Haaro Soqqanshote Qoosso Rosa Dandiineemmohu Hiittoonniiti?

1-3. Mite woꞌma yanna soqqamaanora haaro soqqanshote qoosso uyinoonninsahu mayira ikkara dandaanno?

ROOBERTINNA Meeri Joo togo yiino: “Misiyoone ikkine 21 diro hagiirrunni soqqammummo gedensaanni, lamunku anniranna amara towaanyo hasiissinonsa. Maatenke towaaxxankenni tashshi yiinonke. Ikkirono, lowo geeshsha banxeemmo qooxeessa agurre haꞌrankenni baasa dadillinoommo.”

² Wiiliyaaminna Teeri togo yiino: “Fayyimmate qarrinni kainohunni soqqanshonke agurreemmota anfummoti wiꞌlinoommo. Xaate wole gobba haꞌne Yihowara soqqama didandiineemmo.”

³ Alekiseyi togo yiino: “Gibbannonkeri sinu biironke cufa hasidhannota anfoommo. Biironke cunfeenna Beeteeletenni fulle haꞌnummo yannara kayinni roore dadillinoommo.”

4. Konni birxichira hiikkuri xaꞌmuwa xiinxallineemmo?

⁴ Aleenni kulli roduuwano agurranna, lowo kume ikkitannori Beeteelete soqqantanno roduuwirano ikko wole woꞌma yanna soqqamaanora haaro soqqanshote qoosso uyinoonninsa.b Kuri ammanantino roduuwira, baxxanno soqqanshonsa agura qarra ikkitinonsaha ikkara dandaanno. Ikkina insa haaro soqqanshonsa rosate mayi kaaꞌlannonsa? Ninke insa kaaꞌla dandiineemmohu hiittoonniiti? Kuri xaꞌmuwara dawaro afiꞌranke, ninke baalunku heeshshonke gari soorramanno woyite tenne dandee heeꞌrate kaaꞌlitannonke.

HAARO SOQQANSHONKE ROSA DANDIINEEMMOHU HIITTOONNIITI?

5. Wole soqqanshote qoosso uyinanninke woyite ma ikkinammora dandiineemmo?

⁵ Soqqammeemmohu Beeteeleteno ikko qanchoho, soqqammeemmowa heeꞌranno manna, wole agurina heeꞌneemmo qooxeessa nafa lowo geeshsha banxammora dandiineemmo. Konnira, tenne soqqanshonke agurreemmo gede assannori iillannonke woyite, baasa dadillineemmo. Ledonke soqqantanno roduuwi qalli assitannonke; roorenkanni soqqanshonke agurre haꞌnoommohu dartunni kainohunni ikkiro insara yaandammora dandiineemmo. (Mat. 10:23; 2 Qor. 11:28, 29) Qoleno, wolewa sonkanninke woyite wole agurina uminke gobba nafa wirro haꞌneemmo woyite hatte gobba bude rosa qarrissankera dandiitanno. Roobertinna Meeri Joo togo yiino: “Uminke budeno ikko qaalinkenni sabbaka hamboommo. Gobbankera heeꞌne wole gobbare ikkinoommoha lawinonke.” Haaro soqqanshote qoosso uyinoonninsaha mito roduuwa miinju qarri amadansara dandaanno. Insa kadde amaddannori baꞌꞌansara, yaaddaranna hexxo mudhitara dandiitanno. Ikkina insa kaaꞌlannonsari maati?

6. Yihowawa shiqqi yine heeꞌra dandiineemmohu hiittoonniiti?

⁶ Yihowawa shiqqi yite heeꞌri. (Yai. 4:8) Hatto assa dandiineemmohu hiittoonniiti? ‘Huuccatto macciishshanno’ magano addaxxatenniiti. (Far. 65:2) Faarso 62:8 “Qarraꞌne baala isira hasaaphe” yitanno. Yihowa “hendeemmohunni aleenni quwa sayise assara dandaanno.” (Efe. 3:20) Isi huucciꞌnoommokkireno aankera dandaanno. Yihowa qarranke, ninke horonta hendoommokki garinni tirara dandaanno.

7. (a) Yihowawa shiqqi yee heeꞌrate mayi kaaꞌlannonke? (b) Ibiraawoota 6:10-12 kultanno garinni, woꞌmante yannara Yihowara ammanamme soqqamanke mayi guma abbitanno?

