Ayyaanaamittete Coyibba Hiincaꞌne Agurtinoonte

1, 2. Mannu ooso surre baxxitinota ikkitinohu hiitte doogganniiti?

AFUU woy qaalu mannu ooso nabbawa, borreessa, coyiꞌra, coyiꞌnoonnire huwata, huuccatto assiꞌranna Yihowara galatu faarso faarsa dandiitanno gede kaaꞌlannonsa. Kuri baalunkuri maalaꞌlinannireeti; surrenke konne baala assitannohu hiittoonniitiro sayinsete fullahaano xaa geeshsha affe diguddino. Surrenke baxxitinota ikkitino daafira, afoo rosa dandiineemmo. Mittu afuu xiinxallo fullahaanchi, “[Mannu ooso] baxxitinore assitanno coyibba giddo mitte, qaaqquulleho noote afoo rosate dandooti” yiino.

² Mannu oosoti afoo rosate dandoo, Maganu uyinonkete maalalete eltooti. (Far. 139:14; Aju. 4:11) Maganu kalaqinonke surre baxxitinota assannohu wolu coyino no. Mannu ooso “Maganu daninni” kalaqantino; konni garinni saadatewiinni baxxitanno. Insara doodhate dandoo noonsa; konni daafira afoo coyiꞌrate dandoonsa Magano ayirrisate horoonsiꞌra doodha dandiitanno.—Kal. 1:27.

3. Hayyo heedhannonke gede Yihowa hiittee elto uyinonke?

³ Maganu, isira ayirrinye aa hasidhannorira baalaho kaajja elto ikkinoha Qullaawa Maxaafa uyino. Qullaawu Maxaafi woꞌmu woy gamu 2,800 saꞌꞌanno afiinni qixxaawino. Qullaawa Borro xiinxallatto wote, Maganu hedo surrekkira woꞌmitanno gede assidhanni nootto. (Far. 40:5; 92:5; 139:17) Konni garinni “gato afiꞌratto gede assitannohe hayyo heedhannohe gede kaaꞌlitannohe” coyibba hiinca dandaatto.—2 Xim. 3:14, 15; 2 Ximootewosi 3:16, 17 nabbawi.a

4. Hiincate yaa mayyaate? Aanchine hiittee xaꞌmuwara dawaro afiꞌneemmo?

⁴ Hiincate yaa surrenke mittu coyi aana illachishshanno gede assiꞌne hakkoye coye heeshshi gotti assine hedate; hakku coyi busha woy dancha ikkara dandaanno. (Far. 77:12; Law. 24:1, 2) Aye coyinni roorsine hiinca hasiissannonkehu Maganu Yihowanna Beettisi Yesuusi Kiristoosi daafiraati. (Yoh. 17:3) Ikkollana aante noo xaꞌmuwa hendammora dandiineemmo: Nabbawatenna hiincate mereero mayi xadooshshi no? Hiittee coyibba hiinca dandiineemmo? Ganyine hagiirsiisanno garinni hiinca dandiineemmohu hiittoonniiti?

XIINXALLOꞌNE HORO UYITANNOTA ASSIDHE

5, 6. Nabbawatto yannara nabbawoottore huwatanna qaaga dandaatto gede mayi kaaꞌlahera dandaanno?

⁵ Surrenke maalaꞌlinanni coyibba assitara dandiitanno; isinni mito coye assitannohu ninke hendummokkinniiti. Lawishshaho, foola, qaafa, biskilliite kada, woy kompiyuterete aana borreessa heddanni qarramittokki assattore ikkara dandaanno. Nabbambeemmo yannarano hatto assineemmo woti heeꞌrara dandaanno. Hakko daafira, nabbambanni heeꞌnoommo coyi mayi tiro afiꞌrinoro heda hasiissannonke. Mitte borro nabbawatto yannara, mitte gufo gudittohu gedensaanni woy haaro cinaancho birxicho hanafattora albaanni, nabbabbe kaoottore garunni huwatoottotta buuxate taxxi yite heda dandaatto. Hedo billaallisannori woy hedo gamba assiꞌra hooga surrekki mittu coyi aana illachisha hoogganno gede assitara dandiitanno; tini qolte nabbawatto coyinni horo afiꞌrattokki gede assitannohe. Kuni ikkannota hooꞌla dandaattohu ma garinniiti?

