Dhukanke Anfe Heeꞌra Hasiissannohu Mayiraati?

1, 2. Saaooli umi adda dhukasi afinoha ikkirono, gedensaanni Maganu albaanni mishaminohu mayiraati? (Hanafote noo misile lai.)

MOOTE SAAOOLI hundi Israeelera moohi yannara dhukasi afinohonna ayirrado manchooti. (1 Sam. 9:1, 2, 21; 10:20-24) Ikkollana, moote ikki kawa booꞌnaleessa ikkinota leellishannoha haammata coye assino. Maganu masaalaanchi Saamueeli dinye amadino yannara Galgala daa keeshshita, Saaooli cinca hoogino. Hatte yannara Filisxeeme olaho qixxaabbanni no; Israeeleno Saaooli agurte xooqa hanaffino. Tennera isi, ‘Rahe mitore assa hasiissannoe’ yee hedikki digatino. Konni daafira, Saaooli Maganoho kakkalo kakkali; kayinni isira togo assate qoosso dinosi. Tennera Yihowa dihagiidhino.—1 Sam. 13:5-9.

² Saamueeli Galgala mariti Saaooli seejjinosi. Saaooli kayinni seejjo adha agure kakkalo kakkalinohu mayiraatiro xawisate woꞌnaalino; isi loosino loosira bushu iso ikkinokkita hattono assinori shota ikkinohu gede asse coyiꞌrino. (1 Sam. 13:10-14) Hatte yannanni kayise, Saaooli haammata gara ikkinokki coye assino; tini mootumma hooganno gede calla ikkikkinni Yihowa dadillisanno gede assitinosi. (1 Sam. 15:22, 23) Saaooli umi adda assiꞌra assiꞌre kaenni, gedensoonni abbe huꞌnino.—1 Sam. 31:1-6.

3. (a) Batinyu manni dhukanke anfe heeꞌrate daafira mayyee hedanno? (b) Hiikkuri xaꞌmuwara dawaro qollanni?

³ Heewo woꞌmitinote tenne alamera, lowo manni qinaado heeshsho heeꞌrate wole manna roora hasiissannonsahu gede asse hedanno. Konni daafira, dhukanke anfe heeꞌrate yinanniri didirrannonsa. Lawishshaho, alba filme loosate maccaha ikkinohu gedensaanni poletiku looso loosate higino manchi, dhuka afa yaanno qaali aye doogonnino isi heeshsho ledo xaado afiꞌrinokkitanna albillitteno hakko garinni heeꞌra hasiꞌrannota coyiꞌrino. Ikkina, dhukanke anfe heeꞌra yannankerano hasiissannote yineemmohu mayiraati? Dhukanke anfe heeꞌrate yaa mayyaate? Hatto yaa kayinni mayyaa diꞌꞌikkitino? Fonqolo ikkannori heeꞌrirono woy wolu manni xixxiiwinkerono, dhukanke anfe heeꞌra dandiineemmohu hiittoonniiti? Konni birxichi giddo uminna layinki xaꞌmora dawaro qolloonni. Sayikki xaꞌmo dawaro aananno birxichira qolloonni.

DHUKANKE ANFE HEEꞌRA HASIISSANNOHU MAYIRAATI?

4. Booꞌna yaa mayyaate?

⁴ Qullaawu Maxaafi “umo heeshshi assa” woy dhukanke anfe heeꞌra booꞌnate ledo heewisiisanno. (Lawishsha 11:2 nabbawa.) Daawiti Yihowa, “guullete cubbunni” woy booꞌnannokki gede kaaꞌlasira huucciꞌrino; isi togo assasi hayyote. (Far. 19:13) Booꞌna maati? Mittu manchi assi yinoonnisikki coye assate muddamannoha ikkiro, hakku manchi booꞌnaleessaho yaate. Ninke baalunku guuntete xeꞌne noonkere ikkinoommo daafira, mito wote booꞌnineemmo. Ikkollana, Moote Saaooli lawishshi leellishannonte gede booꞌna roso assiꞌneemmoha ikkiro, galle honsanni Maganu ledo noonke jaalooma huꞌnineemmo. Faarso 119:21 Yihowa ‘booꞌnaleeyye rufannota’ kultanno. Isi togo assannohu mayiraati?

