Sheexaaneho Yaa Busha Akataati?

Qullaawu Maxaafi giddo kulloonni Sheexaani, busha hedooti yee ammana shota ikkitara dandiitanno. Ikkina Qullaawu Maxaafi addinta hatto yee rosiisanno? Hatto ikkiro, Qullaawu Maxaafi Sheexaanu Yesuusi Kiristoosinna Duuchanka Dandaanno Magani ledo hasaawinota kulannohu mayiraati? Hanni tenne kulannoha lame lawishsha laꞌno.

SHEEXAANU YESUUSI LEDO HASAAWINO

Yesuusi uullate aana soqqansho hanafi yannara Daawuloosi sase hige fatanasira woꞌnaalino. Umihunni, Sheexaanu Yesuusi Maganu uyinosi wolqa umisi hasatto wonshiꞌrate yaano, hudesi hooꞌlate horoonsiꞌranno gede assate woꞌnaalino. Hakkiinnino Daawuloosi, Yesuusi mannaho leellamate yee umisira qarra abbannore assanno gede xixxiiwate woꞌnaalino. Jeefoteno, Yesuusi mitte hige calla magansiꞌrisiro alamete mangistubba baalanta aannosita coyiꞌrino. Yesuusi kayinni sasenka fatana qeele saino. Isi sasunku fatanira Qullaawa Borro giddonni qummi assanni dawaro qolino.—Maatewoosi 4:1-11; Luq. 4:1-13.

Yesuusi hasaawinohu aye ledooti? Bushu akatisi ledooti? Qullaawu Maxaafi, “Yesuusi ninkente gede duuchunku coyinni fatanaminoha ikkirono, cubbo diloosino” yaanno. (Ibiraawuyaani 4:15) Qoleno Qullaawu Maxaafi togo yaanno: “Isi cubbo diloosino, afiisinnino dogate qaali difulino.” (1 Pheexiroosi 2:22) Yesuusi guuta ikke heeꞌrino; hattono keeraanchimmate doogonni difulino. Isi busha hedo giddosi kalaqantara horo diwodhino. Konni daafira, Yesuusi hasaawinohu bushu akatisi ledo ikkikkinni Sheexaanu ledooti.

Kuni hasaawi, Sheexaanu addinta nooha ikkinota leellishshannota wole tajeno amadino.

• Daawuloosi, Yesuusi mitte hige calla magansiꞌrisiro, alamete mangistubba baalanta aannosita coyiꞌrinota qaagi. (Maatewoosi 4:8, 9) Sheexaanu nookkiha ikkiro tini yaatto waaga diafidhino. Qoleno Yesuusi, Sheexaane ‘Hakkeeshshi silxaane mama afiꞌritto?’ diyiino.

• Yesuusi fatana qeeli gedensaanni, Daawuloosi “wole injiitanno yanna afiꞌra geeshsha isiwiinni agure haꞌrino.” (Luqaasi 4:13) Tini ikkito Sheexaanu busha akata ikkikkinni, hexxo mudhannokki baarigaara ikkinota leellishshannota diꞌꞌikkitino?

• “Sokkaano dagge Yesuusira soqqama jammartu” yinoonnita qaagi. (Maatewoosi 4:11) Kuri sokkaano Yesuusa jawaachishatenna kaaꞌlate dagginoreeti ayyaanu kalaqooti. Ikkina Sheexaanuno umosi dandiinoha ayyaanu kalaqo ikkinota ammanneemmokki gede assannonkeri mayi no?

SHEEXAANU MAGANU LEDO HASAAWINO

Layinki lawishshi, Magano waajjanno manchire Iyyoobire kultanno xaggeeti. Tini xagge Maganunna Sheexaanu hasaabbinota lame yanna kultanno. Lamente yannara Maganu, Iyyoobi ammanaminoha ikkino daafira naadinosi. Sheexaanu, Iyyoobi Maganoho soqqamannohu umisi xiqimera calla ikkinotanna Maganu jiro uyinosi daafira ikkinota coyiꞌrino. Togo yaasi, Iyyoobi daafira Magano roore afoommohu aneeti yiinohu gedeeti. Yihowa Sheexaanu Iyyoobi jironna oososi galaaffatara, hakkiino sae fayyimmasi gawajjara fajjino.a Yannate gedensaanni Yihowa Iyyoobi daafira yiinori gara ikkinotinna Sheexaanu yiinori kayinni kapho ikkinoti leeltino. Iyyoobi ammanaminoha ikkino daafira Maganu maassiꞌrinosi.—Iyyoobi 1:6-12; 2:1-7.

