Biꞌreera Molokosootu Xa Ayyaanaamittete Roduuwa Ikkino

Feliisa: Ilamoommahu ammaꞌnote baasa diinaggaabbanno maate giddooti. Isinni, fiixinke giddo 13 qeesootaho woy Kaatolikete ammaꞌno soqqamaano miillaati. Kaatolikete rosi mine rosinohunna qeesicha ikkinohu laꞌlamaꞌya beetti reyi yannara, isi qullaawa ikkinota kulinohu Phaaphaasichu Jooni Pooli Layinkiho. Mininke manni angiido shiimaho. Anniꞌya siwiila tumannoho, amaꞌya kayinni gibirinnu looso loossannote. Mininke giddo noote sette ooso giddo ani bayirate.

Ani 12 diriti heeꞌreenna Ispeenete manni insa insanaawa ola kayisi. Konni oli gedensaanni annaꞌya usuru minira eessini. Kadde gashshitanno mangiste isi wolapho hasiꞌrinoti tashshi diassitinonsa. Amaꞌya mininke manni afooho wodhannore abbate shelleggantanno; hakko daafira jaalase sasenka maaꞌnuulle roduuwaꞌya yaano, Araasile, Loorinna Raamooni Ispeenete Bilbawo yinanniwa noo gadaame (molokosootu heeꞌrannowa) sokkanno gede amaaltuse. Insa wolere hoogiro hakkiicho itannore dihooganno.

Araasile: Ninke hakkira haꞌnummo yannara 14, 12nna 10 diriꞌreeti; maatenkewiinni baxxa shota diꞌꞌikkitinonke. Bilbawo heeꞌnoommo waro mini giddo mitore hayishshineemmo. Lamu diri gedensaanni molokosootu, geedhino manna towaantanniwa Zaragooza yinanniwa noote mitte halaꞌlado gadaame haaꞌneemmo gede assi. Hakkiicho sagale qinshanni kifile fiineemmo, kuni aja seenne daafursanno loosooti.

Feliisa: Roduuwiꞌya Zaragooza haꞌrita, amaꞌyanna qeesicha ikkinohu abbiꞌya iseno looso loosate hatte gadaame haꞌra hasiissannose yee hedi. Insa hatto yee hedinohu qooxeessinkera heeꞌrannohu mittu beetti ane baxillu illenni laꞌꞌa hanafinohura tenne hoolate yeeti. Ani ammaꞌnote diinaggaaweemmahura gadaame haꞌratta yinieta hakkawotira digiwoomma. Hakka waro ani barru baala Qurbaane haꞌreemma; wole agurina Afirikaho misiyoone ikke soqqamannohu laꞌlamaꞌya beetti gede anino misiyoone ikka hasiꞌrumma.

Molokosootu wole gobba haꞌre Maganoho soqqamate hedoommatera dijawaachishinoe; gadaamete heeshsho usuru mine labbue. Hakko daafira mittu diri gedensaanni, minira agure hige qeesicha ikkino abboꞌya towaatate hedumma. Mini giddo looso loosano agurranna isi ledo hawarrote kiiro huuccattote maxaafa hige hige nabbaweemma. Qoleno beetekiristaanete awawa biddi assa, hattono seemo Maariyaaminna “qullaawootu” misile seesiisa baxeemma.

Araasile: Yannate gedensaanni, gadaamete heeshshonke soorrantu. Molokosootu qaale eessiehu gedensaanni babbaxxine heeꞌneemmo gede assate hedi. Raamooni hakko Zaragooza gattu, Loori Vaalenshiya hadhu, ani kayinni Maadiriidi haꞌre layinkimeeshsho qaale eumma. Maadiriidi gadaamera rosaano, geedhino manninna wosinu galanno mini no; hakko daafira hakkiicho loonsannihu lowo loosi no. Ani gadaamete giddo keeraanchimma hoogino manna towaantanniwa looseemma.

