Surrekki Agadhi

1. Lamu kuminna tonaa sasu soqqanshote dirihu woradu gambooshshi cuꞌmo mayitannote? Konne gambooshshe qixxeessinoonnihu mayiraati?

¹ Yesuusi rosaanosi Yihowa woꞌmu wodaninsanni, woꞌma lubbonsanninna woꞌma surrensanni baxxanno gede rosiisino. (Maat. 22:37, 38) Tayixehu awuraajju, woradunna baxxino gambooshshi giddiidi mannimmanke jawaachishiꞌrate kaaꞌlankera hende qixxeessinoonniho. Awuraajju gambooshshinke cuꞌmo “Wodanakki Agadhi!” yitannota ikkitinota qaagginikki digattinoonni. Qoleno 2013 soqqanshote dirihu baxxino gambooshshi cuꞌmo, “Tiiakki Agadhi” yitannote. Daanno aganira jammarannohu woradu gambooshshi qole, Maatewoosi 22:37 aana xintantinota “Surrekki Agadhi” yitanno cuꞌmo afiꞌrino. Konne gambooshshe qixxeessinoonnihu, mitti mittinke assaambeemmo gara seekkine layiꞌne albinni roore Yihowa hagiirsiisanno garinni assaambeemmo gede kaaꞌlateeti.

2. Gambooshshu yannara hiitte xaꞌmuwara dawaro afiꞌrate woꞌnaala hasiissannonke?

² Maa Maa Ronseemmo? Woradu gambooshshi pirogiraame macciishshineemmo wote, qara qara assaawe xaphi assite amaddinote aante noo xaꞌmuwara dawaro afiꞌrate woꞌnaallo:

• ‘Mannu assaawe’ assaawatenni xeertiꞌra dandiineemmohu hiittoonniiti?

• Ammaninokki manni surre beeshshe amadino hocco mulqine hoola dandiineemmohu hiittoonniiti?

• Heedhankera hasiꞌneemmoti hiittoo hedooti?

• Gara ikkino coye hiinca mayi kaaꞌlo afidhino?

• Yihowa assaambeemmo gara biddi assannonke gede assiꞌra dandiineemmohu hiittoonniiti?

• Minaanni, minaama, annunna ama, hattono ooso maate hagiirraame ikkitanno gede kaaꞌla dandiitannohu hiittoonniiti?

• Yihowa barrira qixxaawa dandiineemmohu hiittoonniiti?

• Surrenke loosoho qixxeessiꞌrate yaa mayyaate?

• Rosino coye loosu aana hosiisanno manni mayi atoote afiꞌranno?

3. Gambooshshe lamenka barra haꞌra, hixamanyine macciishshanna ronseemmore loosu aana hosiisa hasiissannonkehu mayiraati?

³ Sheexaanu surrenke xursiisatenna batteessate lowo geeshsha olamanni no. (2 Qor. 11:3) Konni daafira assaambeemmo coyi Yihowa hagiirsiisannoha ikkanno gede sharrama hasiissannonke. Ayewoteno Kiristoosi assaawanno garinni assaawanna tenne shokkashsho alame hedo gargadha hasiissannonke. (1 Qor. 2:16) Konni daafira woradu gambooshshe lamenka barra haꞌra dandiitinanni gede qixxaabbe. Pirogiraamete yannara hixamanyitine macciishshe. Ronseemmoha lowonta hasiisanno roso loosu aana hosiisanke, Maganu Mangiste soqqanshora surrenke qixxeessiꞌrate kaaꞌlitannonke.—1 Phe. 1:13.