“Kurinni Roorsite Baxattoe?”

1, 2. Pheexiroosi hashsha woꞌma qulxuꞌme woshshaadanni gali gedensaanni tuncu yiinosiri maati?

YESUUSI rosaano giddo lamalu Galiilu Baarira hashsha woꞌma qulxuꞌme woshshaaxxitanni galtino; ikkirono mitte qulxuꞌmichono diamaxxitino. Reyotenni kainohu Yesuusi baaru qaccera uurre heeꞌre insa lai. Hakkiinni togo yiinsa: “‘Afidhinannina, woshshaadoꞌne yowolote qiniiteenni tugge.’ Insano woshshaado baaru giddora tuggu. Woshshaado lowo qulxuꞌme amaddino daafira giddonni goshooshshe fushsha hooggu.”—Yoh. 21:1-6.

² Yesuusi rosaanosira shooꞌmitannore uyinsahu gedensaanni alba Simooni Pheexiroosiwa hige togo yii: “Yohaannisi beetto Simooni, kurinni roorsite baxattoe?” Yesuusi togo yiinohu maa xawisateeti? Pheexiroosi qulxuꞌme woshshaada baxanno. Hakko daafira Yesuusi Pheexiroosi roorse baxanno coyi maatiro afa hasiꞌrinoha lawanno. Pheexiroosi roorse baxannohu Yesuusanna isi rosiisino rosootinso qulxuꞌmetenna qulxuꞌme woshshaadate loosooti? Pheexiroosi togo yee dawarino: “Ee Mooticha, lowo geeshsha baxeemmoheta afootto.” (Yoh. 21:15, NW) Pheexiroosi coyiꞌrino qaali garinni heeꞌrino. Isi hatte yannanni hanafe, manna rosaano assate looso jaatanaawe loose Kiristoosa baxannota leellishino; umi xibbi dirite Kiristaanu songora tuuqqa ikkitinori giddo mittu isooti.

3. Kiristaanu hiikkonne gawajjanno coye qoropha hasiissannonsa?

³ Yesuusi Pheexiroosira coyiꞌrinorinni maa ronseemmo? Kiristoosira noonke baxilli qiidara wodhineemmokki gede, hattono Maganu Mangistete looso balaxisiinseemmokki gede hedonke bebbeehannore qoropha hasiissannonke. Yesuusi tenne alame coyi daafursannotanna yaachishannota afino. Yesuusi wixa wixiꞌri manchire kultanno masalora mitu manni ‘Maganu gashshooti qaale’ adhe umi qara ayyaanaamittetenni lopha hanafirono gedensaanni ‘tenne gobba hedonna jirote baxilli’ macciishshino ‘qaale beeshshe amadannota’ coyiꞌrino. (Mat. 13:19-22; Maq. 4:19) Ninkeno qoropha hoongummoro addi addi dilgonni doogammammoranna ayyaanaamittenke ajjanni hadhara dandiitanno. Konnira Yesuusi rosaanosi togo yee qorowisiisino: “Itunna agu batinyinni, dimbatenninna tenne gobba heeshshora yaaddinanna wodanu daafurannoꞌnekki gede qorophe!”—Luq. 21:34.

4. Kiristoosa mageeshshi geeshsha banxeemmoro afate kaaꞌlannonkeri maati? (Hanafote noo misile lai.)

⁴ Pheexiroosi reyotenni kainohu Yesuusi ledo hasaawihu gedensaanni assinte gede, ninkeno heeshshonke giddo sabbakate looso balaxisiinse Kiristoosa banxeemmota leellisha hasiissannonke. Ikkina, hatto assinanni heeꞌnoommotanna teꞌee afa dandiineemmohu hiittoonniiti? Yannate kiiro umonke togo yine xaꞌma hasiissannonke: ‘Roorse baxeemmo coyi maati? Roore hagiirsiisannoeri ayyaanaamittete coye assatenso wolereeti?’ Hanni qoropha hoongummoro Kiristoosiranna ayyaanaamittete coyira noonke baxilli qiidanno gede assara dandaannoha sase coye laꞌno; insano, loosoho, boohaarshahonna maalaamittete coyeeti.