⁶ Xiinxallote yannara qoonqo naggi assine nabbawa ganaanni qaaga shota ikkitanno gede assitannota sayinsete xiinxallo leellishshanno. Surrenke Kalaqaanchi tenne afino. Isi Iyyaasu Higgete maxaafa “suutunni” nabbawanno gede kulinosihu iseraati. (Iyyaasu 1:8 nabbawi.b) Qullaawa Maxaafa huuronke macciishshantanno gede assine suutunni nabbawanke nabbamboommore qaagate kaaꞌlitannonke. Qoleno hedonke billaallitannota hooltara dandiitanno.

7. Maganu Qaale hiincate roore injiitanno yanna hiitteeti? (Umi misile lai.)

⁷ Nabbawate lowo geeshsha sharrama hasiisa hooggara dandiitanno; hiincate kayinni hedo gamba assiꞌra woy mittu coyi aana illachisha hasiissanno. Guuta ikkitinokkiti mannu surre hakkeeshshi geeshsha assaawa hasiissannokki coyiwa higganni qarrissannohu iseraati. Hakko daafira, hiincate kaaꞌlitannoti roore injiitanno yanna fooliishshiꞌrootto wotitenna hedo billaallisannori batiꞌrinokki qooxeessira nootto wotite. Faarsaanchoho hiincate injiitinositi hashsha goxinowiinni baqqi yaanno yannaati. (Far. 63:6) Guuta surre noosihu Yesuusi qaxaqaꞌa yiino bayichi hiincatenna huuccatto assiꞌrate injaannota huwatino.—Luq. 6:12.

HIINCINEEMMOTA DANCHA COYIBBA

8. (a) Maganu Qaaleno agurranna, maa hiinca dandiineemmo? (b) Yihowara isi daafira hasaambeemmo wote mayi macciishshamannosi?

⁸ Qullaawu Maxaafi giddo nabbawootto coye heeshshi gotti assite heda, hiinca dandaatto doogga giddo mittete; kayinni hiinca dandaattoti wole coyibbano no. Lawishshaho, dhagge ikkitanno kalaqo laꞌꞌatto yannara taxxi yite hedi. Hatto assakki, Yihowa danchummasira guwisiꞌrattosi gedenna ledokki mannu heeꞌriro dhagge ikkinohere kulatto gede kakkayissahera dandiitanno. (Far. 104:24; Looso 14:17) Yihowa, konni garinni haja assine hende huuccattotenni iso galanteemmotanna woleho isire hasaambeemmota naadanno? Muxxe ikkino Qaalisi tennera dawaro ikkannore coyiꞌranno. Togo yee buuxisannonke: “Hatte yannara Yihowa waajjitannori insa insaneewa mittu mittunku ledosi noohu ledo hasaabbu; Yihowano macca wore macciishshi. Qoleno Yihowa waajjitannoriranna suꞌmisi daafira hiincitannorira qaagooshshu maxaafi albasiinni borreessami.”—Mil. 3:16.

9. (a) Phaawuloosi Ximootewosi maa hiincanno gede amaalinosi? (b) Soqqanshote qixxaambeemmo wote, Phaawuloosi uyino amaale harunsa dandiineemmohu hiittoonniiti?