5. Booꞌna shotinse laꞌnannire ikkinokkihu mayiraati?

⁵ Booꞌna, hedeweelcho loonsanni soꞌronni saꞌino bunsheeti. Umihunni, booꞌnineemmoha ikkiro, Yihowa Aliidi Mootichanke assine adhineemmota leellinshummokki ganteemmo. Layinkihunni, assate qoosso noonkekki coye assineemmoha ikkiro, tini wolu manni ledo giwammeemmo gede assitannonkeha ikkara dandaanno. (Law. 13:10) Sayikkihunni, booꞌnanke xawo fulanno wote, saalfanteemmoha ikkara dandaanno. (Luq. 14:8, 9) Booꞌnatenni kaꞌne assinanniri dixuꞌmanno. Qullaawa Borro giddo kulloonninte gede, dhukanke anfe heeꞌra aye woteno dancha assooteeti.

DHUKANKE ANFE HEEꞌRA MAYI LEDO XAADO AFIDHINO?

6, 7. Umo heeshshi assa yaa mayyaate? Umo heeshshi assa dhukanke afate ledo mayi xaado afidhino?

⁶ Dhukanke anfe heeꞌranna umo heeshshi assa xaado afiꞌrino akattaati. Qullaawu Maxaafi, umo heeshshi assate yaa naaxxanna booꞌna hooga ikkitinota kulanno. Umosi heeshshi assanno Kiristaanchi, wolu manni isinni roorinohu gede asse hedanno. (Fil. 2:3) Umosi heeshshi assanno manchi deerrasi afino manchooti; kuni manchi dandoosinna assa dandaannore seekke hedannoho; qoleno isi soꞌrosi ammananno, hattono wolu manni yaannore macciishshannohonna albi garinni calla looseemmo yaannokkiho. Umo heeshshi assa Yihowa lowo geeshsha hagiirsiissanno.

⁷ Qullaawu Maxaafi giddo, dhukanke anfe heeꞌra yitanno yaatto, ninkeneetira gara ikkitino hedo heedhannonke gede assiꞌranna assine anfeemmokkiri noota ammane adha yitanno tiro afidhinota kulloonni. Qullaawa Borro umo borreessini afiinni dhukanke anfe heeꞌra yitanno yaatto, assine anfeemmokkiri noota huwantoommota akatinkenni leellisha hasiissannonketa xawisate horoonsiꞌnoonniha lawanno.

8. Dhukinkera aleenni ikkinore heda woy assa hananfoommota leellishannori maa ikkara dandaanno?

⁸ Dhukinkera aleenni ikkino coye heda woy assa hananfeemmohu mamoote ikkara dandaanno? Aane nooha qoropha hasiissannonketa leellishanno coye hedi. Ninkeneeto woy lonseemmo looso janjeemmoha ikkara dandaanno. (Rom. 12:16) Qoleno, mannu ninke aana illachishanno gede assineemmoha ikkara dandaanno. (1 Xim. 2:9, 10) Woy noonke qoossonna uminke hedonni kaꞌne, wolu manni assa hasiissannonsarenna hasiissannonsakkire kulleemmoha ikkara dandaanno. (1 Qor. 4:6) Togoore assineemmo wote deerranke hambe naaxxate geeshsha iillinoommoti leella hooggankera dandiitanno.