LOOSOHO QUWA SAꞌINANNIKKI GEDE QOROPHE

5. Qullaawa Borro maatete umo ikkitinori maa assitanno gede kultanno?

⁵ Pheexiroosi qulxuꞌme woshshaadate looso loosannohu baxanno daafira calla diꞌꞌikkino; isi heeshshote heeꞌrate hasiisannosire afiꞌrannohu konni loosinniiti. Maatete umo ikkitinnori Qullaawa Borro maatensara maalaamittete hasiisannonsare wonsha hasiissannonsata kultannota affino. (1 Xim. 5:8) Insa maatensara hasiisannore shiqishate diinaggaabbe loosa hasiissannonsati egennantinote. Ikkollana, tenne goofimarchu yannara loosu lowo yaaddo abbannoha ikkino.

6. Xaa yannara loosu bayicho hiittoohu yaachishanno coyi no?

⁶ Yannankera looso hasiꞌranno manni lowoho; loosu kayinni shiimaho. Konnira looso hasiꞌrannohu batinyu manni lowo yanna loosa hasiissannonsa; mitoho daafurte loosseenna baantanninsa woxi digariho. Loosiisidhanno dirijjituwa tirfe lexxate yite, manna manninaatensanna surrensa daarfursanno garinni loosiisidhanno. Loosanno manni lowore loosa hoogiro, loosunni fushshine hunnansara dandiinanni.

7, 8. (a) Roore ammanama hasiissannonkehu ayeraati? (b) Tayilaandete heeꞌranno rodii loosisi daafira maa huwatino?

⁷ Kiristaana ikkinoommo daafira roore ammanama hasiissannonkehu Yihowaraati ikkinninna loosiissannonkerira diꞌꞌikkino. (Luq. 10:27) Heeshshonke giddo roorsine laꞌneemmo coyi looso diꞌꞌikkino. Loonseemmohu heeshshote heeꞌrate hasiisannonkere wonshiꞌratenna soqqanshonkera irko ikkannore afiꞌrateeti. Ikkollana, qoropha hoongummoro loonseemmo loosi magansiꞌrankera guficho ikkara dandaanno. Lawishshaho, Tayilaandete heeꞌranno rodii togo yiino: “Loosiꞌya kompiyutere biddi assate; konne looso lowo geeshsha baxeemmo; ikkollana haammata saate loosa hasiissannoe. Konnira kuni loosi ayyaanaamittete coye asseemmo yanna gudise adhannoe yaa dandeemmo. Gale hosanni, Maganu Mangiste looso balaxisiisate hakkonne looso soorriꞌra hasiissannoeta huwatummo.” Kuni rodii maa assiyya?

⁸ Isi togo yiino: “Mittu diri geeshsha woxe codhummohunna maa looseemmoro hedummohu gedensaanni ayisikireemete yinanni sagale doogote doyissanni hira doodhummo. Umi qara, woxu anje amaddinoe, hattono hexxo mudhoommo. Alba ledoꞌya loossanno miillaꞌya ledo xaadeemmo wote osoꞌlitannoe; qoleno mine qiissannorichi noo biirora kompiyuterete looso loosantenni doogote ayisikireeme hirate loosa doodhoommohu mayiraatiro xaꞌmitannoe. Ani kayinni, Yihowa konne qarra dandeemmo gedenna fushshiꞌroommota ayyaanaamittete mixoꞌya wonshiꞌreemmo gede kaaꞌlaera huucciꞌrummo. Shiima yanna gedensaanni coyi woyyanni haꞌri. Gale hosanni dambanyootiꞌya baxxanno ayisikireeme hiittootero huwatummo, hattono coommitanno ayisikireeme loosa danduummo. Mulenni looseemmo ayisikireeme barru baala hire guda hanafummo. Alba kompiyutere biddi asse afiꞌreemmohunni xa roorino woxe afiꞌreemmo. Kuni loosi hakkeeshshi geeshsha daafursannokkihanna yaachishannokkiha ikkino daafira lowo geeshsha hagiidheemmo. Qoleno, xa Yihowawa albinni roore shiqoommoha lawannoe; baalunkurinni roorannohu konneeti.”—Maatewoosi 5:3, 6 nabbawi.