⁹ Hawaariya Phaawuloosi Ximootewosi coyiꞌranno coye, amanyootesinna rosiisanno roso “hiincanno” gede amaalinosi. (1 Ximootewosi 4:12, 15, 16 nabbawi;c 1 Xim. 4:13, 14) Ximootewosinte gede, ninkerano hiincineemmoti batinye ayyaanaamittete coyibba noonke. Lawishshaho, Qullaawa Maxaafa mannaho xiinxallisate qixxaambeemmo wote hiinca hasiissannonke. Xiinxallinseemmoha mitto mittonka mancho hendanni, ayyaanaamittetenni lophanno gede kaaꞌlate, wodanisi hedo fushshe coyiꞌranno gede assitanno xaꞌmo woy lawishsha heda dandiineemmo. Konni garinni hiincanke, uminke ammana jawaattanno gedenna Qullaawa Maxaafa mannaho kaajja gede assinenna albinni roore iibbado giddonni rosiinseemmo gede kaaꞌlitannonke. Qanchu soqqanshora wodananke qixxeessineemmo woteno konne assa dandiineemmo. (Izira 7:10 nabbawi.d) Qullaawu Maxaafi giddonni Hawaariyaatete Loosi maxaafita mitte fooliishsho nabbawanke soqqanshote ‘diinaggaambeemmo’ gede assitannonke. Hakko barra soqqanshote horoonsiꞌra hasiꞌnoommoha Qullaawu Maxaafi qummeeshshanna elate hendoommo borro hiincanke soqqanshote baasa kaaꞌlitannonke. (2 Xim. 1:6) Soqqanshote qoqqowiꞌne giddo heeꞌranno manni daafiranna hasattonsa kakkayisara dandaanno coye hiinci. Konni garinni qixxaawanke, Qullaawa Maxaafa horoonsiꞌne “Maganu ayyaananna wolqa leellishanno” garinni farciꞌneemmo gede kakkayissannonke.—1 Qor. 2:4.

10. Hiinca dandiineemmoti wole dancha coyibba hiikkuriiti?

¹⁰ Baalunku mannira shiqqanno lallawo yannara, hattono woradunna qoqqowu gambooshshi yannara qara qara hedo saꞌe saꞌe borreessiꞌratto? Hattee qaagiishshuwa haaro ikkite laꞌanni Maganu Qaalinninna dirijjitesiwiinni rosoottore hedakki hiincate kaaꞌlitannote dancha farooti. Qoleno, aganu aganunku fultannoti Agarooshshu Shaenna Baqqi Yiiyye! yinanni metseetta hattono qoqqowu gambooshshiwa fultannoti haaro borro nabbambeemmohanna hiincineemmoha haarote fulino roso amaddanno. Diru Maxaafa nabbawatto wote, mitto woꞌnaalsha gudde woleho saꞌꞌattora albaanni taxxi yite hedakki kaaꞌlitannohe. Hatto assakki nabbawootto coye hiincatenna woꞌnaalshu wodanakki kakkayisanno gede faro fantannohe. Nabbawatto yannara, manna galagalte marte hasaawisatto wotira, Maganu hoshsha towaatatto wotira, woy lallawote kaaꞌlitannoheta qara hedo malaatisiꞌra woy borrote aana qaccete borreessiꞌra dandaatto. Roorenkanni kayinni, Qullaawa Borro aana xintantino borro nabbawatto wote taxxi yite hiincakki nabbawoottori wodanikkira qaꞌmanno gedenna rossanni noottohu danchu rosira huuccattotenni Yihowa galatate faro fantannohe.

BARRU BAALA MAGANU QAALE HIINCI

11. Hiinca hasiissannonketi qara borro hiitteeti? Mayira? (Lekkaalliidi qaagiishshano lai.)

¹¹ Hiinca hasiissannonketi qara borro ayyaanunni borreessaminoho Maganu Qaaleeti. Hanni Qullaawa Maxaafakki haaꞌne hoolloonnihehu gede assite hedi.e Wodanikkira wodhootto coye, lawishshaho baxatto qummeeshshuwanna Mangistete faarsonke hiincattota kayinni ayino hoolahera didandaanno. (Looso 16:25) Maganu ayyaani alba rosoottoha dancha coye qaagatto gede kaaꞌlahera dandaanno.—Yoh. 14:26.

