AANIIDI QOOLIHA COYI UMO | MAGANU WAAGAHO KIIRANNOHEHA LAWANNOHE?
Maganu Isiwa Shiqattora Hasiꞌranno
“Soyinoehu Anniꞌya goshooshinoha agurranna, anewa daa dandaannohu dino; iso goofimarchu barra kayiseemmosi.” —YOHAANNISI 6:44.
MITU MANNI TENNE HULUULLAMANNOHU MAYIRAATI? Magano ammanannohu batinyu manni isiwa shiqa dandaannohu gede asse dihedanno. Ayerilaandete heedhannoti lamalate kiiro beetekiristaane hadhannoti Kiristiina yinanni mancho togo yitino: “Magano baalankare kalaqinoha ikkino gede asse laeemma. Ikkirono iso diegennoomma. Isiwa shiqoommahu gede ikke horo macciishshame diegenninoe.”
MAGANU QAALI MAYYAANNO? Hexxo mudhine tootayyaambeemmo wote Yihowa ninke kaaꞌlate woꞌnaala diaguranno. Maganu ninkera assaawannota Yesuusi lawishshunni togo yee xawisino: “Mittu manchira 100 geꞌreewi heeꞌrisironna mitte baxxite baꞌuro, baꞌinota mitte hasiꞌrate yee 99 ilaalu aana agure dihaꞌranno?” Tennenni maa ronseemmo? “Hatteente gede, iima noo Anniꞌya kuri shiimmaaddu giddonni mittu nafa baꞌꞌara dihasiꞌranno.”—Maatewoosi 18:12-14.
“Kuri shiimmaaddu” yiniri mittu mittunku Maganu albaanni muxxete. Maganu ‘baxxe bainoha mitto hasannohu’ hiittoonniiti? Konni birxichira umo qummi assini xiqise yitannonte gede, Yihowa manna isiwa qole goshooshanno.
Xaa yannara Qullaawu Maxaafi Maganu daafira mayyaannoro minunni mine hadhe hattono gudumaaleho mannaho kultanni noori ayeooti?
Hanni Maganu suwino wodani noonsa manna isiwa goshooshino gara laꞌno. Umi sane M.D. Maganu, rosaancho Filiphoosi silxaane noosiha mitto Itophiyu mancho faana gane iillanno gedenna kuni manchi nabbawanni noota Qullaawu Maxaafi masaalo tiro kulannosi gede soyino. (Looso 8:26-39) Wole woteno, Maganu hawaariya Pheexiroosi, ganye huuccatto assiꞌrannohunna Magano magansiꞌrate woꞌnaalannohu Qornelewoosi yinannihu Roomu wottaaddari roorrichi mine mare coyishiishanno gede marraino. (Looso 10:1-48) Qoleno Maganu hawaariya Phaawuloosinna ledosi soqqantannore, Filiphoosi katami qaccera noo laga martanno gede marrainonsa. Insa hakkiicho, “Magano magansidhannote” Liidiya yinanni manchonni xaaddu; ise “yinannire wodanchatenni macciishshitanno gede Yihowa wodanase halashshe fanise.”—Looso 16:9-15.
Yihowa iso hasidhanni noori kuri mannooti iso affanno faro afidhanno gede assino. Xaa yannara Qullaawu Maxaafi Maganu daafira mayyaannoro minunni mine hadhe hattono gudumaaleho mannaho kultanni noori ayeooti? Tenne xaꞌmora duuchu manni, “Yihowa Farciꞌraasineeti” yee qolannoti egennantinote. Ateneeto togo yite xaꞌmi: ‘Maganu isi ledo fiixoomeemmo gede aneno insa widoonni woshshanni nooekka?’ Maganu isiwa qole goshooshannohetera maahoyye yaatto gede kaaꞌlahera iso huucciꞌri.a
a Ledde afate, www.jw.org/sid aana noota Qullaawa Maxaafa Xiinxalla Hasiissannohu Mayiraati? yitanno viidiyo lai.