Kiristaanu Mittimmanke Kaajjitanno Gede Kaaꞌla Dandaattohu Hiittoonniiti?

1. Hundinni kayise Maganu looso loosate kaaꞌlino akati hiikkonneeti?

MITTIMMA hanaffinohu kalaqate loosi hanafi yannaraati. Hayyotenni lawinsoonnihu Maganunnihu umi kalaqo ikkinohu Yesuusi togo yiino: ‘Hakkawaro ani [Yihowa] ledo qara loosaasincho ikke noommo. Barru barrunku iso tashshi asseemmosi.’ (Law. 8:30) Annunna Beettu buusante loosse yannankera laꞌneemmoha babbaxxinoha heeshsho afiꞌrino kalaqama kalaqqino. Yannate gedensaannino Maganu soqqamaano isi looso buusante loossino. Nohi diro isinna minisi manni mitteenni markaawe loosino; Maganu manni halalla haꞌri wote xaadooshshu dunkaana qasanno, kayise hoolannonna mittu bayichinni wole bayicho haaꞌre haꞌranno yannara sumuu yee loosanno; hattono Yihowa beetemeqidese giddo iso muuziiqunni mitteenni guwisanno. Konne baala assate kaaꞌlama lowo geeshsha hasiissino.—Kal. 6:14-16, 22; Zeh. 4:4-32; 1 Zee. 25:1-8.

2. (a) Umi xibbi diro heeꞌrino Kiristaana lainohunni dhagge ikkannonkeri maati? (b) Konninni aanchine hiittee xaꞌmuwa laꞌneemmo?

² Umi xibbi diro heeꞌrino Kiristaanino mitteenni buusame loosino. Hawaariya Phaawuloosi mittu mittunku buuramino Kiristaanira “babbaxxino aamamooshshi” noosiha, “babbaxxitino soqqansho” soqqamannohanna “babbaxxino looso” loosannoha ikkirono baalunku “mitto biso” ikkinota xawisino. (1 Qorontoosi 12:4-6, 12 nabbawi.^[1]) Xaa yannarana? Dancha duduwo sumuu yine mitteenni duduwa dandiineemmohu hiittoonniiti? Maatetenna songote giddo buusamme loosa dandiineemmohu ma garinniiti?

SABBAKATE LOOSO BUUSANTINE LOOSSE

3. Hawaariya Yohaannisi mayi ajuuja laino?

³ Umi xibbi M.D. jeefo balla hawaariya Yohaannisi ajuujatenni lamala sokkaano xurumba ufuuffanna laino. Yohaannisi ontikki sokkaanchi xurumba ufuufi yannara iiminni uullara ubbino “beeddakko” laino. Tini “beeddakko” angasenni amadde noo fanaanchinni qilete xullicho fantu. Qilete giddonni wiliile fultu, hattono tenne wiliile giddonni kanchafaru fuli. Kuni lawishshu kanchafari muro ita agure “albinsara Maganu sumuda sumundoonnikki manna gawajjino.” (Aju. 9:1-4) Yohaannisi kanchafaru lowo geeshsha gawajjannoha ikkinota afino. Muse diro kanchafaru Gibitse baasa gawajjino. (Wol. 10:12-15) Yohaannisi ajuujatenni laihu lawishshu kanchafari Yihowata wolqaataame yoote sokka duduwannoha buuramino Kiristaana dancha gede asse xawisanno. Xaa yannara buuramino Kiristaani uullate aana heeꞌrate hexxo noonsahu lowo miliyoone manni ledo mitteenni buusame loosanni no. Buusamme loonseemmohu sabbakate loosi Sheexaaneho alamete doyichora noote kaphu ammaꞌno aana noosi silxaanera umo ganannoho!

4. Maganu manni hiikkonne looso loosa hasiissannonsa? Konne assa dandiitannohu maa assituro callaati?

⁴ Yihowa manni tenne alame goofimarchi daara albaanni alamete woꞌmate “dancha duduwo” duduwannita kaajja qoosso afiꞌrino. (Mat. 24:14; 28:19, 20) Tenne qoosso giddo mitte “gooꞌrinohu baalu” “heeshshote waa mulla” aganno gede koyisate. (Aju. 22:17) Kiristaanu songo miilla ikkinoommohura konne looso loonse dancha guma afiꞌra dandiineemmohu hiittoonniiti? ‘Ninke ninkeneewa sumuu yine mitteenni quraanyammummoro’ callaati.—Efe. 4:16.

5, 6. Dancha duduwo duduwanke mittimma noonketa leellishshannohu hiittoonniiti?

