞌra hooga reyinoha hanqissanno yine hendanni. Hakko daafira Siwazilaandete mitu qooxeessira dagoomu sooreeyye Yihowa Farciꞌraasine uminsa qaenninna baattonni darantanno gede assitino. Ikkollana, konne ammanamino Kiristaana wolewa heedhanno roduuwinsa towaattinonsa.
Siwazilaandete gobbahu Aliidihu Yoote Mini Yihowa Farciꞌraasine, qaensanna gobbansa higganno gede assitannota dancha yoo yiino. Minaanna shiidhinoti mitte Kiristaancho qolte, minaannise reyara albaanni ise xiddu uddano uddiꞌra dihasiissannose yee borreessino dabdaabbenna teeppetenni qaddaꞌnoonni dhaansasi shiqishshuta qaesera heedhara fajjinoonnise. Konni garinni ise minaannase ayirrissannota leellisha dandiitino.
Hakko iso Qullaawa Borro ledo sumuu yaannokki seeri rosamino qooxeessira, mittu manchi reyara albaanni madaarshisi daafira xawise borreesse wodhiro hatti lowore kaaꞌlitanno. Lawishshaho, Kameruuni gobbara Vikitoori hatto assino. Isi madaarshisi yannara assinannire borreesse wodhino. Ayiddisi giddo addi addi seera afiꞌrinoha reyote ledo xaado afiꞌrino bude seekke cuꞌmirinohu ayirradu manni no; isinni insa budira mannunniha umu qooncho magansiꞌnanni. Vikitoori ayiddu giddo ayirrado ikkino daafira, reyi gedensaanni umu qoonchosi ayiddu magansiꞌrara dandaannota afino. Hakko daafira, Yihowa Farciꞌraasine madaarshisi pirogiraame biddi assitanno gara xawise borreessino. Hatto assasi minaamasinna oososi qarrisannore ajishshino; qoleno tini dagoomaho ninke daafira danchare rosiissino.
QULLAAWA BORRO LEDO SUMUU YAANNOKKI BUDIWIINNI XEERTIDHE
Mitootu Qullaawu Maxaafi egenno noonsaha ikkirono, mannuwiinni baxxite leella waajjitino. Iillannonsa darte hooꞌlate, budu garinni reeshsha agare galate seera wonshitanni no yinanninsa gede assannore assite olliichonsa hagiirsiisate woꞌnaaltanno. Shiirinoha shinqe sheshifachishate yine wiꞌlate minira mara gimbannire afidhinokkiha ikkirono, madaarshu barrira albaanni hashshu baala marre baxxino seera wonsha kayinni hasiissannota diꞌꞌikkitino. Kuni assooti Qullaawu Maxaafi reyino manni noo gara lainohunni rosiisannore ammannannikkiha lawisanno daafira, laꞌꞌanno mannira guficho ikkara dandaanno.—1 Qorontoosi 10:32.
Qullaawu Maxaafi, Kiristaanu heeshshonsa giddo Magano magansiꞌra balaxisiisanno gedenna yannansa garunni horoonsiꞌranno gede amaalanno. (Maatewoosi 6:33; Efesooni 5:15, 16) Mitu qooxeessira, madaarshu daafira yineenna mitte lamala woy hakkiinni saꞌanno yanna songote millimmo uurritanno. Kuni qarri Afirikaho calla nooha diꞌꞌikkino. Wodiidi Ameerikinni daggino rippoorte mittu madaarshire kultanni togo yitanno: “Sasu songote gambooshshi yannara mannu lowo geeshsha ajino. Mitu tonnu barri geeshsha qanchu soqqansho fulinohu dino. Songote gobbaanni noo manninna Qullaawu Maxaafi rosaano nafa mitu roduuwi mitu seerira karsantanna laꞌe lowo geeshsha dhagge assidhino hattono koffi yitino.”
Mitu qooxeessira, shiirino ayiddi madaarshu gedensaanni shiimare qixxeesse boode manna mininsara woshshara dandaanno. Ikkollana, batinye Afiriku gobbuwara wiꞌlate mine budu garinni saada gorrine jilleenna itara lowo xibbe ikkanno manni yaaꞌꞌanno. Kiristaanu songo giddo noori mitootuno tenne faale harunsite, reyinoha hagiirsiisate yine budu garinni jillanni jila jiltanni nooha lawissino.
Yihowa Farciꞌraasine biddi assitanno madaarshira, shiirino ayiddira duhu batiꞌranno gede diassitanno. Konni daafira madaarshaho quwa saino woxe fushshanna wiꞌla fulino manni woxe aanno gede qixxaawo assa dihasiissanno. Minaanna shiidhinoti anga ajjino daafira woce dandaa hoogguro, songote giddo noo roduuwi kaaꞌlitannoti dihuluullissannote. Togoo kaaꞌlono garita ikka hoogguro, songote cimeeyye hasiissanno kaaꞌlo aate qixxaawo assitara dandiitanno.—1 Ximootewosi 5:3, 4.
Madaarshu yannara harunsinanni seeri baalunku Qullaawu Maxaafi seeri ledo sumuu diyaannoho yaa diꞌꞌikkino. Sumuu yaannokkiha ikkiro kayinni, Kiristaanu Qullaawa Borro yitannore harunsate murciꞌre kaꞌꞌanno.c (Hawaariyaatete Looso 5:29) Tini wole qarra abbitara dandiitannoha ikkirono, batinyu Maganu soqqamaano togoo fatana qeelte saꞌꞌa dandiitino. Konne assa dandiitinohu “shesho baalante Magani” Yihowa jawaante uyinonsa daafiraatinna qarru yannara sheshifachishshannori ammanate roduuwinsa baxillunni kaaꞌlitinonsa daafiraati.—2 Qorontoosi 1:3, 4.