12. Qullaawa Maxaafa ma garinni nabbawate pirogiraame fushshiꞌra dandiineemmo?

¹² Lamalate giddo gama barra Tiokiraasennihu Soqqanshote Rosi Minira nabbambannita Qullaawu Maxaafi niwaawe nabbawatenna hiincate gaaꞌma dandiineemmo. Wole barra kayinni Yesuusi coyiꞌrinorenna assinore hiincate gaaꞌma dandiineemmo. Lowo geeshsha egennantinote Qullaawu Maxaafi maxaaffa giddo mitte Yesuusi heeshshorenna soqqanshore kultanno Wongeeluwa ikkitinoti egennantinote. (Rom. 10:17; Ibi. 12:2; 1 Phe. 2:21) Maganu manni Yesuusi uullate aana heeꞌre assinorenna heeꞌrino yanna aante aantesenni kultannota kaajja borro afiꞌrino. Hakko iso hatte borro giddo mitte mittente fooliishshora noota fiixoontanno xagge kultanno qummeeshshuwa seekkine nabbambe hiincineemmoha ikkiro lowore kaaꞌlitannonke.—Yoh. 14:6.

HIINCA LOWO GEESHSHA HASIISSANNOTA IKKITINOHU MAYIRAATI?

13, 14. Ayyaanaamittete coye hiinca agura hasiissannonkekkihu mayiraati? Tini ma assineemmo gede kakkayissannonke?

¹³ Ayyaanaamittete coyibba hiinca mittu manchi gikki yiino Kiristaancho ikkanno gede kaaꞌlitannosi. (Ibi. 5:14; 6:1) Yihowanna Yesuusi daafira hakkeeshshi geeshsha hiincannokki manchi ammanatenni kaajje uurre diafanno. Togoo manchi halaaluwiinni sunu sununni xeertiꞌrara woy lekka badhera qolara dandaanno. (Ibi. 2:1; 3:12) Yesuusi, Maganu Qaale “kaajjunna danchu wodaninni” macciishshineemmokkiha woy adhineemmokkiha ikkiro, ‘giddonke keeshshannokkita’ coyiꞌrino. Hatto ikkiro, “yaachishanno coyi, jironna maalaamittete hagiirri” ‘hedonke billaallitanno gede asseenna guma laalleemmokkire ikkineemmo.’—Luq. 8:14, 15.

¹⁴ Hakko daafira, Maganu Qaale hiincanke agurroonke. Hatto assanke, Qullaawu Maxaafi giddo kulloonniha Yihowa ayirrinye, akattasinna ayimmasi heeshshonkenni leellinsheemmo gede kaaꞌlitannonke. (2 Qor. 3:18) Kawiinni saꞌne hasiꞌneemmori mayi no? Magano anfanni haꞌranna ayirrinyesi heeshshonkenni leellisha kaajja qoossooti; qoleno hegere geeshsha isire rosanna isi faale haꞌra dandiineemmo.—Mek. 3:11.

15, 16. (a) Ayyaanaamittete coye hiincanke kaaꞌlitannonkehu hiittoonniiti? (b) Hiinca mito wote qarra ikkitannonkehu mayiraati? Ikkirono agura hasiissannonkekkihu mayiraati?

