AANIIDI QOOLIHA COYI UMO | MAGANU WAAGAHO KIIRANNOHEHA LAWANNOHE?
Maganu Hixamanye Laꞌꞌannohe
“Maganu ille manchu doogo laꞌanno; qoleno isi haꞌrinshosi baala laꞌꞌanno.” —IYYOOBI 34:21.
Shiimaaddu qaaqquullira annunna amate towaanyo roore hasiissannonsa
MITU MANNI TENNE HULUULLAMANNOHU MAYIRAATI? Muli yannara assinoonni xiinxallo garinni, ninke gaalaakse calla ajayi ajeenna 100 biliyoone ikkitanno pilaaneetta amaddino. Batinyu manni kalqete alame mageeshshi geeshsha lowotero hedanno wote togo yee xaꞌmanno: ‘Duuchanka Dandaanno Kalaqaanchi shiinqicco pilaanete aana noori garire ikkitinokkiri mannu ooso assitannore ma assiꞌranni laꞌꞌanno?’
MAGANU QAALI MAYYAANNO? Maganu Qullaawa Maxaafa oye calla facci asse diagurinonke. Yihowa togo yee qaale einonke: “Illeꞌya aanikkinni hoolummokki amaaleemmohe.”—Faarso 32:8.
Hanni 1900 K.A. balla heedhinote Aggaari yinannite Gibitsete mancho xagge laꞌno. Aggaari loosiisidhannoseta Saara woffi assite laꞌino daafira, Saara isera qarra naqqino; hakko daafira Aggaari fulte halallira baꞌu. Ikkina Aggaari soꞌro loossino daafira Maganu ise facci asse agurinoni? Qullaawu Maxaafi togo yaanno: “Yihowa sokkaanchi ise afise.” Kuni sokkaanchi ise togo yee jawaachishinose: “Yihowa qarrakki laino.” Hakkiinni Aggaari Yihowa, “Ati laꞌꞌatto Maganooti” yitino.—Kalaqo 16:4-13.
‘Laꞌꞌanno Magani’ Yihowa ateno hixamanye laꞌꞌannohe. Lawishshaho, shaqqado ama shiimaadda qaaqquullese roorenka ille worte layidhanno; korkaatuno togoo qaaqquullira annunna amate towaanyo roore hasiissannonsa. Hatteente gede Maganu, hexxo mudhineemmo wotenna gawajjannori iillankera kaꞌꞌanno wote roore laꞌꞌannonke. Yihowa togo yiino: “Ani gotti yiinonna qullaawa bayicho heeꞌreemmo; kayinni mishantinori ayyaana haaroonsammoranna wodana hiiqqantinore jawaachishammora hiiqqaminonna mishamino ayyaani noonsari ledono heeꞌreemmo.”—Isayyaasi 57:15.
Ikkirono togo yite hedattora dandaatto: ‘Maganu ane laꞌꞌannoehu hiittoonniiti? Iimi adda calla lae faradannoenso, giddoꞌya lae ayimmaꞌya huwatanno?’