9. Mito manna booꞌnanno gede assinonsahu maati? Lawishsha kuli.

⁹ Aye manchino maalu hasattosira qeelamannoha ikkiro, deerrasi hawara dandaanno. Lowo manna, umonsa roorse baxa, hinaasanna hanqo qeeꞌla hooga booꞌnanno gede assitinonsa. Qullaawu Maxaafi giddo kulloonniri lawishshaho Abeseloomi, Azaariyaasinna Naabukadanatsoori ‘maalu loosira’ qeelante booꞌnitino daafira, Yihowa qorichishinonsa.—2 Sam. 15:1-6; 18:9-17; 2 Dud. 26:16-21; Dan. 5: 18-21.

10. Wolu manni mitto coye assate kainohu konniraati yine coyiꞌrate muddama hasiissannonkekkihu mayiraati? Mitto Qullaawu Maxaafi lawishsha kuli.

¹⁰ Mito manna deerransa hawanno gede assannohu kayinni wolu babbaxxino korkaati no. Hanni lawishshaho, Kalaqama 20:2-7 nna Maatewoosi 26:31-35 noota Qullaawu Maxaafi xagge hendo. Abemeleekinna Pheexiroosi booꞌnitinoha lawannore assitinohu, cubbaataamma ikkitinohura busha hasattonsara qeelantinohuraatinso, insa deerransa afa woy qoropha hoogginohuraati ikka? Ninke mannu wodanita afa dandiineemmokki daafira, wolu manni mitto coye assate kainohu konniraati yine afoo wonshine coyiꞌra dihayyote; qoleno togo assa baxillu noonketa leellishshannota diꞌꞌikkitino.—Yaiqoobi 4:12 nabbawi.

MAGANU DIRIJJITE GIDDO NOONKE QEECHA AFA

11. Dhukanke afa Maganu dirijjite giddo noonke qeecha afate ledo xaado afidhinohu hiittoonniiti?

¹¹ Dhukasi afino manchi Maganu dirijjite giddo noosiha loosu qeecha dideanno. Yihowa amanyootu Magano ikkinohura, minisi giddo mittu mittunkura loosu qeecha aanno. Mittu mittunku songote giddo assannori babbaxxinoha ikkirono baalunku hasiisannoho. Yihowa eltosinni mittu mittunkura babbaxxino aamamooshshe woy dandoo uyino. Ninke tenne elto isira ayirrinye abbatenna wole manna kaaꞌlate horoonsiꞌra dandiineemmo. (Rom. 12:4-8) Yihowa ninke ayirrisannonketanna ammanannonketa leellishanno looso uyinonke; qoleno kuni loosi loosa hasiissannonkeho.—1 Pheexiroosi 4:10 nabbawi.

12, 13. Yannate kiiro Maganoho soqqammeemmo gari soorramanno wote, dhagge assiꞌra hasiissannonkekkihu mayiraati?

¹² Ikkollana, Maganu dirijjite giddo noonke qeechi noowa heeꞌrannoha diꞌꞌikkino. Yanna saꞌanni hadhanno wote soorramara dandaanno. Hanni Yesuusi lawishsha hedde. Umo, Yihowanna isi callu heedhino. (Law. 8:22) Hatte yannara isi wole ayyaanu kalaqama, illete leeltannota kalqete alame, hattono jeefote mannu ooso kalaqa kaaꞌlino. (Qol. 1:16) Yesuusi iiminni dayi yannara umo wolu manni kaaꞌlo hasiissannosiha daaima ikke, gedensaanni kayinni lophe uullate aana heeꞌrino. (Fil. 2:7) Kakkalo ikke reyihu gedensaanni Yesuusi galagale iimira haꞌre ayyaanu kalaqama ikke heeꞌra hanafino; isi 1914 Maganu Mangistera Nugusa ikkino. (Ibi. 2:9) Yesuusira uyinoonnisi loosi xaate disoorramannoho yaa diꞌꞌikkino. Kumu Diri Gashshooti gedensaanni, Yesuusi, Yihowa “woꞌmunkurira guuta ikkanno” gede Mangistesi Isira aanno.—1 Qor. 15:28.

