Tiiakki Agadhi

1. Lamu kumi tonaa sasu soqqanshote dirihu baxxino gambooshshi cuꞌmo mayitannote? Tenne pirogiraame qixxeessinoonnihu mayiraati?

¹ Tiiꞌꞌinke yaannonkere agurre wolere assineemmo gede xixxiiwanno coyi barru tuqa tuncu yaannonke. Wocawaaro 1, 2012⁠nni jammarannohura 2013 soqqanshote dirihu baxxino gambooshshira, “Tiiakki Agadhi” yitanno cuꞌmo doorroonnihu iseraati. (1 Xim. 1:19) Tenne pirogiraame qixxeessinoonnihu, mitti mittinke Kalaqaanchinke uyinonketa tenne dhaggete elto ma garinni horoonsiꞌnanni heeꞌnoommoro hixamanyine assaambeemmo gede kaaꞌlateeti.

2. Gambooshshu yannara hiittee qara xaꞌmuwara dawaro qollanni?

² Kuri Naxibba Wodanche: Konni gambooshshi yannara tiia lainohunni lamala qara xaꞌmora dawaro qollanni:

• Tiiꞌꞌinkera adaga abbitanno coyibba hiikkuriiti?

• Tiianke qajeelsiꞌra dandiineemmohu hiittoonniiti?

• Mannu baalunku mundeenni keeraawa dandiineemmohu ma assinummorooti?

• Qullaawu Maxaafihu xintu seeri garinni assaawankenna heeꞌranke maa leellishshanno?

• Wolu manni tiia madiissatewiinni xeertiꞌra dandiineemmohu hiittoonniiti?

• Wedella, bunshete widira xixxiimbanniꞌneta qeela dandiitinannihu hiittoonniiti?

• Qullaawu ayyaaninni marraꞌꞌamanno tiia harunsanno manni mayi atoote afiꞌranno?

3. Baxxino gambooshshi kaaꞌlannonkehu hiittoonniiti?

³ Sheexaanu tiianke xursiisate sharramanno sharro Yihowa kaaꞌlonni qeela dandiineemmo. Baxannonkehu iimi Anninke Qaalisinna dirijjitesi widoonni qole, “Doogo tenneeti. Ise aana haꞌri” yaanni noonke. (Isa. 30:21) Yihowa marraꞌꞌanni noonke doogga giddo mittu konne gambooshsheeti. Konni daafira, konne gambooshshe gudissine beeqqa dandiitinanni gede qixxaabbe. Hixamanyitine macciishshe, hattono rossinanni roso gilletenni loosu aana hosiisa dandiitinanni gara assaabbe. Rossinoonni rosire maateꞌne ledo hasaabbe. Ronseemmo roso loosu aana hosiisanke, ayewoteno “danchu tiiꞌꞌi heeꞌrannonke” gede jawaante uyitannonke; qoleno geedannokkihu Sheexaanu alame hagiirri dogeennanke doogotenni agurre fulleemmokki gede kaaꞌlitannonke.—1 Phe. 3:16.