9. Lonseemmo loosira quwa saꞌneemmokki gede kaaꞌlannonkeri maati?

⁹ Diinaggaawe loosa dancha akataati; qoleno diinaggaawe loosa kiissannote. (Law. 12:14) Ikkirono, aleenni qummi assini rodii assinte gede loosoho quwa saꞌneemmokki gede qoropha hasiissannonke. Yesuusi togo yiino: “Kiꞌne kayinni balaxxine Maganu Gashshootenna keeraanchimmasi hasidhe; hakkuyi kaꞌire baala [heeshshote heeꞌrate hasiisannoꞌnere] lendanniꞌnena.” (Mat. 6:33) Loonseemmo loosinna ayyaanaamittete coye assate giddo hiikkoye roorsiꞌneemmoro afate, ninkeneeto togo yine xaꞌma danchate: ‘Looseemmo loosi hagiirsiisannohu, ayyaanaamittete loosi kayinni hakkeeshshi geeshsha baxisannokkihu woy woga wonshate calla assinannihu gede asse hedeemmo?’ Tenne xaꞌmo seekkine hedankenna hiincanke hiikkonne coye roorsiꞌneemmoro afate kaaꞌlitannonke.

10. Yesuusi hiikkoye coye balaxisiisa hasiissannonketa rosiisino?

¹⁰ Yesuusi heeshshonke giddo ayyaanaamittete looso balaxisiinseemmo gede dancha lawishsha ikkinonke. Mitto waro Yesuusi Maariyaaminna rodoose Maartaoo minira harino. Maarta sagale qixxeessitanni kabbi facci yitanni no, Maariyaami kayinni Yesuusi lekka hunda ofolte isi yaannore macciishshitanni no. Maarta Maariyaami looso kaaꞌla hoogginosehura coyiꞌrantuta Yesuusi togo yee dawari: “Maariyaami dancha coye doodhitino; konne coye isewiinni diadhinannise.” (Luq. 10:38-42) Yesuusi Maartara lowo geeshsha hasiisanno roso roosiisinose. Loosu hedonke bebbeehannonkekki gede assiꞌratenna Kiristoosa banxeemmota leellishate ‘dancha coye doodha,’ yaano ayyaanaamittete coye balaxisiisa hasiissannonke.

BOOHAARSHAHO QUWA SAꞌINANNIKKI GEDE QOROPHE

11. Qullaawa Borro fooliishshiꞌratenna boohaarate daafira mayitanno?

¹¹ Heeshsho loosunna dilgo batidhinota ikkitino daafira mito wote fooliishshiꞌranna boohaara hasiissannonke. Maganu Qaali togo yaanno: “Mannaho daafure loosiꞌrinohunni hagiidhanni itatenna agate kaꞌaanni kaaꞌlannosiri woluri dino.” (Ros. 2:24) Yesuusi mito wote fooliishshira hasiissannota afino. Mitte hige Yesuusi rosaanosi ledo soqqamanni keeshshihu gedensaanni rosaanosi togo yiinonsa: “Ane ledo kaꞌa shiqqi yitine shiima geeshsha fooliishshidhe.”—Maq. 6:31, 32.

12. Boohaarreemmo wote qoropha hasiissannonkehu mayiraati? Lawishsha kuli.

¹² Boohaarshu fooliishshiꞌratenna wolqanke haaroonsiꞌrate lowo geeshsha kaaꞌlannonke. Ikkirono, heeshshonke giddo boohaarsha balaxisiinseemmokki gede qoropha hasiissannonke. Umi xibbi diro heeꞌrinohu batinyu mannira “Gaꞌa reyineemmo daafira, into ango” yitanno hedo noonsa. (1 Qor. 15:32) Hatteente gede yannankera alamete giddo noo mannirano togoo hedo noonsa. Lawishshaho, mitto waro Awuroppaho heeꞌrannohu mittu wedellichi Kiristaanu gambooshshe daa hanafino. Ikkollana, boohaarsha baasa baxanno daafira Yihowa Farciꞌraasine ledo gamba yaa aguri. Gedensaanni kayinni boohaarshu aana calla illachishasi qarru giddo tugginositanna caaccaawanno gede assitinosita huwati. Konnira isi Qullaawa Maxaafa wirro xiinxalla hanafi; hakkiinnino mulenni dancha duduwo duduwannoha ikkino. Cuuami gedensaanni isi togo yiino: “Gaabbisannoe coyi tini alame shiqishshanno boohaarsha shorra agure Yihowara soqqama addu hagiirre abbitannota afummokki keeshshaꞌyaati.”