Noore coyiꞌniro, ani alba molokose ikka kiissannote yee hedeemma. Qullaawa Maxaafa nabbawanna huwata hasiꞌreemma. Ikkollana, hakko Maganunna Yesuusi daafira hasaawannohu dino; hattono Qullaawa Maxaafa dihoroonsiꞌneemmo. Gadaamete afiꞌroomma yeemmari mito geeshshiha Laatinete afoo rosa, “qullaawootunnirenna” Maariyaami magansiꞌrate daafira xiinxallate. Kuri agurranni woluri daafursanno looso loosa callaho.

Yaaddo amaddue; konnira tenne molokosootu murritera hasaaphumma. Wolootu uminsa horora dodantanna ani kayinni maateꞌya kaaꞌla hasiissannae kowiicho mulla daafuraꞌya gara labbannoekkita kulummase. Ise mitte kifile giddo eessite hakko cuffue; tenne assitinohu hedoꞌya soorratenna gadaametenni fulleemma yaa agurtanno yite heddeeti.

Molokosootu xaano gaadaametenni fule haꞌra hasiꞌreemmaronna teꞌee afate sase hige cunfoonnie kifilenni fushshinoe. Haꞌrummakki yee giwummata insa “Maganoho soqqamantenni Sheexaneho soqqama hasiꞌroomma” yite borreessixa yiie. Insa hatto yiita lowo geeshsha masumma; hakkawote gadaametenni fule haꞌra hasiisse nooeha ikkirono togo yee borreessa dihasiꞌroomma. Ganaanni hige, loonsoonni cubbo kullanni manchira ikkinore hasaawumma. Hakkiinni isi Phaaphaasichu gashshannote alba heeꞌroommatewa Zaragooza noo gadaamewa higeemma gede coye biddi assi. Hakkiicho shiima agana keeshshummahu gedensaanni, haꞌrammara fajjinie. Raamooninna Loorino mulenni gadaametenni fuli.

“KISIDHINOONTE” YINOONNI MAXAAFINNI KAINOHUNNI BABBADAMMUMMO

Feliisa: Yannate gedensaanni, mine assiꞌre Kantabira yinanniwa haꞌrumma. Ikkollana ganye Qurbaane haꞌra diaguroomma; mitte hige Sambatu barra madirakete heeꞌne mitto dhagge ikkanno egensiishsha kullanna macciishshumma. Qeesichu Hegere Heeshshowa Massanno Halaale yaanno maxaafa leellishanni “Konne maxaafa laꞌe!” yee hanqe cance coyiꞌri. Hakkiinnino togo yii: “Konne maxaafa uyiniꞌnero anewa abbe woy huntine agurre!”

Hakkawote anera hakku maxaafi dinoe; kayinni konne maxaafa hakkawontenni afiꞌra hasiꞌrumma. Lamu barri gedensaanni, hedeweelcho lame Yihowa Farciꞌraasine miniꞌyara daye hakkonne “kisidhinoonte” yine hoolli maxaafa uyie. Hakko hashsha konne maxaafa nabbawumma; hattono hasaawisie meenti galagale dayi yannara Qullaawa Maxaafa xiinxallisannoe gede sumuu yuumma.

Shiima yanna gedensaanni, rosoomma halaali loosoho kakkaeemma gede assie. Alba ammaꞌnote diinaggaaweemmati Yihowa lubbora baxeemmatanna diinaggaawe soqqameemmata ikkumma. Hakkiinni 1973nni cuuamumma. Rosoomma halaale ayiddiꞌyara kuleemmahu gari tunceenyi nooekkiha ikkirono, danduumma geeshsha tenne assate woꞌnaaloomma. Aleenni yuummante gede ayiddiꞌya hakko iso rodooꞌya Araasile ammaꞌnoꞌya baasa gibbu.