⁵ Dandaaminke deerrinni Maganu Mangisteha dancha duduwo batinyu mannira kulate, sabbakate looso qinaawino garinni loosa hasiissannonke. Konnira biddishsha uyinanninke. Alamete deerrinni songotenni afiꞌneemmo biddishshi tennera kaaꞌlannonkeho. Qanchu soqqansho gambooshshi gedensaanni Maganu Mangiste sokka mannaho duduwate fulleemmo. Afiinkenninna Qullaawu Maxaafi aana xintantinote lowo miliyoone ikkitanno borruwa widoonni tenne sokka dudumbeemmo. Baxxinohu sabbakate zamachi yannara uyinannihe biddishsha harunsate sharramatto? Hatto assattoha ikkiro, Ajuuja 14:6 aana kullihu ‘iimi mereero buuwanno sokkaanchinna’ Maganu Mangiste sokka duduwannohu lowo miliyoone manni ledo buusamatto.

⁶ Diru Maxaafi giddo sibikatu loosinke abbino guma nabbawa lowo geeshsha hagiirsiissanno! Qoqqowu, baxxinonna daga dagiyyote gambooshshira koyishshu woraqata iillinsheemmo yannarano mittimma noonketa leellinsheemmo. Konni gambooshshiwa jawaachishshannoti Qullaawa Borro aana xintantino lallawo, diraamunna loonse leellinshanni ikkito shiqqanno. Tini kifilla Maganoho woꞌma lubbonkenni soqqammeemmo gede jawaachishshannonkete. Yesuusi reyo qaagooshshi ayyaanino mittimma noonketa leellishannoho. Maganu eltora diniqo noonkehuranna Yesuusi hajajo ayirrinseemmohura, diru kiiro Niisaani 14nni arrishsho eꞌuhu gedensaanni konne ayyaana ayirrisate gamba yineemmo. (1 Qor. 11:23-26) Konne ayyaana ayirrisate daggannori Yihowa Farciꞌraasine calla diꞌꞌikkitino. Qaagooshshu Ayyaani hanafara shiima lamala gatte heedheenna, wolu mannino konne lowo geeshsha hasiisanno ayyaana ninke ledo ayirrisanno gede dandaamannoha ikkiro baalunku songonke qoqqowira koyishshu woraqata iillinsheemmo.

7. Mitteenni buusamme loosanke maaho kaaꞌlitanno?

⁷ Mittu kanchafarchi callichisi garire asse diafanno. Hatteente gede, ninke callootinke assineemmori gari guma abba hoogannoha ikkara dandaanno. Mitteenni buusamme sabbankeemmoha ikkiro kayinni, lowo miliyoone ikkanno manni guweenyunna ayirrinyu hasiisannosi Magani Yihowawa daanno gede assa dandiineemmo! Ikkollana, Maganu manni mereero noo mittimmara kaaꞌla dandiineemmohu sabbakate looso loonse calla diꞌꞌikkino.

SONGOTE GIDDO BUUSANTINE LOOSSE

8, 9. (a) Phaawuloosi Kiristaanu mitto ikke heeꞌranno gede rosiisate maa lawishsha asse horoonsiꞌrino? (b) Songote giddo buusamme loosa dandiineemmohu hiittoonniiti?

⁸ Phaawuloosi Efesooni noo Kiristaanira sokka borreessi yannara songo darajjaꞌꞌanna ‘baalunku coyinni lopha’ hasiissannota xawise kulino. (Efesooni 4:15, 16 nabbawi.^[2]) Tennera mayi kaaꞌlannonke? Phaawuloosi mannu biso lawishsha asse horoonsiꞌre Kiristaanu songora mittimma hasiissannota xawisino. Hawaariya Phaawuloosi buusame loosa “hasiisanno coye amaddinote mitte mittente mikita” gede ikkitinota coyiꞌrino. Ikkina baalinke yaano ajuno akkaluno, wolqa afiꞌrinohuno afiꞌrinokkihuno songote mittimmaranna ayyaanaamittera kaaꞌla dandiineemmohu hiittoonniiti?

⁹ Tenne assa dandiineemmoti qara doogo ninkeneeto shiqinsheetinna Yesuusi songote giddo biddishsha uyitara doorinore songote cimeeyye ayirrinseeti. (Ibi. 13:7, 17) Hige tenne assa aye woteno shotate yaa diꞌꞌikkino. Ikkirono, Maganu biddishsha aannonketa addaxxine iso huucciꞌra dandiineemmo. Maganu ayyaani songote cimeeyye uyitannonke biddishshira woꞌmu wodaninkenni hajajammeemmo gede kaaꞌlannonke. Uyinanninke biddishshira hajajama qarra ikkitannonkeha ikkiro, buusamme loosanke songote mittimmara kaaꞌlitanno gara huwatate sharrama hasiissannonke. Qoleno, songote giddo kaaꞌlamme loosanke mimmitinke ledo lubbora baxammeemmo gede kaaꞌlitannonke.