13. (a) Boohaarshu gawajjara dandaanno gara lawishshunni xawisi. (b) Boohaarshaho quwa saꞌneemmokki gede mayi kaaꞌlankera dandaanno?

¹³ Boohaarreemmohu fooliishshiꞌratenna wolqa haaroonsiꞌrateeti. Ikkina, mageeshshi saate boohaara hasiissannonke? Hanni tenne hedi: Ninke giddo batinyu coommannore ita banxeemmoha ikkirono, coommannore yaano keekenna karameella lawinore duucha wote ita fayyimma gawajjitannota anfoommo. Konni daafira ita hasiissannonketi fayyimmankera kaaꞌlitanno sagaleeti. Hatteente gede, lowo saate boohaarranni sayinseemmoha ikkiro, tini ayyaanaamittenke gawajjitara dandiitanno. Tenne gargadhate ganyine Maganu Mangiste looso loosa hasiissannonke. Ikkina, boohaarshaho quwa saꞌnoommotanna teꞌee afa dandiineemmohu hiittoonniiti? Lamalate giddo ayyaanaamittete loosira, yaano gambooshshe haꞌrate, soqqansho fulate, maatete magansiꞌranna hojju xiinxallo assiꞌrate mageeshshi saate sayinsoommoro borreessine amada dandiineemmo. Hakkiinni aanchine hatte lamalara boohaarranni yaanno ispoorte loonsanni, baxisannonkere assinanni, televizhiine laꞌnanni woy viidiyote godoꞌle godoꞌlinanni sayinsoommo saate ledo heewisiinse laꞌꞌa dandiineemmo. Heewisiinseemmo wote roortannoti maa assinanni sayinsoommo saateeti? Boohaarreemmo yanna roortannoha ikkiro mitore biddi assiꞌra hasiissannonke.—Efesooni Sokka 5:15, 16 nabbawi.

14. Dancha boohaarsha doodhate kaaꞌlannonkeri maati?

¹⁴ Yihowa mittu mittunkura boohaarsha doodhate qoosso uyinonke; maatete umo ikkitinorino Qullaawu Maxaafi giddo noohu Yihowa biddishshi ledo sumuu yaanno garinni doodha dandiitanno.a Danchu boohaarshi ‘Maganuwiinni afiꞌnoonni eltooti.’ (Ros. 3:12, 13) Hige mittu manchi doodhanno boohaarshi wolu doodhannohunni baxxannoti egennantinote. (Gal. 6:4, 5) Doodhineemmo boohaarshi ikkiha ikkirono, quwa saꞌꞌa kayinni dihasiissannonke. Yesuusi, “Jiroꞌne noowa wodaniꞌneno hakkiicho heeꞌranno” yiino. (Mat. 6:21) Konni daafira, Yesuusira noonke baxilli, uminke dilgo agurre Maganu Mangiste balaxisiinseemmota leellishannore hendeemmo, coyiꞌneemmonna assineemmo gede kakkayisannonke.—Fil. 1:9, 10.

MAALAAMITTETE COYE QUWA SAꞌNE BANXEEMMOKKI GEDE QOROPHA

15, 16. (a) Kiristaanaho maalaamittete coye quwa sae baxa woshshaado ikka dandiitannohu hiitte doogonniiti? (b) Yesuusi maalaamittete coyi daafira hiittenne kaajja amaale amaalino?