Araasile: Gadaamete tuncu yiinoeri lowo geeshsha caacceessinoe. Ikkollana, Sambatu kiiro Qurbaane haꞌra diaguroomma; hattono barru baala Huuccattote Maxaafa nabbaweemma. Qullaawa Maxaafa huwata hasiꞌreemmahura Maganu kaaꞌlaera huucciꞌrumma. Ikkollana rodooꞌya Feliisa haaro ammaꞌnosere faasiiqqe kultannoe daafira quwa saꞌinohu gede asse hedumma. Ise kultinoere adha giwumma.

Shiimu diri gedensaanni, loosoho Maadiriidi higumma; hakkiicho mine assiꞌrumma. Yannate gedensaanni, lowo geeshsha huluullameemmata ikkumma. Ganye Qurbaane haꞌranno manni Wongeelu giddo noo roso harunsannokkita huwatumma. Hakko daafira beetekiristaane haꞌra agurumma. Hakkiinni, “qullaawoota”, loonsoonni cubbo kullannirenna giiramanni base no yee ammana agurumma. Wole agurina misillaꞌya nafa hunumma. Hakkawotira assanni noommari gara ikkinotanna teꞌee diafoomma. Hexxo mudhoommaha ikkirono Magano togo yee huucciꞌra diaguroomma: “Ani ate daafira afa hasiꞌreemma. Kaaꞌlie ballo!” Yihowa Farciꞌraasine duucha higge qaeꞌya dagginoha ikkirono mineꞌya fana giwoommati qulli yitannoe. Ani hakkawaro mitte ammaꞌnono diammaꞌneemma.

Faransayetenna Ispeenete gobbara heeꞌranno roduuwiꞌya Loorinna Raamooni 1980 balla Yihowa Farciꞌraasine ledo Qullaawa Maxaafa xiinxalla hanafi. Hakkawotira insano Feliisa gede dogaminoha lawinoe. Gedensoonni, Anjeeliinasi yinannite qachiꞌyara heedhanno manchonni xaade ise ledo muli jaala ikkumma. Iseno Yihowa Farciꞌraasinchooti. Anjeeliinasinna minaannise Qullaawa Maxaafa xiinxalleemma gede duucha hige xaꞌminoe. Insa, goowi alita huluullamolla ikkinnina Qullaawu Maxaafi egenno gooꞌroommata huwatino. Yannate gedensaanni insara togo yuumma: “Maahoyye. Kayinni ani kiꞌne ledo Qullaawa Maxaafa xiinxallate sumuu yeemmahu ane umiꞌyaha Qullaawa Maxaafa horoonsiꞌreemmaha ikkiro callaati”; hatto yoommahu Nakari-Kolunga yinannita Qullaawu Maxaafi tiro horoonsiꞌrammara yeeti.

JEEFOTE QULLAAWU MAXAAFI GAMBA ASSINONKE

Feliisa: Ani 1973nni cuuamumma waro Ispeenete Kantabiriyu qoqqowira qara katama ikkinohu Santanderi katamira mito 70 ikkitannoti Yihowa Farciꞌraasine no. Ninkera sabbankeemmohu halaꞌladu qoqqowi noonke; hakko daafira hakko qoqqowira umo otobisetenni, gedensoonni kayinni makeenunni haꞌnanni sabbankeemmo. Hakko qoqqowira lowo xibbe ikkanno qachira sabbankammo geeshsha mittu qachinni wole qacha haꞌneemmo.

Lowo diro lowo manna Qullaawa Maxaafa xiinxallisate qoosso afiꞌroomma; konni manni giddo 11 cuuamino. Insa giddo rooru alba Kaatolikete ammaꞌno harunsannoho. Anino alba ammaꞌnoꞌyara diinaggaaweemmata ikkoommahura insa xiinxalliseemma yannara cincanna wodancheemmata ikka hasiissinoeta afoomma. Insa seekkite amaxxite keeshshitino ammaꞌno agurate, hattono Qullaawu Maxaafinna Yihowa ayyaani halaale badde affanno gede kaaꞌlansa geeshsha yanna hasiissannota afoomma. (Ibi. 4:2) Alba polisicha ikkinohu minaanniꞌya Beenvendo 1979 cuuami; amaꞌya baꞌinohu Qullaawa Maxaafa xiinxalla hanaffe heedheeti.

