AANIIDI QOOLIHA COYI UMO | MAGANU LEDO JAALOOꞌMA DANDAATTO
Tenne Roortino Heeshsho Dino
Maganu ledo jaalooꞌmate maa assa dandaatto? Maganu ledo muli jaalooma kalaqiꞌrate aante aantete assa dandaattoha sase coye laꞌnoommo. Insano:
Yihowa yinanniha Maganu suꞌma afanna suꞌmasi woshsha
Huuccatto assiꞌnenna Qaalesi Qullaawa Maxaafa xiinxalline isi ledo ganyine hasaawa
Duuchanka wote Yihowa hagiirsiisannore assate sharrama
Maganu ledo jaalooꞌmate suꞌmasi woshshi, iso huucciꞌri, Qaalesi xiinxalli hattono hagiirsiisannosire assi
Tenne coyibba hedatto wote, Maganu ledo jaalooꞌmate hasiisannore assitanni noottoha lawannohe? Woyyeessiꞌra hasiissannoe yite hedoottori no? Konne assa shota ikkitinokkiti egennantinote; ikkirono afiꞌratto atoote hedi.
Yunayitidi Isteetete heedhannoti Jeniferi togo yitino: “Maganu ledo muli jaalooma kalaqiꞌrate aye geeshshano sharrammiro digaabbisanno. Kuni jaaloomi lowo atoote abbanno: Magano albinni roore addaxxineemmo, akattasi roore huwanteemmo, roorenka kayinni iso albinni roore banxeemmo. Tenne roortino heeshsho dino!”
Maganu ledo muli jaalooma kalaqidhe hagiidha hasiꞌrattoha ikkiro, Yihowa Farciꞌraasine kaaꞌlitannohe. Insa Qullaawa Maxaafa woxe kaffaꞌlittokki xiinxallissannohe. Qolteno, insa gamba yite Qullaawa Maxaafa rossannowa qooxeessikkira noota Mangistete Addaraashe haꞌra dandaatto; hakkiicho Maganu ledo noonsa jaalooma kaffi asse laꞌꞌanno manninni xaadatto.a Tenne assattoha ikkiro, hunda faarsaanchu yiihu gede atino, “Anera kayinni Maganunniwa shiqa woyyitannoe” yaakki digattanno.—Faarso 73:28.
a Qullaawa Maxaafa xiinxallinsannihe gede xaꞌmiꞌrate woy qooxeessikkira noota Mangistete Addaraashe afate, tenne metseete uyinohe mancho xaꞌmi, woy www.jw.org/sid yinanni Webisayitenke fante, kaimu qoolira NINKE LEDO XAADATE yaannohu hunda lai.