⁷ Yihowawa shiqqi yee heeꞌrate, Qullaawa Borro barru baala nabbawanna hiinca hasiissannonke. Mittu alba misiyoone ikke soqqamino rodii togo yiino: “Albi soqqanshoꞌne yannara assitinanninte gede, maatete magansiꞌra assiꞌratenna gambooshsheho qixxaawate yanna gaaꞌme.” Qoleno, haaro songoꞌne giddo dancha duduwo diinaggaabbine dudubbe. Yihowa albi geeshsha soqqama hoogguro nafa, isira woꞌmate yannara ammanante soqqantannore dihawanno.—Ibiraawoota 6:10-12 nabbawi.

8. Umi Yohaannisi 2:15-17 noo hedo, heeshshonke bikkunnita assiꞌrate kaaꞌlitannonkehu hiittoonniiti?

⁸ Bikku heeshsho heedhe. Sheexaanu alame abbitanno yaaddo ayyaanaamittete loosoꞌne “qalxitara” wodhitinoonte. (Mat. 13:22) Tini alameno ikko kiꞌnera heddanno jaallaꞌne woy fiixiꞌne Sheexaanu alame giddo jiro duuꞌnitinanni gede xixxiibbannoꞌne woyite tennera qeelantinoonte. (1 Yohaannisi 2:15-17 nabbawi.) Hatteentenni, ayyaanaamitteteno ikko maalaamittete hasattonke wonshate qaale einoha Yihowa addaxxe.—Ibi. 4:16; 13:5, 6.

9. Lawishsha 22:3, 7 kultanno garinni, hasiisannokki asali giddora eꞌneemmokki gede qoropha hasiissannonkehu mayiraati? Dancha doorsha doodhate mayi kaaꞌlannonke?

⁹ Hasiisannokki asali giddora eꞌinoonte. (Lawishsha 22:3, 7 nabbawi.) Bayichunni bayicho haꞌneemmo woyite, lowo woxi fulankera dandaanno; konnira hendummokki asale eꞌneemmoha ikkara dandaanno. Asalu amadannoꞌnekki gede, hakkeeshshi geeshsha hasiisannoꞌnekkire hidhate woxe liqiidhinoonte. Maatenke miilla dhiwansiisiꞌneemmo woyite, woy wolu yaachishanno coyi iillannonke yannara, mageeshshi woxe liqiiꞌra hasiissannonkero afa hoongammora dandiineemmo. Togoo yannara, ‘huuccatto’ assiꞌranke, dancha doorsha doodhate kaaꞌlitannonketa deꞌinoonte. Yihowa ‘wodanankenna hedonke agarannoha’ giddiidi keere oye huuccattonkera dawaro qolanno; kuni keeri wodanaaꞌmine hendeemmo gede kaaꞌlannonke.—Fil. 4:6, 7; 1 Phe. 5:7.

10. Jaalooma kalaqiꞌra dandiitinannihu hiittoonniiti?

¹⁰ Dancha jaalla kalaqidhe. Hedoꞌnenna tuncu yiinoꞌne coye muli jaallaꞌnera roorenkanni kiꞌnera iillinoꞌne gedee coyi iillinonsarira hasaaphaꞌne kaaꞌlitannoꞌne. Tini yaaddoꞌnenni beya afidhinanni gede assitara dandiitanno. (Ros. 4:9, 10) Albi soqqanshoꞌne yannara kalaqidhinoonni jaalla xaano jaallaꞌneeti. Wolewa sonkanniꞌne woyite kayinni, haaro jaalla kalaqiꞌra hasiissannoꞌne. Jaalla afiꞌrate kiꞌne umiꞌne wolootaho dancha jaalla ikka hasiissannoꞌneta habbinoonte. Haaro jaalla kalaqiꞌra dandiitinannihu hiittoonniiti? Yihowara soqqantinanni afidhinoonni woꞌnaalsha kultine, wolootu hagiirreꞌne affanno gede asse. Mitu songoꞌne miilla woꞌma yanna soqqansho mageeshshi geeshsha baxxinanniro huwata hoogguro nafa, wolootu kiꞌne lawishsha harunsitaranna jaallaꞌne ikkitara dandiitanno. Ikkollana, Yihowa soqqanshora assitinoonnire kula batissinoonte; hattono yaachishinoꞌne coye calla illachishshinoonte.

