AANIIDI QOOLIHA COYI UMO | ISI ADDINTA SHEEXAANU NO?
Isi Addinta Sheexaanu No?
Maaeelinoha busha sokkaasincho Sheexaane leellishshannota Ispeenete, Maadiriidi noo hawulte
“Anje amaꞌyara hajajama giweemmo wote ise, ‘Sheexaanu adhahera daanni no!’ yitannoe. Ani qole, ‘Dawona! Waajjeemmoha lawisi?’ yeemmo. Maganu noota ammaneemmoha ikkirono, Sheexaanu no yee kayinni diammaneemmo.”—ROHELIYO, ELSALVADOORE.
Roheliyo yiinorira sumuu yaatto? Aante noo assaawe giddo gara labbannoheti hiitteeti?
Sheexaaneho yinanniri dino; Sheexaaneho yaa busha akataati.
Sheexaanu heeꞌrate wote no, kayinni hakkeeshsha mannu hajo giddora dieanno.
Sheexaanu wolqaataamo ayyaanu kalaqootinna manna bunshete widira xixxiiwannoho.
Tenne mitte mittenta assaawe garaho yee ammanannohu lowo miliyoone ikkanno manni no. Ikkina kuri giddo gara ikkitinoti hiitteetiro afa hakkeeshshi geeshsha hasiissannote? Ee, Sheexaanu nookkiha ikkiro, Sheexaanu no yee ammananno manni soꞌrino yaate. Sheexaanu nooha ikkiro kayinni mannu hajo giddora eannokkiha ikkiro, lowo manni qorophannohunna Sheexaane waajjannohu mulla beebbaati yaate. Sheexaanu soꞌrisiisannohanna xagaraamo ikkiro kayinni, isi lowo manni hedannohunni roore bushaho yaate.
Hanni aante noo xaꞌmuwara Qullaawu Maxaafi qolanno dawaro laꞌno: Sheexaaneho yaa maati woy ayeti? Mulla busha akataatinso ayyaanu kalaqooti? Sheexaanu nooha ikkiro ate gawajjara dandaanno? Hatto ikkiro, ateneeto agadha dandaattohu hiittoonniiti?