Araasile: Yihowa Farciꞌraasine ledo Qullaawa Maxaafa xiinxalla hanafumma yannara lowo geeshsha huluullamoomma. Boode lamala gedensaanni kayinni, albi gede caaccaawa aguroommata huwatumma. Yihowa Farciꞌraasine rosiissanno rosi ledo sumuu yite heedhannore ikkansa lowo geeshsha dhagge ikkitinoe. Alba huluullameemmati ammana nooetanna albinni roore hagiirraame ikkumma. Wole agurina mitu qachiꞌya meenti, “Araasile, tenne doodhootta doogo aana haꞌrakki agurtooti!” yiinoe.

Yihowa togo yee huucciꞌroommati qulli yitannoe: “Yihowa, hexxo mudhite aguroottoekkihuranna hasiꞌranni keeshshoommata Qullaawu Maxaafita gara ikkitino egenno afiꞌreemma faro fanoottoehura galaxxeemmahe.” Rodooꞌya Feliisara xissiisannore coyiꞌroommatera maaro xaꞌmiꞌroomma. Alba heewisammeemmori gedensoonni Qullaawu Maxaafire goolle hasaambeemmore ikkinoommo. Ani 1989nni 61 diriti heeꞌre cuuamoomma.

Feliisa: Xa anera 91 diro ikkinoe, qoleno gunnittete, hattono albiꞌya gede jawaata diꞌꞌikkoomma. Ikkirono Qullaawa Maxaafa barru baala nabbaweemma, gogiꞌyalla fayyo ikkiro gambooshshe haꞌreemma; hattono danduumma geeshsha soqqameemma.

Araasile: Alba molokose ikkoommahuraati lawinoena, soqqameemma yannara xaadeemma qeesootinna molokosooti baalunkura farciꞌra baxisannoe. Insara lowo borruwa eloommansa hattono dancha gede hasaamboommo. Isinni mitte hige mittu qeesichi duucha hige mare hasaawisummahu gedensaanni, togo yiinoeti qulli yitannoe: “Araasile, ati kultanni noottaeri garaho; kayinni ani konni diriꞌyanni ma asse afeemmo? Harunsannoe manninna maateꞌya mayitannoe?” Hakkiinni ani, “Maganu mayyaannoheyya?” yuumma. Hakkawote isi dadille umo milli milli assi; ikkollana hatte yannara isi halaale hasiꞌrate kaaꞌlitanno jawaante hoogino.

Heeshshoꞌya giddo lowo geeshsha hagiidhoomma barri qulli yaannohe; hakku barri minaanniꞌya ledoꞌya gambooshshe haꞌra hasiꞌrannota kulie barraati. Hakkawaro isi 80 diro sainosiha ikkirono, hatte yannanni kayise gambooshshe horo dihosanno. Isi Qullaawa Maxaafa xiinxalle cuuaminokki halashshaancho ikkino. Isi ledo soqqammanni sayinsoommo yanna qaageemma wote tashshi yaannoe. Isi cuuamate lamu agani gate heeꞌreenna reyino.

Feliisa: Heeshshoꞌya giddo lowo geeshsha hagiirsiisannoe coyi giddo mittu umi qara halaale adha giwinori sasu maaꞌnuullu roduuwiꞌya gedensoonni ayyaanaamittete roduuwaꞌya ikkeenna laꞌꞌaꞌyaati. Mimmitinkewa gamba yaanna Maganinke Yihowanna Qaalisi daafira hasaawa tashshi assitannonke! Jeefote, roduuwiꞌyanna ani ayyaanaamittetenni mitto ikkinoommo.a