10. Songote soqqamaano songote mittimmara kaaꞌlitannohu hiittoonniiti? (Hanafote noo misile lai.)

¹⁰ Songote soqqamaano songote mittimmara kaaꞌlannoha kaajja looso loossanno. Kuri roduuwi, dirinsa ikki geeshshihano ikkiro uminsa horo agurte manna baala kaaꞌlanno looso loossanno. Lawishshaho insa soqqanshote ikkitanno borruwa nooronna teꞌee buuxxe songote cimeeyye kaaꞌlitanno. Qoleno, songote soqqamaano Mangistete Addaraashe fiinanninna gatamarranni gede assitanno; hattono gambooshshe daannoha haaro manna haadhanno. Kuri roduuwi ledo buusamme loonseemmoha ikkiro, songote mittimmara kaaꞌlineemmo.—Hawaariyaatete Looso 6:3-6 ledo heewisiisi.

11. Dirinsa shiima ikkino roduuwi songote mittimmara kaaꞌla dandiitannohu hiittoonniiti?

¹¹ Batinyu gikki yiino roduuwi lowo diro songonniha loosu qeecha duqqe keeshshino. Xa kayinni geedhitinohura bashshonsa gede ikkite soqqama hooggannoha ikkara dandaanno; hakko daafira mito coye biddi assa hasiissanno. Tennera dirunni insawiinni ajanno roduuwi kaaꞌlansara dandaanno. Gari woꞌnaalshi noonsakkiha ikkirono nafa, kuri roduuwi qajeelsininsaro alba loossanni noohano agurranna wole loosono loosa dandiitanno. Songote soqqamaano jawaatte loossannoha ikkiro albillitte songote cimeeyye ikkitara dandiitanno.(1 Xim. 3:1, 10) Mitu dirinsa shiima ikkino cimeeyye wole loosu qeechano afiꞌrate jawaatte loossanno; insa giddo xa mitootu woradu aliidi laꞌꞌaano ikkite batinye songora noo roduuwa kaaꞌlitanni no. Kuri roduuwi uminsa fajjonni roduuwa kaaꞌlitannohura galata dihasiissannonke?—Faarso 110:3;^[3] Mekibibi 12:1 nabbawi.^[4]

MINI GIDDO BUUSANTINE LOOSSE

12, 13. Mini giddo baalanti maatete miilla buusante loossanno gede mayi kaaꞌlannonsa?

¹² Hanni xa qole mini giddo buusamme loosate rosicho lossiꞌra dandiineemmo gara laꞌno. Batinyu roduuwi lamalate kiiro Maatete Magansiꞌra assiꞌra maatete mereero noo baxilli jawaata ikkanno gede assitannota huwatino. Maatete Magansiꞌra assiꞌneemmo yannara, ayyaanaamittete coyi aana illachinsheemmo; tini qolte maatete mittimmara baasa kaaꞌlitanno. Mini giddo qanchu soqqanshora rosiisiꞌra sabbakate looso danchu garinni loonseemmo gede kaaꞌlitannonke. Qoleno, baalunku maatete miilla Magano baxxannorenna isi fajjo assitannore ikkitinohura mimmitinsa ledo Maganu Qaali daafira hasaabbanno; tini qolte insa insanaawa albinni roore shiqqanno gede kaaꞌlitannonsa.

¹³ Minaanninna minaama buusame Yihowa guwisiꞌrate maa assa dandaanno? Lamunku mitteenni Yihowara soqqantanno yannara tashshi yaannonsa, hattono galtensa mittimma noota ikkitanno. Abirahaaminna Saara, Yisaaqinna Ribiqa, hattono Haannanna Hilqaana galtensa baxxannota leellishshino. Xaa yannara noo minaanninna minaamano hatto assa hasiissannonsa. (Kal. 26:8; 1 Sam. 1:5, 8; 1 Phe. 3: 5, 6) Tenne assansa galtensa mittimma noota ikkitannonna Yihowawa albinni roore shiqqanno gede kaaꞌlitannonsa.—Mekibibi 4:12 nabbawi.^[5]