11. Maateꞌne giddo noo hagiirri baikkinni heeꞌra dandiitinannihu hiittoonniiti?

¹¹ Soqqanshokki aguroottohu galtekki dhiwantinohura ikkiro, ise bushiishshooti. Wole widoonni kayinni fayyimmate qarri amadinohehu ate ikkiro, galteꞌyara guficho ikkoommo yite ateneeto bushiishshooti. “Mitto biso” ikkitinoonnitanna aye geeshshi coyi iilliꞌnerono mimmito towaatate Yihowa albaanni qaale eꞌinoonnita deꞌinoonte. (Mat. 19:5, 6) Soqqanshokki aguroottohu hedeweelcho minaamakkira godowu gateennase ikkiro, qaaqqiꞌne albi soqqanshoꞌnenni roore iso baxxinannisita huwatanno gede asse. Qoleno, Maganu uyinoꞌne “elto” gede assitine laꞌinannisita kullesi. (Far. 127:3-5) Hattono albi soqqanshoꞌne yannara afidhinoonniha hagiirsiisanno woꞌnaalsha kullesi. Tenne assaꞌne, qaaqqiꞌne kiꞌnente gede woꞌma yannasinni Yihowara soqqamanno gede kakkayissasira dandiitanno.

WOLOOTU KAAꞌLA DANDIITANNOHU HIITTOONNIITI?

12. (a) Woꞌma yanna soqqamaano soqqanshonsa agurtannokki gede kaaꞌla dandiineemmohu hiittoonniiti? (b) Insa haaro qooxeessa rossanno gede kaaꞌla dandiineemmohu hiittoonniiti?

¹² Batinye songonna roduuwi, woꞌma yanna soqqamaano soqqanshonsa agurtannokki gede dandiitu deerrinni kaaꞌlitannonsa; tini hagiirsiissannote. Togo assitannohu, insa soqqanshonsa agurtannokki gede jawaachishatenni, woxe woy wole hasiisannonsaha maalaamittete coye aatenni, hattono soqqantannohu xeertowa ikkiro kayinni maatensa kaaꞌlatenniiti. (Gal. 6:2) Alba woꞌma yanna soqqansho soqqantanno roduuwi songoꞌne sonkeenna dagguro, kiꞌne songo dagginohu soꞌro loosse woy seejjineennansaati yitine heddinoonte.c Hatteentenni haaro qooxeessa rossanno gede kaaꞌlensa. Anga fantine haadhensa, hattono fayyimmate qarrinni kainohunni albi geeshsha soqqama dandiitannokkiha ikkiro nafa, konni albaanni assitinorira galattensa. Insa ledo egennamate woꞌnaalle. Afidhino egennonni, qajeelshinni hattono woꞌnaalshinni rosate sharramme.

13. Haaro soqqanshote qoosso uyinoonninsare kaaꞌla dandiineemmohu hiittoonniiti?

¹³ Haaru qooxeessira soqqantanno gede sonkoonni roduuwi heedhanno mine, hodhishsha, loosonna wole hasiisannonsa coye afiꞌrate kiꞌne kaaꞌlo hasiissannonsaha ikkara dandaanno. Qoleno giwire baata woy wole hajo lainohunni haaro mashalaqqe hasiissannonsaha ikkara dandaanno. Insa roore hasidhannohu noo gara huwattinansaraati. Insa uminsa woy maatensa miilla dhiwantinoha ikkara dandiitanno. Woy shiidhe manchittinoha ikkara dandaanno.d Qoleno, mannaho hasaapha hooggurono, albi soqqanshonsa yannara kalaqidhino jaalla qalli assitinonsaha ikkara dandaanno. Togoo xisso qeelate lowo yanna hasiissanno.

