Maganu Ate Afinohe?

KALAQAMUNNI MAA RONSEEMMO?

Mittu qaaqqi ilami gedensaanni noohu 60 daqiiqi giddo amasi assitannori lowore seekkara woy hunara dandaanno. Hatto yineemmohu mayiraati? Korkaatuno tenne yanna giddo amuuwu qaaqquullinsawa gamba yaannoha ikkiro, qaaqquullinsa lopho lexxitanno.a

Ama xaalla ilamino qaaqqose lubbora baxxanno gede assannoseri maati? Mittu piroofeserichi Ze Joornaali ovi Perineetaali Ejukeeshiini yinanni borro aana xawisino garinni, ama iltu gedensaanni okistoosini yinanni hormoone lexxase, “qaaqqose iltu gedensaanni amammaddannonna ille qasse laꞌanno gede, hattono unuuna qansidhanno gede assitanno.” Ama iltu gedensaanni cingiitannoti wole hormoone qolte, “qaaqqise ledo noose xaadooshshi kaajjanno gede assitanno.” Tenne afanke maaho kaaꞌlitannonke?

Amatenna qaaqqu mereero muli fiixoomi heeꞌranno gede assinohu Kalaqaancho Yihowaati.b Moote Daawiti ‘amasi godowi giddonni’ fushshinosihuranna amasi anga teese heeꞌranno gede assinosihura Magano galatino. Isi togo yee huucciꞌrino: “Ilamummo barrinni kayise ate anga noommo; amaꞌya godowi giddo heeꞌreennanni ati Maganoꞌyaati.”—Faarso 22:9, 10.

HANNI HEDI: Maganu mitte ama qaaqqose lubbora baxxannonna qaaqqise hasiꞌrinore wonshitanno gede asse kalaqinoha ikkina, isi ‘oososi’ ikkinoommori ninke mittu mittunku daafira hedannoha dilawannohe?—Soqqamaasinete Looso 17:29.

QULLAAWU MAXAAFI MAGANU NINKE DAAFIRA HEDANNOTANNA AGARANNONKETA KULANNO GARA

Ayi manchinni roore Yihowa daafira seekke afinohu Yesuusi Kiristoosi togo yiino: “Lame gurrae onte saantenni dihirranni? Gordu Anniꞌne afikkinni kayinni mitticho gurraicho nafa uulla diubbanno. Umiꞌne dananchi baalu nafa kiirreenna no. Batinye gurrae kiꞌne roortinannina waajjitinoonte.”—Maatewoosi 10:29-31.

Mitticho gurraicho uulla ubbanna wodancha agurina, woꞌmanta cea seekke laꞌꞌanno manni nafa shiimaholla. Iimi Anninke kayinni mitte mittenta afino. Qoleno isi albaanni mitte ceicho wole agurina batinye cea mitteenni gamba assiniro nafa mitto mancho diroortanno. Konni daafira, ‘Maganu diafinoe’ yite waajja dihasiissannohe. Isinni Maganu ate daafira hedanno!

Qullaawu Maxaafi sheshifachishannonke

• “Kaaliiqi [“Yihowa,” NW] ille darga baala laꞌanno; danchano bushano affanno.”—LAWISHSHA 15:3.

• “Kaaliiqi ille keeraano towaattanno; maccasino raarensa macciishshitanno.”—FAARSO 34:15.

• “Qarraꞌya afootto; shettoꞌyano laoottona, bagamannokki baxillikkinni tashshi yaannoe.”—FAARSO 31:7.

“YIHOWA BAXANNOEHA DILAWANNOE”

Maganu ninke daafira hedannotanna baxannonketa afanke kaaꞌlitannonkeri no? Ee no. Ingilizete gobbara ilantinoti Haannac tenne daafira xawissanni togo yitino:

“Duucha hige ‘Yihowa dibaxannoe, hattono huuccattoꞌya dimacciishshanno’ yee hedoomma. Kuni ikkinohu ammana ajjinoe daafiraati yee hedoomma. Tidhoommata ikkoommakki daafira isi qorichishanni nooehanna tuge agurinoeha lawinoe. Maganu ane daafira hedannoha dilawinoe.”

Ikkollana Haanna xa Yihowa baxannosetanna ise daafira hedannota buuxxino. Ise hedose biddi assidhanno gede kaaꞌlinoseri maati? Ise togo yitino: “Hedoꞌya biddi yitinohu galte hossanniiti. Lowo diri albaanni Yesuusite wodote kakkalo daafira shiqqinoti Qullaawu Maxaafi lallawo Yihowa baxannoeta buuxissinoe. Huuccattoꞌyara dawaro afiꞌreemma woyite, Yihowa baxannoeti leeltannoe daafira, hindiiddo qalxitannoe. Qoleno Qullaawa Maxaafa xiinxallaꞌyanna Kiristaanu gambooshshe haꞌraꞌya Yihowa daafira, akattasirenna ninkera noosi lao daafira roseemma gede kaaꞌlitinoe. Xa Yihowa ledonke nootanna ninke baalanka baxannonketa, hattono mitto mittonka towaatannonketa dihuluullameemma.”

Haanna coyidhinori jawaachishannoreeti. Ikkollana Maganoho qarrikki leellannositanna hawannohekkita buuxa dandaattohu hiittoonniiti? Aananno birxichira tenne xaꞌmo xiinxallineemmo.