¹⁵ Ayyaanaamittete coyibba hiinca agura hooganke, halaaleho noonke baxilli qiidannokki gede kaaꞌlitannonke. Konni garinni, roduuwankenna qanchu soqqanshowa xaandeemmoha hasatto noonsa manna kiꞌneemmore ikkineemmo. Maganu uyinonkete bayira eltore yaano Yesuusite wodote kakkalo daafira hiincanke Qullaawu Anninke Yihowa ledo noonkeha muli jaalooma kaffi assine laꞌneemmo gede kaaꞌlitannonke. (Rom. 3:24; Yaq. 4:8) Poletiku hajora anga wodha giwinohura sase diro usurame fulinohu Wodiidi Afirikira heeꞌrannohu Maarki togo yiino: “Hiinca danchawa maꞌlate gedeeti. Ayyaanaamittete coyibba hiincinummo kiiro, Maganinke Yihowa daafira haarore anfeemmo. Sae sae hexxo mudheemmo wote woy albillittete yanna daafira yaadeemmo wote, Qullaawa Maxaafa haare mitto gafa nabbawe hiinceemmo. Tini qolte wodanaaꞌmeemmo gede kaaꞌlitannoe.”

¹⁶ Heeꞌnoommo alame hedo billaallisannori woꞌminota ikkitinohura, mito wote ayyaanaamittete coyibba hiinca qarra ikkitannonke. Paatiriki yinannihu Afirikaho heeꞌrannohu wolu ammanamino rodii togo yee noore coyiꞌrino: “Surreꞌya, hasiissannotinna hasiissannokki sokka woꞌmitinote poostu saaxine gedeeti; hakko daafira hasiissannotanna teꞌee barru baala fila hasiissanno. Surreꞌya giddo noore haseemmo yannara, duucha wote ‘yaachishannori’ giddoꞌya noota huwateemmo daafira keeraancho surrenni hiinca dandeemmo gede Yihowa huucciꞌra hasiissannoe. Ayyaanaamittete coye hiinca hanafammora albaanni konne assate yanna hasiissannoeha ikkirono, tenne assaꞌya Yihowawa roore shiqeemmo gede assitinoe. Tini qolte halaale albinni roore huwatate surreꞌya faꞌnantanno gede assitannoe.” (Far. 94:19) Ee, ‘Qullaawa Borro barru baala xiinxallitannorinna’ rossino coye hiincitannori atoote afidhanno.—Looso 17:11.

HIINCATE YANNA AFIꞌRATTOHU HIITTOONNIITI?

17. Hiincate yanna afiꞌrattohu hiittoonniiti?

¹⁷ Mitu roduuwi nabbabbannohu, hiincitannohu hattono huuccatto assidhannohu soodo gutte kaꞌeeti. Mitootu kayinni konne assitannohu barra sagalete yannaraati. Atera kayinni hawarro woy goxattora albaanni injaannoheha ikkara dandaanno. Mitootu Qullaawa Maxaafa soodono hashsha goxxara albaannino nabbawa baxxanno. Nabbambeemmo yanna ikkitutano ikkituro, “barranna hashsha” yaano ganyine nabbawa hasiissannonke. (Iya. 1:8) Qaru coyi, hakkeeshshi geeshsha hasiissannokki coyibba agurre Maganu Qaale barru tuqa hiincate yanna gaaꞌmate.—Efe. 5:15, 16.

18. Qullaawu Maxaafi, barru baala Maganu Qaale hiincitannorinna rossinore loosunni leellishshannori daafira mayyaanno?

¹⁸ Yihowa Qaalesi hiincitannorenna rossinore loosunni leellishate sharrantannore maassiꞌrannota Qullaawu Maxaafi kulanno. (Far. 1:1; Faarso 1:2, 3 nabbawi.f) Yesuusi, “Hagiirraammu Maganu qaale macciishshite harunsitannoreeti!” yiino. (Luq. 11:28) Roorenka kayinni, barru baala ayyaanaamittete coyibba hiincanke dhagge ikkitanno surrenke kalaqino Magani ayirranno gede assate kaaꞌlitannonke; isi qole xaa yannara hagiirraamma ikkineemmo gedenna isi abbannote xalala haaro alamera hegere heeshsho afiꞌneemmo gede asse kiisannonke.—Yaq. 1:25; Aju. 1:3.