14. Mitte rodoo haaro qooxeessa rossanno gede songose halashshaano kaaꞌlitinosehu hiittoonniiti?

¹⁴ Kiꞌne kaaꞌlonna danchu lawishshiꞌne haaro soqqanshonsa rosate kaaꞌlannonsa. Mitte wole gobbara lowo diro soqqantino rodoo togo yitino: “Albi soqqanshoꞌya yannara barru baala haammata manna Qullaawa Maxaafa xiinxalliseemma. Xa soqqameemma qoqqowira kayinni Qullaawa Maxaafa fane nabbawa woy viidiyo leellisha nafa qarraho. Songoꞌyara noo halashshaano manna galagalte marte hasaawissanno woyitenna Qullaawa Maxaafa xiinxallissanno woyite koyissannoe. Kuri worbuullu roduuwira, ayyaanaamittetenni lophitanni nooti Qullaawu Maxaafi rosaano noonsata afaꞌya hexxo mudheemmakki gede kaaꞌlitinoe. Haaru qooxeessira mannu ledo hasaawa hanafa dandiinanni gara rosoomma. Tini wirro hagiirraame ikkeemma gede kaaꞌlitinoe.”

DANDIITINANNIRE BAALA ASSA AGURTINOONTE

15. Haaro soqqanshshoꞌnenni dancha guma afiꞌra dandiitinannihu hiittoonniiti?

¹⁵ Haaro soqqanshshoꞌnenni hagiirraamma ikka dandiitinanni. ‘Haaro qoosso uyinoonniehu albi soqqanshoꞌyanni seekke soqqama hoogoommohuraati woy kaaꞌleemmori nookkihuraati’ yite heddooti. Yihowa assinohere hedi; hattono sabbaka agurtooti. Umi xibbi diri Kiristaani lawishsha harunsi. Insa “hadhuwa baala Maganu qaale [kultino].” (Soq. 8:1, 4) Kiꞌneno sabbaka agura hoogginiro dancha guma afidhinara dandiitinanni. Hanni mitto lawishsha laꞌno; mitte gobbara suwisaano heedhanno gobbanni fultanno gede kullinsata mule noo gobba hadhino; hakkiicho insa coyidhanno qaale coyiꞌrannohu hasatto noonsa manninni xaaddino. Boodu agani giddo hakkiicho duucha gaamo xintantino.

16. Haaro soqqanshshoꞌnenni hagiirraamma ikka dandiitinannihu hiittoonniiti?

¹⁶ Yihowa “hagiirri wolqaꞌneeti.” (Neh. 8:10) Soqqanshonke lowo geeshsha banxeemmoha ikkiro nafa, roore hagiirsiisannonkehu Yihowa ledo noonke jaaloomaati ikkinnina soqqanshote qoossonke diꞌꞌikkitino. Konnira, Yihowa ledo nooꞌne jaaloomi baꞌꞌannokki gede agadhe; hattono hayyo, biddishshanna kaaꞌlo afiꞌrate iso addaxxe. Albi soqqanshoꞌne baxxinoonnihu, hakko heeꞌranno manna kaaꞌlate sharrantinoonni daafiraati. Haaro soqqanshoꞌneno woꞌma giddonni soqqamate sharramme; hatto assitiniro, Yihowa tenne soqqanshoꞌne baxxinanni gede kaaꞌlannoꞌne.—Ros. 7:10.

17. Xaa noonkete soqqanshote qoosso daafira maa qaaga hasiissannonke?

¹⁷ Yihowara soqqammeemmohu hegerera ikkinota, hattono xa noonketi soqqanshote qoosso hegerera heedhannokkita qaaga hasiissannonke. Haaro alamera, ninke baalunkura xa noonkehunni baxxino looso uyinankera dandiinanni. Konni birxichi hanafora kullihu Alekiseyi xaa iillinosi coyi haaro alamera qixxaawanno gede kaaꞌlanni noosita coyiꞌrino. Isi togo yiino: “Yihowa nooha ikkinotanna haaro alame daase gattannokkita huluullame diegennoommo; Yihowa albaꞌyaanni noohu gede ikke leellinoehunna haaro alame dagge furduggi yitara noota seekke huwatoommohu kayinni xaati.” (Soq. 2:25) Soqqammeemmohu ikkiwano ikkiro, woꞌmante yannara Yihowa ledo qaanfo. Isi horo tuge diagurannonke; hatteentenni soqqanshonke ikkitutano ikkituro wolqanke assitu geeshsha isira soqqamatenni hagiirraamma ikkineemmo gede kaaꞌlannonke.—Isa. 41:13.