Konni hasaawi yannara, Maganu bushu akatisi ledo hasaawanni no yaateni? Qullaawu Maxaafi, “Halaalaanchu Magani doogo guutate” yaanno. (2 Saamueeli 22:31) Qoleno Maganu Qaali, “Duuchanka Dandaanno Magani Yihowa qullaawa, qullaawa, qullaawaho” yaanno. (Ajuuja 4:8) Qullaawaho yaa xalala, keeraanchonna cubbu nookkiho yaate. Yihowa guutahonna xeꞌne nookkiho. Busha hedonna akatta horonta heedhasira didandiitanno.

Kayinni mitu manni, Iyyoobi yinanni manchi heeꞌre diegennino, hakko daafira tini xagge lawishshaholla yaanno. Ikkina hatto yaa garaho? Wole Qullaawu Maxaafi xiqisubba, Iyyoobi uullate aana heeꞌrino mancho ikkinota kultanno. Lawishshaho Yaaqoobi 5:7-11 aana, Kiristaanu qarra dandee saꞌꞌanno gede jawaachishatenna Yihowa togooha kaajje uurranno manna maassiꞌrannota qaagiissate Iyyoobi lawishsha assine kulloonni. Iyyoobi heeꞌre egenninokki mancho ikkironna Sheexaanu abbinosi qarri kalanqe coyiꞌnoonnire ikkiro, iso lawishsha asse kula mayi waaga afidhino? Hakkiinni saeno, Hiziqeeli 14:14, 20 aana kulloonniri sasu keeraano manni giddo mittu Iyyoobiiti; iso Nohinna Daanieeli ledo qummi assinoonni. Nohinna Daanieeli gede, Iyyoobino heeshshote heeꞌrinoho lowo ammana noosi manchooti. Ikkina Iyyoobi heeshshote heeꞌrino mancho ikkiro, isira qarra naqinohu Sheexaanuno nooho yee ammana gara diꞌꞌikkitino?

Ee, Qullaawu Maxaafi Sheexaanu addinta nooha ayyaanu kalaqo ikkinota xawise kulanno. ‘Ikkina, xaa yannara Sheexaanu anenna maateꞌya gawajjara dandaanno?’ yite hedattoha ikkara dandaanno.

SHEEXAANU YANNANKERA MANNA GAWAJJANNO?

Hanni jaddo loosannohu lowo manni hedeweelcho heeꞌratto qooxeessa dayinohu gede assite hedi. Qooxeessu heeꞌrate waajjishannoha ikkannotinna amanyootu baꞌꞌannoti dihuluullissannote. Hanni tenne labbannota wole ikkito laꞌno: Sheexaanunna isinte gede Maganoho finqilte agaaninte ikkitino sokkaano woy ayyaanu kalaqo hedeweelcho uullara tugantino. Tini uullate aana maa abbituyya? Hanni qooxeessikkira ikko alamete deerrinni ikkanni noore zeenaho kullanna ati umikki macciishshattore hedi.

• Alamete deerrinni hoolate sharrammanni heeꞌneennanni finqillenna bunshe yannate kiiro lexxitanni hadhinota huwatootto?

• Lowo annuwanna amuuwa yaachishannoha ikkirono, boohaarshu giddo agaanintete ledo xaado afiꞌrino coyi lexxanni haꞌrinota buuxootto?

• Gargarate sharrammanni heeꞌneennanni qooxeessu albinni roore daafamanni haꞌranni noota laootto?

• Dagooma woꞌmanka baote widira qolte xixxiibbanni noo wolqa noohu gede ikke macciishshame diegenninohe?

Qullaawu Maxaafi yannankera noo qarrira kaima ikkinohu ayeti yaannoro wodanchi: “Bayiru dhudhuufi yaano, alame woꞌma soꞌrisiisanni noohu Daawuloosinna Sheexaane yinannihu hundi hamashshi worora tugami, isi uullara tugami; sokkaanosino isi ledo tugantino. . . . Uullatenna baaraho bayisibao; korkaatuno Daawuloosi shiima yanna calla gattinosita afino daafira, bayiru hanqinni kiꞌnewa dirrino.” (Ajuuja 12:9, 12) Lowo manni tenne taje xiinxalli gedensaanni, alamete aana manna bunshete widira qole xixxiiwanni noohu Sheexaane ikkinotanna isi busha ayyaanu kalaqo ikkinota huwatino.

‘Agarooshshe afiꞌra dandiinannihu hiittoonniitiyya?’ yite hedattoha ikkara dandaanno. Hatto yite hedakki garaho. Aane noo birxichi tennera kaaꞌlitannota mite assaawe kulanno.