¹³ Hatteente gede ninkeno heeshshonke giddo murreemmo coyinni kainohunni loonseemmo loosi soorramara dandaanno. Lawishshaho, alba adhoottokkihoro xa mine kalaqiꞌroottoha ikkara dandaanno. Woy ooso ilte loosiꞌra hanafoottoha ikkara dandaanno. Woy yannate gedensaanni, woꞌma yanna soqqansho eate yite bikku heeshsho heeꞌra hanafoottoha ikkara dandaanno. Mittu mittunku muratto coyi, mitte qoosso woy loosu qeecha adhatto gede assara dandaanno. Heeshshonke gari albinni roore soqqammeemmo gede woy albi geeshsha soqqammeemmokki gede assankera dandaanno. Ati wedellichaho woy jawaho? Ordu keeraanchimma noohenso dhibbu waadannohe? Yihowa mittu mittunku ma garinni soqqammummosiro woyyannoro afino. Isi ninke assa dandiineemmore calla assinammora hasiꞌranno; assineemmori baalu hagiirsiisannosi.—Ibi. 6:10.

14. Dhukanke afa loonseemmo loosinni aye woteno hagiirre afiꞌneemmo gede kaaꞌlitannonkehu hiittoonniiti?

¹⁴ Yesuusi uyinoonnisi looso baala hagiirrunni loosino; ninkeno hatto assa dandiineemmo. (Law. 8:30, 31) Dhukasi afino manchi songote giddo uyinannisi loosi ajinosihu gede asse dihedanno. Togoo manchi albillittete loosu qeechi daafira diyaadanno woy wolu manni assanni noori aana diꞌꞌillachishanno. Hatteentenni, isi wolqasi danchu garinni horoonsiꞌratenna xa loosanni noo looso Yihowa uyinosihu gede asse hede hagiirrunni loosate sharramanno. Qoleno, togoo manchi Yihowa wolu mannira uyinoha loosu qeecha ayirrisanno. Dhukanke afa manna hasiisanno garinni ayirrinseemmonna irkinseemmo gede assitannonke.—Rom. 12:10.

DHUKANKE AFATE YAA MAYYAA DIꞌꞌIKKITINO?

15. Gedewooni lawishshinni maa ronseemmo?

¹⁵ Dhukasi afe heeꞌrino manni giddo mittu Gedewooniiti. Isi Yihowa sokkaasinchi umo coyishiishisi yannara, noore coyiꞌre deerrasi afinoha ikkinota leellishino. (Eje. 6:15) Isi Yihowa uyinosi looso adhihu gedensaanni nafa, assa hasiissannosire seekke buuxino; qoleno Yihowa biddishsha hasiꞌrino. (Eje. 6:36-40) Gedewooni waajjannokkihonna worba manchooti. Ikkirono, assannore seekke qorophenna alba badhe layiꞌre assannoho. (Eje. 6:11, 27) Isi uyinoonnisi looso irkiꞌre maccaha ikkate diwoꞌnaalino. Hatteentenni, isi Yihowa uyinosi looso loosihu gedensaanni qaesi harino.—Eje. 8:22, 23, 29.

16, 17. Dhukasi afino manchi ayyaanaamittetenni lophate daafira hedanno wote deannokki coyi maati?

¹⁶ Dhukanke afate yaa, haaro looso adhe loosate woy albinni roore soqqamate sharrama agurate yaa diꞌꞌikkitino. Qullaawa Borro, ninke baalunku ayyaanaamittetenni lophate sharrammeemmo gede jawaachishshannonke. (1 Xim. 4:13-15) Ikkina ayyaanaamittetenni lophate loonseemmo loosi aye woteno soorrama hasiissannosi yaateni? Deeꞌni. Xa loonsanni heeꞌnoommo loosi baxiha ikkirono, Yihowa kaaꞌlonni ayyaanaamittetenni lopha dandiineemmo. Maganu uyinonke akattankenna dandoonke woyyeessiꞌnanni albinni roore soqqamanna danchare assa dandiineemmo.

