Maganu Qaali Rosiisate Kaaꞌlanno

1. Lamu kuminna tonaa shoolu soqqanshote dirihu woradu gambooshshi cuꞌmo mayitannote? Konni gambooshshi yannara hiittee xaꞌmora dawaro qollanni?

¹ Kalqete alame giddo rosiisate ‘Bayira Rosiisaanchonke’ Yihowa ikkannohu dino. (Isa. 30:20, 21) Ikkina, Yihowa rosiisannonkehu hiittoonniiti? Isi wole maxaaffa baalantenni roorannoha, ayyaanisinni borreessamino Qaalesi Qullaawa Maxaafa uyinonke. Maganittete rosi ordinkera, surrenkera, simmeetenkera, hattono ayyaanaamittenkera kaaꞌlannonkehu ma garinniiti? Tenne xaꞌmora dawaro 2014 soqqanshote dirihu woradu gambooshshi yannara qollanni. “Maganu Qaali Rosiisate Kaaꞌlanno” yitannoti konni gambooshshi cuꞌmo xintantinohu 2 Ximootewosi 3:16 aanaati.

2. Gambooshshunniti qara qara assaawe xabbe leeltanno gede assitannoti hiikkuri xaꞌmuwara qollanni dawarooti?

² Qara Qara Assaawe Wodanchate Woꞌnaalle: Aante noo xaꞌmuwara qollanni dawaro gambooshshunniti qara qara assaawe xabbe leeltanno gede assitanno.

• Maganittete rosi heeshshonkera mayi kaaꞌlo aanno? (Isa. 48:17, 18)

• Woꞌma yanna Yihowara soqqamate yine heeshshonke giddo mito coye biddi assiꞌneemmoha ikkiro, isi ma assannonketa dihuluullammeemmo? (Mil. 3:10)

• “Wosinchu rosi” tuncu yaannonke wote ma assa hasiissannonke? (Ibi. 13:9)

• Yesuusi ‘rosiisino garinni’ rosiisa dandiineemmohu hiittoonniiti? (Mat. 7:28, 29)

• Songote giddo rosiissannori umonsa rosiisa hasiissannonsahu mayiraati? (Rom. 2:21)

• Maganu Qaali maaho kaaꞌlanno? (2 Xim. 3:16)

• Dagate “heembeelama” mannu hiikkanno gede assitanni no? (Hag. 2:6, 7)

• Yihowa ninke ma assa dandiineemmota ammaꞌnanno? (Efe. 5:1)

• Yihowa rosinni kaajjine heeꞌrate sharrama hasiissannonkehu mayiraati? (Luq. 13:24)

3. Yannankera hende qixxeessinoonniha konne gambooshshe haꞌratenna seekke macciishshate murciꞌne kaꞌꞌa hasiissannonkehu mayiraati?

³ Phaawuloosi 2 Ximootewosi fooliishsho 3⁠te hanafora, yaano konni gambooshshi cuꞌmo haaꞌnoonni xiqise borreessara albaanni, dandee heeꞌrate qarrissannohu goofimarchu barra ikkannore xawisino. Isi togo yee borreessino: “Bushuullunna dogaasine bunshete aana bunshe leddanni, hattono soꞌrisiissanninna sodhanni hadhanno.” (2 Xim. 3:13) Togoo manni soꞌrisiisannonkekki gede Maganittete roso rosanna hakko rosi ledo sumuu yine heeꞌra lowo geeshsha hasiissannonke! Konni daafira yannankera hende qixxeessinoonniha konne gambooshshe haꞌratenna seekke macciishshate murciꞌne kaꞌno.