Manna Coyi Adhamanno Garinni Hasaawisa
1. Hundi Kiristaani babbaxxino garinni sabbakansa maa rosiissannonke?
1 Hundi Kiristaani dancha duduwo babbaxxino budenna ammaꞌno afiꞌrino mannira sabbakino. (Qol. 1:23) Sabbakino sokka mittete, yaano Maganu Mangisteeti; ikkollana mannaho adhamanno gede asse babbaxxino garinni hasaawisino. Lawishshaho, Pheexiroosi Qullaawa Borro lowo geeshsha ayirrissannorira Yihudu mannira sabbaki wote, masaalaanchu Iyyueeli giddonni qummi assino. (Soq. Los. 2:14-17) Wole widoonni kayinni, Phaawuloosi Soqqamaanote Looso 17:22-31 aana kulloonninte gede Girikete manna hasaawisino gara huwatte. Yannankerano, mannu mite killilera Qullaawa Borro ayirrisanno; hattoo basera minunni mine haꞌne sabbankeemmo wote Qullaawa Maxaafa fanne rosiisa dandiineemmo. Ikkollana, Qullaawu Maxaafira woyi ammaꞌnote hasatto noonsakkirira woyi Kiristaanunnita ikkitukki wole ammaꞌno afiꞌrino mannira sabbankeemmo wote hayyoolle ikka hasiissannonke.
2. Qullaawa Maxaafa ayirrissannore ikko ayirrissannokkire kaaꞌlate borronke horoonsiꞌra dandiineemmohu hiittoonniiti?
2 Borro Danchu Garinni Elle: Heeꞌnoommohu soqqanshote dirira ellanni borro lamu lamu aganinni soorrantanno, roorenka elleemmoti metseettate, tiraaktuwatenna birosherubbate. Killilenkera heeꞌrannohu rooru manni Qullaawu Maxaafire afa hasiꞌrannokkiha ikkiro nafa, huluullisannonsare kayinse hasaawisa dandiineemmo. Togoo manna umo coyishiinsheemmo wote Qullaawa Maxaafa fanne xiqise nabbawano ikko afuunni qummi assa hoongummorono, wirro marre hasaawinseemmo wote hasatto noonsaha ikkiro, Kalaqaanchonna ayyaanisinni borreessinoonni Qaalesi ammananno gede kaaꞌlineemmo yine hajamme haꞌra hasiissannonke. Sabbankeemmo manni Qullaawa Maxaafa ayirrisannoha ikkiro kayinni, mannaho adhamanno gede assine hasaawinse borro ela dandiineemmo. Aganu Qullaawu Maxaafi Roso yinanni maxaafa woyi Maganu Yaannore Macciishshi woyi Maganu Yaannore Macciishshite Hegerera Heeꞌri yinanni birosherubba ellanniha ikka hoogiro nafa, kuriuu borruwa hasiꞌnummo wote ela dandiineemmo. Qaru coyi, manna coyi adhamanno garinni hasaawisate.
3. Killilenkera noo manni wodani bushshu gedeeti yineemmohu mayiraati?
3 Bushsha Qixxeesse: Mannu wodani bushshu gedeeti. (Luq. 8:15) Qullaawu Maxaafi halaali gumi rumuxxe lophanno gede, mito mito bushsha yaano mitu manni wodana, roorenka seekkine qixxeessa hasiissanno. Umi xibbi diri sawaakooti duuchunku dani bushshira danchu garinni wixxino; tini qolte hagiidhitanno gede assitinonsa. (Soq. Los. 13:48, 52) Ninkeno manna coyi adhamanno garinni hasaawisate sharrammummoro hagiirraamma ikka dandiineemmo.