¹⁷ Dhukasi afino manchi haaro looso adhara albaanni, hakko looso loosa hanafiro assa hasiissannosire seekke buuxanno. Hakkiinnino isi noo gara heeshshi gotti asse hedanno. Lawishshaho, isi assa hasiissannosi coye dulli assikki albinni roore soqqama woy wole looso adhe loosa dandaanno? Haaro looso loosate, xa loosanni nooha mito looso wolu manni loosanno gede assa dandaanno? Kuri xaꞌmuwa giddo mittete woy lamente xaꞌmora qolanno dawaro dandaannokkita leellishshannota ikkituro, isi loosanni noo looso wolu manni loosiro woyyannoha ikkara dandaanno. Heeꞌnoommo gara huuccattotenni seekkine hedanke dandiineemmokkire assate shembeephineemmokki gede kaaꞌlitannonke. Dhukanke anfoommota leellinsheemmoha ikkiro, assine anfeemmokkire dandiineemmo diyineemmo.

18. (a) Dhukanke afa haaro looso uyinanninke wote maa assineemmo gede assitannonke? (b) Roomu Sokka 12:3 dhukanke hambeemmokki gede kaaꞌlitannonkehu hiittoonniiti?

¹⁸ Gedewooni lawishshi, haaro looso adhine loonseemmo wote Yihowa biddishshinna maasso nookkiha danchu garinni loosa dandiineemmokkita qaangeemmo gede assannonke. Hakkiinni saeno “Maganu ledo gudisamme joongillunni” woy dhukanke anfe heeꞌneemmo gede koyinsoonninke. (Mik. 6:8) Konni daafira, haaro looso uyinanninke wote Yihowa qaalisinna dirijjitesi widoonni qole aannonke amaale huuccattotenni seekkine heda hasiissannonke. Qoleno, qaafonke Yihowa biddishshi ledo sumuu yitanno gede assiꞌra rosa hasiissannonke. ‘Jawa assitannonketi’ uminke dandoo ikkitukkinni, Yihowa ninke kaaꞌlate umosi heeshshi assasiiti. (Far. 18:35) Konni daafira, dhukanke anfe Yihowa ledo haꞌranke, ninkeneeto janjeemmokki woy ajinshe laꞌneemmokki gede kaaꞌlitannonke.—Roomu Sokka 12:3 nabbawi.

19. Dhukanke afate akata lossiꞌra hasiissannonkehu mayiraati?

¹⁹ Yihowa Kalaqaanchonkenna Kalqete Alame Giddo Aliidiha ikkino daafira, dhukasi afino manchi Yihowara hasiisannosi ayirrinye aanno. (Aju. 4:11) Dhukanke hawa hooga, Maganu dirijjite giddo uyinanninke loosinni kassi yine heeꞌneemmo gedenna danchu garinni loonseemmo gede kaaꞌlitannonke. Dhukanke hawa hooga ayirrinye afiꞌrinokki coye assineemmokki gedenna Yihowa manni mereero mittimma heedhanno gede assitanno. Dhukanke hawa hooga, wole manna ninkenni roorsine laꞌneemmo gedenna assineemmore qorophineemmo gede assitannonke; tini soꞌro loonseemmokki gede kaaꞌlitannonke. Konni daafira, dhukanke anfe heeꞌra yannankerano Maganu mannira kaaꞌlanno akataati; qoleno Yihowa konne akata lossidhannore baxannonsa. Ikkina, dhukanke hambeemmo gede assannori tuncu yaannonke yannara konne akata leellinsheemmo? Aananno birxichira, dhukanke hambeemmo gede assannori tuncu yaannonke wote qoropha dandiineemmo gara xawinsoonni.