[Lekkaalliidi qaagiishshuwa]
a Konni birxichira noo suꞌmuwa soorrinoonnite.
b Mitu qooxeessira mannu wiꞌlate mine mare galannohu shiirinoha sheshifachishateeti. Kuni manni Qullaawu Maxaafi rosiisannori ledo sumuu yaannokkire assa hoogara dandaanno. Onkoleessa 22, 1979 Baqqi Yiiyye! (Ingilizete Afoo) yinanni metseete qoola 27-28 lai.
c Madaarshu ledo xaado afiꞌrino budi mittu Kiristaanchira buutote qarra abbanno qooxeessira, cimeeyye cuuamate kaino mancho mayi iillasira dandaannoro kulte qixxaawanno gede assa dandiitanno. Soqqanshonke Gumulate Daraajjaꞌꞌa yaanno maxaafira noo xaꞌmuwa cuuamate qixxaawanno manchi ledo hasaabbanno wote, “Lubbo, Cubbonna Reyo” hattono “Addi Addi Ammaꞌno Karsiisa” yitanno birxichuwa aana illachisha hasiissannonsa. Konni lamunku birxichira hasaawaho qixxeessinoonniti ledote xaꞌmuwa no. Cuuamate qixxaawinohu togoo coyi tuncu yaannosi wotira Maganu Qaali yaannore afe agadhanno gede, Qullaawa Borro ledo sumuu yaannokkihu madaarshu seeri hiikkoyetiro huwachishate tini dancha farooti.
[Qoola 31 noo misile]
Kaajjite Uurritino Daafira Atoote Afidhino
Sibongili Siwazilaandete gobbara heedhannote worba Kiristaanchooti. Muli yannara minaannise reyita, mannu reyitinore hagiirsiisate yee wonshanno seera wonsha gibbu. Lawishshaho, umo meexxa gibbino. (Marro 14:1) Maatese giddo settu manni tennera baasa hanqite giddetenni umo meedduse. Hakkiinni saꞌeno, Yihowa Farciꞌraasine ise sheshifachishate yite qaese martannota hooltu. Ikkollana, Maganu Mangiste sokkara hasatto noonsa mannooti songote cimeeyye borreessitinota jawaachishshanno dabdaabbe massituse. Sibongili budu garinni baxxinoha xiddu uduunne uddidhanno yine agarranni barra, mittu dhaggete coyi ikki. Ayiddu giddo ayirrado ikkinohu mittu manchi, ise budu garinni xidditannokkihu mayiraatiro kultanno gede manna gamba assi.
Sibongili togo yitino: “Mannu, xissiisiꞌroommata leellishate kolishsho xiddu uddano uddiꞌreemma gede ammaꞌnoꞌya fajjitannoeronna teꞌee xaꞌmie. Hedoꞌya xawise kulummansata, giddeesse uddiꞌri yaannoekkita kulie. Tuttuginoeteranna giddetenni umo meedinoetera baalunku maaro xaꞌmiꞌransa lowonta dhagge ikkitue. Woꞌmunku shiqqe maarinke yitue.” Yannate gedensaanni, Sibongili rodoo Yihowa Farciꞌraasine ammaꞌno halaale ikkitinota ammantannota coyidhino; hattono Qullaawa Maxaafa xiinxallisseꞌꞌe yitino.
Hanni tenne wole lawishsha laꞌno: Wodiidi Afirikira heeꞌrannohu Benjaamini annasi hedeweelcho shiirinohu 29 dirihu heeꞌreeti. Hatte yannara, maatensa giddo Yihowa Farciꞌraasincho ikkinohu iso callaati. Madaarshu yannara, mittu mittunku dirame waamma doyannonna bushsha cuꞌme reeshshu saaxinera aanaho tuganno yine agarranni.d Qoleno, madaarshu gedensaanni ayiddu gudisire umo meexxa hasiissannonsa. Benjaamini kayinni umo meexxinokki daafira, ayiddunna olliichu iso reyino annisi ekera qaxxaassanno yee agarino.
Benjaamini togo yiino: “Yihowa addaxxoommo daafira, ikkoommori dino.” Maatesino insa heddu gede gawajjaminokkita huwattu. Yanna saꞌu gedensaanni, insa giddo batinyu Yihowa Farciꞌraasine ledo Qullaawa Maxaafa xiinxallite insaneeto Maganoho sayisse uyitinota leellishate cuuantino. Benjaamini qole woꞌma yanna sawaakicha ikkino. Saꞌute boode dirrara, isi Yihowa Farciꞌraasine songuwa towaatannoha ikke soqqamino.
[Lekkaalliidi qaagiishsha]
d Mitu manni waammate aanaho awawa woy bushsha cuꞌme tuga afidhinori dino yee hedara dandaanno. Ikkollana, dagoomu konne bude reyinoha hagiirsiisanno yee ammanannoha ikkiro woy kuni assooti kaphu ammaꞌno marichi marraꞌꞌanno seeri ledo xaado afiꞌrinoha ikkiro, mittu Kiristaanchi togoore giwa hasiissannosi.—Badheessa 22, 1977 Baqqi Yiiyye! (Ingilizete Afoo), qoola 15 lai.
[Qoola 31 noo misile]
“Yihowa addaxxoommo daafira, ikkoommori dino.”