14. Minaannikki woy minaamakki Yihowara soqqantanni nookkiha ikkiro galteꞌne kaajjite heedhanno gede maa assa dandaatto?

¹⁴ Kiristaanu ammantinokkiri ledo gara ikkitinokki doogonni quraanyama dihasiissannonsa. (2 Qor. 6:14) Ammaꞌnotenni bebbeehantino maate giddo heeꞌranno roduuwi maa assa hasiissannonsa? Xa Magano magansiꞌranni noo roduuwi giddo mitu halaale macciishshinohu adhamihu gedensaanniiti; konnira kuri roduuwi giddo galtensa Yihowa Farciꞌraasincho ikkitinokkiri no. Tenne yannarano, Qullaawu Maxaafita xintu seerubba harunsa maate sumuu yite heedhanno gede kaaꞌlitanno. Ammananke kisannokki garinni dandaaminke geeshsha kaaꞌlamate sharrama hasiissanno. Togo assa shota ikka hooggara dandiitanno; ikkirono gedensaanni afiꞌneemmohu danchu gumi noota hedi. Minaanninke woy minaamanke halaalu mininni fulanno yannara Qullaawu Maxaafita xintu seerubba harunsa qarra ikkitankera dandiitanno. Meeri yinanni rodoora togoori tuncu yiinose. Isenna minaannise Deevidi Yihowara soqqamanni keeshshino; ikkollana minaannise mito 25 diro gambooshshe haꞌra agurino. Meeri kayinni songote gambooshshenna jajjabba gambooshshe haꞌra diagurtino; hattono mini giddo Qullaawu Maxaafita xintu seerubba harunsate sharrantanno; qoleno lee oososera Yihoware rosiissanno. Oosose lophite mininni fulte hadhuta Meerira callimma macciishshantuse. Yannate gedensaanni, Deevidi ise mine worte hadhannosi metseetta nabbawa hanafi. Hakkiinni Deevidi gambooshshe haꞌra hanafi; gambooshshe haꞌranno wote lewu dirihu beettisi qaaqqi ofollanno bayicho amadannosi. Deevidi gambooshshe hosiro qaaqqu “Annaanna, techo gambooshshe daa hoogootto daafira tashshi diyiinoe” yaanno. Xa Deevidi Yihowara hagiirrunni soqqamanni no; Meerino minaannise ledo mitteenni soqqamasenni lowo geeshsha tashshi yiinose.

15. Adhantunku lowo diro ikkinonsari mule adhantinore kaaꞌla dandiitannohu hiittoonniiti?

¹⁵ Xaa yannara Sheexaanu maate bebbeehate qodhe kaino daafira baalanti Maganu soqqamaano galtensa ledo kaaꞌlama hasiissannonsa. Adhantininku saino diri ikki geeshshihano ikkiro, coyiꞌrattorinnino ikko assattorinni galtekki kaajjishiꞌra dandaatto gara hedi. Adhantunku lowo diro ikkinonsa roduuwi songonsa giddo mule adhantinore kaaꞌla dandiitanno. Lawishshaho, mule adhantinore kiꞌne ledo maatete magansiꞌra assidhanno gede koyisa dandiitinanni. Insa kiꞌne ledo yanna sayisanno wote adhamminku saino diri ikki geeshshiha ikkirono baxillunna sumuu yaa lowo geeshsha hasiissannota ikkitinota huwatanno.—Tit. 2:3-7.

“AMME YIHOWA ILAALA HAꞌNONA”

16, 17. Maganu soqqamaano maa agadhite no?

¹⁶ Hunda Isiraeele ayyaanu woggara Yerusaalamete noote Yihowa beetemeqidese giddo iso guwissanna leellohe. Insa doogote hasiisannonsare qixxeessidhannonna beetemeqidesete giddo magansiꞌrate gamba yitanno yannara kaaꞌlama hasiissinonsa. (Luq. 2:41-44) Ninkeno haaro alame eate qixxaambanni heeꞌnoommohura mimmitinke ledo sumuu yee heeꞌranna kaaꞌlame loosa hasiissannonke. Tenne assate agurrummokki sharrama hasiissanno. Ati tenne albinni roore assa hasiissannoheha lawannohe?

¹⁷ Hanni albillitte afiꞌneemmo atoote hedi! Xa nafa mittimmanna salaame noo heeshsho heeꞌnanni heeꞌnoommo. Yannankera Isayyaasinna Mikkiyaasi Maganu manni mitteenni gamba yee “Yihowa ilaala” haꞌrannota coyidhino masaalo woꞌmitanna laꞌnanni heeꞌnoommo. (Isa. 2:2-4; Mikkiyaasi 4:2 nabbawi;^[6] Mik. 4:3-4) Ee, konni ‘goofimarchu diri giddo’ magansiꞌranke luphi yite leeltanni no. Albillitte mannu baalu mitteenni sumuu yeenna kaaꞌlame heeꞌranno yannara heeꞌneemmo wote lowo geeshsha hagiidhineemmo!