¹⁵ Yannankera batinyu manni yannate fultanno faashine, elektirooniksete uduunnenna wole hattoo uduunne afiꞌrate lowo geeshsha hedanno. Konni daafira mittu mittunku Kiristaanchi noosi hasatto afate isonooto togo yee xaꞌma hasiissannosi: ‘Maalaamittete coyi aana illachishoommohura gambooshsheho qixxaaweemmo yannanni roore yannate fulino kaameelire woy faashinere nabbawanninna hedanni sayiseemmo yanna roortanno? Barru baala umiꞌya dilgora calla kabbi facci yaanna huuccatto assiꞌreemmonna Qullaawa Maxaafa nabbaweemmo yanna ajjinoe?’ Maalaamittete coyi Kiristoosira noonke baxillinni roorinota huwantummoro, Yesuusi “hafuuraamma ikkitinoonte” yee amaalino amaale heeshshi gotti assine heda hasiissannonke. (Luq. 12:15) Yesuusi konne shotinse laꞌꞌa hasiissannokki qorowishsha uyinohu mayiraati?

¹⁶ Yesuusi “Mittu manchi lamu Mootichira soqqama didandaanno” yiino. Isi ledo togo yiino: “Mittu manchi Maganohonna woxeho borojjicho ikka didandaanno.” Yesuusi hatto yiinohu lamunku “mootichi” woꞌmunni woꞌma hajajammammonsara hasidhanno daafiraati. Konni daafira ‘mitto gimbe mitto baxa’; woy ‘mitto ayirrinse mitto misha’ hasiissannonke. (Mat. 6:24) Guuntete xeꞌne noonkere ikkinoommo daafira, ‘maalu yortora’ hattono maalaamittete coye quwa saꞌne baxate hasattora qeelammeemmokki gede sharrama hasiissannonke.—Efe. 2:3.

17. (a) Maalu yortonni amadamino mannira maalaamittete coye baxate hasatto qeela qarra ikkitannonsahu mayiraati? (b) Maalaamittete coye quwa saꞌne banxeemmokki gede kaaꞌlannonkeri maati?

¹⁷ Maalu yortonni amadimino manni maalaamittete coyira quwa saꞌꞌa hooga qarra ikkitannonsa. Mayira? Korkaatuno Maganu albaanni roore waaga afiꞌrinori maatiro huwata qarrissannonsa. (1 Qorontoosi 2:14 nabbawi.) Insati danchanna busha bade afate dandoonsa baꞌino daafira gara ikkinohanna gara ikkinokkiha badde diaffanno. (Ibi. 5:11-14) Konnira mitootu maalaamittete coye aana aanaho lexxa hasidhanno; hakko daafira kassi diyitanno. (Ros. 5:10) Ninke kayinni maalaamittete coye quwa saꞌne banxeemmokki gede gargadhate Maganu Qaale ganyine nabbawa lowo geeshsha kaaꞌlitannonke. (1 Phe. 2:2) Yesuusi Qullaawa Borro seekke hiincasi iillinosi fonqolo qeelanno gede kaaꞌlitinosi; ninkeno Qullaawu Maxaafiha xintu seera seekkine harunsanke maalaamittete coye banxeemmokki gede kaaꞌlitannonke. (Mat. 4:8-10) Togo assineemmoha ikkiro, maalaamittete coyinni roorsine Yesuusa banxeemmota leellinsheemmo.

18. Maa assate murciꞌrootto?

¹⁸ Yesuusi Pheexiroosi, “Kurinni roorsite baxattoe?” yee xaꞌmi wote, Pheexiroosi ayyaanaamittete coye balaxisiisa hasiissannosita qaagiissanni noosi. Pheexiroosi suꞌmi tiro “Manaado Kincho” yaate; isi suꞌmisinte gede kinchu gedeeti kaajjado akatta noosita leellishino. (Soq. 4:5-20) Ninkeno, loosoho, boohaarshahonna maalaamittete coyira quwa saꞌneemmokki gede qorophine baalunkurinni roore Kiristoosa banxeemmota leellishate murciꞌno. Pheexiroosinte gede “Mooticha, lowo geeshsha baxeemmoheta afootto” yineemmota heeshshonke giddo assineemmorinni leellinsho.